3 Пачаби 12

ГӀизраилал Реховамида дандечӀей

1Реховам Шехемалде вилълъана, щайгурелъул тӀолабго ГӀизраил гьенибе бакӀаризе кколаан гьев пачалъун гьавизе. 2Наватил вас Яровамида гьеб хабар рагӀидал (гьев Сулейманихъа лъутарав чи, жеги Мисриялда вукӀана яшав гьабун), гьев Мисриялдаса тӀадвуссана. 3Яровам ахӀизе чагӀи ритӀана гьез, ва тӀолабго ГӀизраилалъул жамагӀатгун цадахъ, гьев Реховамихъе вачӀана. Гьез Реховамида абуна:

4«Дур инсуца нижер горбода хӀехьезе захӀматаб рукь бана, амма гьанже дуца тӀадагь гьабе нижер захӀмат ва гьес нижеда бараб зулмуялъул къвалги чуче, цинги ниж дуда цере хӀалтӀила».

5Реховамица жаваб гьабуна: «ГьабсагӀат нуж нахъе а, лъабго къоялдасан нахъеги рачӀа», – ян. Халкъ нахъе ана. 6Жиндирго эмен Сулейман чӀаго вугеб мехалъ гьесда цере хъулухъалъе хӀалтӀарал кӀудиял чагӀигун гӀакълу дандбана Реховамица.

«Гьаб халкъалъе кинаб жаваб кьун лъикӀ букӀинебилан нужеда кколеб?» – ин цӀехана гьес.

7«Жакъа мун гьаб халкъалъе хъулухъалъе вахъун, гьезул мурадги тӀубазабун дуца гьезие лъикӀаб жаваб кьуни, гьел кидаго дур лагъзаллъун рукӀине руго», – ян жаваб кьуна гьез.

8Амма Реховамица, кӀудиял чагӀаз кьураб гӀакълуги нахъчӀван, жиндаго цадахъ гӀурал, жиндирго гӀолохъанал хъулухъчагӀазда гӀакълу дандбана. 9Гьес гьезда цӀехана: «Нужеца кинаб хӀукму гьабеян абилеб? „Цодагьаб тӀадагь гьабе дур инсуца нижеда бараб бакӀаб гьирин“ абун кӀалъалеб халкъалъе щиб жаваб кьун лъикӀ нилъеца?»

10Гьесда цадахъ гӀурал гӀолохъабаз абуна:

«„Дур инсуца цӀакъ бакӀаб гьир бана нижеда, амма дуца тӀадагьлъизабе гьеб нижее“, – ян абулеб халкъалъе гьадинаб жаваб кье: „Дир инсул мачӀабаздасаги дир гьитӀинкилищ биццатаб буго. 11Дир инсуца бакӀаб гьир нужеда бан батани, дица жеги бакӀлъизабила гьеб. Дир инсуца цӀалаца рухун гьабуна нужее тамихӀ, дицайин абуни маххул рекелал тӀад рекьараб цӀалаца рухун гьабила нужее тамихӀ“, – ин».

12Лъабго къоялдасан Яровамги тӀолабго халкъги, гьес лъабго къоялдасан рачӀа жиндихъеян абураб рагӀуда рекъон, гьесухъе тӀадруссун рачӀана. 13Цинги пача халкъалда цеве вахъун хъачӀго кӀалъана. КӀудиял чагӀазул гӀакълуги нахъчӀван, 14гьев гӀолохъабазул гӀакълуялда хадув вилълъана ва гьес абуна:

«Дир инсуца бакӀаб гьир бана нужеда, дица тӀадеги бакӀлъизабила гьеб. Дир инсуца цӀалаца рухун гьабуна нужее тамихӀ, дицайин абуни маххул рекелал тӀад рекьараб цӀалаца рухун гьабила нужее тамихӀ», – ин.

15Гьедин гӀадахъ босичӀо пачаяс халкъалъул рагӀи: Наватил вас Яровамил рахъалъ, Шилоялдаса АхӀияги гьоркьов ккун рещтӀараб БЕТӀЕРГЬАНАСУЛ калима тӀубазе хъван букӀиндал БЕТӀЕРГЬАНАС. 16ТӀолалго гӀизраилазда бихьана пачаяс гьезухъ гӀенеккизе инкар гьабураблъи ва пачаясе жаваб кьун халкъалъ абуна:

«Давудилъ нижее щибгӀаги бутӀа бугищ?

Йишайил васасдаса кинабгӀаги ирс бугищ?

ГӀизраилал, русса нужерго чадразухъе!

Давуд, гьанже дурго наслуялда тӀад гьабе кверщел!»

ГӀизраилал рокъо-рокъоре руссана. 17ЦохӀо Ягьудиялъул шагьаразда яшав гьабун чӀаразда тӀад букӀана Реховамил кверщел.

