Левит 23
23
23-тӥ ЛЮКЕТ
1Кузё-Инмар Моисейлы тазьы вераз, тазьы шуиз: 2«Израиль пиослы ял, соослы Кузё-Инмарлэн праздникъёсыз сярысь вера, калыкез вӧсяськонэ люкаса ортчытъяно сӥё-дано нуналъёс сярысь ялыса вера. Тани Мынам праздникъёсы: 3куать нунал ужъёсты быдэсъяны яра, нош сизьыметӥ нуналэ шутэтскон суббота, вӧсяськонэ люкаськон нунал; нокыӵе но мукет ужъёс эн лэсьтэ; вань улоно интыосады та Кузё-Инмарлэн субботаез. 4Тани Кузё-Инмарлэн праздникъёсыз, вӧсяськонэ люкаськон дыръёс, соосты ортчытъян понна тӥ калыкез ас дыраз ӧтчаны кулэ. 5Нырысетӥ толэзьлэн дас ньылетӥ [нуналаз], ӝытазе, Кузё-Инмарлэн Пасхаез; 6та толэзьлэн ик дас витетӥ нуналаз Юмал Нянь Сиён праздник, та Кузё-Инмарлэн праздникез; сизьым нунал ӵоже юмал нянь сиыса улэ; 7нырысетӥ нуналаз тӥ вӧсяськонэ люкаське; номыр но эн ужалэ. 8Сизьым нунал ӵоже Кузё-Инмарлы курбонъёс вайылэ; сизьыметӥ нуналэ озьы ик вӧсяськонэ люкаськон; номыр но эн ужалэ».
9Кузё-Инмар Моисейлы тазьы вераз, тазьы шуиз: 10«Израиль пиослы таӵе ялон вера: Мынам тӥледлы сётоно музъемам вуиды ке, кизем юдэс араса улӥды ке, нырысь культодэс священниклы вае; 11тӥ доры ӟечлык мед вуоз шуыса, со Кузё-Инмар азьын культодэс, салам-кузьым карыса, вылэ ӝутоз, праздниклэн кыкетӥ нуналаз священник сое вылэ ӝутоз; 12культоез вылэ ӝутон нуналэ Кузё-Инмар азьын тылын сутӥськись курбон сётыны шектэм, одӥг аресъем ыжпи вае, 13салам нянез соин ӵош вае: Кузё-Инмар азьын ческыт зын поттӥсь курбон сётыны ефалэн кык дасмос люкетаз тэрымон чабей пызь вӧйын сураса вае; соин ӵош кисьтоно курбон-саламлы гинлэн ньылетӥ люкетаз вина вае; 14Инмардылы таӵе курбон ваемдылэсь азьвыл нокыӵе но выль нянез, куасьтэм юэз, ыль юэз эн сие: тӥляд вань улон интыосысьтыды тӥляд выжыостылы пумтэм вапумъёс ӵоже быдэсъяны сётэм пуктон-косон та. 15Праздник ортчем бере, нырысетӥ нуналысеныз кутскыса, сэзъяса вылэ ӝутыны ю культо ваем нуналысеныды кутскыса, быдэссэ сизьым арняез асьтэлы лыдъялэ-ӵоталэ, 16сизьым арня ортчем бере нырысетӥ нуналозяз витьтон нунал лыдъялэ-ӵоталэ, соку Кузё-Инмарлы саламлы выль нянь вае: 17улон интыосысьтыды вылэ ӝутыны кык нянь вае, соос ефалэн кык дасмос люкетаз тэрымон чабей пызьлэсь пыжемын луыны кулэ, соос чырсатыса пыжемын луыны кулэ; соосты Кузё-Инмарлы нырысь емыш шуыса вае. 18Салам нянен валче одӥг аресъем, шектэм сизьым ыжпиосты, сюро таза пудо пӧлысь одӥг ошпи, кык [шектэм] такаосты вае; соосын валче сётоно салам нянен но кисьтоно курбон-саламен та ваньмыз Кузё-Инмарлы сӥзем тылын сутӥськись курбонлы сётэмын мед луоз, та курбон Кузё-Инмар азьын ческыт зын поттыса мед улоз. 19[Саламлы ваем выль нянен ӵош] сьӧлык понна курбон сётыны кеч уллёысь одӥг кечтака вае, тупаса улонлы сӥзем курбон сётыны одӥг аресъем кык ыжпиосты вае. 20Священник сое Кузё-Инмар азьын сэзъяса вылэ ӝутыны кулэ, сэзъяса ик вылэ ӝутыны кулэ саламлы ваем выль нянез но кык ыжпиосты, та луоз Кузё-Инмарлы ваем святыня; [тае курбон сётӥсь] священниклы [сёто]; 21та нуналэ калыкез ӧтчалэ, тӥ доры вӧсяськыны мед люкаськозы, со нуналэ номыр но эн ужалэ: та пумтэм вапумъёс ӵожелы сётэм пуктон-косон тӥляд вань улон интыосады выжыысь выжыосы мед улоз. 22Ана вылысьтыды юдэс аракуды, йыран дурозяз ик эн аралэ, арам бервылады усьылэм шепъёсты эн бичалэ, куанер улӥсьлы, сьӧрлось лыктэм муртлы кельтэ. Мон Кузё-Инмар, тӥляд Инмарды». 23Кузё-Инмар Моисейлы тазьы вераса шуиз: 24«Израиль пиослы вера: сизьыметӥ толэзьлэн нырысетӥ [нуналаз] тӥ мед шутэтскоды, гумыен пеллян праздник мед луоз, вӧсяськонэ люкаськонды [мед луоз]; 25номыр но эн ужалэ, Кузё-Инмарлы курбон сётэ».
