Маккавейёслэн 2-тӥ книгазы 15
15
15-тӥ ЛЮКЕТ
1Иудаен ӵош ветлӥсьёс Самария музъемын та дыре уло шуыса, Никанор тодӥз но, нокыӵе но кышкытлыке медаз сюры шуыса, юри шутэтскон нуналазы соос вылэ урдскыны малпаз. 2Ас эриксытэк со сьӧры келяськыса ветлӥсь иудейёс шуизы: «Сокем лек амалэн, адямиез жалянэз тодытэк соосты эн быдты, Ваньзэ Адӟисьлэсь дун-чылкыт карем нуналзэ сӥё-дано кар». 3Соку та сьӧлыклэсь чик кышкасьтэм юаз: «Зэм ик инмын суббота нуналэз праздник карыны косӥсь Кузё-Атай вань-а?» 4Иудейёс таӵе ответ сётӥзы: «Вань улэп Кузё-Инмар, Инмысь Кузё-Атай, сизьыметӥ нуналэз сӥё-дано карыса улыны косӥсь». 5Соку со шуиз: «Нош мон – музъем вылын кузё, кияды ожмаськон тӥрлык кутыны, эксэйлы службаез быдэсъяны косӥсь». Озьы ке но со аслэсьтыз лушкем малпанзэ быдэстыны ӧз вуы. 6Туж вылӥ мылкыдын улыса, вылтӥяськыса, Никанор малпа вал Иудаен ӵош ветлӥсьёсты ваньзэсты вормыны. 7Нош Маккавей Кузё-Инмар дорысь юрттэт басьтыны оскиськемысь чик ӧз дугдылы. 8Асэныз ӵош ветлӥсьёсты со язычникъёслэн урдсконзылэсь кышканы кулэ ӧвӧл шуыса оскытылӥз, азьвыл вакытъёсы Инмысь вуэм юрттэтъёсты тодазы вайытылӥз, али но Дунне Кутӥсь Инмар дорысь асьсэлы вормон, юрттэт басьтонлы оскиськыса улыны курылӥз. 9Законэн книгаысь, пророкъёслэн книгаосысьтызы сӥзиськонъёсын буйгатыса, соослэсь асьсэлэсь азьвыл лэсьтылэм вылӥ ужъёссэс тодазы вайытылыса, кышкасьтэм луыны мылкыдзэс ӝутказ. 10Соослэсь мылзэс-кыдзэс ӝуткаса, соосты со оскытылӥз, язычникъёс кескич сямоесь, сётэм кылзэс быдэсъясьтэмесь луо шуыса возьматылӥз. 11Соосты со юн щитъёсын, шибодыосын гинэ ӧз юнматы, эшшогес но оскиськымонэсь кылъёсын юнматӥз, эшшо ке ваньзэсты ум йылтӥ адӟем оскыны ярамон ӟеч иворен шумпоттӥз.
12Солэн адӟонэз таӵе вал: со Онияез, азьвыл архиереез, адӟиз, чылкыт сюлэмо, лякыт сямо, учкымон тусбуё, зӥбыт-востэм сямо, чебер вераськись, пичи дырысеныз вань ӟечсэ-умойзэ кабыл басьтӥсь муртэ, – адӟиз, кызьы со, киоссэ ӝутыса, вань иудей калык понна вӧсяське. 13Собере пурысьтам йырсиен, данлыкен чебермам, туж паймымон, адӟылымтэ быдӟымлыкен котыртэм мукетыз пиосмурт возьматскиз. 14Ония шуиз: «Та – агай-вынъёсты яратӥсь, калык понна, святой город понна трос вӧсяськись, Инмарлэн пророкез, Иеремия». 15Соку Иеремия, бур кизэ ӝутыса, Иудалы зарни меч сётӥз, сое сётыкуз, тазьы шуиз: 16«Басьты та святой мечез, со – Инмарлэсь кузьым, соин тон тушмонъёсты погыръялод». 17Иудалэн кышкасьтэм луонлы ӝуткась, сокем ӟеч кылъёсыныз буйгатскыса, егитъёслэсь сюлэмъёссэс юнматылӥзы, иудейёс малпазы, стан пуктытэк тушмон вылэ урдскыны, чик кышкатэк ожмаськыны кутскыны, озьы ужез быдэстыны, уго городлы но, святой арбериослы но, храмлы но кышкытлык кылдэмын вал. 18Кышнооссы, нылпиоссы, агай-вынъёссы, выжы-кумыоссы понна нюръяськизы ке но, со соос понна нырысетӥ интыын ӧй вал, малы ке шуоно тужгес но бадӟым кышкан кылдэмын вал святой храм понна. 19Городэ кылемъёслэн но бадӟым сюлмаськонзы вал, уго соос бусы шорын ортчоно ожмаськон пумысен сюлмаськизы.
