Потон 27

27-тӥ ЛЮКЕТ

1Сӥттимпулэсь курбон сётон ӝӧк лэсьты, кузьдалаез вить гырпум кузьда мед луоз, пасьталаез – вить гырпум кузьда, со ньыль сэрего мед луоз, ӝуждалаез – куинь гырпум кузьда. 2Солэн ньыль сэрегаз ик сюръёс лэсьты, сюръёс солэн пушкысьтыз мычиськыса мед улозы; сое ыргонэн шобырты. 3Пень киськаны горшокъёс лэсьты, лопаткаос, чашаос, вилкаос, эгыр тыронъёс, ваньзэ таосты ыргонлэсь лэсьты. 4Ыргонлэсь сеткалы укшась решётка лэсьты, ньыляз ик сэрегаз ыргон кульчоос юнматы. 5Решёткаез курбон сётон ӝӧклэн дуртӥз юнматыса пон, сетка курбон сётон ӝӧклэн шорозяз мед вуоз. 6Курбон сётон ӝӧклы сюрыос лэсьты, сӥттимпулэсь куать сюры лэсьты, ыргонэн соосты шобырты; 7солэсь сюрыоссэ кульчоосы тыр, курбон сётон ӝӧклэн кык палтӥз ик сюрыосыз мед луозы, кытчы ке нуыку, соос кулэ луозы. 8Пушкыз солэн тырттэм мед луоз, пуллэсь лэсьтэмын; кыӵеез гурезь йылысен тыныд возьматэмын вал, солы укшатыса мед лэсьтозы.

9Скиниялы азбар лэсьты: лымшор палтӥз азбар кузя ошыны етӥн шортлэсь ын#27:9 ын – завеса, полог куы, одӥг палтӥз кузьдалаез сю гырпум кузьда мед луоз; 10сое кутыса возьыны кызь юбо лэсьты, соослы ыргонлэсь кызь пыдул кутэт лэсьты; юбоослэн шедьытъянъёссы но, герӟетъёссы но азвесьлэсь луыны кулэ. 11Озьы ик уйпал ласянь но – ын сю гырпум кузьда луыны кулэ, сое кызь юбо борды шедьытыса возьыны кулэ, юбоослэн кызь пыдул кутэтсы ыргонлэсь луыны кулэ, юбоос бордысь шедьытъянъёс, соослэн герӟетъёссы [но пыдул кутэтъёссы] азвесен шобыртэмын луыны кулэ. 12Шундыпуксён палтӥз, азбарлэн пасьтала палтӥз, ынлэн кузьдалаез витьтон гырпум кузьда мед луоз; сое возьыны дас юбо пуктэмын луыны кулэ, пыдул кутэтъёсыз но дас луыны кулэ. 13Азбарлэн пасьталаезъя, азьпал ласянь, шундыӝужан палтӥз [ын] витьтон гырпум кузьда мед луоз; [сое возьыны дас юбо пуктоно, соосты возьыны дас пыдул кутэт лэсьтоно]. 14Пыронлэн огпалтӥз [ӝуждалаез] дас вить гырпум кузьда ын ошемын луыны кулэ, сое возьыны куинь юбо пуктоно, юболы быдэ пыдул кутэт кулэ. 15Пыронлэн мукет палтӥз но ын ошемын луыны кулэ, [ӝуждалаез] дас вить [гырпум] кузьда мед луоз, сое возьыны куинь юбо пуктоно, юболы быдэ пыдул кутэт кулэ лэсьтыны. 16Азбар ӟезьы азе ошыны чагыр, нап-горд, пеймыт-горд ыжгон шортлэсь, етӥн шортлэсь катанчи куэмын мед луоз, пужыё мед луоз, [ӝуждалаез] кызь гырпум кузьда мед луоз; сое возьыны ньыль юбо пукты, соослы ньыль пыдул кутэт лэсьты. 17Азбар котырысь вань юбоослэн герӟетъёссы, шедьытъянъёссы азвесьлэсь лэсьтэмын мед луозы; нош юбоослэн пыдул кутэтъёссы ыргонлэсь лэсьтэмын мед луозы. 18Азбарлэн кузьдалаез сю гырпум кузьда, пасьталаез – витьтон гырпум, ӝуждалаез вить гырпум кузьда; ынъёсты куоно етӥн шортлэсь, нош юбоослэсь пыдул кутэтсэс ыргонлэсь лэсьтоно. 19Скиния пушкысь уже кутоно арбериос, отысь вань майыгъёс, азбарысь вань майыгъёс ыргонлэсь лэсьтэмын мед луозы.

20Израиль пиосты кос, соос тыныд вӧйпу мульыысь пызьыртыса поттэм чылкыт вӧй мед ваёзы – югыт карон понна, лампадаос кысылытэк мед ӝуалозы; 21вӧсяськон скинияын, сӥзён-косонэн ковчег азьысь, катанчи азьысь лампадаосты Аарон но солэн пиосыз ӝуатъялозы, ӝытысен ӵукнаозь Кузё-Инмар азьын лампадаос мед ӝуалозы. Та израиль пиос понна выжыысь выжыослы, пумтэм вапумъёслы сётэм пуктон-косон.

Currently Selected:

Потон 27: УДМБИБ

Highlight

Copy