Потон 29

29-тӥ ЛЮКЕТ

1Соосты Мыным священнике пуктон азяд тани тон мар карыны кулэ: кут одӥг ошпиез, кык такаосты – мугор вылазы шекъёссы медаз луы, 2басьты юмал нянь, вӧйын сураса пыжем юмал нянь, вӧйын зырам юмал куарняньёс: чабей пызьлэсь соосты пыж; 3соосты, одӥг мушкое (корзинае) поныса, мушкоеныз валче татчы вай, ошпиен кык такаосты но вай. 4Ааронэз но солэсь пиоссэ вӧсяськон скиния пырон доры вай, соосты вуэн гылты. 5[Вӧсяськон] дӥськутъёсты кут но Аарон вылэ дэрем, риза выл дӥсь, ефод, муресазь дӥся, ефод вылтӥз кускерттонэн дум; 6йыраз кидар изьыя но со борды святынялэсь диадимзэ юнматы; 7зырӟон вӧй кут но солэн йыр вылаз кисьты, йырзэ вӧйын зыра. 8Солэсь пиоссэ татчы вай, вылазы дэремъёс дӥся; 9Ааронлэсь но, солэсь пиосызлэсь но куссэс еэн дум, йыр вылазы кидар изьы изьыя, пуктон-косонъя соос пумтэм вапумъёс ӵоже священникъёс луозы; озьы Ааронэз но, солэсь пиоссэ но священнике пукты. 10Вӧсяськон скиния азе ошпиез вай, соку Аарон но солэн пиосыз ошпилэн йыр вылаз кизэс понозы [Кузё-Инмар азьын, вӧсяськон скинияе пырон ӧс дорын]; 11вӧсяськон скинияе пырон дорын Кузё-Инмар азьын ошпиез ванды; 12ошпилэсь вирзэ кут но чиньыеныд курбон сётон ӝӧклэсь сюръёссэ зыра, нош [кылемзэ] ваньзэ вирез курбон сётон ӝӧклэн выжыяз кисьты. 13Ошпилэн пушкысьтыз вань кӧйзэ окты, мус бордысь кӧй пуйыез, кыксэ ик пекляосты, соос вылысь кӧез но, соосты курбон сётон ӝӧк вылын сут; 14нош ошпилэсь сӥльзэ, кузэ, кырсь-жоб макеоссэ, стан сьӧры поттыса, тыл вылын сут: та сьӧлыкъёс понна сётӥськись курбон. 15Кут одӥгзэ такаез, Аарон но солэн пиосыз такалэн йыр вылаз кизэс мед понозы; 16такаез ванды, вирзэ тусьтые кут, со вирын курбон сётон ӝӧкез котыр ласянь пазя; 17така сӥлез люкетэн-люкетэн вандылы, пуш тӥрлыксэ [вуэн] миськы, пыдъюмылзэ но, соосты корам сӥль люкетъёс вылэ, йыр вылаз пон; 18курбон сётон ӝӧк вылын быдэссэ такаез сут: та Кузё-Инмарлы тылын сутыса сётэм курбон, Кузё-Инмар азьын ярам, ческыт зын поттӥсь курбон. 19Мукетсэ такаез кут, Аарон но солэн пиосыз такалэн йыр вылаз кизэс мед понозы; 20такаез ванды, вирзэ тусьтые кут но Ааронлэн бур пель дураз пон, пиосызлэн но бур пель дуразы пон, бур кизылэн бадӟым чиньы вылазы, бур пыдзылэн бадӟым чиньы вылазы пон; курбон сётон ӝӧкез котыр ласянь вирен пазьгы. 21Курбон сётон ӝӧк вылысь вир, нош озьы ик зырӟон вӧй басьты, соосын Аарон вылэ, солэн дӥськутэз вылэ, солэн пиосыз вылэ, соослэн дӥськутсы вылэ пазьгы, – соку Аарон но солэн дӥськутэз, солэн пиосыз но соослэн дӥськутсы но дун-чылкыт каремын луозы. 22Такалэсь кӧйзэ, быж бордаз ошиськыса улӥсь кӧй пуйыез, пуш тӥрлыкъёсыз вылэ люкаськем кӧез, мус бордысь кӧй пуйыез, кыксэ ик пекляез, вылазы люкаськем кӧез басьты, бурпал пельпумзэ но, малы ке шуоно та – священнике пуктыку курбон сётэм така, 23одӥг сукыри нянь, вӧйын пыжем куарнянь, одӥг юмал нянь Кузё-Инмар азьын сылӥсь мушкоысь басьты, 24ваньзэ тае Ааронлэн ки вылаз пон, солэн пиосызлэн ки вылазы пон, та салам-кузьымез Кузё-Инмарлэн азяз сэзъяса вылэ ӝут; 25соослэн ки вылысьтызы басьты но курбон сётон ӝӧк вылын тылын сутӥськись курбонэн ӵош сут, Кузё-Инмар азьын ческыт зын мед поттоз: та Кузё-Инмарлы курбон. 