Tito 3
3
Creta kä'co i̧sä̧sa̧ ttö̧ja̧rö̧ jiähuinö huȩnȩ
1Ji'ähui jahuätörö o'ca toi'önä ruhuotörö ttucuota pä'ö. O'ca juiyönä ruhuotö huettömä jȩttä̧cua̧'a̧nö̧. 'Cuäopönä adiu jȩttä̧cua̧'a̧nö̧. 2Korotörö suronä ttucuocu juiya. Ja̧'hua̧ta̧nö̧ ttami diyaunä ttö̧ja̧cua̧. Korotörö'inä eseunu ppättäda pä'ö ji'ähui.
3Iso päi'önä täbocö ujutumä ja̧'a̧tä̧ cue'ächö, Diosrö esetocotö pi̧nä̧tö̧jä̧. Re'tehuächätö cuettächö'a̧nö̧ cue'ächinätöjä. Ujutumä suronä amöcuädö cue'ächinätöjä. Ja̧'hua̧ta̧nö̧ suronä jȩpi̧nä̧tö̧jä̧ korotörö. Korotö ttu̧ju̧nä̧rö̧ ta'anö, tu̧ju̧nä̧ra̧ pä'inätöjä. Korotörö pä̧huä̧ juiyönä topö cue'ächinätöjä. 4Ja̧'hua̧nö̧ cuetächomenä, Dios ujuturu ppä'ädinö. 5Diosmä suronä jȩtö̧ jȩpö̧ icuinö. Ujututä adiu jȩpo̧co̧tö̧ pi̧nä̧tö̧jä̧. Chutä, Diostä, re rö̧jö̧nä̧ topinö ujuturu. 6Tu̧ru̧hua̧ Jesucristorö tesetomenä, Dios repeähuä juiyönä iyinä̧u̧jä̧ Espíritu Santorö. 7Chutä ppäda'attö, i̧tti̧mö̧jä̧. Ja̧'hua̧nö̧ ja̧'a̧ kä̧cuä̧huä̧ i'co tta̧tä̧rö̧mä̧ i̧yä̧cua̧ ujuturu.
8Pi̧yȩ huȩnȩ iso päi'önä adihuä huȩnȩ. Pi̧yȩ huȩnȩ cu̧huo̧juȩta̧ pä'ösä, Diosrö esetätö adiu jȩtta̧ pä'ö. Pi̧yȩ huȩnȩ o'ca toi'önärö adiu päa'a. 9Ja̧'hua̧nö̧ ja̧'a̧nä̧ ttö̧ja̧ amönä ttucuocu huȩnȩ'i̧nä̧, tä̧do̧tö̧ mi̧nä̧ ttö̧ji̧nö̧ ttucuocu huȩnȩ'i̧nä̧ cucuocuä'. Ja̧'hua̧ta̧nö̧ ttahuaruhuärö ra̧huä̧rö̧ ttucuocu huȩnȩ'i̧nä̧, Moisés hueähuä huȩnȩ ttucuocu huȩnȩ'i̧nä̧ cucuocuä' Tito. Ja̧u̧mä̧ yoröiso micuähuocö huȩnȩ ja̧'a̧.
10Ya̧tȩ iglesia ruhuärö 'quȩ'ȩpö̧ icua päöttömä, todärenätä ucuocuirö. Ja̧'hua̧nö̧ cucuocuomenä, esetö juiyöttömä 'quȩ'i̧pä̧chi̧rö̧. 11Ja̧'hua̧nö̧ jȩpö̧rö̧mä̧ adihuä huȩnȩ jaropi'inö pä'ö huo̧jua̧jä̧. Chutä suronä jȩö̧tä̧ huo̧jua̧.
Röji jiähuinö huȩnȩ
12Artemas pä'ö mi̧cua̧rö̧'i̧nä̧, Tíquico pä'ö mi̧cua̧rö̧'i̧nä̧ ucu cu̧ja̧'a̧ huedomenä, ucutä Nicópolis ötahuiyära̧'a̧ cuichaja, ji̧nä̧ yo̧mȩtȩ päti'a. Ju̧huȩnȩ chö̧ja̧ pä'ösä ya'ute a̧'ȩ. 13Ja̧'hua̧ta̧nö̧ Apolos pä'ö mi̧cua̧rö̧'i̧nä̧, pi̧jä̧ jähuä hueähuä huȩnȩ huo̧jua̧rö̧ Zenas pä'ö mi̧cua̧rö̧'i̧nä̧ tti̧'cho̧mȩnä̧, jahuätörö recuä rö̧jö̧mä̧ iyö ppä'ädi. 14Ujutu tahuaruhuä tö̧jä̧hua̧tö̧rö̧ huo̧juȩti̧ recuä rö̧jä̧u̧ru̧ iyö ppättäda pä'ö. Ja̧'hua̧nö̧ jȩpö̧ kä̧nö̧, adiu ttö̧ja̧cuä̧cuo̧tö̧.
15O'ca toi'önä ttöcu ka̧cuä̧tö̧mä̧ te'ähuätö ucuru. Ucu'inä tahuaruhuä tö̧jä̧hua̧tö̧ Diosrö esetätörö te'ähui. Dios ucuturu o'ca toi'önärö adiu ppädaja. Amén.
Currently Selected:
Tito 3: PIDNT86
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Piaroa © Sociedades Biblicas Unidas, 1986.
