Ездралэн 3-тӥ книгаез 15
15
15-тӥ ЛЮКЕТ
1«Тынад кыл вылад понэм азьпалзэ тодытыса Мынэсьтым верам кылъёсме Мынам калыкелы шара вера, – шуэ Кузё-Инмар, – 2лэсьты озьы: соос хартия#15:2 хартия – папируслэсь лэсьтэм кагаз (бумага) вылэ гожтэмын мед луозы, уго соос шонерлыкоесь, зэмлыкоесь кылъёс луо. 3Эн кышка, тыныд пумит уж малпало шуыса, тыныд пумит верасьёслэн оскымтэзы тонэ медаз паймыты, 4уго котькудӥз оскымтэ мурт оскымтэ улон пушказ кулоз-быроз. 5Тани, Мон, – шуэ Кузё-Инмар, – быдэс музъем вылэ курадӟонъёс лэзё: меч, сютэм улон, кулон, изъянмон, 6уго адямиослэн юрӟым ужъёссы быдэс музъем вылэз саптазы, изъян вайись ужъёссы пачылмизы ни». 7Соин ик Кузё-Инмар шуэ: 8«Законлы пумит улонъёс пумысен ымме ворсаса уг ни улы, сьӧлыклэсь кышкатэк соос соосты лэсьто, йыруж лэсьтӥсь кадь сьӧлыкамзэс азьланяз чидаса уг улы; тани, янгыштэм, дун-шектэм вирлэн тэльмыремез Мон доры вуэ, шонер улӥсьёслэн лулзы дугдылытэк тэльмырыса Мыным вазиське. 9Пунэмзэ Мон соослы берыкто, – шуэ Кузё-Инмар, – соос пушкысь вань сьӧлыктэм вирез Ас дорам басьто. 10Тани, Мынэсьтым калыкме пудо уллёез кадь вандыны нуо; Египетын со мед улоз – тае Мон азьланяз уг чида, 11кужмо киын, ӝужыт суйбыгытэн калыкме потто, азьвыл кадь ик Египетэз секыт курадӟонэн погырто, солэсь быдэс музъемзэ быдто. 12Пунэм берыктэм бере, курадӟытыса погыртэм бере, Инмар вӧсь каронъёс лэзем бере Египет, солэн инъетъёсыз но бӧрдозы. 13Музъем ужасьёс, сое утялтӥсьёс бӧрдозы, малы ке шуоно сынэм висёнэн#15:13 сынэм висён – ржавчина – будосъёслэн губиен аляса висёнзы сэрен кидыссы начармоз, йӧзорен сэрен, туж кышкыт кизилилы луыса но начармоз. 14Куректон-кайгу луоз та дуннелы, со вылын улӥсьёслы но, 15уго соосты быдтон вылысь, меч матэ лыктэ, жугиськыны-ожмаськыны калык калыклы ваче пумит султоз, мечъёссы – соослэн киосазы уло. 16Адямиос вошъяськись мылкыдоесь луозы, ог-огзэс вормыса, асьсэлэн эксэйзы сярысь уз сюлмаське, кивалтӥсьёс но ас киулазы лэсьтӥськись ужъёслэн мынэмзы сярысь уз сюлмаське. 17Адямилэн городэ мынэмез потоз, но со уз быгаты, 18уго соослэн вылтӥяськеменызы сэрен городъёс бугыръяськыны кутскозы, юртъеръёс таркамын луозы, адямиос доры кышкан вуоз. 19Адями матысь муртъёссэ уз жаля, соослэсь юртъерзэс ожмаськон тӥрлыкен тарканы эрик сётозы, сютэм улонэн сэрен, трос шугадӟонъёсын сэрен ваньбурзэс таланы-тарканы кутскозы. 20Тани, шундыӝужанысен, лымшорысен кутскыса, уйпаласен, Ливанысен кутскыса дунне вылысь вань эксэйёсты огазе люкало, – шуэ Инмар, – Мон азьын куалекъяса мед улозы, лэсьтэм ужъёссы понна соослы пунэм мед берыктом шуыса, асьсэ пушкы мед берытскозы. 