3 Пачаби 13
13
1Кьеккен гьабизе къурбаналъул бакӀалда аскӀов Яровам вахъун чӀун вукӀаго, Ягьудиялъул ракьалдаса Бет-Элалде, БЕТӀЕРГЬАНАСУЛ амруялдалъун, Аллагьасул авараг вачӀана. 2БЕТӀЕРГЬАНАСУЛ амруялдалъун, къурбаналъе бакӀалдеги валагьун, гьев ахӀдана:
«Къурбаналъе бакӀ, къурбаналъе бакӀ! Гьадин лъазабулеб буго БЕТӀЕРГЬАНАС: „Давудил наслуялъе гьавизе вуго Ёшиягь абун цӀар бугев вас. Дуда тӀад гьес къурбаналъе хъвела гьал, дуда тӀад кьеккен бухӀулел ругел гохӀазул кашишзаби ва дуда тӀад инсанасул рукьбиги рухӀила#13:2 Бал. 4 Пач. 23:15-20. Гьениб бицунеб буго гьаб аварагасул рагӀи тӀубаялъул хӀакъалъулъ.“».
3Гьебго къоялъ гьес гӀаламат бихьизабуна: «Гьале БЕТӀЕРГЬАНАСУЛ амру гьаб букӀин бихьизабулеб гӀаламат: гьаб къурбаналъул бакӀ кӀийиде кьватӀила ва гьелда тӀад бугеб рахъуги щущахъ бала».
4Аллагьасул авараг Бет-Элалъул къурбаналъе бакӀалде ахӀдолев рагӀидал, Яровам пачаяс гьесдехун кверги битӀун абуна: «Ккве гьев!», – ин.
Амма гьес гьев чиясдехун балагьун битӀараб квер гьебсагӀаталда бакъвана ва гьесда гьеб жиндехунго тӀадбуссинабизе бажаричӀо. 5БЕТӀЕРГЬАНАСУЛ амруялда рекъон Аллагьасул аварагас бицараб гӀаламатги тӀубана – къурбаналъул бакӀ кӀийиде кьватӀана ва гьелда тӀад букӀараб рахъу щущахъ бана.
6Гьебмехалда пачаяс Аллагьасул аварагасда абуна:
«Гьаре дурго Аллагьасда дие гӀоло, БЕТӀЕРГЬАН дида гурхӀизе ва дир квер сахлъизе букӀине». Аварагасе гӀоло БЕТӀЕРГЬАН гурхӀана ва пачаясул квер цебе букӀараб гӀадин сахлъана. 7Пачаяс Аллагьасул аварагасда абуна:
«Кваназе вилълъа дир бакӀалде, дица дуе сайгъаталги кьела».
8Амма Аллагьасул аварагас абуна:
«Дур буголъиялъул бащдаб бутӀа дуца дие кьолеб букӀарабанигицин, дун дуда цадахъ вилълъинароан ва я квен квинароан, я лъим гьекъелароан гьаб бакӀалда. 9БЕТӀЕРГЬАНАСЛЪИДАЛ дида лъазабураб: „Я квен кванаге, я лъим гьекъоге ва гьебго, мун араб нухалъ тӀадги вуссунге“, – ян».
10Цинги, живго Бет-Элалде вачӀараб нухалъ тӀадвуссинчӀого вукӀине, гьев батӀияб нухалъ ана.
Авараг къосун ккей
11Бет-Элалдайин абуни, цо херав авараг вукӀана. Гьесул васал рачӀана ва Аллагьасул аварагас доб къоялъ гьабураб жоялъул хӀакъалъулъ кинабго гьесда бицана. Гьес пачаясда абураб жоги бицана гьез инсуда.
12Инсуца гьезда цӀехана: «Кинаб нухккун гьев арав?» – ин.
Васаз гьесда бихьизабуна Ягьудиялдаса вачӀарав авараг араб нух. 13Гьес васазда абуна: «ХӀама кьолой дие».
Гьез хӀама кьолона ва гьев гьелдаги рекӀун 14Аллагьасул аварагасда хадув къокъана. Гьесда гьев ватана миккигъотӀода гъоркь гӀодов чӀун ва гьес цӀехана: «Мунищ Ягьудиялдаса вачӀарав Аллагьасул авараг?» – ин.
«Дун вуго», – ян жаваб кьун гьес.
15Цинги аварагас абуна: «Вилълъа дир рокъове кӀалдиб жо лъезе», – ян.
