3 Пачаби 11

Сулейманица БетӀергьанасде мугъ рехи

1ПиргӀавнасул яс тун жеги гӀемерал къватӀиса руччабиги рокьана Сулеймание – могӀавиял, аммониял, эдомиял, сидониял ва хитиял. 2«Гьезулгун ригьин гьабуге, щайгурелъул гьез нуж ракӀчӀун жидерго аллагьзабазде руссинарула», – ян БЕТӀЕРГЬАНАС жиндир хӀакъалъулъ абурал халкъазул кколаан гьел. Амма Сулейманил гьездехун ракӀ цӀана. 3Пачабазул агьлуялъул анкьнусго лъади йикӀана гьесул ва лъабнусго гъараваш-лъадиги йикӀана. Гьел лъудбуз битӀараб нухдаса къосинавуна гьев. 4Сулейман херлъидал, лъудбуз гьесул ракӀ батӀиял аллагьзабазде буссинабуна, ва гьев тӀокӀалъ жиндирго инсул нухдасан хьвадичӀо, ай жиндирго БЕТӀЕРГЬАН Аллагьасе тӀуван мутӀигӀав вукӀинчӀо. 5Гьес сидониязул аллагь Ашторатие ва аммониязул ракӀ гъанцӀизабулев аллагь Милхомие#11:5 Милхом (Молох) аллагьасе къурбаналъе лъимал рухӀулаан. Къануналда рекъон, Милхомил дин гьабурав чи чӀвазе къотӀулаан (бал. Лев. 18:21; 20:2-5). бетӀер чӀвана.

6Сулейманица БЕТӀЕРГЬАНАСДА цебе квешабщинаб гьабуна, ва гьев гьесул эмен Давудил гӀадаб тӀубараб ритӀухълъиялда БЕТӀЕРГЬАНАСУЛ нухда хьвадичӀо. 7Иерусалималъул бакътӀерхьул рахъалда цо гохӀда Сулейманица балканав могӀавиязул аллагь Кемошие#11:7 Кемош аллагьасе гӀадамал къурбан гьарулаан. ва капурав аммониязул аллагь Молохие как-диналъе бакӀ бана. 8Гьединго гьабуна гьес цогидал киналго къватӀиса лъудбузе ва гьез жидерго аллагьзабазе кьеккеналъе махӀгьуинал нахал рухӀулаан ва къурбанал хъолаан гьенир.

9БЕТӀЕРГЬАНАСУЛ ццин бахъана Сулейманиде, щайгурелъул кӀиго нухалъ илгьам гьабун гьесухъе вачӀарав ГӀизраилалъул БЕТӀЕРГЬАН Аллагьасде мугъ рехиндал гьес; 10чияр аллагьзабазда хадув унгеян Гьес жинда лъазабун букӀаниги, Сулейманица БЕТӀЕРГЬАНАСУЛ амру тӀубазабичӀелъул. 11Цинги БЕТӀЕРГЬАНАС Сулейманида абуна:

«Дуца гьедин гьабуралъухъ, Дир КъотӀи хвезабуралъухъ ва Дица дуда тӀадлъурал амруял тӀуразаричӀелъухъ, пачалъи духъа нахъе бахъичӀого толаро Дица – дуда цере хӀалтӀулезул цоясе кьела гьеб. 12Амма, дур эмен Давудие гӀоло, мун чӀаго вукӀаго гьабиларо гьеб иш. Дица гьеб дур васасухъа кодоса бахъила. 13Амма тӀолабго пачалъи бахъиларо гьесухъа – Дир лагъ Давудие ва Дица тӀаса бищараб Иерусалималъе гӀоло, Дица гьесие цо къавм тела».

Сулейманил тушбаби

14БЕТӀЕРГЬАНАС Сулейманида данде тушман вахъинавуна – Эдомалъул пачаясул къавулъа эдомияв Гьадад. 15Давуд Эдомалда вугеб мехалдаго, чӀварал чагӀи рукъизе вачӀарав Иоавица, Эдомалъул киналго бихьинал чӀван рукӀана. 16Иоавги киналго гӀизраилалги анлъго моцӀалъ, Эдомалда рукӀарал киналго бихьинал чӀван лъугӀизегӀан, гьенир чӀана. 17Амма Гьадад жеги гьитӀинав лъимер вукӀана, ва гьесул инсуда цере хӀалтӀулел рукӀарал эдомиязда цадахъ Мисриялде лъутана гьев. 18Гьел Мидяналдаса къватӀире рахъана ва Паран авлахъалде щвана. Цадахъ Параналдаса чагӀиги рачун гьел Мисриялде, пиргӀавнасухъе, Мисриялъул пачаясухъе рачӀана ва гьес Гьададие рукъги, квен-тӀехги, ракьги кьуна.

19Гьадад кутакалда рекӀее гӀуна пиргӀавнасе ва гьес жиндирго лъади Тахпенесил яц кьун йикӀана гьесие росасе. 20Тахпенесил яцалъ гьесие Генуватин абурав вас гьавуна, гьевги пиргӀавнасул васазда цадахъ пачаясул кӀалгӀаялда хьихьана.

21Мисриялда вукӀаго Гьададида рагӀана Давуд хваравлъи ва аскаразул бетӀер Иоавги хун вукӀин. Гьебмехалда Гьададица пиргӀавнасда абуна: «Виччай дун дирго ракьалде», – ян.

22«Дир гьаниб дуй камураб жо бугищ цониги гьеб хӀалалда дурго улкаялде тӀадвуссине къасд лъезе ккани?» – ян цӀехана пиргӀавнас.

«ГьечӀо, амма букӀаниги виччай дун!» – ин жаваб кьуна Гьададица.