21Мынам быръем муртъёсыным та дырозь но кызьы соос лэсьто, озьы ик Мон но соослы лэсьто, пушказы пунэмзэ берыкто, – шуэ Инмар Кузё-Инмар. – 22Мынам бур киы уз жаля сьӧлыкоосты, мече но погыръямысь уз дугды музъем вылэ янгыштэм вирез кисьтӥсьёсты, 23Кузё-Инмарлэн вожпотонэз дорысь тыл потӥз но музъемлэсь инъетъёссэ быдтӥз, сьӧлыкоосты ӝуась куроез кадь быдтӥз. 24Куректон-кайгу сьӧлыкоослы но Мынэсьтым курон-косонъёсме утисьтэмъёслы! – шуэ Кузё-Инмар. – 25Уг жаля соосты. Осконлэсь куштӥськемъёслэн нылпиоссы, палэнске, Мынэсьтым дун-чылкыт интыме эн сапталэ. 26Кузё-Инмар ваньзэс Солы пумит сьӧлыкаса улӥсьёсты тодэ; со понна ик соосты виылон, быдтон киулэ сётӥз. 27Музъем вылэ шугадӟонъёс вуизы ни, тӥ соос пушкын улоды. Инмар тӥледыз уз мозмыты, малы ке шуоно тӥ Солы пумит сьӧлыкады. 28Тани, лек адӟон, со лыктоз шундыӝужанысь. 29Трос ожмаськон уробоос вылын Аравияысь лобась кыйёслэн (драконъёслэн) октос-калтосъёссы потозы, тӧллэсь но ӝог соос музъем вылтӥ ортчозы, кинъёс таос сярысь кылӥзы ке, ваньзы туж кышкатскозы, куалекъялозы. 30Лексэс кытчы поныны валасьтэм Кармон карысь калык нюлэскысь кыр парсьёс кадь потоз, туж бадӟым кужымен лыктоз но соосын ожмаськыны кутскоз, Ассирия музъемлэсь оглюкетсэ тырттэм кельтоз. 31Собере кытысь потэмзэс тодӥсь лобась кыйёс вормозы но, бадӟым кужым люкаса, соос сьӧры уйиськыса мынозы. 32Соос куалектозы, бадӟым кужымзэс адӟыса чус кариськозы но бызьыса кошкыны кутскозы. 33Ассирия ожгарчиос пӧлысь ватӥськыса улӥсьёс соосты котыртозы но одӥгзэ виёзы; ожгарчиоссы пӧлын кышканы, куалекъяны кутскозы, эксэйёссы вылэ ӟургетыны кутскозы. 34Тани шундыӝужанысь, уйпаласен лымшор палозь кыстӥськись кышкыт тусъем пилемъёс адӟисько, леклыкен пачылмемын, сильтӧлэн тырмемын. 35Соос куспазы ваче шуккиськозы – трос кизилиосты музъем вылэ сэрпалтозы, соослэсь кизилизэс но уськытозы; мечен кисьтэм вир кӧт дорозь вуоз, 36адями сӥть верблюдлэн энерез дорозь вуоз; музъем вылын туж бадӟым кышкан, куалекъян луоз. 37Таӵе леклыкез вань адӟисьёс туж курдатскозы, куалекъяны кутскозы. 38Та бере трос пол кутскыса лымшорысь но, уйпалась но сильтӧлъёс ӝутскылозы, оглюкетэз – шундыпуксёнысь но, 39шундыӝужанысь кужмо тӧлъёс ӝутскозы, воже потыку вырӟытэм пилемме но усьтозы; нош шундыӝужанысь но шундыпуксёнысь тӧл пельтыку кышкатон понна дасям кизили сӧриськоз. 