16Гьес абуна: «Дида кӀоларо дуда цадахъ вилълъине; я дур бакӀалда квен кваназе гьечӀо, я гьаб бакӀалда лъим гьекъезе гьечӀо. 17БЕТӀЕРГЬАНАС дида лъазабун буго: „Я квен кванаге, я лъим гьекъоге гьениб ва гьебго, мун унев вугеб нухккун тӀадги вуссунге“, – ян».
18Херав аварагас жаваб кьуна: «Дунги мунго гӀадав авараг вуго. Малаикас БЕТӀЕРГЬАНАСУЛ амруялдалъун дида абуна: „ТӀад вуссинавун, квенги кваназе лъимги гьекъезе рокъове ваче дов“, – ин». (Амма гьеб гьесул гьереси букӀана.)
19Гьев гьесда цадахъ тӀадвуссана ва гьесул рокъов квана-гьекъана. 20Гьел жеги кваналеб бакӀалдаса тӀаде рахъун рукӀинчӀо, гьев тӀадвуссинавурав херав аварагасухъе БЕТӀЕРГЬАНАСУЛ рагӀи рещтӀана. 21Гьебмехалда Ягьудиялъул ракьалдаса вачӀарав аварагасухъги валагьун ахӀдана гьев: «Гьадин лъазабулеб буго БЕТӀЕРГЬАНАС:
„БЕТӀЕРГЬАНАСУЛ рагӀухъги гӀенеккичӀого, БЕТӀЕРГЬАН Аллагьас дуе гьабураб амру хвезабуна дуца; 22тӀадги вуссун, Гьес гьукъараб бакӀалда квенги кванана, лъимги гьекъана! Гьединлъидал дур жаназа дур умумузул хабалалъ букъизе гьечӀо“».
23Аллагьасул авараг квана-гьекъон вахъун хадуб, гьев тӀадвуссинавурав аварагас гьесие хӀама кьолона. 24Гьев нухде вахъана, амма нухда гъалбацӀалъ тӀадги речӀчӀун чӀвана. Гьесул жаназа гьенибго хутӀана, хӀамаги гъалбацӀги аскӀор эхетун чӀана. 25АскӀосан унел чагӀазда бихьана нухда бугеб жаназаги, жаназаялда аскӀоб эхетараб гъалбацӀги. Гьез инеги ун, дов херав авараг вугеб шагьаралда бицана гьеб хабар. 26Нухдаса гьев нахъвуссинавурав аварагасда гьеб хабар рагӀидал, гьес абуна:
Гьев ккола дов БЕТӀЕРГЬАНАСУЛ рагӀухъ гӀенеккичӀев Аллагьасул авараг. БЕТӀЕРГЬАНАС, Жиндицаго бицараб рагӀуда рекъон, гъалбацӀалъул ихтияралде кьун вуго гьев, гъалбацӀалъги тӀадги речӀчӀун чӀван вуго.
27Аварагас жиндирго васазда абуна: «ХӀама кьолой дие». Гьез хӀама кьолона.
28Гьев гьениве вилълъана ва нухде рехараб, аскӀоб хӀамаги гъалбацӀги эхетараб, жаназа батана. ГъалбацӀалъ абуни, я жаназаялда кӀал чӀван батичӀо, я хӀама чӀван батичӀо. 29Аварагас гьесул жаназа тӀаде борхун, хӀамиде бахинабуна, ва магӀуги бахъун хабалъ лъезе, тӀадбуссун шагьаралде босана. 30Гьес гьев жиндирго хабалазулъ лъуна ва: «Вай, дир вац!» – ин ахӀун магӀуги гьабуна.
31Гьев хабалъ лъун хадуб гьес жиндирго васазда абуна:
«Дун хваравго, доб Аллагьасул авараг лъураб хабалъ лъе дунги; досул рукьбузда аскӀор лъе дир рукьбиги. 32БЕТӀЕРГЬАНАСУЛ амруялда рекъон гьес Бет-Элалда бараб къурбаналъул бакӀалда данде ва киналго Самариялъул шагьаразул гохӀ-щобазда ругел мукъадасал бакӀазда данде бицараб рагӀи ракӀчӀун тӀубазе бугелъул».
Яровамил мекълъи
33Амма гьелдаса хадубцин Яровамица жиндирго квешал нухал хисичӀо ва цӀидасан халкъалда гьоркьоса кашишзаби тана гохӀазда мукъадасал бакӀазда. Гьес бокьа-бокьарав чи толев вукӀана гохӀазда мукъадасал бакӀазда кашишлъун. 34Гьеб мунагьалъ Яровамил хъизан-агьлуялдаго ццин букӀана, ва гьеб сабаблъун гьесул хъизан-агьлу, щущахъ базабун, дунялалдасаго тӀагӀинабуна.
Currently Selected:
3 Пачаби 13: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
