Hebreos 11
11
Diosrö esetäcuähuä huȩnȩ
1Diosrö esetäcuähuänä, o'ca juiyönä tta̧tä̧rö̧mä̧ tȩmä̧cuo̧tö̧jä̧ pä'ö huo̧juä̧tö̧jä̧. Ja̧'hua̧ta̧nö̧ Diosrö esetäcuähuänä, koro juäi totocö juäi'inä iso päi'önä ja̧'a̧ huo̧juä̧tö̧jä̧. 2Ujutu tä̧do̧tö̧ mi̧nä̧ adiu ttesetina'attö, adiu ka̧cui̧nä̧tö̧do.
3Diosrö esetö, huo̧juä̧tö̧jä̧ chutä Dios i̧huȩnȩ päö'a̧nö̧ pi̧jä̧ aditinö pä'ö. Ja̧'hua̧ ja̧'a̧ttö̧ jitä totömä, totocö juäittö adicuina'ado.
4Diosrö esetö, Abelmä, Caínttö'inä abonänö adihuä juäi sacrificio iyinödo Diosrö. Ja̧'hua̧nö̧ ja̧'a̧ttö̧ Dios esehuinäcudo. Iyinömä ȩmi̧nö̧do. Ja̧'hua̧ ja̧'a̧ttö̧ Abel 'corupäi'inö o'ca'a, Diosrö esetina'attö ji̧nä̧ ucuocua'ado.
5Diosrö esetö, Enoc 'corupäi'oca'anä mo̧ro̧jä̧ra̧'a̧ ȩmi̧nä̧cu̧do. Ja̧u̧ru̧ ttu̧sä̧ro̧mȩnä̧, po̧cui̧po̧co̧tö̧ pi̧nä̧tö̧do, Dios ja̧u̧ru̧ ȩmi̧na̧'a̧ttö̧. Huȩyu̧cuä̧ Huȩnȩ päa'a: “Dios Enocrö ȩmä̧cua̧'a̧ ä'canä, esehuinäcudo.” 6Ja̧'hua̧nö̧ ja̧'a̧nä̧ ya̧tȩ Diosrö esetoca'anä, Dios esehuarö pä'ö yoröiso jȩpo̧cö̧do. Ya̧tȩ Diosrö ötö'cöhuächa pä'ömä, Diosmä kö̧ pä'ö ȩsȩtä̧cua̧. Ja̧'hua̧ta̧nö̧ Diosrö usätörö, Diosmä adihuä juäi iyö pä'ö ȩsȩtä̧cua̧.
7Diosrö esetö, Dios, koro juäi ji̧nä̧ tottocö 'cuäopäcua'a jiähuomenä, Dios päinö ta'anö jȩpi̧nö̧do Noémä. Huoi'ca rö̧ä'ca aditinödo ahuaruhuäcu ö̧ji̧pa̧ pä'ö. Noé Diosrö eseta'attö, pi̧jä̧ ttö̧ja̧rö̧ ro̧ȩcuä̧ 'cuäopina'ado. Ja̧'hua̧ta̧nö̧ Diosrö esetomenä, Dios esehuinäcudo o'ca toi'önä Diosrö esetätörö eseu'a̧nö̧.
8Diosrö esetö, Dios huomenä, Dios päinö ta'anö jȩpi̧nö̧do Abrahammä. Korome, Dios ja̧u̧ru̧ iya päinome i̧'cha̧ pä'ö rä'opinödo. Chutä adihuä i̧rȩjä̧ttö̧ rä'opinödo i̧'chä̧cuo̧mȩ ieruhua'ara̧'a̧. 9Diosrö esetö, ya̧tȩ korotö tti̧rȩjä̧nä̧ ö̧jö̧'a̧nö̧, Dios iya päinome ki̧nö̧do Abraham, isotö tti̧jȩti̧yu̧ttu̧ adicuodenä Isaaccu, Jacobocu ki̧nö̧do. Jahuätörö'inä ju̧huä̧jä̧ rȩjȩ iya pä'inödo Dios. 10Abraham koro ötahuiyä, 'quiyönä adicuome, Dios aditome tta̧'ä̧ri̧nö̧do.
