3 Пачаби 22

Микаягьица Ахавие БетӀергьанасул хӀукму загьир гьаби

1Сириялдаги ГӀизраилалдаги гьоркьоб лъабго соналъ рекъел букӀана. 2Лъабабилеб соналъ Ягьудиялъул пача Егьошафат ана ГӀизраилалъул пачаясухъе.

3Цинги ГӀизраилалъул пачаяс жиндирго цересел чагӀазда абуна: «Нужеда лъаларищ ГилгӀадалъул Рамот нилъер кколеблъи, нилъецайин абуни гьеб Сириялъул пачаясухъа нахъе бахъине тӀалабго гьабулеб гьечӀо?»

4Егьошафатида кӀалъана гьев: «Мун вилълъинищ дида цадахъ ГилгӀадалъул Рамоталъе гӀоло вагъизе?»

Егьошафатица ГӀизраилалъул пачаясда абуна: «Дуца гьабураб гьабила дица, дир халкъ – дур халкъ, дир чуял – дур чуял». 5Жеги Егьошафатица абуна: «Цин дуца БЕТӀЕРГЬАНАСДА цӀехе гьеб иш».

6ГӀизраилалъул пачаяс аварагзаби данде ахӀана – ункънусгогӀанасев чи – ва гьезда цӀехана: «Ун лъикӀдай дун ГилгӀадалъул Рамоталде тӀаде кӀанцӀизе?» «А, – ян жаваб гьабуна гьез. – БетӀергьанас пачаясухъе кодобе кьезе буго гьеб».

7Амма Егьошафатица цӀехана: «БЕТӀЕРГЬАНАСУЛ амру лъазабизе бажарулев авараг гьечӀищ гьанив тӀокӀав?»

8ГӀизраилалъул пачаяс Егьошафатида абуна: «Вуго цоги чи, БЕТӀЕРГЬАНАСУЛ гӀакълу жиндасан лъазабизе бегьулев, амма дида гьев цӀакъ рихун вуго, щайгурелъул цо лъикӀаб калам бицунаро гьес дир рахъалъ, квешаб гурони. Гьев ккола Имлагьил вас Микаягь», – ин. «Пачаясда рекъон гьечӀо гьедин абизе», – ян кӀалъана Егьошафат.

9Цинги ГӀизраилалъул пачаяс аскаразул бутӀрузул цояв ахӀана ва хехлъи гьабун Имлагьил вас Микаягь вачун вачӀаян лъазабуна.

10Пачалъиялъул ретӀелги тӀад ретӀун ГӀизраилалъул пачаги Ягьудиялъул пача Егьошафатги Самариялъул кавабахъ бугеб жамагӀаталъул майданалда жинди-жиндир тахида гӀодор чӀун рукӀана ва киналго аварагзабаз Аллагьасул рагӀи загьир гьабулеб букӀана гьезда цебе.

11КенагӀанагьил вас Цедекиягьица жиндиего маххул лълъурдул гьаруна ва гьадин абуна: «БЕТӀЕРГЬАНАС абулеб буго: „Гьадин хӀунк-хӀункила дуца сириязда ва тӀуран тӀагӀинарила гьел“».

12ХутӀарал киналго аварагзабазги гьединго бицунеб букӀана: «ГилгӀадалъул Рамоталде тӀаде кӀанцӀизе а ва бергьенлъи босе; БЕТӀЕРГЬАНАС пачаясухъе кодобе кьезе буго гьеб», – ин.

13Микаягьида хадув витӀарав вакилас абуна гьесда: «Мун гӀенекке цо, хутӀаралщинал аварагзабаз пачаясе бергьенлъи букӀине бугилан бицунеб буго. Биччанте дур каламги гьезулалда рекъараб букӀине ва дуца берцинаб рагӀиги бицине».

14Амма Микаягьица абуна: «Дир БЕТӀЕРГЬАНАСУЛ цӀаралхӀа – дида БЕТӀЕРГЬАНАС абураб рагӀи тун батӀияб щибго абиларо дица».

15Гьев вачӀаравго пачаяс гьесда цӀехана: «Микаягь, ун лъикӀдай дун ГилгӀадалъул Рамоталда данде вагъизе?» «Гьайгьай, а дурго, мун бергьинарищха, – ян жаваб кьуна гьес, – ракӀчӀун, БЕТӀЕРГЬАНАС дуда кодобе кьола гьеб».

16Амма пачаяс гьесда абуна: «Чан нухалъ дица мун гьедизе тӀамизе кколев хӀакъаб БЕТӀЕРГЬАНАСУЛ рагӀи тун тӀокӀаб батӀияб жо бицугеян?»

17Цинги Микаягьица жаваб гьабуна: «Дида тӀолабго ГӀизраил, вехь гьечӀеб гӀи гӀадин, мугӀрузда щущан бихьана ва БЕТӀЕРГЬАНАС абуна: „Гьезул хважаин гьечӀо. Виччанте жив-жив чи жинди-жиндир рокъове тӀадвуссине“, – ян».

