Потон 16

16-тӥ ЛЮКЕТ

1Собере израиль пиос, ваньзы огазе люкаськыса, Елимысь потӥзы но Елимен Сӥнай куспысь Сӥн луоё кыр дуннее вуизы, со вал Египет музъемысь потэмзы бере, кыкетӥ толэзьлэн дас витетӥ нуналаз. 2Соку луоё кыр дуннеысен вань израиль калык Моисеен Аарон вылэ ӟургетыса улыны кутскиз. 3Израиль пиос соослы шуизы: «Э, Кузё-Инмар, Ас киыныз милемыз Египет музъемын виысал ке, куке ми сӥльын пӧзись пуртыос дурын пукиськомы вал, куке ми кӧт тырымонамы нянь сиыса улӥмы! Тӥ милемыз, вань люкаськем калыкмес сютэмен быдтон понна та луоё кыр дуннее поттӥды». 4Соку Кузё-Инмар Моисейлы шуиз: «Тани, инмысь васькись зор ву кадь Мон тӥледлы инмысь нянь кисьто; нуналлы быдэ калык мед потылоз но нуналлы быдэ кӧтэз тырон понна кӧня кулэ, сомында мед бичалоз, – Мон эскерыны-тодыны мед быгатом: Мынам законэя калык лэсьтоз-а, уз-а. 5Нош куатетӥ нуналэ бичаса дасямзы кык пол тросгес луоз, мукет нуналъёсы бичамен ӵошатыса». 6Моисеен Аарон вань израиль калыклы шуизы: «Туннэ ӝыт тододы, Кузё-Инмар тӥледыз Египет музъемысь поттӥз шуыса, 7ӵукна Кузё-Инмарлэсь данлыксэ адӟоды, уго Со кылӥз Кузё-Инмар вылэ ӟургетыса улэмдэс: нош ми кинъёс сыӵеесь, малы милемыз пыкылыса улӥськоды?» 8Соку Моисей шуиз: «Кузё-Инмар ӝыт тӥледлы сиыны сӥль сётоз, нош ӵукна мыльымон нянь сётоз, уго Кузё-Инмар тӥлесьтыд Со вылэ ӟургетыса улэмдэс кылӥз. Нош ми кинъёс сыӵеесь? Тӥ милемыз уд пыкылӥське, Кузё-Инмарез пыкылӥськоды». 9Соку Моисей Ааронлы шуиз: «Вань люкаськем израиль калыклы вера: ”Кузё-Инмар азе султэ, уго Со тӥлесьтыд ӟургетэмдэс кылӥз”». 10Вань израиль калыклы Аарон тае вераку, соос луоё кыр дунне пала берытскыса учкизы но, тани, пилемын Кузё-Инмарлэн пиштӥсь данлыкез возьматскиз.

11Соку Кузё-Инмар Моисейлы шуиз: 12«Мон кылӥ израиль пиослэсь ӟургетыса улэмзэс; вера соослы: ”Ӝыт сӥль сиёды, нош ӵукна, нянь сиыса, кӧтты тыроз, соку тододы: Мон Кузё-Инмар, тӥляд Инмарды”».

