Левит 22
22
22-тӥ ЛЮКЕТ
1Кузё-Инмар Моисейлы тазьы вераз, тазьы шуиз: 2«Ааронлы но солэн пиосызлы вера, израиль пиослэн святыняосынызы туж чакласа мед вырозы, соослэн Мыным сӥзем саламъёссы-кузьымъёссы пыр Мынэсьтым святой нимме медаз сантэмалэ. Мон Кузё-Инмар. 3Вера соослы: кин ке но тӥляд кидысысьтыды-выжыысьтыды, али яке вуоно выжыысьтыды, ас бордаз кырсез вань дыръя израиль пиослэн Кузё-Инмарлы сӥзьыса сётэм святыняоссы борды вуттӥськиз ке, со адями лул Мынам азьысьтым быдтэмын луоз. Мон Кузё-Инмар, [тӥляд Инмарды]. 4Ааронлэн выжыысьтыз кин гижлочерен висе яке кинлэн саптаськонэз вия, сыӵе муртлы чылкытатӥськытозяз святыняез#22:4 святыня шуыса нимало Инмарлы курбон сётыны ваем саламъёсты-кузьымъёсты; соосты священникъёслы гинэ сиыны яра, кылсярысь, курбонлы ваем салам няньлэсь кылем люкетсэ, сьӧлык понна сётэм курбон пудолэсь сӥльзэ, янгыш уж понна сётэм курбон пудолэсь сӥльзэ – соосты быдӟым святыня шуыса лыдъяло сиыны уг яра; кулэм муртлэсь кырсь луэм маке борды йӧтӥськиз ке яке кидысэз кисьтӥськиз ке, 5яке кин ке кый выжы борды йӧтӥськыса саптаськиз ке, яке адями борды йӧтӥськыса саптаськиз ке, – солэн кырсез котькыӵе мед луоз, – 6та кырсь борды йӧтӥськыса, со ӝытозь кырсь луоз, мугорзэ вуэн миськытозь, солы святыняез сиыны уг яра; 7шунды пуксем бере со чылкыталоз, соку со святыняез сиыны быгатоз, уго та солэн сиёнэз. 8Кулэм пудоез, пӧйшурен кесям пудо сӥлез со сиыны кулэ ӧвӧл, та пыр медаз саптаськы шуыса. Мон Кузё-Инмар. 9Мынэсьтым косонъёсме мед быдэсъялозы, асьсэ вылэ сьӧлык медаз басьтэ но та косонъёсты сӧрыса улыку кулоно медаз луэ шуыса. Мон [Инмар] Кузё-Инмар, соосты дун-чылкыт карись. 10Огез но палэнысь мурт святыняез сиыны кулэ ӧвӧл; священник доры улыны интыяськем мурт но, медъяськем мурт но святыняез сиыны кулэ ӧвӧл; 11нош священник, азвесь уксё тырыса, адямиез аслыз басьтӥз ке, со мурт тае сиыны быгатэ; священниклэн юртаз вордскемъёс но солэсь няньзэ сиыны быгато. 12Священниклэн нылыз палэнысь муртлы бызиз ке, саламлы-кузьымлы ваем святыняосыз со сиыны кулэ ӧвӧл; 13священниклэн нылыз палкышно кылиз яке картэныз люкиськиз ке, нылпиосыз солэн ӧвӧл, со атай юртаз пинал дыръяз сямен ик улыны берытскиз ке, соку со атаезлэсь няньзэ сиыны быгатэ ни; нош палэнысь вуэм одӥгез но адями сое сиыны кулэ ӧвӧл. 14Кин ке янгышен святыня пӧлысь мае ке сииз ке, со святыняез священниклы сётыны кулэ, со борды витетӥ люкетсэ ватсаны кулэ. 15Священникъёс израиль пиослэсь Кузё-Инмарлы ваем святой саламъёссэс-кузьымъёссэс сантэманы кулэ ӧвӧл, 16йыруж лэсьтон сьӧлыкез асьсэ вылэ басьтыны кулэ ӧвӧл, асьсэлэсь святыняоссэс сиыку, уго Мон Кузё-Инмар, соосты дун-чылкыт карись».
