3 Пачаби 10
10
Шеваялъул бика ячӀуна Сулейманихъе
1БЕТӀЕРГЬАНАСДАСАН Сулеймание щвараб машгьурлъиялъул хӀакъалъулъ рагӀун, Шеваялъул бика ячӀана захӀматал суалаздалъун гьесул хӀалбихьизе. 2Цадахъ кӀудияб къокъа чукъбузулгун, хириял махӀгьуинал хурдузул, гӀемераб меседалъул ва жавгьар-якъуталъул гьирал тӀад къарал варанабиги рачун щвана гьей Иерусалималде ва ячӀун Сулейманихъегун жиндирго рекӀеда букӀарабщиналъул гьесулгун накъит гьабуна. 3Сулейманица киналго гьелъул суалазе жаваб кьуна: пачаясе захӀматаб ва гьесда баянлъизабизе кӀолареб щибго жо батичӀо. 4Шеваялъул бикада Сулейманил кинабго гӀакъиллъи, гьес бараб кӀалгӀа, 5гьесул кваналеб бакӀалда тӀад лъураб квен, гьесул цересел хъулухъчагӀазул рукъзал, гьесул лагъзаз берцинго тӀубазабулеб хъулухъ, гьезда тӀад ретӀараб ретӀел, гьесул чагъир тӀолел чагӀи ва гьес БЕТӀЕРГЬАНАСУЛ Рокъоб тӀубан рухӀулел къурбанал хъолеб куц бихьарабго, гьей хӀикмалъун хутӀана.
6Гьелъ пачаясда абуна:
«Дур ишазул ва гӀакъиллъиялъул хӀакъалъулъ дида рагӀараб хабар битӀараб букӀун буго, 7амма дун гьелда божулей йикӀинчӀо, ячӀун дирго беразда гьеб бихьизегӀан. Дида бащдабцин бицун букӀун гьечӀогури: дур гӀакъиллъи ва бечелъи дида рагӀаралдасаги жеги кутакалда цӀикӀкӀараб букӀун буго. 8Гьардарал гурищ дур гӀадамал! Гьардарал гурищ кидаго дуда цере рахъун чӀарал ва дур гӀакъилаб калам рагӀулел дур цересел чагӀи! 9Гьадин дуй лъикӀабщиналъе квербакъулев ва ГӀизраилалъул тахида мун лъурав дур БЕТӀЕРГЬАН Аллагьасе рецц! ГӀизраилалдехун БЕТӀЕРГЬАНАСУЛ бугеб абадияб рокьуе гӀоло тун вуго Гьес мун пачалъун, ГӀизраил дуца ритӀухъго ва иманалда цебе бачине букӀине».
10Гьелъ пачаясе сайгъаталъе нусиялда къого талант#10:10 120 талант – гӀага-шагарго 4,3 тонна. меседил, дунялалда батарабщинаб къадар хириял махӀгьуинал хурдузул ва жавгьар-якъуталъул кьуна. Шеваялъул бикаца Сулеймание сайгъат гьаруралгӀан гӀемерал хириял хурдул тӀокӀалъ киданиги рачӀинчӀо гьенире.
11Гьединго Офиралдаса месед босун рачӀун рукӀарал Хирамил гумузда лъун гӀемераб багӀараб сандалалъул цӀул ва жавгьар-якъут бачӀана. 12БагӀараб сандалалъул цӀулал БЕТӀЕРГЬАНАСУЛ Рукъалъе ва пачаясул кӀалгӀаялъе хӀубал гьаруна пачаяс, гьединго бакънал рачунел чагӀазе арфаби ва лираби гьаруна. ГьедигӀан кӀудияб къадар сандалалъул цӀулал, я гьелдаса цебе, я хадуб киданиги гьенибе бачӀинчӀо.
13Сулейман пачаяс, жиндирго пачаясулаб сахаватлъиялда рекъон гьелъие сайгъат гьабурабщинаб рикӀкӀинчӀого, гьелда берцин бихьанщинабги ва гьелъ гьарарабщинабги кьуна Шеваялъул бикае. Хадуй гьей цадахъ чукъбигун жиндирго улкаялде тӀадюссана.