18ГӀизраилалъул пачаяс Егьошафатида абуна: «Дица абунагури дуда гьес киданиги цо берцинаб рагӀи бицунарин дир рахъалъ, квешаб гуреб?»

19Микаягьица абуна: «ГӀенекке БЕТӀЕРГЬАНАСУЛ рагӀухъ. Дида БЕТӀЕРГЬАН вихьана Жиндирго тахида гӀодов чӀун; Гьесул кваранаб ва квегӀаб рахъалдаги тӀолабго зобалазул боги букӀана бахъун чӀун. 20БЕТӀЕРГЬАНАС цӀехана: „Лъица Ахав рагъде вахъинавилев, ГилгӀадалъул Рамоталда аскӀов гьев гӀажалалъукье ккезе вукӀине?“ – ян. Цояс цо абуна, цогидас цогияб абуна. 21Ахирги цо кинабалиго рухӀ бачӀана цебе; БЕТӀЕРГЬАНАСДА цебе бахъунги чӀун гьелъ абуна: „Дица гуккила гьев“, – ин. „Кин?“ – ин цӀехана БЕТӀЕРГЬАНАС. 22„Инеги ун дун лъугьина гьерсил рухӀлъун гьесул киналго аварагзабазул кӀалдиб“, – ин абуна гьелъ. „ЛъикӀ буго, духъа гьев рагъде вахъинавун бажаризе буго, – ян абуна БетӀергьанас. – А дурго ва гьедин гьабе“. 23Гьале гьанже БЕТӀЕРГЬАНАС гьал киналго аварагзабазул мацӀалда лъуна гьерсил рухӀ, дуейин абуни, БЕТӀЕРГЬАНАС балагь хъвана».

24Гьебмехалъ КенагӀанагьил вас Цедекиягьица аскӀовеги вачӀун Микаягьил гьурмалъ хъат щвезабуна. «Аб киндай дуда кӀалъазе гӀоло БЕТӀЕРГЬАНАСУЛ РухӀ дунги тун дуде рещтӀараб?» – ин цӀехана гьес.

25Микаягьица жаваб гьабуна: «Дуда эб лъала мун нахъарокъове лъутун, гьенив кьеризе ккараб къоялъ». 26Цинги ГӀизраилалъул пачаяс буюрухъ кьуна: «Микаягь вачун шагьаралъул бетӀер Амонихъе ва пачаясул вас#22:26 Гьаб пачаясул вас абураб рагӀул батӀияб магӀнаги батизе бегьула: пачаясул цӀакъго божарал цересел хъулухъчагӀаздаги гьедин абулеб гӀадат букӀана. Ёашихъе щвезаве, 27ва гьезда абе: „Гьав чи туснахъалъув тӀаме ва бакъвараб чедги лъимги гурони кваназе жоги кьечӀого, вакъун чӀезаве, дун сах-саламатго тӀадвуссинегӀан“, – ин».

28Микаягьица абуна: «Дица бицараб рагӀи БЕТӀЕРГЬАНАСУЛ батичӀони, мун хӀакъикъаталдаги сах-саламатго тӀадвуссина». Жеги гьес тӀадеги жубана: «Биччанте гьеб кинабго халкъалда рагӀун букӀине!»

Ахавил гӀажал

29ГӀизраилалъул пача цадахъ Ягьудиялъул пачагун ГилгӀадалъул Рамоталда данде вагъизе вилълъана. 30ГӀизраилалъул пачаяс Егьошафатида абуна:

«Лъидаго лъачӀого вукӀине ретӀелги хисун лъугьина дун рагъде; дуца дурго пачалъиялъул ретӀел тӀад те». ГӀизраилалъул пачаяс ретӀел хисана ва рагъ байбихьана.

31Сириялъул пачаяс жиндирго лъебералда кӀиялго чолгьаказул бутӀрузда лъазабуна: «Нуж ГӀизраилалъул пача тун тӀокӀал батӀиял чагӀигун рагъуге – гьитӀинал-чӀахӀиял батӀалъи гьечӀого».

32Чолгьаказул бутӀрузда Егьошафат вихьидал, гьезда ракӀалде ккана: «РакӀчӀун, доле дов вуго ГӀизраилалъул пача». Гьел гьесде тӀаде кӀанцӀизе гьесул рахъалде сверана, амма Егьошафатица ахӀи бахъинабидал, 33чолгьаказул бутӀрузда бихьана гьев ГӀизраилалъул пача гуревлъи ва тӀокӀал гьесда хадур лъугьинчӀо. 34Амма цо чияс тохлъукьего речӀчӀараб чӀор щун ГӀизраилалъул пача лъукъана; гьесул къолдабазда гьоркьобе ккана гьеб чӀор.

