3 Пачаби 14
14
Яровамил вас хвей
1Гьеб заманалда Яровамил вас Авиягь унтана. 2Яровамица лъадуда абуна:
«Яхъа, мун Яровамил лъади йикӀин лъидаго лъалареб хӀалалъ ретӀелги хисун Шилоялде а. Дова вуго гьаб халкъалда тӀад пачалъун дун вукӀине вугин бицун букӀарав авараг АхӀия. 3АнцӀго чедги, панкъалги, хъаба цӀун гьоцӀоги цадахъ босун а досухъе. Гьес бицина дуда васасе щиб ккезе бугебали».
4Яровамил лъадуца кинабго гьес малъухъе гьабуна ва Шилоялде АхӀиял бакӀалде ана. АхӀияда канлъи бихьулароан гьанже; херлъиялъ беццлъун вукӀана гьев. 5Амма БЕТӀЕРГЬАНАС АхӀияда абуна:
«Яровамил лъади ячӀуней йиго дуда жиндирго васасул хӀакъалъулъ цӀехезе, щайгурелъул гьев унтун вугелъул. Гьадинги додинги абун жаваб кье долъие. ЯчӀун дой батӀияй гӀаданалъухъего хӀазе йиго». 6НуцӀидахъ гьелъул хӀатӀазул сас рагӀидал, АхӀияца абуна:
«Жание ячӀа, Яровамил лъади. Щайзе дуца батӀияй гӀадан хӀалей? Дир дуе квешаб хабар буго. 7Яровамихъе тӀадги юссун, гьадин абулеб бугин ГӀизраилалъул БЕТӀЕРГЬАН Аллагьасилан абе: „Дица мун халкъалда тӀад кӀодоги гьавун Дир халкъ ГӀизраилалъул бетӀерлъун гьавуна. 8Дица Давудихъа бахъун пачалъи духъе кьуна. Амма ракӀ-ракӀалъго киналго Дир амруял тӀуразарурав ва цохӀо Дир беразда берцин бихьарабги гьабун, Дида нахъ вилълъарав Давудида мун релълъинчӀо. 9Дуца цере рукӀаралщиназдасаги цӀикӀкӀун квешлъи гьабуна. Дуца Дир ццин гьалаглъизабизе, Диде мугъги рехун, дуего батӀиял аллагьзаби гьаруна. 10Гьединлъидал Дица ГӀизраилалда бугеб Яровамил тӀолабго хъизан-агьлуялда тӀаде балагь биччалеб буго. Дица Яровамил цо течӀого бихьинлъи тӀагӀинабила – лагъ вукӀа, эркенав вукӀа. Дица Яровамил зуриятго бокьоса къватӀибе рак гӀадин тӀубан хачан нахъе бала. 11Яровамил чагӀазул шагьаралда хварал гьабзаца тӀутӀун разе руго, авлахъалда хварал хӀинчӀ-гъедуялъ ретӀ-ретӀизе руго“. Гьедин абуна БЕТӀЕРГЬАНАС#14:11 Бал. 3 Пач. 15:29-30 – гьениб бицунеб буго гьаб рагӀи тӀубаялъул хӀакъалъулъ..
12Мун гьанже рокъое тӀадюсса. Дуца шагьаралда хӀетӀе чӀарабго вас хвезе вуго. 13ТӀолабго ГӀизраилалъ магӀуги бахъун вукъизе вуго гьев. ЦохӀо гьев вуго Яровамил хъизан-къаялда гьоркьов хабалалъ лъезе вугев чи, щайгурелъул Яровамил хъизан-къаялда жаниб ГӀизраилалъул БЕТӀЕРГЬАН Аллагьасда цо гьесулъ батана дагьабниги лъикӀлъи.
14ГӀизраилалда БЕТӀЕРГЬАНАС Жиндиего вахъинавила Яровамил хъизан-агьлу нахъбахъичӀого тӀагӀинабизе бугев пача. 15БЕТӀЕРГЬАНАС жаза гьабила ГӀизраилалъул халкъалъе, ва хехаб гӀурулъ хьвагӀолеб муцӀидул рихьалда релълъина гьеб. Гьес гьезул умумузе кьураб гьаб лъикӀаб ракьалдаса тӀагӀинарила гӀизраилал ва Ефрат гӀор тун дорехун щущахъ разарила, щайгурелъул Ашерае#14:15 Ашера – вавилониязулги ханааниязулги аллагь. Гьей рикӀкӀунаан аллагьзабазулги гӀадамазулги эбеллъун, ралъадазул ва тӀолабго дунялалъул кверщелайлъун. хӀубалги чӀван, БЕТӀЕРГЬАНАСУЛ ццин гьалаглъизабуна гьез. 16Гьес ГӀизраил рехун тезе буго, Яровамица жинцаго гьарурал ва гӀизраилалги гьезде куцарал мунагьал сабаблъун».