20Озьы, ужрадлэсь кутсконзэ ваньзы возьмаку, куке тушмонъёс огазеяськизы ни, ожгарчиос строе султытэмын вал ини, слонъёсты кулэ интые султытӥзы, вал вылын ожмаськисьёсты урдэсъёсазы султытӥзы, – 21туж трос ожгарчиослэсь оже вырӟемзэс, ожмаськон тӥрлыкъёслэсь куӵо-маӵозэс, пӧйшуръёслэсь-слонъёслэсь туж лекъяськемзэс Маккавей адӟиз но, киоссэ ин пала ӝутыса, паймымон ужъёс лэсьтӥсь, ваньзэ адӟись Кузё-Инмарлы тае тодыса вазиськиз: ожмаськон тӥрлыкен вормон уг басьтӥськы, Со Ачиз, кызьы Солы кулэ, ярамон муртъёслы вормон кузьма. 22Тазьы вераса, со вазиськиз: «Тон, Кузё-Инмаре, Иудеяын Езекия эксэй луыку Кылчинэз ыстӥд но, со Сеннахиримлэн армиысьтыз сю тямыстон вить сюрс муртэ погыртӥз. 23Инъёслэн Кузё-Инмарзы, али но тушмонъёсты кышкатыны, куалекъятыны милям азьпаламы ӟеч Кылчиндэ ысты. 24Тынад суйбыгытэдлэн кужыменыз Тынэсьтыд святой калыктэ урод кылъёсын сантэманы лыктэмъёс погыртэмын мед луозы». Таин со куриськонзэ йылпумъяз. 25Никанорен ӵош мынӥсьёс гумы пелляса, кесяськыса вамышъязы, 26нош Иудаен ӵош ветлӥсьёс, Инмарлы вазиськыса, вӧсяськыса, тушмонэн ожмаськонэ пыриськизы. 27Киынызы ожмаськыса, нош сюлмынызы Инмарлы вӧсяськыса, соос куамын вить сюрслэсь ӧжытсэ ӧз погыртэ, туж шумпотӥзы Инмарлэн адӟиськымон юрттӥськемезлы. 28Ужзэс йылпумъяса, шумпотыса берытскыкузы, соос тодӥзы, Никанор вань ожмаськон тӥрлыкеныз валче пограз шуыса. 29Кесяськонъёс, черекъянъёс чусомем бере соос асьсэ атыкай кылынызы Кузё-Инмарез ушъязы-данъязы. 30Соку Иуда, ас калыкез понна лулыныз но, мугорыныз но сюлмаськись-тыршись нырысьёс пӧлысь нырысез адями, ас выжы калыкез понна аслэсьтыз самой ӟеч улон аръёссэ дась возись, Никанорлэсь йырзэ но суйзэ пельпуменыз валче ӵогыса, Иерусалиме нуыны косӥз. 31Отчы вуэм беразы со ас выжы калыксэ ӧтчаз но курбон сётон ӝӧк азе священникъёсты султытӥз, изкар пушкы кылемъёсты но ӧтьытӥз. 32Юрӟым Никанорлэсь йырзэ возьматӥз, лек кылын сантэмасьлэсь Дунне Кутӥсь Инмарлэн святой коркаез вылэ вылтӥяськыса урдылэм кизэ возьматӥз. 33Сьӧлыклэсь кышкасьтэм Никанорлэсь кылзэ вандӥз но юдылыса сое тылобурдоослы пазьгыны косӥз, нош укылтэмлэсь кизэ храмлы ваче беринэ ошыны косӥз. 34Соку ваньзы, ин пала учкыса, юрттэт сётӥсь Кузё-Инмарез ушъяса-данъяса улӥзы но шуизы: «Аслэсьтыз интызэ саптатэк, дун-чылкыт куен Возись данлыко!» 35Никанорлэсь йырзэ Иуда изкар борды, ваньмызлы адӟиськон интые, Кузё-Инмарлэсь паймымон юрттэтсэ возьматон понна ошиз. 36Ваньзы, огазе люкаськыса, тазьы карыны вераськизы: та нуналэз одӥг пол но пусйытэк кельтыны уг яра, дас кыкетӥ толэзьлэсь, сири кылын Адар шуыса нимаськись толэзьлэсь, дас куинетӥ нуналзэ праздник карыса пусъёно, со Мардохейлэн Нуналызлэсь#15:36 Мардохейлэн Нуналыз – Пурим праздник (Есф. 9:17-32) одӥг нунал азьлогес луэ.
37Тазьы йылпумъяськиз Никанорен ужпум; со нуналысен город еврейёслэн киулазы кылиз бере, та интыысен вераськонме йылпумъяло. 38Сое мон валамон, ярамон вераны быгатӥ ке, со ик мыным кулэ вал; нош сое мон ляб, огшоры гинэ верай ке, соку мон лэсьтӥ озьы, кӧня мынам кужыме вал. 39Винаез ас кожаз секыт юыны, со дыре ик ву юыны номыр умоез ӧвӧл, – винаез вуэн сураса юиськод ке, со ческыт луэ, шумпотон вае; озьы ик гожтэм верос но, ваньмыз интыяз ке, лыдӟисьёсты шумпоттэ. Татын пумыз мед луоз.
Currently Selected:
Маккавейёслэн 2-тӥ книгазы 15: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016