Пачаяс жиндирго чолгьакил бетӀерасда абуна: «ТӀад вусса ва дун рагъдаса нахъе ваче! Дун лъукъун вуго», – ян.

35Амма тӀубараб къоялъ рагъул кор боркьана ва пача, сириязда дандвитӀун, жиндирго чолгьакида тӀад вахъун чӀезе ккана. Гьесул ругънадаса би чолгьакида тӀаде чвахулеб букӀана ва бакъанигӀужалда гьесие къадар щвана. 36Бакъ щинкӀулеб гӀужалда рагъухъабазде ахӀи бана: «Жив-жив чи жинди-жиндир шагьаралде ва ракьалде тӀадвусса!»

37Пача хвана ва Самариялдеги вачун гьенив хабалъ лъуна. 38Самариялъул хӀоразул, хъахӀбаби жанир чвердолеб цо хӀориниб чурана гьесул чолгьоко ва, БЕТӀЕРГЬАНАС цебеккунго загьир гьабураб Гьесул рагӀуда рекъон, гьабзаз чӀикӀулеб букӀана Ахавил би.

39ХутӀарал Ахавил пачалъиялъул лъугьа-бахъинал, гьес гьарурал ишал, магьиги бекьун бараб кӀалгӀа, щула гьарурал шагьарал – гьеб киналъулго хӀакъалъулъ хъван буго «ГӀизраилалъул пачабазул тарих» абураб тӀехьалда.

40Ахав хвана ва жиндирго умумузда аскӀов хабалъ лъуна. Гьесул вас Ахазиягь вахъана гьесул бакӀалда пачалъун.

Егьошафат – Ягьудиялъул пача

41Ахав ГӀизраилалъул пачалъун вахъун ункъабилеб соналъ Асал вас Егьошафат Ягьудиялъул пачалъун вахъана. 42Егьошафатица лъебералда щуго сон бан букӀана гьев пачалъун вахъаравго ва къоло щуго соналъ пачалъи гьабуна гьес Иерусалималда. Гьесул эбелалда цӀар букӀана Азува, Шилхил яс йикӀана гьей. 43Сундулъгоги, дове-гъове кьуричӀого, гьев жиндирго эмен Асал нухда хьвадана ва БЕТӀЕРГЬАНАСДА берцин бихьарабщинаб гьабуна. Амма гохӀазул мукъадасал бакӀал щущазарун рукӀинчӀо жеги ва халкъалъ гьенир къурбанал хъолел ва кьеккеналъе махӀгьуинал нахал рухӀулел рукӀана. 44Егьошафатица ГӀизраилалъул пачагун ракълилаб къотӀи-къайги гьабуна.

45Егьошафатил пачалъиялъул хутӀарал лъугьа-бахъинал, гьесул бергьенлъаби ва рагъул гьунарал – гьеб кинабго хъван буго «Ягьудиялъул пачабазул тарих» абураб тӀехьалда. 46Гьесул инсул заманалдасаго хутӀарал, гьересиаллагьзабазе хъулухъалъе чӀарал, бихьинал рукӀа, цӀуял рукӀа хъахӀбабиги тӀуран тӀагӀинаруна гьес улкаялдаса. 47Егьошафат пачалъун вугеб заманалда Эдомалда пача вукӀинчӀо; сардарасул нухмалъиялда гъоркь букӀана гьеб.

48Меседалда хадув Офиралде ине Егьошафатица ралъдал гумул рана, амма гьел гьенире щвечӀо, Эцион-Гевералдаго щущана гьел. 49Доб мехалда Ахавил вас Ахазиягьица абун букӀана Егьошафатида: «Биччанте дур чагӀигун дир чагӀиги лъедезе гумузда», – ян. Амма Егьошафатица гьеб иш къабул гьабун букӀинчӀо.

50Егьошафат хвана ва жиндирго кӀудияв эмен Давудил Шагьаралда умумузда аскӀов хабалъ лъуна. Гьесул бакӀалда гьесул вас Егьорам пачалъун вахъана.

Ахазиягь – ГӀизраилалъул пача

51Егьошафат Ягьудиялъул пачалъун вахъун анцӀила анкьабилеб соналъ, Ахавил вас Ахазиягь ГӀизраилалъул пачалъун вахъана ва кӀиго соналъ пачалъи гьабуна гьес ГӀизраилалда тӀад. 52Гьес БЕТӀЕРГЬАНАСДА цебе квешабщинаб гьабуна, щайгурелъул жиндирго инсулги эбелалъулги ва ГӀизраилго мунагьазукье ккезабурав Наватил вас Яровамилги нухал ккун хьвадана гьев. 53Гьес БагӀалил диналдеги вуссун, гьесие гӀибадатги гьабун, гьесул инсуцаго гӀадин ГӀизраилалъул БЕТӀЕРГЬАН Аллагьасул ццин гьалаглъизабуна.

Currently Selected:

3 Пачаби 22: АварАК

Highlight

Copy