Михей 3

3-тӥ ЛЮКЕТ

1Мон шуи: «Иаковлэн кузёйыръёсыз, Израиль выжылэн кивалтӥсьёсыз, кылзӥське: тӥ-а зэмлыкез тодыны кулэ ӧвӧл? 2Нош тӥ ӟечез адӟонтэм кариськоды, уродэз яратӥськоды; вылысьтызы кузэс нииськоды, лы бордысьтызы сӥльзэс ишкаськоды. 3Калыкелэсь мугорзэ сииськоды, вылысьтызы кузэс нииськоды, нош лыоссэс чигиськоды, горшоке кадь пыргытӥськоды, лулмугорзэс пуртые кадь юдӥськоды. 4Кузё-Инмарлы соос вазиськозы, но со вакытэ Со соосты уз кылы, Аслэсьтыз ымнырзэ соослэсь ватоз, уго соос лек ужъёс лэсьтыса уло. 5Тазьы шуэ Кузё-Инмар Мынэсьтым калыкме йыромытӥсь пророкъёслы, кудъёсыз, пинь улазы мар ке йырйыны вань дыръя тупаса улон сярысь тодыто, нош кин соослэн ымазы номыр но уг поны, солы пумит ожмаськыны кутско. 6Соин ик адӟон интые тӥледлы пеймыт уй луоз, азьпалзэ тодон интые – пеймытлык; ӧрекчи пророкъёслэн шундызы пуксёз, соос йылын нуназе куазь пеймытомоз. 7Возьытэ вуозы азьпалзэ адӟытӥсьёс, серекъян-сантэман улэ сюрозы тунаськисьёс, ваньзы соос ымзэс ворсалозы, малы ке шуоно Инмар дорысь ответ уз вуы. 8Нош мон кужымен, Кузё-Инмарлэн Духеныз тыр луэмын, шонерлыкен, юнлыкен вераны быгатӥсько Иаковлы солэн йыружез сярысь, Израильлы солэн сьӧлыкез сярысь. 9Кылзэ ук тае, Иаков юртлэн кузёйыръёсыз, Израиль юртлэн кивалтӥсьёсыз – шонер судэз кулэтэм карисьёс, вань шонерез кырыж-мерыж карисьёс, 10Сӥонэз вир вылэ пуктӥсьёс, Иерусалимез ӧрекчаськонэн тырмытӥсьёс! 11Солэн кузёйыръёсыз салам-кузьым басьтыса судить каро, священникъёсыз дун басьтыса дышето, пророкъёсыз коньдон бичаса азьпалзэ тодыто, нош асьсэос, со куспын ик Кузё-Инмар вылэ пыкиськыса, шуо: ”Асьме пӧлын Кузё-Инмар ӧвӧл-а? Шугадӟон асьме доры уз вуы!” 12Соин ик тӥледын сэрен Сӥон бусы кадь гыремын луоз, Иерусалим из люклы пӧрмоз, та коркалэн гурезез нюлэсо вырйыллы пӧрмоз».

Currently Selected:

Михей 3: УДМБИБ

Highlight

Copy