Иоаннил тӀоцебесеб кагъат 2

2 бетӀер

1Гьаб дица нужехъе хъвалеб буго, дир лъимал, нужеца мунагьал гьаричӀого рукӀине. Цо лъицаниги мунагь гьабуни, нилъер вуго гьесул рахъалъ Инсул судалда кӀалъазе ритӀухъав чи – ГӀиса МасихӀ. 2Гьев вуго нилъер мунагьал чуризе къурбан, цохӀо нилъер гурелги, тӀолабго гӀаламалъул мунагьал чуризе къурбан.

3Нилъеда Аллагь лъалев вукӀин бихьула нилъеца гьесул амруял тӀуразарулел ругони. 4Жинда гьев лъалинги абулев, амма гьесул амруял тӀуразаруларев чи гьерсихъан вуго, хӀакъабги гьечӀо гьесулъ. 5Гьесул рагӀи тӀубазабулев чиясулъ хӀакълъунго камиллъула Аллагьасде рокьи. Гьелдасанин нилъеда лъалеб нилъ гьесде цолъун рукӀин. 6Аллагьгун жив цолъун хутӀулин абулевги хьвадизе ккола ГӀиса МасихӀ хьвадарав гӀадин.

ЦӀияб амру

7Нужее цӀияб амру гьабизе гуро, дир хириял, дица нужехъе хъвалеб бугеб. Гьеб буго авалалдаго нужее гьабун букӀараб цебегосеб амру. Гьеб цебегосеб амру ккола нужеда рагӀун букӀараб рагӀи. 8Амма гьале цӀияб амру гьабулеб буго нужее – хӀакъабщинаб ГӀисалъги нужелъги бихьулеб бугелъул, бецӀлъи лъутулеб бугелъул ва хӀакъаб канлъиги рещтӀун бугелъул.

9Жив канлъуда вугиланги абулев, амма жиндирго диналъул вац вокьуларев чи жеги бецӀлъуда вуго. 10Жиндирго вац вокьулев чи канлъуда хутӀула ва гьесдалъун щивниги къосинеги гьечӀо. 11Жиндирго вац вокьуларев чи бецӀлъуда вуго, бецӀлъуда хьвадулевги вуго. БецӀлъиялъ берал бецлъизарун ругелъул, кивехун иневали лъаларого хутӀун вуго гьев.

12Гьале дица нужехъе хъвалеб буго, дир лъимал, ГӀисал цӀар сабаблъун мунагьал чурун ругелъул. 13Гьале нужехъе хъвалеб буго, умумул, авалалдаго вукӀарав нужеда лъан вугелъул. Нужехъеги хъвалеб буго, гӀолилал, илбис къезабизе кӀун бугелъул нужеда. 14Дица нужехъе хъвана, дир лъимал, Эмен нужеда лъан вугелъул. Дица нужехъе хъвана, умумул, авалалдаго вукӀарав нужеда лъан вугелъул. Дица нужехъе хъвана, гӀолилал, нуж къуватал ругелъул, Аллагьасул рагӀиги нужелъ бугелъул ва илбис къезабизеги кӀун бугелъул нужеда.

Гьаб дуниял бокьуге

15Гьаб дуниялги бокьуге, дуниялалда бугебги бокьуге. Дуниял бокьулесулъ Инсуде рокьи гьечӀо. 16Дуниялалда бугебщинаб кколелъул чорхол гьаваги, берзул гьаваги ва гьаб дуниялалъул боцӀудаса чӀухӀиги. Гьеб Инсудасан бачӀараб гуро, дуниялалдасан бачӀараб буго. 17Дуниял лъутун унеб буго, гьелдаго цадахъ унеб буго гьелъул чӀухӀи-гьаваги. Амма Аллагьасул амру тӀубазабулев чи абадиялъго хутӀила.

Тажал вахъине вуго

18Ахирзаман гӀагарлъулеб буго, дир лъимал. Нужеда рагӀун букӀана Тажал (МасихӀил тушман) вахъине кколилан. Гьанже гьел МасихӀил тушманзаби гӀемерлъун ругелъулин нилъеда лъалеб бугеб ахирзаман гӀагарлъун букӀин. 19Гьел нилъеда гьоркьосан рахъана, амма гьел нилъерал рукӀинчӀо. Нилъерал рукӀаралани, нилъгун хутӀилаан гьел. Амма киналгоги нилъерал рукӀинчӀолъи загьирлъизейин гьел нилъеда гьоркьоса арал.

20Нужелъе Илагьияб РухӀ ГӀисадалъун рещтӀана, гьединлъидал нужеда кинабго лъала. 21ХӀакъабщинаб нужеда лъаларилан гуро дица нужехъе гьаб хъвалеб бугеб, хъвалеб буго нужеда гьеб хӀакъабщинабги лъалелъул ва кинаб букӀаниги гьереси гьелдасан бижулареблъиги лъалелъул. 22МасихӀ гурилан ГӀисаде абулев чиги гьерсихъан гурев ватани, гьерсихъан щивха цинги кколев? Гьединав чи ккола Инсудасаги Васасдасаги инкар гьабурав Тажал. 23Васасдаса инкар гьабулевщинав чияс Инсудасаги инкар гьабула. Вас къабул гьавуравщинав чияс Эменги къабул гьавула.

24Авалалдаго нужеда рагӀарабщинаб нужелъго цӀуне. Авалалдаго рагӀарабщинаб нужелъ хутӀани, нужги хутӀулелха Инсулъги Васасулъги. 25Васас нилъее рагӀи кьун буго абадияб гӀумру насиблъулилан!

26Нуж къосинаризе къваригӀаразул хӀакъалъулъин дица гьаб нужехъе хъвалеб бугеб. 27ГӀисадалъун рещтӀараб Илагьияб РухӀ нужелъ хутӀулеб бугелъул, нужеда лъицаниги малъизе кколаро. Амма гьеб Илагьияб РухӀалъ нужеда кинабго малъулеб бугелъул, гьеб хӀакъаб бугелъул ва гьересиги гьелъулъ гьечӀелъул, гьелъ малъухъе нуж МасихӀгун цолъун рукӀа.

Аллагьасул лъимал

28Гьанже, дир лъимал, МасихӀгун цолъун рукӀа, гьев рещтӀараб мехалда хӀинкъичӀого рукӀине ва гьев вачӀаравго намуслъун лъутизе ккечӀого рукӀине. 29Гьев ритӀухъав вукӀин лъалев чиясда лъала ритӀухъго хьвадулелщиналги Аллагьасул лъимал кколеллъи.

Currently Selected:

Иоаннил тӀоцебесеб кагъат 2: АварАК

Highlight

Copy