Ездралэн 3-тӥ книгаез 16
16
16-тӥ ЛЮКЕТ
1Куректон-кайгу тыныд, Вавилон но Асия, куректон-кайгу тыныд, Египет но Сирия! 2Чурыт бышкись дӥсянэн, кеч гонлэсь лэсьтэм дӥськутэн дӥсяське, пиосты понна викышъяса бӧрдэ, куректэ-кайгыре, уго быронды матэ вуиз. 3Тӥ вылэ меч лэземын, – кин сое палэнтоз? 4Тӥ вылэ тыл лэземын, – кин сое кысоз? 5Курадӟонъёс тӥ вылэ лэземын, – кин соосты палэнэ нуоз? 6Нюлэскысь сютэм левез кин ке улляны быгатоз-а, куро пушкын гомаса ӝуаны кутскись тылэз син куспын кин кысыны быгатоз? 7Кужмо ыбылӥськисьлэсь ыбыса лэзем ньӧлзэ кин ке палэнтоз-а? 8Кужмо Кузё-Инмар шугадӟонъёс лэзья, – кин соосты палэнтоз? 9Солэн вожпотонэз бордысь тыл потӥз, – кин сое кысоз? 10Со чилектӥз ке, кин талэсь уз кышка? Гудыртӥз ке, кин туж уз куалекты? 11Кузё-Инмар кышкыт тусын учкоз, – кин Солэн ымнырызлэсь куалектыса пумозяз уз чигиськы? 12Куалектӥз-зурказ музъем, солэн инъетъёсыз но; зарезь пыдэскысеныз бугыръяське, тулкымъёсыз но куалекъяло, чорыгъёсыз но – Кузё-Инмарлэсь ымнырзэ адӟыса, Солэсь быдӟым кужымзэ шӧдыса. 13Уго Солэн пукыӵез золъясь бур киыз кужмо, ыбыса лэзем ньӧлъёсыз Солэн лэчытэсь, музъем пумозь ке но лэзьязы, уз лябӟе. 14Тани, курадӟонъёс лэзисько, музъем вылэ вуытозязы уз ни берытске. 15Тыл кенже, музъемлэсь инъетъёссэ ӵушкатозяз, со уз ни кысы. 16Кызьы кужмо ыбылӥськисьлэн ыбыса лэзем ньӧлыз уг ни берытскы, озьы ик музъем вылэ лэзем шугадӟонъёс уз ни берытске. 17Куректон-кайгу мыным, куректон-кайгу мыным! Со нуналъёсы кин монэ мозмытоз на? 18Висёнъёс потозы но, тросэз викышъяны-ӝуштыны кутскозы; сютэм улон вуоз но, тросэз кулозы; ожмаськонъёс кутскозы, кивалтӥсь йыръёс куалекъяны кутскозы; курадӟонъёс вуозы но, вань калык куалекъяны кутскоз. 19Курадӟонъёс вуэм бере мыным мар кароно? 20Тани, сютэм улон, висёнъёс, куректон-кайгуос, ёрмыса-ӝикаса улон нуналъёс – вӧсь карон сюлоос – ыстэмын тупатскон понна; 21нош ваньмыз тазьы ке но луиз, законлы пумит ужъёс лэсьтэмысь адямиос уз дугдэ, вӧсь каронъёсыз но ялан тодазы возьыса уз улэ. 22Тани, музъем вылын ваньмыз дунтэм дунын вузаськоз, соку малпалозы: каньыллык вуиз, но со дыръёсы ик музъем вылэ курадӟонъёс вуозы: меч, сютэм улон, кужмо бугыръяськон. 23Сютэм улыса, музъем вылысь туж трос калык быроз, нош кинъёс сютэм улонэз чидалозы, меч улын кулозы-бырозы. 24Кулэм шӧйёсты кыедэз кадь пазялозы, соос понна нокинлы бӧрдыны луоз, малы ке шуоно музъем тырттэм кылёз, солэн городъёсыз куашкатэмын луозы. 25Музъемез гырисьёс, кизисьёс чик уз ни кыле. 26Писпуос емыш сётозы, – но кин соосты бичалоз? 27Виноград кисьмалоз, – но кин сое лёгалоз? Уго ваньмыз ышемын-быремын луоз. 28Секыт луоз адямилы адямиез пумитаны яке солэсь куаразэ кылыны, 29уго городын улӥсьёс пӧлысь ог дасо пала гинэ адями улэп кылёз, нош гуртъёсын – ог кык мурт, соос пеймыт нюлэсъёсы но гурезьёсысь мур гопъёсы ватскылозы. 