Потон 28

28-тӥ ЛЮКЕТ

1Израиль пиос пӧлысь бырйыса, ас бордад Аарон агайдэ пиосыныз кут – Аарон но солэн Надав, Авиуд, Елеазар, Ифамар пиосыз Мон дорын священникъёс мед луозы. 2Аарон агаедлы священниклэсь дӥськутсэ дася – данлыко, чеберлыко мед адӟиськоз. 3Сюлмынызы визьлыкоесь муртъёслы, кинъёслы Мон бадӟым визьлыклэсь, [валанлэсь] духсэ сётӥ, вера, соос Ааронлы [вӧсяськон] дӥськут мед дасялозы – Ааронэз Мыным священнике пуктон понна.

4Тани соос таӵе дӥськут дасяны кулэ: муресазь, ефод, риза выл дӥсь, пужыятэм дэрем, кидар#28:4 кидар – священниклэн йыраз нуллон изьыез (тюрбан) (йыре понон), кускерттон. Аарон агаедлы, солэн пиосызлы вӧсяськон дӥськут мед дасялозы, со Мыным священник мед луоз. 5Соос зарни, чагыр, нап-горд, пеймыт-горд ыжгон, етӥн шорт мед басьтозы, 6зарнилэсь, чагыр, нап-горд, пеймыт-горд ыжгонлэсь, етӥн шортлэсь ефод мед дасялозы, быгатыса лэсьтэмын со мед луоз. 7Ефодлэсь кык люкетъёссэ огазе карон понна солэн мыд-мыд палтӥз пельпумвыл пуктэт вурӟемын луыны кулэ. 8Ефод вылын нуллон кускерттон ефодэн одӥг кадь луыны кулэ, со лэсьтэмын мед луоз [чылкыт] зарнилэсь, чагыр, нап-горд, пеймыт-горд ыжгон шортлэсь, етӥн шортлэсь. 9Кык оникс из кут, соос вылэ Израильлэн пиосызлэсь нимзэс гожты: 10одӥгаз из вылэ куать ним, мукетаз из вылэ куать ним гожты, арессэс лыдэ басьтыса; 11со кык изъёс вылэ печать лэсьтӥсез гожъяты Израильлэн пиосызлэсь нимъёссэс; соосты зарни гопъёсы-гутёосы поныты. 12Та кык изъёсты ефодлэн пельпум вылъёсаз юнматы; та изъёс – Израильлэсь пиоссэ тодэ ваён понна. Соослэсь нимъёссэс Аарон кыказ ик пельпум вылъёсаз Кузё-Инмар азьын тодэ вайытыса нуллоз. 13[Чылкыт] зарнилэсь гопъёс-гутёос лэсьты; 14чылкыт зарнилэсь кык жильы [лэсьты] – пуныса лэсьты но со жильыосты [пельпум вылысь] гопъёс-гутёос борды шедьыты. 15Суд ужъёсты сэрттыку-пертчыку уже кутӥськись муресазез быгатыса лэсьты, ефодэз кадь ик сое лэсьты: зарни сӥньысъёслэсь, чагыр, нап-горд, пеймыт-горд ыжгон шортлэсь, етӥн шортлэсь сое лэсьты; 16со ньыль сэрего, кык полэсо луыны кулэ, кузьдалаез но, пасьталаез но вись пасьта луыны кулэ; 17со борды ньыль радэн дуно изъёс бырттылы; нырысетӥ радэ рубин, топаз, изумруд изъёсты тыр; 18кыкетӥ радэ карбункул, сапфир, алмаз изъёсты тыр; 19куинетӥ радэ яхонт, агат, аметист изъёсты тыр; 20ньылетӥ радэ хризолит, оникс, яспис изъёсты пон; зарни сӥньыслэсь лэсьтэм гопъёсы-гутёосы соос тыремын луыны кулэ. 21[Кык пельпум вылъёсазы юнматэм] дас кык изъёс Израильлэн [дас кык] пиосызлэн нимъёссы мында луыны кулэ; со изъёс вылэ соослэн нимъёссы гожтэмын луыны кулэ, [арессэс лыдэ басьтыса]; печать вылын кадь котькуд из вылын дас кык выжыослэн нимаз-нимаз нимъёссы гожтэмын луыны кулэ. 22Муресазьлы чылкыт зарнилэсь жильыос лэсьты – гозы кадь пунэмын мед луозы; 23кык зарни кульчоос лэсьты но муресазьлэн мыд-мыд палаз та кык [зарни] кульчоосты бырттылы. 24Зарни сӥньыслэсь пуныса лэсьтэм кык жильыосты муресазьлэн [мыд-мыд пал] сэрегаз юнматэм кык кульчоос борды шедьыты, 25нош кык жильыослэсь кык пумзэс ик кык гопъёс-гутёос борды шедьыты но ефодлэн азьпалысьтыз пельпумвыл пуктэтъёсын герӟа; 26эшшо кык зарни кульчо лэсьты но муресазьлэн мукет мыд-мыд палаз юнматы, со ефодлэн пушказ интыяськемын; 27эшшо кык зарни кульчо лэсьты но соосты ефодлэн кык пельпумвыл пуктэтъёс борды ул палтӥз, азьдориназ, ефодлэн кускерттонэзлэн вылӥетӥз, бырттэм интызы вӧзы юнматы. 28Муресазьлэн кульчоосыз чагыр ыжгон шортэн ефодлэн кульчоосыныз герӟамын мед луозы, озьы: ефодлэн кускерттонэзлэн вылӥяз улыса, муресазь ефод борды ӝик-ӝик кариськыса мед улоз. 29Соку Аарон суд ужъёсты сэрттыку-пертчыку уже кутӥськись муресазь вылаз, сюлэм дораз, Израиль выжыослэсь нимзэс нуллоз, вӧсяськон интые пыракуз, Кузё-Инмар азьын соослэсь нимзэс буре вайыны. [Суд ужъёсты сэрттыку-пертчыку уже кутӥськись муресазь вылэ пунэм жильыосты пон, муресазьлэн мыд-мыд пал сэрегаз пон, оникс изъёсты интыян кыксэ ик гопъёсты-гутёосты кыкезлэн ик пельпумвыл пуктэтлэн азьпалаз пон.] 30Кузё-Инмарлэсь эриксэ тодон муресазе уримен туммим#28:30 урим но туммим – жеребе (жребий) куштыку, Кузё-Инмарлэсь эриксэ тодон понна кутӥськись изъёс, соосты архиерей пичи пуйыын (калтаын) гадяз ошыса нуллӥз пон, соос Ааронлэн сюлэм вылаз улозы, куке со [вӧсяськон интые] пыроз, Кузё-Инмар азе султоз; озьы Аарон котьку но израиль пиослэсь суд ужъёссэс сэрттон-пертчон арбериез Кузё-Инмар азьын сюлэм вылаз нуллоз.

