Маккавейёслэн 3-тӥ книгазы 4
4
4-тӥ ЛЮКЕТ
1Кытчы гинэ та косон ӧз вуылы, котькытын но язычникъёс, огазе люкаськыса, шулдыръяськыса юондыръёс ортчытъязы, куаныса кесяськизы, кемалась дырысен лул пушкы выжы лэзьыса улӥсь йыркуръяськон табере кышкатэк ассэ шарае поттӥз кадь. 2Нош иудейёс пӧлы буйгатыны луонтэм куректон-кайгу, курыт синву но викышъян пыризы; уго соослэсь сюлэмзэс тыл кадь сутӥзы малпамтэ шорысь соослы дасям кулон-бырон вуон пумысен бӧрдӥсьёслэн котькытысен кылӥськись ӝуштэм куараоссы. 3Кыӵе меда улосвыл яке кар-город, кыӵе меда улон инты яке кыӵе меда сюресъёс ӧз пачылме соослэн бӧрдэменызы, викышъяменызы? 4Туж вӧсь карыса, чик жалятэк котькудӥзлэн городлэн кивалтӥсез иудейёсты улляса поттаз, соин ик, таӵе секытлэсь но секыт вӧсь каронэз адӟыса, тушмонъёс пӧлысь но куд-огез, огъя курадӟонэз синйылтыса, малпазы улонлэн тодыны луонтэм воштӥськылонъёсыз сярысь, бӧрдыса жалязы шудтэмлэсь но шудтэм улонэ сюрем муртъёсты уллямзы понна. 5Улляса нуизы пурысьтам, пересьмыса губырскем, шальтрам пыдо трос-трос пересьёсты; кужмысь, эриктэм улляны косэмын вал бере, возьдаськытэк соосты ӝоггес вамышъяны ёртӥзы. 6Егит нылъёс, али гинэ кузпаллы сётыса огазьын улыны кутскемъёс, шумпотыса-шулдыръяськыса улэм интые, бӧрдыны кутскизы, ческыт зын поттӥсь арбериосын зырам йырси вылазы пень пызьнаны кутскизы, йырзэс шобыртыны маза сётытэк соосты нуизы, сюан-бӧрысь гуръёс интые, ӵош кутскыса, куараен викышъязы, мурт пиослэн курадӟытэмзылы чидатэк, жильыяса кужмысь калык азьтӥ корабле куштыны нуизы. 7Нош соослэн кузпалъёссылэн, сяськаяськон арлыдэ вуэм егит пиослэн, тугоко интые, чыртыязы гозы думемын вал, егит дырзэс юон-шулдыръяськон пӧлын эзылыса улэм интые, кузпалъяськыса улон нуналъёссэс бӧрдыса ортчытылӥзы, уго пыд улысьтызы усьтӥськем адэз адӟылӥзы. 8Пӧйшуръёсты музэн, соосты корт сьӧлтэтъёсын дурылыса нуылӥзы: одӥгъёсыз корабль пушкысь ӟусъёс борды чыртытӥзы жильыен думылэмын вал, мукетъёссэ пыдтӥзы юн жильыен дурылӥзы. Йыр йылтӥзы выж пулъёс ӟырк-ӟырк тыризы, нунал югытэз но адӟыны ӧз быгатэ; озьы, котыр ласянь соос пеймытэн шобыртэмын вал, уямысь дугдытозязы, соосты йыруж лэсьтӥсь муртъёсты кадь возизы. 9Схедия нимо интые иудейёсты вуттэмзы бере эксэйлэсь косонзэ быдэстыса ортчытэм уянзы йылпумъяськиз, соку эксэй косон сётӥз соосты город азе, вал ӵошатон интые, султытъяны – татын туж паськыт инты вал, городэ мынӥсь, берен кунлэн шорпалаз кошкись вань адямиос азьын соосты вӧсь каремзэс возьматыны туж умой инты вал; татысен иудейёс эксэйлэн ожгарчиосыныз но кусып возьыны ӧз быгатэ, нокыӵе но ватӥськон интызы ӧй вал. 10Та ужез быдэстэм бере эксэй кылӥз, та выжыысь адямиос, ӵем дыръя городысь лушкемен потыса, бӧрдыса вӧсясько, пе, сантэмаса, курадӟытыса возиськись агай-вынъёссы понна, соку со туж лек йыркурен косон сётӥз: таоссэ но соосты кадь ик вӧсь кароно, нокызьы но ӧжытгес вӧсь каремын медаз луэ. 11Та выжыысь вань калыкез со нимын-нимын гожъяны косӥз – секыт медо-ляльчи ужез быдэсъян понна ӧвӧл, кудӥз сярысь алигес ивортэмын вал, – вӧсь карыса курадӟытон понна, пе, со, нош пумаз одӥг нунал куспын соосты виылыны, пе, мед луоз. 12Тазэ калыкез лыдъян-ӵотанэз – шунды ӝужаны кутскем дырысен шунды пуксьытозь – туж дыртыса, вожомыса быдэсъяны тыршизы, но та ужез ньыльдон нунал куспын но йылпумъяны уз вуттэ. 13Нош эксэй укыр шумпотыса, дугдылытэк майбыръяськыса улыны кутскиз, вань сульдэръёс-идолъёс азьын юондыръёс ортчытъяз: визьмыныз зэмлыклэсь кыдёке палэнскиз но кырсь-сьӧлыко кылыныз-ымыныз кылтэм, вераськисьтэм, юрттыны быгатӥсьтэм сульдэръёсты данъялляз, нош быдӟымлэсь но быдӟым Инмарлы пумит ярантэм кылъёс вералляз.
14Верам дыр ортчем бере калыкез лыдъясь-ӵотасьёс эксэйлы ивор вуттӥзы: вань иудейёсты лыдъяса-ӵотаса быдэстыны луонлыксы ӧвӧл – лыдъяса быдтонтэм трос соос; эшшо но тросэз соос пӧлысь улосвылъёсын уло; одӥгъёсыз асьсэ юртазы уло на, мукетъёсыз пӧртэм интыосы пазьгиськемын, соин ик та ужез Египетысь вань кивалтӥсьёс но быдэстыны уз быгатэ. 15Нош эксэй соосты уката но золгес кышкатыны кутскиз, со малпа вал уго, иудейёс соосты саламъёс-кузьымъёс пыр асьсэ пала берыктӥзы шуыса, нош таосыз иудейёсты вӧсь каронлэсь утён понна кескич амалъёс утчало, пе. Соку таос эксэйлы оскыны луымон валэктоно луизы: соос оскыны луымон веразы, кызьы соослы уг тырмы ма вылэ, маин гожъян арбериоссы. 16Та вал вормыны луонтэм Инмысь Тупатӥсь-Радъясьлэн ужез, Со иудейёслы юрттӥз.
Currently Selected:
Маккавейёслэн 3-тӥ книгазы 4: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016