Сулейманил бечелъи ва гуч
14Жиб-жиб соналъ Сулеймание щолаан анлънусиялда лъабкъоялда анлъго талант#10:14 666 талант – гӀага-шагарго 23,9 тонна. меседалъул – 15базаргабазухъа, дармихъабазухъа, киналго ГӀарабустаналъул пачабазухъа ва батӀи-батӀиял ракьазул сардаразухъа бачӀунеб хайир рикӀкӀинчӀого.
16Сулейманица кӀинусго кӀудиял, рачитӀа лъун рацӀарал, меседил хъалхъанал гьаруна. Жиб-жиб хъалхъаналъе анлънусго шекел#10:16 600 шекел – гӀага-шагарго 6–7 кило. меседил хӀалтӀизабуна. 17Жеги гьес гьаруна лъабнусго гьитӀинал, рачитӀа бухун гьарурал меседил хъалхъанал – жиб-жиб хъалхъаналъе лъабго мина#10:17 3 мина – гӀага-шагарго 2 кило. хӀалтӀизабуна. Пачаяс гьел Ливаналъул рохьин абулеб кӀалгӀаялда лъуна.
18Жеги пачаяс гьабуна магьидул, кӀудияб, тӀад бацӀцӀадаб меседги бекьараб тах. 19Анлъго болъо букӀана тахил ва тахил мугъги тӀадехун гургинлъараб букӀана. ГӀодоб чӀолеб бакӀалъул кӀиябго рахъалда кверал лъолел бакӀалги рукӀана гьарун ва гьезда аскӀор гъалбацӀалги эхетизаруна. 20АнцӀила кӀиго гъалбацӀ эхетана анлъго болъода тӀад – болъодул жиб-жиб рахъалда цо-цо гъалбацӀ. Киданиги ва цоги кинабгӀаги пачалъиялда гьединаб жо гьабун букӀинчӀо.
21Сулейманил тӀолабго суркӀа-щурун меседил букӀана ва Ливаналъул рохьил КӀалгӀаялъул киналго рукъалъул тӀагӀелал бацӀцӀадаб меседалъул гьарурал рукӀана. ГӀарцул гьабураб щибго букӀинчӀо, щайгурелъул Сулейманил заманалда гӀарцул кӀудияб къимат букӀинчӀо.
22Хирамил гумулгун цадахъ пачаясул кӀудиял дармил гумул рукӀиндал ралъдахъ, лъабго лъагӀалида жаниб цо нухалъ гумул рачӀунаан меседалъул, гӀарцул, магьидул, маймалаказул ва тӀавусазул цӀун.
23Сулейман пача гӀакъиллъиялъул ва бечелъиялъул рахъалъ цогидал киналго пачабаздаса бергьарав вукӀана. 24Дунялалъулго халкъаз Сулейман вихьизе ва БетӀергьанас гьесие кьураб гӀакъиллъиялъухъ гӀенеккизе рес балагьулеб букӀана. 25ВачӀаравщинав чияс, лъагӀалидаса лъагӀалиде, сайгъатал росун рачӀунаан: гӀарцул ва меседил тӀагӀелал, ретӀел, ярагъ ва махӀгьуинал хурдул, чуял ва гӀорцӀенал.
26Сулейманица жиндирго чолгьаказул ва чуязул къадар цӀикӀкӀинабуна. Гьесул рукӀана азаралда ункънусго чолгьакал ва анцӀила кӀиазарго чу. Гьес гьел гьезие рихьизарурал шагьаразда тана ва цоял Иерусалималда жиндихъгоги тана. 27Сулейманил заманалда Иерусалималда гӀарцул къадар гӀадатияб ганчӀилалда бащадаб букӀана, кедралъул цӀулги, гьелъул гьарзалъиялъ, Ягьудиялъул мугӀрузул ракьанлъабазда ругел инжиралъул гъутӀбуздасацин цӀикӀкӀун букӀана. 28Чуял рачӀунаан Сулеймание Мисриялдасан ва Кувеялдасан – пачаясул базаргабаз ричун росулаан гьел Кувеялда. 29Чолгьоко Мисриялдаса босулаан анлънусго гӀарцул шекелалъухъ#10:29 600 шекел – гӀага-шагарго 6 кило., чу – нусиялда кӀикъоялда анцӀго шекелалъухъ#10:29 150 шекел – гӀага-шагарго 2 кило.. Гьединго пачаясул базаргабазги ричулаан чуял – киналго хитиязул ва сириязул пачабазе.
Currently Selected:
3 Пачаби 10: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
