Маккавейёслэн 2-тӥ книгазы 14
14
14-тӥ люкет
1Куинь ар ортчем бере Иуда доры, соин ӵош ветлӥсьёс доры ивор вуиз, Селевклэн Димитрий пиез ву вылын но, музъем вылын но нюръяськись кужмо армиен Трипольысь корабльёслы-пыжъёслы дугдылон интые вуиз шуыса; 2кунэз киултэм бераз Антиохез но, солэсь чакласьсэ-утисьсэ Лисиез но вииз.
3Кыӵе ке но Алким, азьвыл архиерейын улэм, огыр-бугыр улон вакытэ юри саптаськем мурт, ас понназ малпаськиз, нокыӵе но амалэн со утиськон уз ни басьты, святой курбон сётон ӝӧк доры пырыны солы сюрес ӧвӧл ни, 4сю витьтон одӥгетӥ арын со Димитрий эксэй доры лыктӥз но солы зарнилэсь лэсьтэм эксэй изьы, пальма, со сяна вӧйпулэсь вайёссэ вайиз, соосты храмлэн арбериосыз шуыса лыдъяло вал, – со нуналэ Алким номыр но сыӵе-таӵезэ ӧз лэсьты. 5Укылтэм ужез быдэстыны тупась, ярам дыр шедиз, – сое Димитрий кенешлэн люкаськоназ ӧтиз но, кыӵе малпанъёсын, мылкыдын та виын иудейёс уло шуыса, солэсь со юаз. Ответ сётыса, со шуиз: 6«Асидей шуон иудейёс, соослэн азьвалтӥсьсы Иуда Маккавей луэ, ожмаськонэз кулэен лыдъяло, бугыръяськонъёс ӝутъяло, кун-эксэйлыклы ӟеч улонэн улыны маза уг сёто. 7Соин ик мон, вашкала атайёсылэн вӧсяськон ужъёсъя кузё луонлэсь палэнтэм, сӥ-данзытэк кельтэм мурт, табере татчы лыктӥ, 8лыктонэлэн нырысь мугез: маиз вань эксэйлэн, со понна сюлмысь тыршыны кулэ, кыкетӥ муге: ас кунысьтым калыке понна сюлмаськыса лыктӥ, уго вылӥ верам муртъёс визьзэс ыштэмен сэрен, милям вань выжымы трос курадӟоно луэ. 9Нош тон, эксэй, та сярысь тодӥд ни бере, кунмы сярысь сюлмаськы, вань адямиослы тырмымон яратонэныд ёртыса-ӝикатыса возем выжымы сярысь сюлмаськы: 10Иуда улэп дыръя каньылэн улон луыны уз быгаты». 11Таослы та сярысь верам бере мукетъёсыз визь-кенеш сётъясьёс, Иудаез синазькыль карисьёс, Димитриез эшшо но зол бугыртӥзы. 12Соку ик со слонъёсын кузёяськись Никанорез ӧтьытӥз но Иудеяе ож ужъёсын кивалтӥсе пуктӥз, сое ыстӥз но 13таӵе косон сётӥз: Иудаез виёно, солэсь эшъёссэ пазьгытоно, нош Алкимез быдӟым храме архиерее пуктоно. 14Соку Иудеяысь, Иуда дорысь, пегӟем язычникъёс уллёосын Никанор доры люкаськизы, малы ке шуоно соос оскиськыса улӥзы, иудейёслэн шудтэм улонзы но курадӟонъёссы соос понна ӟеч улонлы пӧрмозы шуыса. 15Никанор ожен, пе, лыктэ, язычникъёс со борды кариськиллям шуыса, иудейёс кылӥзы но соку соос, йыр вылазы сюй пызьнаса, вӧсяськыны кутскизы Солы, Кин пумтэм дауръёс ӵожелы Ас калыксэ пуктӥз-кутӥз, Аслэсьтыз люкетсэ котьку но адӟиськымон амалын утьыса-чакласа возиз. 16Азьвалтӥсьсылэн косэмезъя соос дыртыса султӥзы но Дессау гурт дорысен соосын огазе луизы. 17Иудалэн Симон агаез Никанорен ожмаськыны кутскиз, нош ӝоген, малпамтэ шорысь тушмонлэн урдсконэныз сэрен, ӧжытак ыштонъёс-чигнанъёс чидано луиз. 18Никанор сярысь верано ке, со кылӥз, макем кышкатэк нюръясько Иудаен ӵош ветлӥсьёс, атыкай музъемзэс утёнын кышкатэк ожмасько, пе, соос, соин со вир кисьтон пыр ужзэ быдэстыны кышказ; 19соин ик со Посидониез, Феодотэз но Маттафияез иудейёс доры тупаса улон курыны ыстӥз. 20Та пумысен кема вераськемзы бере, азьвалтӥсь та сярысь калыклы ивортэм бере, ог-огзэс ваньзы огкылысь валазы но куспазы вераськон пумысен огкылэ вуизы, 21ог-огенызы валче пумиськон нунал сярысь вераськизы, нош со дыр вуэм бере, котькудзылы нимысьтыз пукон пуктӥзы. 22Нош Иуда тупамон интыосы ожмаськыны дась луэм муртъёсты пуктылӥз, – тушмонъёс малпамтэ шорысь кескич уж медаз лэсьтэ шуыса, – Никанорен Иуда куспазы тупаса улон сярысь вераськизы. 23Никанор Иерусалимын кӧня ке но дыр ӵоже улӥз, – ярамтэзэ-тупамтэзэ номыре ик ӧз лэсьты, котыраз люкаськем калыкез кошкыны лэзиз. 24Иудаез ялан сюлмаз-малпаназ возиз, лулыныз со та воргорон борды думиськиз; 25солы кышнояськыны кулэ шуыса оскытӥз, нылпиосыз, пе, мед луозы. Иуда кышнояськиз, буйгатскиз, куаныса-шумпотыса улыны кутскиз. 26Нош Алким Иудаен Никанорлэсь куспазы гажаса улэмзэс, ваче кусып кылдытэмзэс адӟиз, лулыныз-сюлмыныз ӝутскиз но, Димитрий доры лыктыса, шуиз, Никанорлэн кун-эксэйлыклы тушмон мылкыдыз, пе, вань, уго кун-эксэйлыклы пумит лек малпась Иудаез ассэ воштӥсьлы пуктӥз. 27Та лек муртлэн ӧрекчаськыса кыл сётъямез бере эксэй, йырзэ кур карыса, вожзэ поттыса, Никанорлы гожтэт гожтӥз, вераз, таӵе ваче гожтэм ужез чиданы солы секыт, чик ӝегатскытэк Маккавеез, жильыен дурылыса, Антиохияе ыстыны косӥз. 28Та сярысь Никанор тодэм бераз ӝоже усиз, кӧтыз урод луиз, номыр но уродзэ лэсьтымтэ воргоронэн кылдытэм кусыпъёсты сӧрыны кулэ луоз шуыса. 29Эксэйлы пумитъяськыны уг луы бере, со тупамон дыр возьмаса улӥз, та ужез кескич амалэн быдэстыны мед луоз шуыса.