11Diosrö esetö, Sara'inä ki̧tti̧ ku̧ju̧nä̧ro̧ca̧'a̧, böa isaju kö̧ja̧'a̧ttö̧'i̧nä̧, kujuru ȩmi̧nä̧ju̧do, ki̧tti̧rö̧ ku̧ju̧nä̧ra̧ pä'ö. Iso päi'önä Dios päinö ta'anö jȩä̧cua̧ pä'ö keseta'attö, ki̧tti̧rö̧ ku̧nä̧ri̧nä̧ju̧do. 12Ja̧'hua̧ ja̧'a̧ttö̧ Abraham bö̧o̧ i̧sa̧ ö̧jo̧mȩnä̧, hua'ö icuäcua'a ä'canä, si̧ri̧'cö̧ mo̧ro̧jä̧ra̧'a̧ recuätö ttö̧rö̧ja̧'a̧ jä̧'i̧nö̧'a̧nö̧ jö̧nä̧'i̧nä̧, rȩba̧ dubora rö̧ora jäyä pa̧'a̧ jä̧'i̧nö̧'a̧nö̧ jö̧nä̧'i̧nä̧ ahuaruhuä o'cotörö ku̧nä̧ri̧nö̧do. Yoröiso pa̧ja̧tä̧cuä̧huo̧ca̧'a̧do, ttirecua'attö.
13Jahuätö, Abraham ahuaruhuä o'cotö, o'ca toi'önä hua'ö icuinätödo, Dios iya päinö ttȩmo̧ca̧'a̧nä̧. Ja̧'hua̧nö̧ ja̧'a̧nä̧ Diosrö tteseta'attö, oto kä̧nö̧ Dios iya päinö topö esehuinätödo. Ja̧'hua̧nö̧ ttesehua'anä: “Pi̧jä̧nä̧, korotö tti̧rȩjä̧nä̧ cuettächö'a̧nö̧ cue'ächätöjä”, pä'inätödo. 14Iso päi'önä ja̧'hua̧nö̧ ucuocuätömä: “Ji̧nä̧ isocu adihuome tö̧ja̧cua̧ pä'ö usätöjä”, pä'ätödo. 15Ja̧'hua̧ta̧nö̧ pä'äji ttö̧ja̧cui̧no̧mȩcu̧ ttamöcuädinöttömä, juhua'atä ppa̧'ä̧chi̧na̧ja̧tö̧do. 16Ja̧'hua̧ ja̧'a̧nä̧ korome ji̧nä̧ isocu adihuome, mo̧ro̧jä̧ra̧'a̧, pä'inätödo. Ja̧'hua̧nö̧ ja̧'a̧ttö̧ chutä Dios, jitötä “Ujutu Tu̧ru̧hua̧ Dios ja̧'a̧” pättomenä, yoröiso dä'äcuocödo. Iso päi'önä jahuätö ttöäre ötahuiyä aditinödo. 17-18Diosrö esetö, Abraham Dios ja̧u̧ru̧ ka̧cuä̧mö̧ hueomenä, i̧tti̧ Isaacrö sacrificio päi'önä i'cächinödo. “Isaac ahuaruhuä o'cotörö recuätörö cu̧ju̧nä̧rä̧cua̧jä̧”, Dios päinömä amöcuäda'anä, Abraham i̧tti̧ ya̧tȩrö̧tä̧ sacrificio päi'önä iyinaji. 19Abraham huo̧jui̧nö̧do, iso päi'önä Dios 'corupä'i'ätörö ttoädö'a̧nö̧ hua̧ pä'ö. Ja̧'hua̧ta̧nö̧ Abraham i̧tti̧ 'corupäi'äjittö pä'äji ta'anö ȩmi̧nä̧cu̧ pätö'a̧nö̧ ja̧'a̧.
20Diosrö esetö, Isaac adiu yodoji ppädä̧cuȩ huȩnȩ ji'ähuinödo Jacoborö'inä, Esaúru'inä. 21Ja̧'hua̧ta̧nö̧ Diosrö esetö, