Маккавейёслэн 3-тӥ книгазы 3
3
3-тӥ ЛЮКЕТ
1Сьӧлыклэсь кышкасьтэм та сярысь тодэм бераз туж-туж йыркуръяськыны кутскиз, Александриын улӥсь иудейёс вылэ гинэ вожзэ ӧз потты, быдэс кунын улӥсь иудейёслы пумит туж лек тушмонъяськыны кутскиз, косон сётӥз: чик ӝегатскытэк ваньзэсты огазе люканы но туж лек амалъёсын виылыны косӥз. 2Та уж дасяськыку, лек ужез лэсьтыны дасяськисьёсын одӥг мылкыдын улӥсьёс иудей калыклы пумит лек кыл вӧлдӥзы, соос, пе, та косонлэсь палэнско, асьсэлэсь законъя быдэстоно ужзэс быдэсъяны пумит, пе, луо. 3Со виын ик иудейёс эксэйёсты гажаса улӥзы, соос оскиськыны ярамонэсь вал; соос Инмарез сӥлы карыса, Солэн законэзлы тэрытскыса улӥзы, соин ик куд-ог учыръёсы эксэйёслэсь куд-ог косонъёссэс быдэсъятэк, кулэ карытэк кылён дыръёссы но вал. Та муген куд-огез азьын соос тушмонъёс кадесь адӟиськылӥзы; нош вань мукет адямиос азьын вань ужъёсты шонерлыко быдэсъямзы понна соос гажамонэсь вал. 4Та калыклэсь ваньмызлы тодмо ӟеч улон сямъёссэ тодыса вылысь но мурт выжыысь калыкъёс соосты номыр ӵотэ но ӧз понылэ. Та калыкъёслэн син шоразы йӧтэ вал иудейёслэн Инмарез сӥлы карон, сиён-юонъёс ортчытъян сямъёссы гинэ, шуо вал, та адямиос эксэен но, кивалтӥсь йыръёсын но ӵош уг сиё-юо, соос, пе, сьӧд сюлэмо адямиос, кунлы туж пумитъяськыса улӥсьёс, таӵе амалэн соос сярысь юромо урод кылъёс вӧлдылӥзы. 5Соослэсь нокыӵе но уродлыксэс ас вылазы чидано луымтэ городын улӥсь эллинъёс адӟизы, та адямиослы пумит малпамтэ шорысь бугыръяськон ӝутскиз шуыса, соос адӟизы, кызьы син куспын бугыръяськисьёс огазе люкаськизы, но эллинъёс иудейёслы юрттыны ӧз быгатэ – уго эксэй дорысь косон вуиз, – озьы ке но соосты буйгатыны выризы, ужъюгдур понна вожзэс поттылӥзы, но ужпум умойлы берытскоз шуыса оскиськизы. 6Таӵе трос лыдо, номырин янгыштэм калыкез санэ понытэк кельтыны нокызьы но уг луы вал уго. 7Куд-ог бускельёссы, эшъёссы, соосын вузкарисьёс иудейёс пӧлысь куд-огъёссэ лушкемен доразы ӧтчаллязы, юрттӥськомы шуыса, соослы кыл сётылӥзы, тӥледлы котькыӵе амалэн но юрттомы, шуылӥзы. 8Нош эксэй, огдырлы сётӥськем азинсконэныз ушъяськыса, ӧз но малпаськы быдӟымлэсь но быдӟым Инмарлэн кужымез-властез сярысь, малпам ужезлэсь куштӥськытэк улоно кариськиз но иудейёслы пумит таӵе гожтэт гожтӥз: 9«Филопатор Птоломей эксэй Египетын улӥсьёслы, татысь ож ужен кивалтӥсьёслы, ожгарчиослы: шумпотэлэ, тазалыко улэ. Мынам аслам тазалыке умой, ужъёсмы но азинлыко мыно. 10Азие ожен ветлэммы, кызьы тӥ асьтэос но тодӥськоды, малпамтэ шорысь инмаръёслэн юрттэменызы но асьме кужымен, кызьы мылкыд каримы вал, шудэн-бурен йылпумъяськиз, соку ми малпамы Келе-Сирияын но Финикияын улӥсь калыкъёслэсь улонзэс умоятыны, ожмаськон тӥрлыкен ӧвӧл, но гажаса-жаляса, адямиез туж яратыса, мылысь-кыдысь юрттӥськыса ӟеч карыны малпамы. 