30Маккавей шӧдӥз Никанорлэсь соин чурытгес вераськемзэ, огшоры пумиськонъёс дыръя лекгес луэмзэ но таӵе малпанэ со вуиз: ӟеч малпан бордысь уг поты та леклык; соку со, ас бордаз ветлӥсь трос гинэ адямиосты люкаса, Никанорлэсь пегӟиз. 31Та адями тодӥз, Иуда сое кескич амалэн азьпалтӥз шуыса, соку со, священникъёс тупатэм курбон сётонэз быдэсъяку, быдӟым, святой храме лыктӥз но со пиосмуртэз солэн киулаз сётыны косӥз. 32Соос кыл сётыса веразы, утчано муртлэсь кытын луэмзэ ум тодӥське шуыса, 33соку со бур кизэ храм пала ӝутӥз но кыл сётыса шуиз: «Иудаез думылыса мыным ӧд ке сётэ, та Инмар храмез мон музъемен ӵошкато, курбон сётон ӝӧкез куашкато но татчы, Дионислы сӥзьыса, данлыко храм ӝуто». 34Тае верам бераз со отысь кошкиз. Нош священникъёс, киоссэс инбам пала вӧлъяса, калыкмылэн котьку но Дурбасьтӥсезлы сюлворыса тазьы вазиськизы, соос шуизы: 35«Тон, Кузё-Инмаре, номырлы ӟудӥсьтэм-ёрмисьтэм, озьы ке но ӟеч эриктэ сётӥд, та храм ми куспын Тынад улон интыед мед луоз шуыса. 36Вань дун-чылкытлыклэн Дун-Чылкыт Кузё-Инмарез, алигес гинэ чылкытатэм Коркаез али но пумтэм вапумъёс ӵоже саптаськытэк возь, шонертэм улӥсьёслэсь ымзэс ворса».
37Нош Никанорлы Иерусалимысь кыӵе ке но Разис тӧро шоры возьматӥзы, со татысь калыклэн эшез шуыса веразы, солэн ӟеч данэз вӧлмемын вал, аслаз ӟеч мылкыдыз понна сое иудейёслэн атайзы шуыса нимазы. 38Талэсь азьвыл луэм бугыръяськон вапумъёсы иудейлык палан со сылӥз, иудейлык понна туж тыршыса мугорзэ но, лулзэ но сётылӥз. 39Нош Никанор, иудейёсты туж юн адӟемпотостэм каронзэ возьматон понна, вить сюлэсь но ятыргес ожгарчиоссэ сое кутыны ыстӥз, 40уго со малпа вал, сое кутӥз ке, иудейёслы куректон-кайгу ваёз шуыса. 41Нош куке калык уллё каланчаез киултыны малпаз, азбар капка пыр кужмысь пырыны выриз, косэмын вал ини, тыл вайыса, капкае тыл поныны, соку Разис, одно ик киултэмын луонзэ тодыса, ассэ мечен бышкалтӥз, 42Законлы пумит улӥсьёслэн киулазы сюрытозь, аслэсьтыз сӥзэ-данзэ саптаны сётытэк, со сӥлыко кулыны мылкыд кариз. 43Дыртэменыз сэрен бышкалтэмез кулэ интые сюрымтэ, нош адями уллё ӧсъёсы чуртнаське вал ини, соку со из борддор йылэ бызьыса тубиз но кышкатэк со йылысен адямиос вылэ тэтчиз. 44Отын сылӥсьёс ӝогак палэнскыса вуэм бере, – шораз буш инты кылиз, – со шоры ик со кӧт вылаз усиз. 45Шока на вал, йыркурен ӝуатскыса, шур кадь вирыз бызе ке но вал, секытэсь яраосыз ке но вал, султӥз но калык уллё пыр бызьыса потӥз, меӵ изгурезь йылэ дугдӥз. 46Вирыз кошкыса кынарыз бырыку, со пуш макеоссэ ишкалтыса басьтӥз но, кык киыныз ик кутыса, калык вылэ зӥртыса лэзиз, улонлэсь, духлэсь Кузё-Инмарзэ вӧсяськыса куриз, нош ик солы улон но шокан мед сётоз шуыса, таӵе амалэн со улонзэ уретӥз.
Currently Selected:
Маккавейёслэн 2-тӥ книгазы 14: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016