30Кызьы садысь вӧйпулэн вайёсаз кытӥ-отӥ куинь яке ньыль мульыосыз кылё, 31яке виноград бакчаын емыш октэм-калтэм бере кӧня ке пурыосыз адӟытэк кылё, виноградэз сак-сак бичаку но, 32озьы ик со нуналъёсы юртъеръёссэс чакласа-качаса мечен ветлэмъёс бере куинь яке ньыль мурт улэп кылёз. 33Музъем тырттэм кылёз, бусыосыз уз ни гыриське, бадӟымъёсыз но, пичиосыз но сюресъёс бышкись будосэн согиськозы, малы ке шуоно соос кузя нокинлы ветлыны луоз. 34Эмеспи сюрымтэен, нылмуртъёс бӧрдыса улозы; картъёссы ӧвӧлысь кышномуртъёс бӧрдыса улозы; соослэн нылъёссы бӧрдыса улозы юрттэт ӧвӧлысь. 35Эмеспиоссэс ожын виылозы, картъёссы сютэм улыса кулылозы. 36Кылзэ тае но визьмаське, Кузё-Инмарлэн ляльчиосыз! 37Та – Кузё-Инмарлэн кылыз: кылзэ сое, Кузё-Инмарлэн верам кылызлы оскытэк эн улэ. 38Тани, матэ вуо курадӟонъёс, соос ӝегаса уз улэ. 39Кызьы нуны ваёно кышномуртлэн укмыс толэзь ортчыса пи нуны ваён дырыз вуэ, кык яке куинь час талэсь азьвыл солэсь вань пушсэ висёнъёс шымырто, пушкысь нуны потыны кутскем бере, одӥг минут но ӝегатскыса уз улэ, – 40озьы ик музъем вылэ лыктоно курадӟонъёс но ӝегатскыса уз улэ; со вакытысь адямиос викышъялозы-ӝуштозы, висёнъёс соосты котыртозы. 41Мынам калыке, кылзы, кыл верало: ожмаськыны дасяське, курадӟонъёс пӧлын улыса, музъем вылын дормы ӧвӧл шуыса улэлэ. 42Вузась мурт пегӟыны дасяськись кадь мед луоз, басьяськись мурт – бырыны дасяськись мурт кадь мед луоз; 43вузкарись мурт – барыш басьтонлы оскиськисьтэм мурт кадь мед луоз, корка пуктӥсь мурт – со пушкын улыны оскиськисьтэм мурт кадь мед луоз. 44Кизись мурт уг ни ара шуыса мед малпалоз, виноград будэтӥсь – виноградэз уг ни бича шуыса мед улоз; 45бызись-басьтӥсьёс – нылпи ум ни вае мед шуозы, бызьытэк кылемъёс – палкышно кадь мед улозы. 46Соин ик ужасьёс пайдатэк ужало, 47уго соослэсь ужам емышсэс мурт кунысь лыктэмъёс киултозы, ваньбурзэс талалозы, коркаоссэс куашкатозы, пиоссэс ляльчи карозы, малы ке шуоно пленын но сютэм улыса, соос нылпиоссэс ваё. 48Лушкаськыса-таласькыса улӥсьёсты, городъёссэс, коркаоссэс, юртъерзэс, асьсэдыз чебермаса улӥсьёсты 49сьӧлыкъёссы понна уката но юнгес синазькыль каро, – шуэ Кузё-Инмар. 50Кызьы юмшась-калгись кышномурт синазькыль каре дун-чылкыт, дун-шектэк улӥсь кышномуртэз, 51озьы шонерлык синазькыль кароз ассэ чеберъясь шонертэм улонэз, син азяз сое янгыше уськытоз, лыктӥз ке Со, Кин дурбасьтэ музъем вылысь котькуд сьӧлыкез шарае поттӥсьлы. 52Соин ик шонертэм улонлэсь адӟем карыса эн улэ, солэн ужъёсызлы но синмаськыса эн улэ, 53уго ӧжытак дыр ортчоз но, шонертэм улон музъем вылысь уллямын луоз, нош шонерлык тӥ вылэ кузёяськыны пуксёз. 54Сьӧлыко мурт ӧй сьӧлыка медаз шуы, уго ӝуась эгыръёс ӝуало со муртлэн йыр йылаз, кин шуэ: «Инмар Кузё-Инмар азьын, Солэн данлыкез азьын но ӧй сьӧлыка». 