Левит 24
24
24-тӥ ЛЮКЕТ
1Кузё-Инмар Моисейлы тазьы вераз, тазьы шуиз: 2«Израиль пиосты тыныд вӧйпу мульыысь пызьыртыса поттэм чылкыт вӧй вайыны кос – югыт карон понна, лампадаос кысылытэк ӝуаны мед быгатозы; 3сӥзён-косонэн ковчеглэн катанчи сьӧраз, вӧсяськон скиния пушкын, Аарон [но солэн пиосыз] та лампадаосты Кузё-Инмар азе пуктылыны кулэ, ӝытысен ӵукнаозь ялан мед ӝуалозы шуыса: та тӥляд выжыостылы пумтэм вапумъёс ӵожелы сётэм пуктон-косон. 4Чылкыт югдытон арбери вылэ соос котьку но Кузё-Инмар азе лампадаосты пуктылыны кулэ. 5Чабей пызь басьты но солэсь дас кык бискыли нянь пыж; котькуд бискылиез пыжоно ефалэн кык дасмос пызь люкетэзлэсь; 6соосты кык чурен пуктылы, котькуд чуре куать бискыли, Кузё-Инмар азе чылкыт ӝӧк вылэ пуктылы; 7[котькуд] чур вылэ чылкыт ливан-ладан [но сылал] пон, та нянь бордын мед улоз Кузё-Инмарлы курбон сётонэз буре ваён понна; 8котькуд суббота нуналэ израиль пиослэн нимынызы бискылиосты Кузё-Инмар азе тыроно: та пумтэм вапумъёслы сётӥськем сӥзён-косон. 9Соос Ааронлы но солэн пиосызлы сётэмын луозы, соос та курбон нянез святой интыын сиёзы, уго та Кузё-Инмарлы ваем курбонъёс пӧлысь соослы сётоно быдӟым святыня: та пумтэм вапумъёслы сётэм пуктон-косон».
10Одӥг израиль ныллэн египет воргоронэн шедьтэм пиез израиль пиос азе потӥз но израиль ныллэн пиез станысен израиль пиосмуртэн ченгешонэ вуиз; 11израиль ныллэн пиез [Кузё-Инмарлэсь] нимзэ лек кылъёсын сантэмаса вераз. Соку сое Моисей доры вайизы – та пилэн анаезлэн нимыз Саломиф, Даврийлэн нылыз, со Дан выжыысь вал, – 12та пиез возьмаськисьёс киулэ сётӥзы Кузё-Инмарлэн эрикез со пумысен ялэмын луытозьлы.
13Кузё-Инмар Моисейлы тазьы шуыса вераз: 14«Лек кылын вераськисез станлэн сьӧраз потты но, верамез кылӥсьёс ваньзы солэн йыр вылаз кизэс мед понозы, вань калык сое изэн зӥръяса мед жугоз. 15Израиль пиослы шу: ”Кин аслэсьтыз Инмарзэ лек кылын куаретӥз ке, со ас вылаз сьӧлыксэ нуоз; 16Кузё-Инмарлэсь нимзэ ултӥясь мурт виемын луыны кулэ, вань калык сое изэн зӥръяса мед виёз: сьӧрлось лыктэм мурт-а со, та музъемын весяк улӥсь-а со, – [Кузё-Инмарлэсь] нимзэ сантэманы кутскиз ке, виемын луоз. 17Кин ке но мукет муртэ вииз ке, со мурт виемын луоз. 18Кин ке но пудоез вииз ке, со понна дун тырыны кулэ, пудо понна пудо. 19Кин ке но матысь муртсэ яраё кариз ке, со муртлы озьы ик кароно, мар со мукет муртлы лэсьтӥз: 20тӥям понна тӥян, син понна син, пинь понна пинь; кызьы со мукет адямилэсь мугорзэ яраё кариз, озьы ик солы но лэсьтоно. 21Кин ке но пудоез вииз ке, со понна дун тырыны кулэ; нош кин ке но адямиез вииз ке, сое ассэ но виёно. 22Тӥляд одӥг кадь судды луыны кулэ: сьӧрлось лыктэм муртлы но, та музъемын весяк улӥсь муртлы но, уго Мон тӥляд Инмарды Кузё-Инмар”». 23Соку Моисей Израиль пиослы вераз; лек кылын куаретӥсь муртэ станлэн сьӧраз поттӥзы но изэн зӥръяса виизы, израиль пиос лэсьтӥзы озьы, кызьы Кузё-Инмар Моисейлы косӥз.
Currently Selected:
Левит 24: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