11Городъёсысь храмъёсы трос ваньбур сётъяса, ми Иерусалиме но вуимы, асьсэлэн укылтэмъяськонзылэсь ноку но куштӥськымтэослэсь, та йӧнтэм адямиослэсь вӧсяськон интызэс сӥлы карыны мылкыдмы вал. 12Нош соос кыл вылын шумпотыса, нош уж вылын – туж кескич амалын милемды пумитазы: храм пушкы пырыны но сое самой умоесь, ӟечесь салам-кузьымъёсын сӥлы карыны малпамы, нош соос вашкала вылтӥяськон сямынызы милемыз пырыны ӧз лэзе; вань адямиосты яратон сямынымы сэрен, соос милесьтым номыр но уродмес-лекмес ӧз адӟе. 13Вань калыкъёс пӧлысь соос гинэ, милемын тушмонъяськыса улӥсьёс, асьсэлы ӟеч лэсьтӥсьёслы, эксэйёссылы туж пумитъясько, нокыӵе но шонерлыко ужез лэсьтэмзы уг поты. 14Нош ми, соослэн укылтэмъяськонзылы тэрытскыса, соку но, вормон басьтыса бертыкумы, Египетын но, адямиез яратӥсь луэммес вань калыкъёслы возьматӥськомы бере, лэсьтылӥмы озьы, кызьы кулэ. 15Со сяна, ми ваньмызлы вераллямы соосын одӥг выжыысь адямиослы ми пунэмзэ ум берыктӥське, соослы номыр но уродзэ ум лэсьтӥське шуыса; соку ми воштӥськонъёс пыртыны малпамы: ожъёс дыръя соос ми палан ожмаськизы но кемалась дырысен соослы оскем трос ужъёсты быдэсъяллязы бере, соку ми малпаськомы вал ини Александрия карын улӥсьёслэсь правозэс соослы сётыны, соосты вашкала дауръёсысь ортчытъям вӧсяськонъёсы пыриськисьёс карыны малпамы вал. 16Нош соос тае соослы ярантэм уж луэ шуыса лыдъязы, асьсэлэн лек сямзыя ӟечсэ кулэтэм каро, ялан уродэз пала берытско; дунолэсь но дуно ужез – кун адями луон право басьтонэз – кулэтэм карем гинэ ӧвӧл, нош кинъёс чылкыт сюлмын асьмемын ӟеч кусып возьыны тыршо, соос трос ик ӧвӧл ке но, озьы но, шара но, лушкемен но троссэ соос пӧлысь соос кулэтэм каро, ялан оскисько, соослэсь радтэм улонзэс адӟыса, ми ӝоген пуктон-косонъёсмес воштомы шуыса малпало. 17Тырмыт учыръёсын пумиськылыса, тодӥмы: соос котькуд-котькуд учыре асьмелы пумит малпанъёсын уло. Куке но, асьмелы пумит малпамтэ шорысь кыӵе ке но бугыръяськон ӝутскиз ке, та сьӧлыклэсь кышкасьтэм, йӧнтэм адямиос пӧлысь асьмеды вузасьёс, лек тушмонъёс потозы шуыса малпаськомы, 18соин ик косӥськомы: та гожтэтэз басьтэм берады ик милесьтым верам муртъёсмес кышноосынызы, нылпиосынызы ӵош кужмысь, жугыса, корт жильыосын думылыса, ми доры виылыны келялэ, жалятэк, сантэмаса виылоно таӵе лек малпанъёсын улӥсьёсты. 19Одӥг пол соос вӧсь каремын луизы ке, ми оскиськомы, азьланяз асьмелэн кун ужъёсмы туж умоялозы, ваньмыз ӟеч радъяськоз. 20Нош кин ке иудеез дораз ватӥз ке, – пересь муртэ-а, пинал муртэ-а, нонӥсь нуныосты но лыдэ басьтыса, – та мурт семьяеныз валче туж курадӟытыса виемын луыны кулэ. 21Нош кин ке ватӥськыса улӥсь муртэ шарае поттӥз ке, янгыше сюрем муртлэн юртъерез солы сётэмын луоз, эшшо эксэй казнаысь кык сюрс драхма сётэмын луоз, ляльчи радын улонлэсь мозмытэмын луоз, сӥё-сано каремын луоз. 22Ватӥськыса улӥсь иудейлэн интыез, кытысен со кутэмын вал, сутэмын, тырттэм кельтэмын мед луоз, одӥгезлы но кулоно муртлы со инты пумтэм вапумъёс ӵожелы номырлы но ярамон медаз луы». Таӵе вал гожтэтлэн пуштросэз.
Currently Selected:
Маккавейёслэн 3-тӥ книгазы 3: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016