31Ефод вӧзы быдэсак чагыр буёло риза выл дӥсь лэсьты; 32солэн шораз йыр понон пасез мед луоз; медаз кесяськы шуыса, солэн пась котыртӥз ожгарчиослэн дӥсянзылэн кадь басма вуремын мед луоз. 33Сӧзытӥз котырак чагыр, нап-горд, пеймыт-горд шортлэсь, [етӥн шортлэсь] гранат улмолы укшась шарикъёс лэсьты; [соос выллем ик улмоос], соос вискы зарни чингыли гырлыос ош; 34выл дӥсьлэн сӧзы котыртӥз зарни чингыли гырлы ош, со вӧзы – улмолы укшась шарик, чингыли гырлы ош, со вӧзы нош улмолы укшась шарик ош; 35Аарон сое служить карыкуз дӥсялоз, вӧсяськон интые, Кузё-Инмар азе султыны пырыкуз, чингыли гырлыосызлэн куаразы мед кылӥськоз; отысь потыкуз но мед кылӥськоз, со медаз кулы шуыса.

36Чылкыт зарнилэсь пластина лэсьты но со вылэ печать вылэ кадь тазьы гожты: «Кузё-Инмарлэн Святыняез», 37чагыр шортлэсь пунэм векчи гозыен сое кидар борды дум, кидарлэн азьпалаз мед луоз; 38Ааронлэн кымес вылаз луоз, Аарон израиль пиослэн ваем курбонъёссылэн, вань салам-кузьымъёссылэн шекъёссы понна кыл кутоз; Кузё-Инмар соосты кабыл мед басьтоз шуыса, та йыркерттэт пластинаез Аарон котьку но кымес вылаз мед нуллоз.

39Дэремзэ етӥн шортлэсь куы, кидарзэ но етӥн шортлэсь лэсьты, пужыё кускерттон куы; 40Аарон пиослы но етӥн дэралэсь дэрем вур, кускерттонъёс, йыркерттэтъёс лэсьты, данлыкоесь, чебересь мед адскозы шуыса. 41Аарон агайдэ но солэсь пиоссэ таӵе дӥськутэн дӥся, вӧйын зырӟы, священнике пукты, соосты дун-чылкыт кар но, соос, Мынам священникъёсы луыса, Мыным ужаса-тыршыса улозы. 42Етӥнлэсь улдэрем куы возьдаськон интызэс ватон понна, улдэремзы кускысен пыдес кемозь мед луоз. 43Аарон но, солэн пиосыз но тае мед дӥсялозы, вӧсяськон скинияе пырыкузы яке вӧсяськон интыысь курбон сётон ӝӧк доры вӧсяськонэз ортчытыны султыкузы, [асьсэ вылэ] сьӧлык басьтоно медаз луэ но соин сэрен кулоно медаз луэ шуыса, пуктон-косон Ааронлы но солэн выжыысьтыз выжыосы улӥсь пиослы пумтэм вапумъёслы сётэмын.

Currently Selected:

Потон 28: УДМБИБ

Highlight

Copy