26Ааронэз священнике пуктыку курбон сётэм такалэсь мӧлязэ басьты, вай сое татчы, та салам-кузьымез Кузё-Инмарлэн азяз сэзъяса вылэ ӝут, со тынад люкетэд луоз; 27Аарон понна, солэн пиосыз понна, соосты священнике пуктыку курбон сётэм такалэсь мӧлязэ, пельпумзэ вӧсям берад та салам-кузьымез Кузё-Инмар азе сэзъяса вылэ ӝут, – 28израиль пиос курбонлы ваем пудолэсь та люкетъёссэ Ааронлы но солэн пиосызлы сётыны кулэ – та пумтэм вапумъёслы сётэм пуктон-косон, уго та – вылэ ӝутон; та [израиль пиослэсь] тупаса улонлы сӥзем курбонъёссэс вайыкузы израиль пиослэн вылэ ӝутон салам-кузьымзы, соослэн Кузё-Инмарлы ваёно вылэ ӝутон курбонзы. 29Нош Ааронлы служить карыны дасям дӥськут со бере солэн пиосыз кие сётӥськоз, со дӥськутэз дӥсятыса, соосты вӧйын зырӟозы но священнике пуктозы; 30Аарон бере солэн пиосыз пӧлысь потэм [быдӟым] священник вӧсяськон скинияе пырыкуз но отын, святой интыын, служить карылыкуз, сизьым нунал ӵоже та дӥськутъёсты мед нуллоз. 31Священнике пуктыку курбон сётэм такаез басьты но святой интыын сӥльзэ пӧзьты; 32Аарон но солэн пиосыз вӧсяськон скиниялэн пырон ӧс дораз такалэсь сӥльзэ, мушкоысь нянез мед сиёзы, 33уго та пыр соос священнике пуктон понна, священник санэз басьтон понна чылкытатэмын-сузямын; священник луисьтэм мурт тае сиыны кулэ ӧвӧл, уго та святыня; 34священнике пуктыку сиёно курбон сӥльлэн но няньлэн ӵукнаозь люкетэз кылиз ке, со кылемез тыл вылын сут: сое сиыны уг ни яра, уго со святыня. 35Кызьы, мар тыныд лэсьтыны косӥ, Ааронэз но солэсь пиоссэ лэсьтыты; сизьым нунал ӵоже священнике пуктон мед кыстӥськоз. 36Нуналлы быдэ сьӧлыкъёслэсь чылкытатӥськон-сузяськон понна ошпиез курбон сёт, сьӧлык понна курбонэз курбон сётон ӝӧк вылын сое чылкытатон-сузян понна сёт, вӧйын зырӟыса, сое дун-чылкыт кар. 37Сизьым нунал ӵоже курбон сётон ӝӧкез чылкытаты-сузя, дун-чылкыт кар, соку курбон сётон ӝӧк быдӟым святыня луоз: мар со борды йӧтӥськиз – дун-чылкыт луоз. 38Тани тон нуналлы быдэ курбон сётон ӝӧк вылэ таӵе курбонъёс вайылыны кулэ: одӥг аресъем кык ыжпи [– нокыӵе шекъёсыз медаз луэ]; 39одӥгзэ ыжпидэ ӵукна курбон сёт, нош мукетсэ – ӝыт, 40котькуд ыжпиен ӵош, ефалэн дасэтӥ люкетаз чабей пызь поныса вай, гинлэн#29:40 гин – ог 6 литр тэрись сосуд ньылетӥ люкетаз вӧйпу мульыысь пызьыртэм вӧй вай, соосты сура; гинлэн ньылетӥ люкетысьтыз винаез курбон-саламлы кисьты; 41мукетсэ ыжпиез ӝыт курбон сёт, сыӵе ик салам пызен, ӵукна кадь ик кисьтоно курбон-саламен сое Кузё-Инмарлы курбон сёт, – ярамон, ческыт зыно курбон. 42Та тылын сутӥськись курбонэз тӥ нуналлы быдэ, выжыысь выжыосы, котьку но Кузё-Инмарлы сӥзьыса ортчытъяны кулэ, – вӧсяськон скинияе пырон ӧс азьын, отысен Мон тӥледын пумисько, тонэн верасько. 43Отысен израиль пиосын пумисько, Мынам данлыкеным со инты дун-чылкыт луоз. 44Вӧсяськон скинияез, курбон сётон ӝӧкез дун-чылкыт каро; Ааронэз но солэсь пиоссэ дун-чылкыт каро, священник луыса, Мыным мед ужалозы-тыршозы; 45соку Мон израиль пиос пӧлын уло, соослы Инмар луо, 46соку соос тодозы: Мон – соослэн Инмарзы Кузё-Инмар, Египет музъемысь соосты поттӥсь соос пӧлын мед улом шуыса. Мон – соослэн Инмарзы, Кузё-Инмар.

Currently Selected:

Потон 29: УДМБИБ

Highlight

Copy