17Соку Кузё-Инмар Моисейлы тазьы вераз, тазьы шуиз: 18«Ааронлы, солэн пиосызлы, вань израиль калыклы тазьы вера: израиль выжыысь яке сьӧрлось лыктыса израиль калык пӧлы [улыны интыяськем] муртъёс пӧлысь кин ке но кыӵе ке сӥзиськонзэ быдэстыса яке аслаз ӟеч мылкыдыныз Кузё-Инмарлы тылын сутоно курбонзэ вае ке, 19та уж понна Инмар азьын ӟечлык басьтэмед потэ ке, курбон пудоед шектэм, айы выжы, сюро таза пудо пӧлысь, ыжъёс пӧлысь, кечъёс пӧлысь мед луоз; 20пудодылэн вылтыраз шекез вань ке, эн вае [Кузё-Инмарлы], уго со тӥледлы ӟечлык уз вайы. 21Кин ке но тупаса улонлы сӥзем курбон вае ке, Кузё-Инмар азьын сётэм кылзэ быдэстыса яке аслаз ӟеч мылкыдызъя, [яке праздник нуналъёсады,] – сюро таза яке сюро векчи пудо пӧлысь, Инмарлы ярамон луон понна со курбон пудозы шектэм мед луоз: вылтыраз нокыӵе но шекез луыны кулэ ӧвӧл; 22синтэм, чутӥсь, ӧлексы, висись, гижлоё-яраё, паршаё пудоосты Кузё-Инмарлы эн вае, Кузё-Инмарлэн курбон сётон ӝӧк вылаз соосты курбон эн сётэ; 23туж кузь куко яке туж вакчи куко ошпиез яке ыжпиез аслад ӟеч мылкыдыныд курбонлы сётыны малпаськод ке, сётыны быгатӥськод, нош сӥзиськондэ быдэстыса сётӥськод ке, соку курбонэд Инмар азьын ярантэм луоз. 24Паньгам, пилиськем, ишкалтэм пузо, улошо карем пудоез Кузё-Инмарлы эн вае, асьтэ музъем вылын тае эн лэсьтэ; 25мурт выжыысь адямиослэн киысьтызы басьтэм таӵе пудоосты Инмардылы эн вае, уго соослэн вылтыразы шекез вань, сӧриськем интыосыз вань – соос тӥледлы ӟечлык уз вае». 26Кузё-Инмар Моисейлы тазьы вераз, тазьы шуиз: 27«Кунян яке ыжпи, яке кечпи вордӥськиз ке, сое сизьым нунал ӵоже анаез бордын возёно, нош тямыс нунал, солэсь но бадӟымгес луэм бере Кузё-Инмарлы курбон сётыны ярамон луоз ини; 28скалэз кунянэныз ӵош яке ыжез ыжпиеныз ӵош одӥг нуналэ эн вандэ. 29Кузё-Инмарлы тау карон курбон вайыкуды, ӟечлык басьтыны мед быгатоды шуыса, курбондэс кызьы кулэ, озьы сётэ; 30курбон сиёндэс со нуналэ ик сие, номырзэ но ӵукнаозьлы эн кельтэ. Мон Кузё-Инмар.
31Мынэсьтым курон-косонъёсме уте, быдэсъялэ соосты. Мон Кузё-Инмар. 32Мынэсьтым святой нимме эн сапталэ, израиль пиос Монэ дун-сьӧлыктэм шуыса сӥлы мед карозы. Мон Кузё-Инмар, тӥледыз дун-чылкыт карись, 33тӥледлы Инмар луон понна Мон тӥледыз Египет музъемысь поттӥ. Мон Кузё-Инмар».
Currently Selected:
Левит 22: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