18Цинги лагъзаллъун гьарун цере хӀалтӀизарулел чагӀазда тӀад бетӀерлъи гьабизе тарав Адорам витӀана Реховамица гӀизраилазухъе, амма гьез гьев ганчӀица чӀвана. Живго Реховам хехлъи гьабун чолгьакида тӀаде кӀанцӀана ва Иерусалималде тӀурана. 19Гьебмехалдаса нахъе ГӀизраил Давудил наслуялда данде чӀана.

ГӀизраилалъул тӀоцевесев пача Яровам пачалъун вахъин

20ГӀизраилалъул халкъалда Яровам тӀадвуссун вугилан рагӀидал, гьез гьесда хадур чагӀиги ритӀун, гьев мажлисалде ахӀана ва ГӀизраилалда тӀад пачалъун гьавуна. ЦохӀо Ягьудал къавм хутӀана Давудил рукъалъе мутӀигӀаблъун.

21Иерусалималде вуссиндал Реховамица тӀолабго Ягьудал ва Буняминил къавмалда гьоркьоса нусиялда ункъоазарго тӀаса рищарал рагъухъаби данде ракӀарана – гӀизраилазда данде рагъизе ва Сулейманил вас Реховамихъе пачалъи нахъбуссинабизе къасдгун.

22Амма Шемай аварагасухъе Аллагьасул калима рещтӀана: 23«Ягьудиялъул пача Сулейманил вас Реховамида ва Ягьудалгун Буняминил тӀолабго къавмалда гьадин абе: 24„БЕТӀЕРГЬАНАС лъазабулеб буго: ‘Нужерго вацал гӀизраилалгун рагъизе унге. Гьеб Дир амруялдалъун ккараб иш бугелъул, рокъоре тӀадрусса’, – ян“».

Гьел БЕТӀЕРГЬАНАСУЛ рагӀухъ гӀенеккана ва гьеб рагӀуда рекъон рокъо-рокъоре руссана.

Яровамица гьересиаллагьзабазул дин гьаби

25Яровамица Ефраимил мугӀрузул тӀалъиялда бугеб Шехем шагьар щула гьабуна ва гьенив рукӀел ккун чӀана. Гьениса ун гьес Пениэлги цӀи гьабуна.

26Яровамида рекӀеда ккана: «Давудил наслуялъухъе нахъбуссине гурин пачалъи. 27Къурбанал хъвезелъун халкъ Иерусалималде БЕТӀЕРГЬАНАСУЛ Рокъобе хьвадани, гьезул ракӀалги гьезул бетӀергьан Ягьудиялъул пача Реховамиде руссина. Цинги гьез дун чӀвала, гьелги Ягьудиялъул пача Реховамихъе тӀадруссина». 28Гьев жиндирго гӀакълучагӀазда кӀалъана, ва кӀиго меседил баси гьабизабуна. Цинги пачаяс халкъалда лъазабуна: «ГӀела Иерусалималде хьвадарал. ГӀизраилал, гьале нуж Мисриялдаса къватӀире рачарал нужер аллагьзаби».

29Гьел бусбузул цояб Бет-Элалда, цояб Даналда лъуна гьес. 30Гьеб ишалъ халкъ мунагьалъукье ккезабуна, щайгурелъул Даналде щвезегӀанцин ун гьезие тӀагӀат-гӀибадат гьабизе лъугьана гьел.

31Гьединго Яровамица гохӀ-щобазда гьединаб как-диналъе ва къурбаназе бакӀал рана ва гьенир левитазулъан гурел кашишзабиги тана. 32Ягьудиялда тӀобитӀулеб байрамкъоялъул бакӀалда#12:32 Ягьудияз анкьабилеб моцӀрол анцӀила щуабилеб къоялъ тӀобитӀулеб Хъошазул байрамалъе Яровамица чӀезабураб заман букӀана дурусго цо моцӀалъ кватӀун. микьабилеб моцӀрол анцӀила щуабилеб къо чӀезабуна гьес ва Бет-Элалда бараб къурбаналъе бакӀалда гьес жинцаго тӀоритӀана къурбанал, жинцаго гьарурал меседил бусбузе. Бет-Элалда кашишзабиги тана жинцаго рарал гӀибадаталъул бакӀаздаса рачун.

Ягьудиялдаса авараг

33ГӀизраилазе байрамалъул къолъун чӀезабун, жинцаго тӀаса бищараб микьабилеб моцӀрол анцӀила щуабилеб къоялъ, жинцаго Бет-Элалда бараб къурбаналъул бакӀалда аскӀове къана гьев, гьениб кьеккеналъе махӀ гьуинал нахал рухӀизе.

Currently Selected:

3 Пачаби 12: АварАК

Highlight

Copy