Иоиль 2

2-тӥ ЛЮКЕТ

1Сӥонын пеллян гумыосын шудэ, Мынам святой гурезям гумы пелляса, кышкытлык сярысь тодытэ; быдэс музъем вылысь калыкъёс мед куалекъялозы, – Кузё-Инмарлэн нуналыз вуэ, со матын ини – 2тём-тём пеймыт, пилемо, бусо нунал; ӵук ӟардон кадь гурезьёс кузя кужмо, трос лыдо калык вӧлме, таӵеез дунне кылдон дырысен ӧй на вал, уз но луы выжыосысь выжыосы. 3Солэн азьтӥз тыл сутыса мынэ, нош бертӥз гомась тыл ӵушка; солэн азьысьтыз музъем Едем сад выллем, нош бераз тырттэм кылем кыр музъем луоз, нокин но солэсь утиськыны уз быгаты. 4Солэн вылтусыз валъёслы укша, вал вылын пукисьёс кадь соос вортто; 5гурезьёс йылтӥ вортто ожмаськон уробоослэн дыбыртэмзы кадь, куроез сутӥсь гомась тыллэн шатыртэмез кадь, ожмаськыны султытэм кужмо калык кадь. 6Сое адӟизы ке, калыкъёс куалекъяны кутскозы, ымныръёссы кӧдэктозы. 7Соос нюръяськисьёс кадь бызё, кышкасьтэм ожгарчиос кадь изкарлэн борддор йылаз тубо но котькудӥз ас сюрес кузяз мынэ, сюрес вылысьтыз уг кожылы. 8Огзэс огзы уг лёгало, котькудӥз мынэ ас сюрес кузяз, шибоды вылэ усё, но соослы номыр но уг луы. 9Город кузя бызьыло, борддоръёс йылэ ӝутско, коркаос йылэ тубо, лушкаськись кадь укноостӥ пыро. 10Соос азьын музъем зуркалоз, инбам куалекъялоз, шундыен толэзь пеймытомозы, кизилиослэн но югытсы быроз. 11Аслаз ожгарчиосызлы Кузё-Инмар куаразэ поттоз, уго туж трос кузя соос, Солэсь кылзэ быдэстӥсь туж кужмо; Кузё-Инмарлэн нуналыз быдӟым но укыр кышкыт, кин сое чиданы быгатоз? 12Али но шуэ Кузё-Инмар: «Визяса, бӧрдыса, викышъяса чылкыт сюлмыныды Мон пала берытске». 13Сюлэмъёстэс кесялэ, дӥськуттэс эн, Инмарды Кузё-Инмар пала берытске; уго Со ӟеч, гажась-жалясь, кема чидась, Солэн гажан-жалянэз бадӟым, Аслэсьтыз лэзем шугадӟонъёссэ Со воштэ. 14Кин тодэ, оло, жалялоз Со, бакель каронзэ уз палэнты, Инмардылы Кузё-Инмарлы ваем нянь курбондэс, кисьтэм курбон-саламдэс кабыл басьтоз? 15Сӥонын пеллян гумыосын шудэ, визяны кутске, огазе люкаськон сярысь ялэ. 16Калыкез люкалэ, кенеш ортчытэ, пересьёсты ӧте, егит пиосты, нонӥсь нуныосты огазе люкалэ; четлыкысьтыз-юртысьтыз эмеспи мед потоз, вылькен чылкыт, чебер юртысьтыз мед лыктоз. 17Храмлэн бӧльмыен курбон сётонлэн висказ мед бӧрдозы священникъёс, Кузё-Инмарлэн ужась-тыршисьёсыз, мед шуозы: «Кузё-Инмаре, жаля Аслэсьтыд калыктэ, сантэман киулэ эн сёты Аслэсьтыд люкеттэ, соосты мукет калыкъёс ултӥяса медаз ни возе! Калыкъёс пӧлын малы тазьы шуыны кулэ: ”Кытын соослэн Инмарзы?”» 18Соку Кузё-Инмарлэн Ас музъемзэ яратонэз ӝуатскоз но Аслэсьтыз калыксэ жалялоз-утёз. 19Ответ сётыса, Ас калыкезлы Кузё-Инмар шуоз: «Тани, Мон тӥледлы нянь, вина, вӧй сёто, соин кӧттэс тырыса улоды, азьланяз мукет калыкъёслэн киулазы сантэманы уг ни сёты тӥледыз. 20Уйпалась лыктэмез тӥ дорысь вутэм, тырттэм музъеме улляло, азьпал уллёзэ ысто шундыӝужанпал зарезе, мышказ лыктӥсьсэ – шундыпуксёнпал зарезе; со бордысь шимес зын, юрӟым зын ӝутӥськоз, уго укыр трос урод ужъёс лэсьтӥз». 21Музъем, эн кышка: шумпот, шулдыръяськы, уго Кузё-Инмар быдӟым, Со тае лэсьтыны быгатэ. 22Пудо-животъёс, эн кышкалэ, кыр дуннее турын потоз, писпу емыш сётоз; смоквапу, виноградпуд асьсэлэсь кужымзэс возьматозы. 23Тӥ но, Сӥонлэн нылпиосыз, шумпотэ, шулдыръяське Инмарды Кузё-Инмар бордын; уго Со тӥледлы кӧня кулэ, сомында зор сётоз; азьвыл кадь ик вазь лыктӥсьсэ но, бер лыктӥсьсэ но зорез сётылоз. 24Итымъёсыз нянен тырмозы, виноград мульы нюртон интыосыз виноград сокен но вӧен пачылмозы. 25Тӥ вылэ лэзем туж бадӟым войское – саранча, нумыръёс, бӧчыос-дургалиос, гоно нумыр – будосъёстэс сием аръёс понна, Мон тӥледлы пунэмзэ берыкто. 26Кӧтты тырытозь сиёды, тыр улоды, Инмардылэсь Кузё-Инмарлэсь нимзэ данъялоды, Со тӥледын паймымон ужъёс лэсьтӥз; пумтэм вапумъёс ӵоже калыке возьытэ уз вуы. 27Соку тӥ тододы, Мон Израиль пушкын, Мон – тӥляд Инмарды Кузё-Инмар шуыса, мукетыз ӧвӧл, Мынам калыке пумтэм вапумъёс ӵоже возьытлык пӧлын уз улы.

28Собере тазьы луоз: Аслэсьтым Духме вань адямиос вылэ кисьто. Соку тӥляд пиосты, тӥляд нылъёсты Инмарлэсь кылзэ ивортылозы; пересьёсты уйвӧтъёс адӟылозы, егит пиосты адӟонъёс адӟылозы. 29Ляльчи пиос вылэ но, ляльчи нылъёс вылэ но со нуналъёсы Аслэсьтым Духме кисьто. 30Паймымон тодметъёс инмын но, музъем вылын но возьмато: вир, тыл, ӵын юбоос. 31Кузё-Инмарлэн быдӟым но кышкыт нуналэзлэн вуэмезлэсь азьло шунды пеймытомоз, нош толэзь – вир кадь гордэктоз. 32Тазьы луоз: котькудӥз Кузё-Инмарлэн нимызлы тэльмырыса вазиськись мурт утемын луоз; уго Сӥон гурезьын, Иерусалимын соослы утиськон луоз, кызьы шуиз Кузё-Инмар, улэп кылемъёс пӧлысь Кузё-Инмарлэн ӧтёно муртъёсызлы но.

Currently Selected:

Иоиль 2: УДМБИБ

Highlight

Copy