4 Пачаби ЦеберагӀи
ЦеберагӀи
Гьаб тӀехьалдаги, Пачабазул Лъабабилеб тӀехьалдаго гӀадин, бицунеб буго гӀизраилазул ва гьезул кӀиябго пачалихъалъул, ай, ГӀизраилалъул ва Ягьудиялъул хӀакъалъулъ.
ТӀехьалда жанире рачун руго цебесеб эраялъул ичӀабилеб гӀасруялдаса бахъараб цебесеб эраялъул анлъабилеб гӀасруялъул байбихьуде щвезегӀан гьоркьоб заманалъул лъугьа-бахъинал. Бицен гьабулеб заманалъул тарих бикьизе бегьула кӀиго бутӀаялде:
1) ГӀизраилазул кӀиябго пачалихъалъул тарих – цебесеб эраялъул 772-леб соналъ ассирияз Самария кверде босиналда цебесеб заман (1–17 бетӀ.);
2) ГӀизраилазул къилбаялъул рахъалъул пачалихъалъул, ай Ягьудиялъул тарих – цебесеб эраялъул 586-леб соналъ вавилонияз Иерусалим кверде босиналда цебесеб заман (18–25 бетӀ.).
БетӀергьан Аллагьасе жал мутӀигӀлъичӀолъиялъ, гӀизраилазда гӀемер гӀазаб-гӀакъуба бихьула. БетӀергьанас, аварагзабиги ритӀун, гьезда цебеккунго лъазабун букӀана гьедин кколеблъи. Иерусалим тӀубан щущахъ базаби ва Ягьудиялъул халкъалъул цӀикӀкӀарасеб бутӀа Вавилоналде асирлъуде бачун ин, – гьеб ккола жугьутӀазул тарихалда жаниб цӀакъ кӀвар цӀикӀкӀараб лъугьа-бахъинлъун.
ЦохӀо пачабазул гуребги, тӀехьалда бицунеб буго ГӀизраилалъул къадру цӀикӀкӀарал аварагзабазулги: Иляс аварагасул ва гьесие хъулухъ гьабурав ЭлишагӀ аварагасул (2–9, 13 бетӀ.), гьединго Ишаягь аварагасул хӀакъалъулъ (19–20 бетӀ.). ЭлишагӀ аварагас халкъалдаги пачабаздаги лъазабула гьез Аллагьасул ццин бахъинабун букӀин ва гьезда цебе Аллагьасул амру загьир гьабула гьес, амма гӀемерисезе гьелъухъ гӀенекки къабуллъуларо. Ишаягь аварагас Хизкиягьида вацӀцӀадго хьвадизе малъула ва Иерусалим щущахъ базабизе букӀин бицуна (20 бетӀ.).
Гьаб тӀехьалда гьединго хасаб кӀвар кьолеб буго Ягьудиялъул даража тӀадегӀанав пача Ёшиягьил пачалъиялъул заманалда ккарал лъугьа-бахъиназде: мажусиязул батӀи-батӀиял гьересиаллагьзаби гьес ракьалдаса тӀагӀинаруна ва халкъ цохӀо БетӀергьан Аллагьасде буссинабуна (22–23 бетӀ.).
ТӀехьалда буго
Пачабазул Ункъабилеб тӀехь
Пачалъи кӀийиде бикьи (4 Пач. 1–17)
Ахазиягь пача ва Иляс авараг (4 Пач. 1:1-18)
Иляс авараг зобалазде хъами; ЭлишагӀ авараг ва ГӀизраилалъул пача Иорам (4 Пач. 2:1–8:15)
Егьорам ва Ахазиягь – Ягьудиялъул пачаби (4 Пач. 8:16-29)
ГӀизраилалъул пача Егьул заманаялъ ккараб хиса-свери (4 Пач. 9:1–10:36)
Ягьудиялда Аталиял ва Егьоашил пачалъи; БетӀергьанасул Рукъ цӀи гьаби (4 Пач. 11:1–12:21)
Егьоахаз ва Иоаш – ГӀизраилалъул пачаби; ЭлишагӀил хвел (4 Пач. 13:1-25)
Ягьудиялъул ва ГӀизраилалъул цогидал пачаби (4 Пач. 14:1–15:38)
Ахаз – Ягьудиялъул пача (4 Пач. 16:1-20)
Гьошеа – ГӀизраилалъул ахирисев пача; ассирияз ГӀизраил асир гьаби (4 Пач. 17:1-41)
Ягьудиялъул тарих (4 Пач. 18:1–25:30)
Хизкиягьил пачалъи; гьев сах гьави (4 Пач. 18:1–20:21)
Манасс ва Амон – Ягьудиялъул квешал пачаби (4 Пач. 21:1-26)
Даража тӀадегӀанав Ёшиягь пача; Аллагьасулгун КъотӀи цӀи гьаби (4 Пач. 22:1–23:30)
Ягьудиялъул ахирисел пачаби (4 Пач. 23:31–24:20)
Иерусалим кьучӀдасаго биххи; халкъ Вавилоналде асирлъуде ккей (4 Пач. 25:1-30)
Currently Selected:
4 Пачаби ЦеберагӀи: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023