40Пилемъёс ӝутскозы – туж бадӟымесь но кужмоесь соос, леклыкен пачылмемын, кизили но ӝутскоз, быдэс музъемез но отын улӥсьёсты кышкатон понна; вань ӝужыт интыосы, вырйылъёсы кӧшкемыт кизилиез кисьтозы, 41тылэз но йӧзорез, лобась мечъёсты но вань бусыосты, вань шуръёсты, трос вуосын пачылмытон понна, трос вуосты кисьтозы; 42городъёсты, борддоръёсты, гурезьёсты, мувыръёсты, нюлэскысь писпуосты, возь вылысь турынэз, ю-нянь сётӥсь будосъёсты вуэн ӝокатозы; 43Вавилонэ дугдылытэк мынозы но сое куашкатозы; 44со доры вуыса, сое котыртозы; кизилиез но вожпотонэз со вылэ кисьтозы. Инбамозь ик ӝутскоз тузон но ӵын, ваньзы, котыр калык, сое жаляса бӧрдоз. 45Нош солы тэрытскыса улыны кылем калык кышкан вайисьёс дорын ужаса-тыршыса улоз. 46Нош тон, Асия, Вавилонлэн оскиськон ужаз, солэн данлыказ пыриськись: 47куректон-кайгу тыныд, куанер, солы укшаны тыршыса улэмед понна, азыны-калгыны нылъёстэ чебермамед понна, – дусымъёсыд азьын соос данъяськыны мед быгатозы, соослы мед кельшозы шуыса, нош дусымъёсыдлэн котьку но тонэн азыса-калгыса улэмзы потэ вал. 48Кыӵе гинэ синазькыль ужъёс, маръёс гинэ ӧз лэсьты, ваньзэ сое адӟем карыса улӥд. 49Со понна, – шуэ Инмар, – тон доры куректон-кайгу лэзё: кузпалтэк кылён, куанер, сютэм улон, меч, сьӧдчер – тынэсьтыд юртъёстэ эриктэмаса, виён пыр тырттэм кельтон вылысь. 50Тынад кужымлыкедлэн данлыкез сяська кадь куасьмоз, тон доры ыстэм ӵушкась пӧсь вуиз ке. 51Кураськись кышномурт кадь тон кынартэм кылёд, кышномуртъёс тонэ тышкалозы, яраё карозы, сӥё-дано адямиос, дусымъёсыд асьсэ доры тонэ пыртаны медаз ни быгатэ шуыса. 52Сокем Мон тонэ синазькыль карысал-а, – шуэ Кузё-Инмар, – 53котькыӵе но дыръёсы Мынэсьтым быръем муртъёсме ӧй ке виылысалыд, виён вылысь киостэ ӝуткаса ӧй ке улысалыд, кудӟем дыръяд кулӥсьёсты сантэмаса ӧй ке улысалыд? 54Чеберъя аслэсьтыд ымнырдэ: 55азыса-калгыса поттэм дундэ алвылад басьтӥд ни, со понна тон доры пунэм берыктон вуоз. 56Мар карид тон Мынам быръем муртъёсыным, – шуэ Кузё-Инмар, – озьы ик Инмар тыныд пунэмзэ берыктоз, – курадӟонъёс киулэ Со тонэ сётоз: 57сютэм улыса, нылпиосыд кулозы, меч улэ тон бырод, городъёсыд куашкатэмын луозы, вань адямиосыд бусые меч улэ погралозы, 58нош кинъёс гурезьёсын, соос сютэм кулозы, нянь тырмымтэен, мугор люкетъёссэс сиёзы, ву тырмымтэен, вирзэс юозы. 59Шудтэм улэмысьтыд зарезьёс кузя кошкод, отын но куректон-кайгуосын пумиськод. 60Одӥг интыысь мукетаз выжон дыръяд соос тырттэм кылем город вылэ урдскозы но музъемедлэсь одӥг люкетсэ быдтозы, данлы ужедлэсь люкетсэ но куашкатэм Вавилон доры берытскыкузы быдтозы. 61Таркаса куштэм, соос понна тон куро интыын луод, нош соос тон понна тыл луозы, – 62тонэ быдтозы, городъёстэ но, музъемдэ, гурезьёстэ, вань нюлэсъёстэ, емыш вайись писпуостэ тылын сутозы; 63пиостэ пленэ нуозы, ваньбурдэ асьсэлы киултозы, данлыктэ быдтозы».
Currently Selected:
Ездралэн 3-тӥ книгаез 15: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016