17Яровамил лъади нахъюссун ана ва Тирзаялде щвана. Гьелъ рукъалъул рагьумахӀу бахъарабго вас хвана. 18Гьев хабалъ лъуна, ва Жиндирго лагъ АхӀияги гьоркьов ккун БЕТӀЕРГЬАНАС абухъе, тӀолабго ГӀизраил гьесда хадуб магӀу бахъун гӀодана.
Яровамил хвел
19Цогидал Яровамил пачалъиялъул ишал, гьес гьарурал рагъал ва гьес халкъалъе гьабураб нухмалъиялъул хӀакъалъулъ хъван буго «ГӀизраилалъул пачабазул тарих» абураб тӀехьалда. 20Къоло кӀиго соналъ пачалъи гьабуна гьес. Гьев хвана ва умумузда аскӀов хабалъ лъуна. Гьесул бакӀалда гьесул вас Надав пачалъун вахъана.
Реховам – Ягьудиялъул пача
21Сулейманил вас Реховам Ягьудиялда пачалъун вахъана. Гьес КӀикъоялда цо сон бан букӀана пачалъун вахъиндал ва анцӀила анкьго соналъ пачалъи гьабуна Иерусалималда – БЕТӀЕРГЬАНАС ГӀизраилалъул киналго къавмазул шагьаразда гьоркьоса, Жиндирго Мукъадасаб бакӀалъе тӀаса бищараб шагьаралда. Гьесул эбелалда цӀар букӀана Нагьама, гьейги аммонияй йикӀана.
22Ягьудиязул халкъалъ БЕТӀЕРГЬАНАСДА цебе квешлъи гьабулеб букӀана. Жиндирго умумуз гьабурабщиналдасаги цӀикӀкӀун мунагьалги гьарун, хиянатай чӀужуялде гьалаглъулеб гӀадаб ццин бахъинабуна гьез Гьесул. 23Гьезги рана жидеего мукъадасал бакӀал, жиб-жиб гохӀда ва жиб-жиб гӀаркьахараб гъотӀода гъоркь лъуна мукъадасал ганчӀал ва Ашерал хӀубал. 24Мукъадасал бакӀазул хасал хъахӀбабицин#14:24 Хасал хъахӀбаби – гьел ккола мажусиязул диниял шартӀазда рекъон, лъимал гьаризарулел ва бачӀин цӀикӀкӀинабулел аллагьзабазда цере хъулухъалъе пасалъи гьабизе тарал бихьиналги цӀуялги хъахӀбаби. Гьеб кидаго Аллагьасда кутакалда рихараб жо букӀана. рукӀана гьезул ракьалда. Ягьудиялъул халкъалъ БЕТӀЕРГЬАНАС гӀизраилазда цереса нахъе гъурал халкъазул киналго хъубалщинал гӀадатал росана.
25Реховам пачалъун вахъун щуабилеб соналъ Мисриялъул пача Шишак Иерусалималде тӀаде кӀанцӀана. 26Гьес БЕТӀЕРГЬАНАСУЛ Рукъалъул ва пачаясул кӀалгӀаялъул хазина бахъун ана. Кинабго босун ана гьес, Сулейманица гьарурал меседил хъалхъаналги. 27Реховам пачаяс гьезул бакӀалда мазгаралъул хъалхъанал гьаруна ва пачаясул кӀалгӀаялъул кӀалтӀа хъулухъалъе тарал пачаясул рорчӀухъабазул бутӀрузухъе кьуна. 28Пача БЕТӀЕРГЬАНАСУЛ Рокъове уневщинахъе хъаравуллъиялъ хъалхъанал цадахъ росулаан, хадуб хъаравуллъиялъул рокъоре тӀадруссинеги гьарулаан.
29Реховамил пачалъиялъул хутӀарал лъугьа-бахъинал, гьесул киналго ишал «Ягьудиязул пачабазул тарих» абураб тӀехьалда хъван руго. 30Реховамидаги Яровамидаги гьоркьоб кидаго кьал букӀана. 31Реховам хвана ва Давудил Шагьаралда жиндирго умумузда аскӀов хабалъ лъуна. Гьесул эбелалда цӀар Нагьама букӀана, гьейги аммонияй йикӀана. Гьесул бакӀалда пачалъун Гьесул вас Авиям вахъана.
Currently Selected:
3 Пачаби 14: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
