Потон 26

26-тӥ ЛЮКЕТ

1Скинияез етӥн шортлэсь, чагыр, нап-горд, пеймыт-горд ыжгон шортлэсь куэм дас кесэглэсь лэсьты, соос вылэ быгатыса херувимъёслэсь тусбуйзэс лэсьты; 2котькудӥз кесэг кызь тямыс гырпум кузьда мед луоз, нош котькудӥзлэн кесэглэн пасьталаез ньыль гырпум кузьда мед луоз: вань та кесэгъёслэн быдӟалазы огкадь луыны кулэ. 3Витез ик та кесэгъёс огзы борды огзы вуремын мед луозы, мукетъёсыз но вить дэра кесэгъёс огзы борды огзы вуремын мед луозы. 4Кыксэ но люкетэз огазе карон понна нырысетӥ люкетлэн урдэстӥз чагыр буёло шедьытэтъёс лэсьты, мукетызлэн люкетлэн но урдэстӥз таӵеесь ик шедьытэтъёс лэсьты; 5витьтон шедьытэт лэсьты одӥгезлы кесэглы, витьтон шедьытэт лэсьты соин герӟано мукетызлэн кесэглэн дуртӥз; шедьытэтъёс ог-огенызы герӟаськон понна ваче беринын бырттэмын луыны кулэ; 6витьтон зарни каптырна#26:6 каптырна – крючок; застёжка лэсьты, каптырнаосын шедьытэтъёсты ваче герӟа но, кык кесэгъёс огазе луизы ке, скиния пӧрмоз. 7Кеч гонлэсь дас одӥг кесэгъёс лэсьты, скинияез шобыртыны мед тырмоз; 8одӥгезлэн кесэглэн кузьдалаез куамын гырпум кузьда, пасьталаез ньыль гырпум кузьда; таиз одӥгез кесэг; дас одӥгез кесэгъёс одӥг быдӟаесь. 9Витьсэ кесэгъёсты нимысьтыз огазе шедьытъя, куатьсэ кесэгез нош нимаз шедьытъя; куатетӥзэ кесэгез кык полэс кар, скиниялэн азьпалаз интыя. 10Дурысь кесэгез мукетысьтыз кесэгысь витьтон шедьытэтъёсын огазе карон понна дуртӥз витьтон шедьытэт лэсьты. 11Витьтон ыргон каптырнаос лэсьты, та каптырнаосты шедьытэтъёсын огазея, озьы шобретъёсты но огазе кар – одӥг бадӟым шобрет мед луоз. 12Нош кесэглэн мултэс кылем люкетэз, скинияез шобыртон понна мултэс кылем люкетэзлэн ӝыныез, скиниялэн мышкысь борддор вылаз ошемын мед луоз; 13нош скиниялы дасям кесэгъёслэсь кузь кылемзэ – одӥг гырпум кузьдазэ одӥг палысьтыз, одӥг гырпум кузьдазэ – мукет палысьтыз, скиниялэн урдэсказ, мыд-мыд палаз ошоно – сое шобыртон понна. 14Вылтӥз шобыртон понна горд буям така куослэсь шобрет лэсьты, нош солэн вылтӥз вальыны лыз куослэсь шобрет лэсьты.

15Скиниялы сӥттимпулэсь вӧлэм пулъёс дася, соос мед сылозы: 16котькудӥзлэн пуллэн кузьдалаез дас гырпум кузьда мед луоз, котькудӥзлэн пасьталаез одӥг но ӝыны гырпум кузьда мед луоз; 17котькуд пуллэн [пумаз] кык шипез мед луоз – ог-огзылы ваче беринын соос мед луозы: скинияысь вань пулъёслы озьы лэсьты. 18Скиниялэн лымшор палаз кызь пулъёс дася, 19кызь сылӥсь пулъёс улэ ньыльдон пыдул кутэтъёс лэсьты: кык пыдул кутэт одӥг пул улэ кык шипъёс понна, кык пыдул кутэт мукетыз пул улэ солэн кык шипъёсыз понна; 20скиниялэн мукет, уйпал люкетаз, кызь пулъёс дася, 21соослы ньыльдон азвесь пыдул кутэтъёс лэсьтоно: кык пыдул кутэт [кык шипъёсыз понна] одӥгез пул улэ; кык пыдул кутэт лэсьтоно мукетыз пул улэ [солэн кык шипъёсыз понна]; 22скиниялэн мышпалтӥз, шундыпуксён палтӥз, куать пулъёс лэсьты. 23Скиниялэн сэрегъёсаз, мышпалаз, кык пулъёс лэсьты; 24ултӥз соос герӟамын луыны кулэ, вылласянь но соос одӥг кульчо борды шедьытэмын луыны кулэ: кыкеныз ик соос тазьы каремын луыны кулэ, соос кыкезлы но сэреглы ярамон луыны кулэ. 25Озьыен, тямыс пулъёс луозы, соослэн дас куать азвесь пыдул кутэтсы луоз: одӥгаз пул улэ кык пыдул кутэт, мукетаз пул улын но кык пыдул кутэтэз луоз [кык шипъёсызлы]. 26Сӥттимпулэсь сюрыос лэсьты, вить [сюры] скиниялэн одӥг палысьтыз пулъёс борды шедьытыны, 27скиниялэн мукет палысьтыз пулъёс борды шедьытыны вить сюры лэсьты, скиниялэн шундыпуксён палаз мышпалтӥз пулъёс борды шедьытыны вить сюры лэсьты; 28нош пушкысь сюры пулъёслэн шортӥзы ортчыны кулэ одӥг пал пумысеныз мукет пал пумозяз; 29пулъёсты зарниен шобырты, сюрыосты шедьытъян кульчоосты но зарнилэсь лэсьты, сюрыосты зарниен шобырты. 30Гурезь йылын тыныд возьматэм скиниялы укшатыса тазэ скинияез пукты.

31Катанчиез#26:31 катанчи – татын вераськон мынэ вӧсяськон скинияысь занавеска (завеса) сярысь чагыр, нап-горд, пеймыт-горд ыжгон шортлэсь, етӥн шортлэсь куы; катанчи вылэ быгатыса херувимъёс лэсьтоно; 32сӥттимпулэсь зарниен шобыртыса лэсьтэм ньыль юбоос борды сое зарни каптырнаосын шедьытыса ош, юбоослэн азвесьлэсь лэсьтэм пыкъетъёссы луыны кулэ. 33Каптырнаос борды шедьытыса, катанчиез ош, катанчи сьӧры сӥзён-косонэн ковчегез пырты; соку катанчи вӧсяськон интыез Святойлэсь но Святой интылэсь висъялоз. 34Сӥзён-косонэн ковчеглэсь шобретсэ солэн вылӥяз Святойлэсь но Святой интые пон. 35Катанчилэн педпалаз ӝӧкез пукты, ӝӧклэн ваче пумитаз, скиниялэн лымшор пал борддор вӧзаз, югдытон арбериез интыя, нош ӝӧкез [скиниялэн] уйпал борддор вӧзаз пукты. 36Скинияе пырон катанчиез чагыр, нап-горд, пеймыт-горд ыжгонлэсь, етӥн шортлэсь пужыятыса лэсьты; 37катанчиез ошыса возьыны сӥттимпулэсь вить юбоос лэсьты, соосты зарниен шобырты; юбоос бордысь шедьытъянъёс зарнилэсь луыны кулэ; соосты возьыны ыргонлэсь вить пыдул кутэтъёс ӵыжатыса лэсьты.

Currently Selected:

Потон 26: УДМБИБ

Highlight

Copy