26Кузё-Инмар Моисейлы тазьы вераз, тазьы шуиз: 27«Сизьыметӥ толэзьлэн дасэтӥ [нуналаз], Чылкытатӥськон-сузяськон нуналэ, вӧсяськонэ люкаське; асьтэдыз зӥбыт-востэм возе но Кузё-Инмарлы курбон сётэ; 28со нуналэ номыр но эн ужалэ, уго со Чылкытатӥськон-сузяськон праздник, Инмарды Кузё-Инмар азьын тӥледыз чылкыт карон понна со. 29Котькудӥз но адями та нуналэ ассэ зӥбыт-востэм возьытэк (визятэк) улэ ке, со мурт ас калыкез пӧлысь быдтэмын луоз; 30кудӥз ке но адями лул та нуналэ кыӵе ке но уж лэсьтӥз ке, со лулэз Мон ас калыкез пӧлысь быдто; 31номыр но эн ужалэ, вань улон интыосысьтыды тӥляд выжыостылы пумтэм вапумъёс ӵожелы сётэм пуктон-косон та; 32та – суббота – тӥ понна шутэтскон нунал мед луоз, асьтэдыз зӥбыт-востэм возе, толэзьлэн укмысэтӥ [нуналэзлэн] ӝытазеысеныз кутскыса; [толэзьлэн дасэтӥ нуналаз] ӝытазеысен ӝытазеозь суббота праздниктэс уте».
33Кузё-Инмар Моисейлы тазьы вераз, тазьы шуиз: 34«Израиль пиослы тазьы шу: со сизьыметӥ толэзе ик дас витетӥ нуналысен кутскыса Тылыс Пуктон праздник, сизьым нуналъем, Кузё-Инмарлы сӥзем праздник. 35Нырысетӥ нуналэ вӧсяськонэ люкаське, номыр но со нуналэ эн ужалэ; 36сизьым нунал ӵоже Кузё-Инмарлы курбон сётэ; тямысэтӥ нуналэ вӧсяськонэ люкаське, соку Кузё-Инмарлы курбон сётэ: та праздникез келян нунал, номыр но эн ужалэ. 37Тани Кузё-Инмарлэн праздникъёсыз, вӧсяськонэ люкаськонъёс ортчытъян нуналъёс, куке Кузё-Инмарлы тылын сутӥськись курбонъёс сёто, салам няньёс, кисьтоно курбон-саламъёс ваё, курбон пудоос вандо, котькудзэ курбон сётонэз аслаз нуналаз ортчыто, 38Кузё-Инмарлэн субботаосыз сяна, тӥляд саламъёсты-кузьымъёсты сяна, вань сӥзиськондэс быдэстыса ваемъёсты сяна, ас ӟеч мылкыдыныды Кузё-Инмарлы вань ваемъёсты сяна. 39Нош сизьыметӥ толэзьлэн дас витетӥ нуналаз, музъемлэсь будэтэм емышъёссэ бичан вакытады, Кузё-Инмарлэсь праздниксэ сизьым нунал пусъе: нырысетӥ нуналаз шутэтске, тямысэтӥ нуналаз шутэтске; 40нырысетӥ нуналаз чебер писпуослэсь вайёссэс, пальмапу вайёсты, паськыт куаро писпуослэсь вайёссэс, шур дурысь бадьпу вайёсты кияды кутэ, соку сизьым нунал ӵоже Инмарды Кузё-Инмар азьын шулдыръяське; 41арлы быдэ Кузё-Инмарлэсь та праздниксэ сизьым нунал ӵоже сӥё-дано ортчытэ: та тӥляд выжыостылы пумтэм вапумъёс ӵожелы сётэм пуктон-косон; сизьыметӥ толэзе та праздникез ортчытэ; 42тылыс пушкын сизьым нунал улэ; Израиль музъемын пырак улӥсь тылысын улыны кулэ, 43тӥляд выжыосты мед тодозы, Мон израиль пиосты Египет музъемысь поттэм берам тылысъёсы улыны интыяй шуыса. Мон тӥляд Инмарды Кузё-Инмар». 44Соку Моисей израиль пиослы ивортӥз Кузё-Инмарлэн праздникъёсыз сярысь.
Currently Selected:
Левит 23: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
