Иоаннил тӀоцебесеб кагъат 3
3
3 бетӀер
1Нилъ Аллагьасул лъимал ругилан абизе ва хӀакъикъаталдаги гьеллъун рукӀинеги Инсуца нилъее кьун бугеб рокьиялъухъ балагье нуж. Гьаб дуниялалъул гӀадамазда Аллагь лъаларелъул, нилъги рикӀкӀунел гьечӀо гьез. 2Гьанже нилъ Аллагьасул лъимал руго, дир хириял, амма щаллъун нилъ рукӀинелали жеги загьирлъун гьечӀо. Амма нилъеда лъала, МасихӀ вачӀараб мехалда, нилъ гьесда релълъунеллъи, кинав вугевали гьев нилъеда вихьизе вугелъул. 3Гьев вацӀцӀадав вугелъул, гьевго гӀадин вацӀцӀалъула гьединаб хьул гьесде лъунщинавги.
4Мунагь гьабулевщинас къанунги хвезабула, къанун хвезаби бугелъулха мунагьги. 5Нужеда лъала МасихӀ нилъер мунагьал чуризе гӀоло загьирлъаравлъи ва гьесда мунагь гьечӀеблъиги. 6Гьесде цолъун вугевщинас мунагь гьабуларо, мунагь гьабулевщинасдаги гьев вихьунги лъанги гьечӀо.
Нужго къосинаризе гурин
7Лъицаниги нужго къосинаризе гурин, дир лъимал: МасихӀ ритӀухъав вугев гӀадин, ритӀухъав вукӀуна ритӀухъабщинаб гьабулевги. 8Мунагь гьабулевги илбисалъул рахъалда вуго, авалалдаса бахъарабго мунагь гьабулеб бугелъул гьеб. Илбисалъул ишал хвезаризейин Аллагьасул Вас загьирлъарав. 9Аллагьасдасан лъугьаравщинас мунагь гьабуларо, гьесулъ Аллагьасул тӀабигӀат бугелъул. Гьесда мунагь гьабизе кӀоларо, гьев Аллагьасдасан лъугьун вугелъул. 10Гьеле гьелдалъун ратӀа гьаризе лъала Аллагьасул лъималги илбисалъул лъималги: ритӀухъаб гьабуларевщинавги ва жиндирго вац вокьуларевщинавги Аллагьасдасан гуро.
Цоцазе рокьа нуж
11Авалалдасанго нилъехъе амру бачӀун букӀиндалха нилъ цоцазе рокьайилан. 12Илбисалда нахъвилълъун жиндирго вац чӀварав Къабил гӀадин рукӀунге. Щай гьес вац чӀварав? Гьесул ишал квешал рукӀиндал ва вацасул ишалги ритӀухъал рукӀиндал чӀвана.
13Гьединго гьаб дуниялалъе нуж рокьунгутӀиялда гӀажаиблъуге, вацал. 14Нилъеда лъала нилъ хвалдаса гӀумруялде рачӀараллъи ва гьебги загьирлъана вацал рокьиялдалъун. Рокьуларев – хвалил кверщаликь хутӀула. 15Жиндирго вац вокьуларевщинав ккола чи чӀвалев чи. Нужеда лъала чи чӀвалев цониги чиясулъ абадияб гӀумру хутӀулареблъиги.
16Нилъее гӀоло гьес жиндирго рухӀ кьеялдалъун лъана нилъеда МасихӀил рокьи, нилъецаги вацазе гӀоло рухӀ кьезе ккола. 17Дуниялалъул бечелъи жиндир бугев чиясда жиндирго вац мискинго вихьидал гьев кьурун вуссунев вугони, Аллагьасде рокьи гьесулъ кисаха букӀинеб? 18РачӀа, дир лъимал, нилъго цоцазе рокьилин, рагӀудалъунги кӀал-мацӀалдалъунги гуреб, ишалдалъунги ва хӀакъабщиналдалъунги.
19-20Гьединин нилъеда лъалеб нилъ хӀакъабгун рукӀин ва гьединин, нилъерго намусалъ нилъеда гӀайиб чӀвалеб мехалда, Аллагьасда цебе нилъеца ракӀалги парахалъизарулел. Аллагь нилъер намусалдаса тӀадегӀанав вугелъул ва гьесда кинабго лъалелъул! 21Нилъер намусалъ нилъеда гӀайиб чӀвалеб гьечӀони, Аллагьасда цебе нилъер ракӀ сородуларо. 22Нилъеца гьесул амрабиги тӀуразарулелъул ва гьесие бокьарабги гьабулелъул, щиб гьараниги щола нилъее гьесдасан. 23Гьесул амру буго нилъ гьесул вас ГӀиса МасихӀида божайилан ва МасихӀица нилъеда лъазабураб куцалда цоцазе рокьайиланги. 24Жиндир амру тӀубазабулев чи Аллагьас жиндего цолъизавула, живго гьев чигун цолъула. Гьес нилъее кьураб РухӀ нилъелъ букӀин бихьунин нилъеда лъалеб гьев нилъгун цолъун вугевлъи.
Currently Selected:
Иоаннил тӀоцебесеб кагъат 3: АварАК
Highlight
Share
Copy

Want to have your highlights saved across all your devices? Sign up or sign in
© Институт перевода Библии, 2005-2023