Коринфиязухъе тӀоцебесеб кагъат 9

9 бетӀер

Чапарлъун вукӀиналдаса пайда босичӀо Павелица

1Дун эркенав чи гурищ? Дун МасихӀил чапар гурищ? Нилъер ТӀадегӀанав ГӀиса вихьарав чи гурищ? ТӀадегӀанасде нуж цолъи дир хӀаракатчилъиялъул хӀасил гурищ? 2Цогидазе дун чапар ватичӀониги, нужее дун чапарлъидалха! ТӀадегӀанасде цолъараб нужер гӀумруялъ нугӀлъи гьабула дун МасихӀил чапар вукӀиналъе.

3Гьеле гьедин, дунго ритӀухъ гьавун, жаваб кьола дица дир ишазул цӀех-рех гьабизе бокьаразе. 4Кваназеги гьекъезеги гӀарац щвезе ихтияр гьечӀебищ нижер? 5Нижер ихтияр гьечӀебищ, цогидал чапарзабаз гӀадин, ТӀадегӀанав ГӀисал вацаз яги Пётрица гӀадин, нилъер диналъул яцаздасан лъади ячине ва гьейгун цадахъ сапаралде ине? 6Яги гӀицӀго диеги Барнабаегийищ ихтияр гьечӀеб бетӀербахъиялъе хӀалтӀичӀого чӀезе?

7Мухьдахъ ккурав рагъухъан жиндирго гӀарацги харж гьабун вагъулевищ? Жиндирго цӀибил квинчӀого толебищ ахихъанас? Жиндирго рохьдолъа гӀачиязул рахь гьекъечӀого толебищ вехьас? 8ГӀадамазул гӀадатияб гӀумру-яшавалдасан гьединал мисалал рачине бегьи гуребги, гьелъулго хӀакъалъулъ Къануналдаги буго. 9Мусал Къануналда хъван бугелъулха: «Лал бокъунеб бугеб оцол кӀалалда таргьа баге», – ян. Аллагьас оцазул тӀалаб-агъаз тӀаде босун абурал рагӀабийищ гьел? 10Гьес нилъер хӀакъалъулъ гуребдай гьеб абун бугеб? Гьайгьай, нилъер хӀакъалъулъ абун буго. Векьарухъанас бекьула ва лал тӀамулес лалги тӀамула хуриса бачӀаралъул бутӀа щвезе хьулалда. 11Нужеда гьоркьоб Илагьияб РухӀалъул хьон хьарал нижеца хьул-къасд гьабулеб бугони, гьелдасан бижаралъул бутӀа бетӀербахъиялъе щвелародайилан – цӀикӀкӀараб мухьищха гьеб кколеб? 12Цогидазул ихтияр батани нужедасан кумек тӀалаб гьабизе, гьайгьай, нижер жеги цӀикӀкӀараб ихтияр буго гьелъие.

Амма нижеца киданиги пайда босичӀо гьеб ихтияралдаса. Нижеца кинабго хӀехьола МасихӀил хӀакъалъулъ Рохалил хабаралъе сундулъго квалквал-квекӀен гьечӀого хутӀизе. 13Нужеда лъаларебищ Мукъадасаб Рокъоб хъулухъ гьабулел чагӀаз гьенисан бетӀербахъулеблъи? Къурбаналъул гьан лъолеб бакӀалъул тӀалаб гьабулезеги гьеб къурбаналъул бутӀа жидеего босизе ихтияр букӀин лъаларебищ? 14Гьединго ТӀадегӀанасги бихьизабун буго Рохалил хабар лъазабулезги гьелдасан бетӀербахъеян.

15Гьединаб цониги ихтияралдаса цониги нухалъ пайда босичӀо дица. Гьанжеги дица нужехъе гьеб тӀалаб гьабун гуро хъвалеб бугеб. Дунго чӀухӀизе бегьулелдаса махӀрумлъизегӀан хвезе бокьила. 16Рохалил хабар лъазабулеб бугилан чӀухӀдаризе бегьуларо дун. Дица тӀубазабичӀого гӀолареб тӀадкъай бугелъулха гьеб! Рохалил хабар халкъалда лъазабичӀони, балагь рещтӀаги диде! 17Дунго лъикӀав лъугьун гьеб гьабулеб букӀарабани, гьелъухъ мухьги щвелаан дие. Дунго лъикӀав лъугьун гуро, дида тӀадкъан бугелъул гьабулеб буго. 18Щиб кириха дие щолеб бугеб? Дие щолеб кири ккола – дица щибго мухь гьечӀого Рохалил хабар лъазабулеб букӀин ва гьелдалъун дие бугеб ихтияралдаса пайда босулеб гьечӀолъиги.

19Дун эркенав чи вуго, лъилниги лагъ гуро, амма дун киназулго лагълъун лъугьана, кигӀан кӀваниги цӀикӀкӀун гьел дихъ гӀенеккизе бокьун. 20ЖугьутӀазда гьоркьов дун лъугьана жугьутӀав гӀадин, жугьутӀал дихъ гӀенеккизе бокьун. Къанун цӀунулезда гьоркьов дун хьвадана гьеб Къанун цӀунулев чи гӀадин (Къануналъ дида тӀад кверщел гьабулеб гьечӀониги), Къанун цӀунулелалги дихъ гӀенеккизе бокьун. 21Къанун лъаларезда гьоркьов дун чӀана Къанун лъаларевлъун, (амма МасихӀил кверщаликь вугев дида Аллагьасул къанун лъала), Къанун лъаларел чагӀиги дихъ гӀенеккизе бокьун. 22ЗагӀипазе дун загӀипавлъун лъугьана, загӀипалги дихъ гӀенеккизе бокьун. Киназдаго гьоркьов дун гьезда релълъун лъугьана, щиб сабаб-гӀамал батунги гьезул цо-цоялгӀаги хвасар гьаризе бокьун. 23Гьеб кинабго дица гьабулеб буго Рохалил хабаралъе гӀоло, гьелъул баркаталъул бутӀа насиблъизе бокьун.

24Нужеда лъаларищ: къецазда киналго рекерухъаби рекерула, амма бергьенлъиялъул шапакъат цоясе гурони щоларо. Нужги рекере гьеб шапакъат щвезе бокьун. 25Къецазул киналго гӀахьалчагӀаз гӀемераб жоялдаса жалго махӀрум гьарула, речӀалел тӀугьдузул гор щвезе бокьун. Нилъецани гьеб гьабула речӀаларел тӀугьдузул гор щвезе бокьун. 26Гьедин дунги векерулев вугев ватани, мурадалде щвезе бокьун векерулев вуго. Зарул рагъулъ дунги гӀахьаллъулев вугев ватани, зарал гьаваялде хьвагӀизе гуро. 27Кьабулеб-тункулебги хӀехьон, квегъулеб буго дица черх, гьелда тӀад кверщелги гьабулеб буго, цогидалги къецазде ахӀун, дунго гъоркь хутӀилевилан хӀинкъун.

Currently Selected:

Коринфиязухъе тӀоцебесеб кагъат 9: АварАК

Highlight

Copy