Иоиль 3

3-тӥ ЛЮКЕТ

1Уго, тани, со нуналъёсы, самой со вакытэ, куке Иудалэсь но Иерусалимлэсь пленэ сюремъёссэ берен ваё, 2соку вань калыкъёсты Иосафат нёжалэ люкало но соослы суд лэсьто Ас калыке понна, люкетлы быръем Израиле понна, сое пӧртэм калыкъёс пӧлы пазьгизы, Мынэсьтым музъемме люкылӥзы. 3Калыке пумысен соос пус чӧлтылӥзы, калгись кышномуртэн кӧлан понна егит пиез солы ляльчие сётылӥзы, вина понна егит нылэз вузаллязы, юизы. 4Мар тӥ Мон понна Тир но Сӥдон, быдэс Филистим шаер? Мыным пунэм берыктыны турттӥськоды-а? Мыным пунэм берыктыны турттӥськоды-а? Тӥлесьтыд пунэм берыктондэс Мон капчиен но ӝог асьтэлэн йыр вылады берыкто, 5уго тӥ Мынэсьтым азвесьме, Мынэсьтым зарниме, тужгес чебересь дуно арбериосме асьтэлэн куалаосады нуиды, 6Иудалэсь нылпиоссэ, Иерусалимлэсь нылпиоссэ эллин калыклы вузалляды дор музъемзылэсь палэнэ келян понна. 7Тани, Мон соосты ӝуто со интыысь, кытчы тӥ соосты вузады, тӥлесьтыд пунэм берыктондэс асьтэлэн йыр вылады берыкто. 8Тӥлесьтыд пиостэс, тӥлесьтыд нылъёстэс Иудалэн пиосызлэн киулазы сёто, нош соос соосты кыдёкын улӥсь савейёслы вузалозы; озьы шуэ Кузё-Инмар.

9Та сярысь калыкъёс пӧлын ивортэ, ожлы дасяське, кышкасьтэмъёсты ӝутэ; мед султозы, мед ӝутскозы вань ожгарчиос. 10Усы-герыдэс меч лэсьтыны, сюрлоостэс шибоды лэсьтыны ӵыжатэ; ляб мурт мед шуоз: «Мон кужмо». 11Дыртэ, люкаське, котыр ёросъёсын улӥсь калыкъёс, огазе кариське; Кузё-Инмаре, Аслэсьтыд батыръёстэ отчы ну. 12Калыкъёс султыса Иосафат нёжалэ мед васькозы; уго Мон отчы пуксё пӧртэм интыосысь вань калыкъёсты судить карыны. 13Сюрлоосты ужатэ – аран дыр вуиз; мынэлэ, лэзиське, виноград нюртон гу тырмемын ни, сок бызён вышкыос пачылмемын ни, малы ке шуоно соослэн уродлыксы-леклыксы туж бадӟым. 14Суд лэсьтон нёжалын калык, калык! Уго суд лэсьтон нёжаллы Кузё-Инмарлэн нуналыз матэ вуиз ини! 15Шундыен толэзь пеймытомозы, кизилиослэн но югытсы быроз. 16Сӥонысен Кузё-Инмар гудыртоз, Иерусалимысен Аслэсьтыз куаразэ сётоз; ин но музъем зуркалозы; нош Кузё-Инмар Ас калыкезлэн дурбасьтӥсез луоз, израиль пиослэн утиськон интызы. 17Соку тӥ тододы: Мон тӥляд Инмарды Кузё-Инмар, Аслам Святой гурезям Сӥонын улӥсь; Иерусалим святой инты луоз, со пыр мурт выжы калыкъёс уз ни ветлэ. 18Со нуналэ тазьы луоз: гурезьёсысь вина шапыкъёс виялозы, вырйылъёсысь йӧл бызьыны кутскоз, Иудеяысь вань ӧръёс вуэн пачылмозы, нош Кузё-Инмарлэн юртысьтыз ошмес усьтӥськоз но Сӥттим нёжалэз вуэныз мускытатыса возёз. 19Египет луоё кырлы пӧрмоз, Едом тырттэм кылем кыр дунне луоз иудей пиосты ӝикатыса воземзы понна, соослэн музъем вылазы янгыштэм вирез кисьтылэмзы понна. 20Нош Иуда пумтэм вапумъёс ӵоже улоз, Иерусалим но выжыысь выжыосы улоз. 21Кисьтэм вирзэс татчыозь ӧй на сузя, нош табере Мон соосты вирзылэсь сузяло, соку Кузё-Инмар Сӥонын улоз.

Currently Selected:

Иоиль 3: УДМБИБ

Highlight

Copy