Иоаннил тӀоцебесеб кагъат 4

4 бетӀер

РухӀазул хӀалбихьулеб куц

1Аллагьасдасан бачӀараб рухӀ жиндилъ бугин абуравщинав чиясда божуге, хириял. Гьезул хӀалбихье, Аллагьасдасанищ гьел ругелали лъазе. ГӀемерал гьересиаварагзаби рахъун ругелъул гьаб дуниялалда. 2Аллагьасдасан гьеб рухӀ букӀин гьадин лъазе кӀола: инсанасул къаркъала-черхгун ГӀиса МасихӀ ракьалде вачӀун вукӀин ритӀухъ гьабулевщинасулъ буго Аллагьасдасан бачӀараб рухӀ. 3ГӀиса ритӀухъ гьавуларевщинав чиясулъ бугеб рухӀ Аллагьасдасан бачӀараб гуро. Гьеб буго Тажалидасан бачӀине бугилан нужеда рагӀун букӀараб ва гьанже дуниялалде бачӀун бугеб рухӀ.

4Нуж Аллагьасулал руго, дир лъимал, ва нуж гьел рухӀаздаса бергьана. Нужелъ бугеб рухӀ гӀемерго къудратаб бугелъул гьаб дуниялалъул гӀадамазулъ бугеб рухӀалдаса. 5Гьел гьаб дуниялалъул гӀадамал руго, гьез бицунебщинабги гьаб дуниялалъул гӀадамазулаб буго, гьединлъидал гӀаламги гьезухъ гӀенеккула. 6Нилъ Аллагьасулал руго, Аллагь лъалевав нилъехъ гӀенеккула, Аллагьасулав гурев нилъехъ гӀенеккуларо. Гьелдалъун батӀа гьабизе лъала хӀакъикъияб рухӀги гьересияб рухӀги.

Аллагьасдасан бачӀараб рокьи

7Цоцазе рокьа, хириял, рокьи Аллагьасдасан бачӀараб буго, рокьи рекӀелъ бугевщинав чи Аллагьасдасан лъугьарав вуго, ва гьесда Аллагьги лъала. 8Рокьи рекӀелъ гьечӀесда Аллагь лъаларо, Аллагьги рокьи кколелъул. 9Аллагьасул нилъеде бугеб рокьи гьадин загьирлъана: гьес жиндирго цохӀого вугев Вас дуниялалде витӀана гьесдалъун нилъеца гӀумру гьабизе. 10Гьеле гьелъулъ буго рокьи – Аллагь нилъее вокьиялъулъ гуреб, гьесие нилъ рокьиялъулъ ва нилъер мунагьал чуризе къурбанлъун гьес жиндирго Вас витӀиялъулъги. 11Аллагьасе нилъ гьедин рокьулел ругеб мехалда, нилъ цоцазеги рокьизе ккола, хириял. 12Аллагь лъиданиги киданиги вихьичӀо, амма нилъ цоцазе рокьани, Аллагь нилъелъ хутӀула ва гьесдасан бачӀараб рокьиги нилъелъ камиллъула.

13Нилъ гьесулъ хутӀиги ва гьев нилъелъ хутӀиги нилъеда лъала гьес жиндасанго нилъехъе РухӀ битӀун бачӀиналдалъун. 14ГӀалам хвасар гьабизе бокьун, жиндирго Вас Инсуца витӀаравлъи нижеда бихьана ва нижеца гьелъие нугӀлъиги гьабула. 15ГӀиса Аллагьасул Вас вукӀин ритӀухъ гьабулев чиясулъ Аллагь хутӀула ва Аллагьасулъ гьевги хутӀула. 16Нилъеда лъалеб буго Аллагьасе нилъ рокьулеллъи ва гьелда божаралги руго нилъ. Аллагьги рокьи ккола, рокьи рекӀелъ хутӀулев чи Аллагьасулъги хутӀула, ва гьесулъ Аллагьги хутӀула. 17Гьедин нилъеда гьоркьоб рокьи камиллъана, къиямасеб къоялдаса хӀинкъичӀого рукӀине. Гьаб дуниялалда нилъги МасихӀида релълъун ругелъулха! 18Рокьи бугелъуб хӀинкъи букӀунаро, камилаб рокьиялъ хӀинкъи къватӀибе гъола, щайгурелъул гӀадамал хӀинкъулеб жо тамихӀ бугелъул. ХӀинкъарасулъ рокьи камиллъуларо.

19Нилъее Аллагь вокьула, тӀоцерего гьесие нилъ рокьидал. 20Дие Аллагь вокьулинги абун, жиндирго вац рихарав чи гьерсихъан вуго. Жиндаго вихьулев вац вокьуларев чиясе вихьуларев Аллагь вокьизе рес гьечӀелъул. 21Нилъее МасихӀидасан амру буго Аллагь вокьулесе гӀадамалги рокьизе кколилан.

Currently Selected:

Иоаннил тӀоцебесеб кагъат 4: АварАК

Highlight

Copy