Потон 25

25-тӥ ЛЮКЕТ

1Кузё-Инмар Моисейлы тазьы шуиз: 2«Израиль пиослы вера: соос Мыным саламъёс-кузьымъёс мед ваёзы, кин чылкыт сюлмыныз Мыным саламъёс-кузьымъёс вайыны ӝутске, соослэсь ваньзылэсь ваемзэс кутэ. 3Тани кыӵеоссэ ваем салам-кузьымъёсты тӥ кутыны кулэ: зарни, азвесь, ыргон, 4чагыр, нап-горд, пеймыт-горд ыжгон шорт, етӥн шорт, кеч гон, 5такалэсь горд буям кузэ, лыз ку, сӥттимпу#25:5 сӥттимпу – акацияпу, 6лампадае понон вӧй, зырӟон вӧй пӧлы ческыт зын поттӥсь макеос, ӵындытыку ческыт зын поттӥсь макеос, 7оникс из, ефодэ бырттоно изъёс, муресазе понон изъёс. 8Вӧсяськон инты Мыным лэсьтозы, соос пӧлын Мон уло. 9Ваньзэ [лэсьтэ] озьы, кызьы возьматӥсько тыныд: скинияез но, вань сосудъёссэ но озьы ик лэсьтэ.

10Сӥттимпулэсь ковчег лэсьтэ; кузьдалаез кык но ӝыны гырпум кузьда мед луоз, пасьталаез одӥг но ӝыны гырпум пасьта, ӝуждалаез одӥг но ӝыны гырпум ӝужда; 11пушласянь но, кырласянь но сое чылкыт зарниен шобырты; солэн котыртӥз, вылласянь, зарнилэсь тугоко [пуныса] лэсьты. 12Талы ньыль зарни кульчоос ӵыжаты но ньылезлэн ик сэреглэн улӥяз юнматы: кыксэ кульчоез одӥг палаз, кыксэ кульчоез мукет палаз юнматы. 13Сӥттимпулэсь сюрыос лэсьты но [чылкыт] зарниен шобырты; 14со сюрыосты кульчое пон, ковчеглэн мыд-мыд палтӥз, ковчегез сюрыос борды шедьытыса нуллыны мед луоз; 15ковчеглэн кульчоосаз сюрыос тыремын луыны кулэ, отысь соосты поттаны уг яра. 16Ковчег пушкы курон-косонъёсын изпулъёсты пон, кудъёссэ Мон тыныд сёто. 17Шобретсэ но чылкыт зарнилэсь лэсьты: кузьдалаез кык но ӝыны гырпум кузьда, нош пасьталаез одӥг но ӝыны гырпум пасьта; 18шобретлэн кык пал пумаз ик, зарнилэсь дурыса, кык херувимъёс лэсьты; 19одӥгзэ херувимез лэсьты одӥг пал пумаз, мукетсэ херувимез – мукет пал пумаз; шобретлэн мыд-мыд пал пумысьтыз мычиськыса улӥсь херувимъёсты лэсьтэ; 20херувимъёс бурдъёссэс вылӥе вӧлъяса сылозы, бурдъёсынызы шобретэз ворсаса улозы, нош ымнырынызы ваче учкыса сылозы; шобрет пала ымнырынызы учкыса сылозы. 21Шобретэз ковчег вылэ пон, нош ковчег пушкы курон-косонъёсын изпулъёсты пон, соосты Мон тыныд сёто; 22отысен Мон тыныд усьтӥсько но шобрет йылысен, сӥзён-косонэн ковчег вылэ пуктэм кык херувимъёс вискысен, тонэн верасько: вань курон-косонъёсме, кудъёссэ израиль пиос лэсьтыны кулэ, верало тон пыр. 23Сӥттимпулэсь ӝӧк лэсьты, кузьдалаез кык гырпум кузьда мед луоз, пасьталаез одӥг гырпум кузьда, нош ӝуждалаез одӥг но ӝыны гырпум кузьда мед луоз, 24сое чылкыт зарниен шобырты, солэн котыртӥз зарнилэсь тугоко [пуныса] лэсьты; 25солэн котыртӥз кикур пасьта борддор лэсьты, борддорлэн котыртӥз зарни тугоко лэсьты; 26солы ньыль зарни кульчоос лэсьты, соосты ӝӧклэн ньыль сэрегаз сылӥсь кукъёсыз борды юнматы; 27борддоръёс бордын кульчоос луыны кулэ отчы сюрыосты понон понна, сюрыосын та ӝӧкез ӝутыса нуллозы. 28Нош сюрыосты сӥттимпулэсь лэсьты но [чылкыт] зарниен шобырты, соос вылын та ӝӧкез нуллозы; 29солы чылкыт зарнилэсь тэркыос, фимиам ӵындытон сосудъёс, чашаос, кружкаос лэсьты, отысь киськаса саламъёс-курбонъёс сётыны мед луоз. 30Мынам азям ӝӧк вылэ курбон няньёс тыр, соос котьку но отын мед луозы.

31Чылкыт зарнилэсь югдытон арбери лэсьты; со дурыса лэсьтэмын мед луоз; вылаз пужъятэм будослэн мугорыз, вайёсыз, чашаосыз лэсьтэмын мед луозы; улвайёсыз, чашаосыз, улмоосыз, сяськаосыз со бордысь потыса улыны кулэ; 32куать вайёсыз урдэскысьтыз потыны кулэ: югдытон арберилэн куинь вайёсыз одӥг палысьтыз, куинез вайёсыз мукет палысьтыз потыны кулэ; 33одӥгаз вай бордаз лэсьтэмын луыны кулэ миндальпулэн сяськаезлы укшась куинь чашаос – улмоосынызы, сяськаосынызы, мукетаз вайын но миндальпулэн сяськаезлы укшась куинь чашаос луыны кулэ, улмоосынызы, сяськаосынызы: озьы лэсьтэмын луыны кулэ югдытон арберилэн пушкысьтыз потӥсь куать вайёс бордын. 34Югдытон арберилэн мугор бордаз миндальпулэн сяськаезлы укшась ньыль чашаез луыны кулэ, улмоосынызы, сяськаосынызы; 35югдытон арбери бордысь потӥсь куать вайёслэн кыкезлэн улӥяз улмо, мукет кык вайёслэн но улӥязы улмо, мукетъёсызлэн кык вайёслэн но улӥязы улмо, [югдытон арбери бордын миндальпулэн сяськаезлы укшась ньыль чашаез]. 36Улмоос но, вайёсыз но со бордысь потыны кулэ: со быдэсак дурыса суредамын, чылкыт зарнилэсь итэтъёстэк быдэс луыны кулэ. 37Сизьым лампадаос лэсьты но югдытон арбери вылэ пуктылы, солэсь азьпал люкетсэ югдытыса мед возёзы; 38бордаз пичиесь кискачъёс но сускичъёс чылкыт зарнилэсь [лэсьты]. 39Одӥг талант мында чылкыт зарнилэсь югдытон арбериез, со борды юнматэм вань кулэ арбериосты мед лэсьтозы. 40Учкы, гурезь йылын кыӵеосыз тыныд возьматэмын вал, соослы укшатыса ваньзэ лэсьты».

Currently Selected:

Потон 25: УДМБИБ

Highlight

Copy