23Цоги тушманги вахъинавуна Аллагьас Сулейманида данде – Цовагьалъул пачаясухъа, жиндирго хважаин Гьададезерихъа лъутарав Резон – Элиадил вас. 24Давудица Цовагьалъул аскар гъурун хадуб Резоница жиндихъего питначагӀи ракӀарана ва гьезие бетӀерлъи гьабуна. Гьел Дамаскалде рачӀана, гьениб рукӀел гьабун чӀана ва гьев Дамаскалда тӀад пачалъун гьавуна. 25Сулейман чӀаго щинаб на гӀан заманалъ ГӀизраилалъул тушманлъун вукӀана Резон – гьес Гьададица гӀадин гьесие гӀемераб зарал гьабулеб букӀана. Сириялда тӀад пачалъун вукӀана гьев ва ГӀизраил гьесие рихараб букӀана.

АхӀияца пачалъи кӀийиде бикьизе букӀиналъул бицин

26Наватил вас Яровамицаги питна багъаризабуна пачаясда данде. Гьев вукӀана Сулейманил хъулухъчагӀазул цояв, Цередаялдаса ефраимияв. Гьесул эбелалда цӀар Церуа букӀана, гьейги къоролай йикӀана.

27Гьале гьес Сулейманида данде питна багъаризабиялъе гӀилла: Сулейманица Милло абураб щулалъи бана ва жиндирго инсул, Давудил Шагьаралъул къадалъ букӀараб каратӀги бацана. 28Яровам вукӀана махщел бугев чи. Гьев гӀолохъанчияс жиндирго хӀалтӀи цӀакъ мухӀканго ва дурусго тӀубазабулеб букӀин бихьидал, Сулейманица гьев киналго Юсупил агьлуялъул хӀалтӀухъабазул къокъаялда тӀад бетӀерлъун тана.

29Гьеб заманалда, цо пуланаб къоялъ Яровам Иерусалималдаса къватӀиве вахъаравго, нухда, цӀияб гӀабаги тӀад ретӀун, Шилоялдаса АхӀия авараг дандчӀвана гьесда. Гьел тун тӀокӀал чагӀи рукӀинчӀо сверухълъиялда. 30Цинги АхӀияца тӀад букӀараб цӀияб гӀаба бахъун, анцӀила кӀиго чӀоло гьабун бихъ-бихъана гьеб.

31Хадуб гьес Яровамида абуна: «Босе дуего анцӀго чӀоло, щайгурелъул гьадин лъазабулеб буго ГӀизраилалъул БЕТӀЕРГЬАН Аллагьас: „Гьале Дица Сулейманихъа нахъе бахъулеб буго пачалъи ва гьелъул анцӀго наслу дуе кьолеб буго. 32Амма Дица ГӀизраилалъул тӀолалго агьлабазда гьоркьоб Иерусалималъе ва Дир лагъ Давудие гӀоло тӀаса бищараб цо наслу хутӀила гьесие. 33Гьез Диде мугъги рехун сидониязул аллагь Ашторатил, могӀавиязул аллагь Кемошил ва аммониязул аллагь Милхомил дин гьабуралъухъ ва Дир нухда гьел хьвадичӀелъухъ, Дида берцин бихьулебаб гьабичӀелъухъ, ва Дир амруялги Дир къануналги гьез тӀуразаричӀелъухъ гьабизе буго Дица гьеб иш.

34Амма Дица Сулейманихъа тӀубараб пачалъи бахъизе гьечӀо. Дица тӀаса вищарав ва Дир амруялги къануналги тӀуразарурав Дир лагъ Давудие гӀоло, Дица гьесул гӀумруялъего пачалъун тана гьев. 35Дица гьесул васасухъа нахъе босила пачалъи ва дуе кьела анцӀго наслу. 36Цо наслу Дица гьесул васасе тела, Дица Дирго цӀар чӀван тӀаса бищараб шагьар Иерусалималда Дир лагъ Давудил пачалъиялъул чирахъ кидаго свинчӀого букӀине Дида цебе. 37Дица мун тӀаса вищулев вуго ГӀизраилалъул пачалъун – дуего бокьарабщиналда тӀад кверщел гьабила дуца. 38Дир лагъ Давудица гӀадин Дир амруялги къануналги тӀуразарун, Дица дуе бихьизабурабщиналда нахъ вилълъани, Дир нухазда хьвадани ва Дида ритӀухъаблъун бихьулебщинаб гьабуни, дуеги Дица квербакъи гьабила. Дица Давудие гьабураб гӀадин, дур наслуги щула гьабила, ГӀизраилги дуе кьела. 39Давудил наслуялъе Дица тамихӀ гьабила, амма абадиялъего гуребха“».

40Сулейманица Яровам чӀвазе хӀал бихьана, амма Яровам Мисриялде Шишак пачаясухъе лъутана ва Сулейман хвезегӀан гьенив чӀана.

Сулейманил хвел

41Сулейманил пачалъиялъул цогидал лъугьа-бахъинал, кинабго гьес гьабурабщинаб ва гьесул гӀакъиллъи – гьеб хъван буго «Сулейманил ишазул хӀакъалъулъ бицен» абураб тӀехьалда. 42Иерусалималда ва ГӀизраилалда тӀад кӀикъого соналъ кверщеллъи гьабуна Сулейманица. 43Хадув гьев хвана ва гьесул эмен Давудил Шагьаралда, гьесул умумузда аскӀов хабалъ лъуна. Гьесул вас Реховам вахъана пачалъун гьесул бакӀалда.

Currently Selected:

3 Пачаби 11: АварАК

Highlight

Copy