55Кузё-Инмар адямиослэсь вань ужъёссэс тодэ, соослэсь мар карыны ӧдъямзэс но, малпанъёссэс но, сюлэмзэс но Со тодэ. 56Со шуиз: «Музъем мед луоз», – музъем потӥз, «инбам мед луоз», – инбам луиз. 57Солэн кылыныз кизилиос кылдытэмын, кизилиослэсь но лыдзэс Со тодэ. 58Пыдэстэм дуннеосты но Со учке, мар отын ватӥськемын адӟе, зарезез мертаз, маиз вань со пушкын, – сое но. 59Аслаз кылыныз Со зарезез вуос пушкы ворсаз, музъемез вуос йылэ ошиз. 60Инмез Со тылысэз кадь возъяз, вуос вылэ сое интыяз. 61Кыр дуннее Со ву поттон пасьёсты интыяз, гурезь йылъёсы – тыосты, ӝужыт изгурезь йылъёсысь шуръёсты васькытыса музъемез люктан понна интыяз. 62Со адямиез кылдытӥз но мугор шораз сюлэм понӥз, адямилы дух, улон но визьлык сётӥз, 63Ваньмызлэсь Кужмо Инмарлэсь шоканзэ но, Кин ваньзэ кылдытӥз, музъемлэн ватӥськем интыосысьтыз ваньзэ ватӥськыса улӥсьсэ но Со эскере-чакла. 64Со тӥлесьтыд малпандэс тодэ, сюлмыныды мар малпаськоды, – сое но, куке тӥ сьӧлыкаськоды но сьӧлыкъёстэс ватыны тыршиськоды. 65Кузё-Инмар тӥлесьтыд одӥгтэм вань ужъёстэс адӟе озьы, кызьы вань, ваньдылэсь сьӧлыкъёстэс шарае поттоз, – 66сьӧлыкъёсты адямиос азьын усьтӥськем бере тӥ возьытэ вуттэмын луоды, со нуналэ законлы пумит улэмъёсты тӥ азе тӥледыз янгыше уськытыны султозы. 67Мар тӥ кароды, кызьы тӥ сьӧлыкъёстэс ватоды Инмар азьын, Солэн Кылчинъёсыз азьын? 68Инмар – Судья; Солэсь кышкалэ; сьӧлыкъёстылэсь куштӥське но ноку но азьланяз законлы пумит ужъёс лэсьтыса эн улэ, – соку Инмар тӥледыз поттоз, вань куректон-кайгуослэсь мозмытоз. 69Уго тани, туж трос лыдъем уллёлэн йыркурез тӥ вылэ ӝуатске, тӥ пӧлысь куд-огдэс кутозы но сульдэръёслы-идолъёслы курбон сётозы. 70Кин соосын огкылысь кариськиз ке, соосты серем карозы, ултӥялозы, лёгалозы. 71Уго вань интыосын, бускель городъёсын Кузё-Инмарлэсь кышкаса улӥсьёс вылэ тросэз урдскозы. 72Укылтэмесь луозы но Кузё-Инмарлэсь кышканэн улӥсьёслэсь жалятэк лушкалозы-таркалозы, тырттэм кельтозы, 73соослэсь ваньбурзэс лушкалозы, соосты коркаосысьтызы уллялозы, тырттэм кельтозы. 74Соку Мынам быръем муртъёсы доры эскерон-чаклан вуоз, кызьы зарниез тылын эскеро-чаклало. 75Яратоноосы, кылзэ Монэ, – шуэ Кузё-Инмар, – тани тӥ азьын куректоно-кайгыроно нуналъёс, соослэсь Мон тӥледыз мозмыто. 76Эн кышкалэ, эн шекланэлэ, уго тӥляд азьвалтӥсьты – Инмар. 77Мынэсьтым курон-косонъёсме, законъёсме быдэсъяса улӥды ке, – шуэ Инмар Кузё-Инмар, – соку тӥляд сьӧлыкъёсты зӥбет интыын уз луэ, тӥледыз зӥбыса-нюртыса уз возе, законлы пумит ужъёсты но тӥледыз уз ворме. 78Сьӧлыкъёсыныды думылӥськемъёс, законлы пумит улонъёсыныды шобырскемъёс, куректон-кайгу тӥледлы! Та – куакен басьтэм бусы, со пыр потон бышкись будосэн шобыртэмын, соин ик со пыр адями потыны уг быгаты: тыл пушкы быдтон понна сое куштыса кельтозы.
Currently Selected:
Ездралэн 3-тӥ книгаез 16: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016