3 Пачаби 21
21
Наватил цӀолбол ах
1Заман ун хадуб гьадинал лъугьа-бахъинал ккана. Изреел шагьаралдаса Наватил цӀолбол ах букӀана Изреелалда, Самариялъул пача Ахавил кӀалгӀаялда аскӀоб. 2Ахавица Наватида абуна:
«Дие кье дур цӀолбол ах, гьеб дир кӀалгӀаялда аскӀоб бугелъул. Гьелъухъ дица дуе гьелдасаги лъикӀаб цӀолбол ах кьела, ялъуни, дуе бокьани, гьелъухъ кколеб багьа кьела». 3Амма Наватица абуна: «БЕТӀЕРГЬАНАС цӀунаги дица дирго умумузул ирс чияе кьеялдаса», – ян.
4Кьерхун гьумергун ва ццидал цӀун ракӀгун ана Ахав рокъове, щай абуни, дица дуе дир умумузул ирс кьеларилан абидал гьесда Изреелалдаса Наватица. Кванидаса инкарги гьабун, вахун бусадегун, къададехунги вуссун вегана гьев.
5Гьесул лъади Изавел ячӀана жание ва гьелъ гьесда цӀехана: «Щай мун гьедин кьерхун вугев? Щай кваналарев?»
6Гьес жаваб гьабуна: «Щайгурелъул, дица Изреелалдаса Наватида абуна биче дий цӀолбол ахин, ялъуни, дуе бокьани, дица гьелъул бакӀалда цогидаб кьелин дуеян. Амма кьеларо дица дуе дир цӀолбол ахилан абуна гьес».
7Цинги гьесул лъади Изавелица абуна: «ГӀизраилалъул пача гьединищ вукӀунев? ТӀаде вахъун кӀалдиб жо лъе, гьелъул ургъел гьабуге! Дица чӀезабила дуе Изреелалдаса Наватил цӀолбол ах».
8Гьебмехалда Ахавил цӀаралдасан кагътал хъвана гьелъ, ва гьесул мугьруги чӀван Наватил шагьаралъул кӀудиял чагӀазухъе ва чӀухӀбузухъе ритӀана. 9Гьел кагътазда хъван букӀана:
«КӀал кколеб къо чӀезабе ва гӀакӀаги ахӀун халкъ данде бакӀаре. Цинги Нават, халкъалда гьоркьоб бищун хӀурматияб бакӀалда гӀодов чӀезаве. 10Гьесда дандвитӀун кӀиго хӀалихьатги чӀезаве. Биччанте гьез бицине гьес Аллагьасдеги пачаясдеги рогьо банилан. Хадуб, гьениса нахъеги вачун, ганчӀал речӀчӀун чӀвай гьев».
11Изавелица кагътазда хъвараб буюрухъалда рекъон гьабуна Наватил шагьаралдаса кӀудиял чагӀаз ва чӀухӀбуз. 12Гьез кӀал кквезе къоги чӀезабун, халкъ данде бакӀарана, ва Нават халкъалда гьоркьоб хӀурматияб бакӀалда гӀодов чӀезавуна. 13Хадуб кӀиго хӀалихьат вачӀун, гьесда дандритӀун гӀодор чӀана ва халкъалдаго рагӀун Наватида гӀайиб чӀвазе лъугьана: «Наватица Аллагьасе ва пачаясе рогьо бана», – ян.
Цинги гьев шагьар тун къватӀивехунги вачун ганчӀица чӀвана. 14Хадуб гьез Нават ганчӀица чӀванин ва гьев хванин абун хабар битӀана Изавелихъе.
15Нават ганчӀица чӀванин хабар рагӀарабго, гьелъ Ахавида абуна: «Вахъун тӀадегун дуе гьеб бичизе инкар гьабурав Наватил цӀолбол ахил хважаинлъи гьабизе а. Дов хвана». 16Нават хун вугилан рагӀидал, Ахав къватӀиве вахъана Наватил цӀолбол ахил хважаинлъи гьабизе.
Илясица Ахавидаги Изавелидаги данде Аллагьасул рагӀи бицин
17Тишбиялдаса Илясихъе БЕТӀЕРГЬАНАСУЛ калима рещтӀана: 18«Самариялда вугев ГӀизраилалъул пача Ахавихъе а. Гьев гьабсагӀаталда Наватил цӀолбол ахикь вуго, гьелъие хважаинлъи гьабизе вачӀун. 19Гьесда абе: „Гьадин абулеб буго БЕТӀЕРГЬАНАС: ‘Дуца чи чӀварав гӀечӀого, гьанже гьесул боцӀи-малалдеги квер бегьулевищ вугев?’“ Хадубги абе гьесда: „Гьадин лъазабулеб буго БЕТӀЕРГЬАНАС: ‘Гьабзаз Наватил би чӀикӀараб бакӀалда, дур биги чӀикӀизе буго’, – ян“»#21:19 Гьаб тӀубаялъул бицуна: 3 Пач. 22:29-38; 4 Пач. 9:24-26..
20Ахавица Илясида абуна: «Ватанагури дун дуда, дир тушман!»
«Ватана, – ян жаваб кьуна гьес, – щайгурелъул БЕТӀЕРГЬАНАСДА цебе къабихӀаб жо гьабизе къасд ккедал дур. 21Гьадин лъазабулеб буго БетӀергьанас: „Дица балагь бачине буго дуда тӀаде. Дица гъурила дур наслу ва Ахавил бихьинал цо течӀого, лагъ вукӀа, эркенав вукӀа, тӀуран тӀагӀинарила. 22Дица дур хъизан-агьлу Наватил вас Яровамилалда ва АхӀиягьил вас Баашалалда релълъинабила, щайгурелъул дуца Дир ццин гьалаглъизабидал ва ГӀизраил мунагьазде бачиндал“#21:22 Бал. 3 Пач. 14:10-11; 16:3-4.. 23Гьединго Изавелил рахъалъги лъазабулеб буго БЕТӀЕРГЬАНАС: „Изреелалъул къеда гъоркь гьабзаца тӀутӀун язе йиго Изавел“. 24Ахавил чагӀазул шагьаралда хварал гьабзаца тӀутӀун рала, авлахъалда хварал – хӀинчӀ-гъедуялъ ретӀ-ретӀила».#21:24 Гьаб тӀубаялъул бицуна: 4 Пач. 9:24-26, 30-37; 10:1-11, 17.
25(Жиндирго лъади Изавелица гьусизавун БЕТӀЕРГЬАНАСДА рихарабщинаб гьабулев Ахав гӀадав чи тӀокӀалъ вахъинчӀо. 26БЕТӀЕРГЬАНАС гӀизраилазда цереса нахъе гъурал амориязда релълъун, гьезул гьересиаллагьзабазе бетӀерги чӀван, гьес кутакалда къабихӀал жал гьаруна.)
27Гьеб калима рагӀидал Ахавица тӀад букӀараб ретӀел бихъана ва хӀебтил гӀабаги тӀад ретӀун кӀал ккуна; къаси сардилъги тӀад гьебго гӀабагун вегана ва кьерхун гьумергун вукӀана.
28Цинги БЕТӀЕРГЬАНАСУЛ калам рещтӀана Илясихъе: 29«Дуда бихьанищ Ахав Дида цеве мутӀигӀлъараб куц? Гьев Дида цеве мутӀигӀлъаралъухъ дица гьев чӀаго вукӀаго биччаларо, амма гьесул васасул гӀумруялда жаниб балагь биччала гьесул агьлу-хъизамалда тӀаде».
Currently Selected:
3 Пачаби 21: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
