3 Пачаби 4
4
Сулейман пачаясул хъулухъчагӀи ва сардарал
1Сулейман пача тӀолабго ГӀизраилалда тӀад пачалъун вукӀана. 2Гьале гьесул бетӀерал хъулухъчагӀи:
кашиш Цадокил вас ГӀазариягь;
3Шишил васал Элихореп ва АхӀиягь – хъвадарухъаби;
АхӀилудил вас Егьошафат – тарихчи;
4ЕгьоядагӀил вас Бенаягь – аскаралъул бетӀер;
Цадок ва Авиатар – кашишал;
5Натанил вас ГӀазариягь – сардаразул бетӀер;
Натанил вас Завуд – кашиш ва пачаясул цевесев гӀакълучи;
6Ахишар – хъалаялъул бетӀерав тадбирчи;
ГӀабидил вас Адонирам – лагъзадерил тадбирчи.
7Жеги Сулейманил анцӀила кӀиго сардарги вукӀана. Гьез чӀезабулаан пачаясе ва пачаясул кӀалгӀаялъе квен-тӀех. Гьезул жив-живас лъагӀалидаса лъагӀалиде цо моцӀалъе гӀураб квен-тӀех чӀезабизе кколаан. 8Гьале гьезул цӀарал:
Бен-Гьур – Ефраимил мугӀрузул тӀалъиялда тӀад;
9Бен-Декер – Макацалда, Шаалвималда, Бет-Шемешалда ва Элон Бет-Хананалда тӀад;
10Бен-Хесед – Аруботалда тӀад (Гьесухъ рукӀана Сохоги Хетералъул тӀолабго ракьги);
11Бен-Авинадав – Доралъул борхалъабазда тӀад (Сулейманил яс Тапат йикӀана гьесул лъади);
12АхӀилудил вас Ваанав – ТагӀанахалда ва Мегиддоялда, гьединго ТӀолабго Цартаналда аскӀоб Изреелалдасаги гӀодобегӀан бугеб Бет-Шеаналда сверухъ ракьалда ва Бет-Шеаналдаса Авел-Мехолаялде щвезегӀан, гьединго Йокмоам тун дорехун ругел бакӀазда тӀадги.
13Бен-Гевер – ГилгӀадалъул Рамоталда тӀад (Гьесухъ рукӀана ГилгӀадалда ругел, Манассил вас Яирил росаби. Гьесухъ букӀана Арговалъул ракь-мухъги, лъабкъого кӀудиял, сверун къарал, мазгаралъул хӀос кавабазда нахъа ралел шагьаралги);
14ГӀидол вас АхӀинадав – Маханаималда тӀад;
15АхӀимаац – Нафталил ракьалда тӀад (гьес ячана Сулейманил яс Басемат);
16Хушайил вас БагӀан – Ашерил ракьалдаги БегӀалоталдаги тӀад;
17ТарухӀил вас Егьошафат Иссахарил ракьалда тӀад;
18Элавил вас ШимгӀи – Буняминил ракьалда тӀад;
19Урил вас Гевер – ГилгӀадалъул ракьалда тӀад (амориязул пача Сихонил ва Башаналъул пача Огил ракьазда тӀад). Гьелгощинал ракьазда тӀад сардарлъун вукӀана гьев.
Сулейманил пачалъиялъул кӀодолъи
20Ралъдал салигӀанги кутакалда гӀемераб халкъ букӀана Ягьудиялъул ва ГӀизраилалъул; гьел квана-гьекъей гьарзаяб, аваданаб гӀумруялде руссана. 21Сулейманил кверщалида гъоркь рукӀана Ефрат гӀурухъа бахъараб пилистимазул ракьалде ва Мисриялъул гӀорхъиде щвезегӀан киналго пачаби. Гьезул халкъаз Сулеймание кидаго магъало кьолаан ва гьесие ккараб хъулухъ гьабулаан.
22Жиб-жиб къоялъ Сулейманил кӀалгӀаялде бачӀунаан лъеберго кор#4:22 30 кор – гӀага-шагарго 7,2 тонна. тӀаса бищараб ролъул, лъабкъого кор#4:22 60 кор – гӀага-шагарго 14,4 тонна. гъурараб ролъул, 23ва ритӀучӀал, жайранал, багӀнасал, хьихьарал хӀанчӀи рикӀкӀинчӀого, анцӀго жаниб тун хьихьараб баси, къого рехъалъа бачараб баси ва нусго гӀиялъажо.
24Гьесул ихтияралда гъоркь рукӀана Ефрат гӀурул бакътӀерхьул рахъалдехун ругел ва ТипсахӀалдаса Газаялде щвезегӀан ругелги тӀолалго пачаби – киналго сверухъ ругел улкабазулгун рекъел букӀана Сулейманил. 25Сулейманил заманалда, Даналдаса бахъараб Беэр-Шеваялде щвезегӀан, Ягьудиялъулги ГӀизраилалъулги халкъазул парахатаб гӀумру букӀана – жиб-жиб хъизан-къаялъул жиндирго цӀолбол гъабу ва инжиралъул гъутӀби рукӀана#4:25 НекӀсияб КъотӀиялда рекъон, цӀолбол гъабу ва инжиралъул гъутӀби рикӀкӀуна баракатаб, гӀатӀидаб ва хӀинкъи гьечӀеб гӀумруялъул гӀаламатлъун..
26Ункъазарго руссун чолгьаказда ралел чуязул букӀана Сулейманил ва анцӀила кӀиазарго рекӀунел чуялги рукӀана гьесул.
27Сардараз, жив-живас жиндиего бихьизабураб моцӀалъ, Сулеймание ва киналго гьесул кӀалгӀаялда квана-гьекъолелщиназе, щибго камизе биччачӀого, квен-тӀех чӀезабулаан. 28Гьединго, жиндие бихьизабураб бакӀалде, киналго чуязе гӀураб пурчӀина ва рагӀи-хер щвезабулаан гьез – жив-живас жиндирго къадаралда рекъон.
Сулейманил гӀакъиллъи
29Аллагьас Сулеймание гӀакъиллъи, кутакаб цӀодорлъи ва ралъдал салигӀанги жиб рикӀкӀун я борцун хӀалкӀоларебгӀан къадаралъ гъваридаб гӀакълу-лъайги кьуна. 30Сулейманил гӀакъиллъи тӀолалго Бакъбаккул рахъалъул чагӀазулалдасаги ва тӀолабго Мисриялъул гӀакъиллъиялдасаги бергьараб букӀана. 31Гьев бокьарав чиясдаса, гьединго эзрахияв Этанидасаги, МахӀулил васал Еманидасаги, Халколидасаги, ДардагӀидасаги гӀакъилав вукӀана. Киса-кибего сверухълъиялъулго халкъазда гьоркьоб машгьурлъана гьесул цӀар. 32Гьес лъабазарго хӀикматаб хабар бицана, ва азаралда щуго шигӀру гьабуна. 33Гьес Ливаналъул кедралъул гъутӀбуздаса бахъараб, къададаса къватӀибе бижулеб иссопалде#4:33 Иссоп – ГӀизраилалда бижулеб махӀ гьуинаб хер. гӀунтӀунги, киналъулго лъай босана. Гьединго хӀайваназул, хӀанчӀазул ва ракьалда шурулел жалазул хӀакъалъулъ гӀелмуги лъалаан гьесда.
34Сулейманихъ гӀенеккизе рачӀунаан киналго халкъазул ва пачабазул вакилзаби, гьесул гӀакъиллъиялъул хӀакъалъулъ бицен рагӀарал чагӀи.
Currently Selected:
3 Пачаби 4: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