13Ӝыт бӧдёноос лобӟыса вуизы, станэз (сылон интызэс) ик ӵоксазы, нош ӵукна стан котыре лысву усиз; 14лысву тӧлӟиз но, тани, луоё кыр дуннеысь музъем выл векчи кеньырлы укшась, пужмер кадь векчи маин ке шобырскемын. 15Израиль пиос тае адӟизы но ог-огзылы шуизы: «Мар та?» Уго уг тодо вал, мар та. Соку Моисей соослы шуиз: «Та Кузё-Инмарлэн тӥледлы сиыны сётэм нянез; 16Кузё-Инмар тани кыӵе косон сётӥз: ”Котькудды но сое сомында бичалэ, кӧня сиыны быгатоды; адямилы быдэ одӥг гомор#16:16 гомор – 3-4 литр тэрись сосуд бичалэ, балаганады улӥсьёслы кӧня кулэ, сомында бичалэ”». 17Тазьы каризы израиль пиос, кин трос, кин ӧжытгес бичаз; 18бичамзэс гоморен мертазы но тодӥзы: кин трос бичам, солэн мултэсэз ӧй вал, нош кин ӧжыт бичам, солэн но ёрмон-ӟудонэз ӧй вал; ваньзы бичаллям кӧтэз тырымон мында. 19Моисей соослы шуиз: «Мар бичады, сое одӥгды но ӵуказеозьлы эн кельтэ». 20Нош соос Моисейлэсь верамзэ санэ ӧз понэ, бичамзы пӧлысь оглюкетсэ ӵукнаозьлы кельтӥзы, – соку со пӧлы нумыръёс потӥзы но, со зынмыны кутскиз. Моисейлэн соослы вожез потӥз. 21Сое соос ӵукналы быдэ бичаллязы сомында, кӧня сиыны кулэ; нош шунды ӵушканы кутскем бере со сылмыса бырылӥз. 22Нош куатетӥ нуналэ сиёнзэс кык пол тросгес бичазы, адямилы быдэ кык гомор. Калыклэн вань кивалтӥсьёсыз лыктыса та сярысь Моисейлы веразы. 23Соку [Моисей] соослы шуиз: «Тани, Кузё-Инмар мар шуиз: ”Ӵуказе ужатэк улон нунал, Кузё-Инмарлэн святой субботаез; мар кулэ пыжыны, пыже, мар кулэ пӧзьтыны, пӧзьтэ туннэ, нош мар кылиз, сое ӵуказе ӵукнаозьлы кельтэ”». 24Мултэссэ ӵуказе ӵукнаозьлы кельтӥзы, кызьы Моисей косӥз; со ӧз сӧриськылы, со пушкы нумыр ӧз потылы. 25Соку Моисей шуиз: «Сое туннэ сие, уго туннэ Кузё-Инмарлэн субботаез; туннэ сое бусыысь уд шедьтэ; 26куать нунал ӵоже сое бичалэ, нош сизьыметӥез нунал – суббота: та нуналэ со уз луы». 27Калык пӧлысь куд-огез сизьыметӥ нуналэ бичаськыны потӥзы вал, но ӧз шедьтэ.

28Соку Кузё-Инмар Моисейлы шуиз: «Мынэсьтым курон-косонъёсме, Мынэсьтым законъёсме быдэсъятэк кема улоды на-а? 29Учкелэ: Кузё-Инмар тӥледлы субботаез сётӥз, соин ик Со арнялэн куатетӥ нуналаз кык нуналлы тырмымон нянь сётэ. Сизьыметӥ нуналэ ваньды тӥ асьтэлэн дорады улэ, интыысьтыды нокытчы эн поталэ». 30Сизьыметӥ нуналэ калык ужатэк улӥз. 31Израиль выжы та сиёнэз манна шуыса нимаз. Со тӧдьы вал, кориандрлэн кидысэзлы укша вал, нош шӧмыз чечыен пыжем уднянь кадь. 32Моисей шуиз: «Тани, Кузё-Инмар кыӵе косон сётӥз: ”Одӥгзэ гомордэс [маннаен] тырмытэ но сое выжыысь выжыосы йӧтылытэк возе: вуоно выжыосты адӟыны мед быгатозы луоё кыр дуннеын Египет музъемысь тӥледыз поттэм берам кыӵе нянен Мон тӥледыз сюдӥ”». 33Моисей Ааронлы шуиз: «Басьты одӥг [зарни] сосуд, отчы быдэс гомор манна пон, сое Кузё-Инмар азе пукты, дорады выжыысь выжыосы мед возиськоз». 34Аарон сое сӥзён-косонлэн ковчегез азьын возьыны пуктӥз, кызьы Моисей пыр Кузё-Инмар косӥз.

35Израиль пиос улоно музъемазы вуытозь ньыльдон ар ӵоже манна сиыса улӥзы; Ханаан музъем доры вуытозязы манна сиизы. 36Нош гомор – со ефалэн дасэтӥ люкетэз.

Currently Selected:

Потон 16: УДМБИБ

Highlight

Copy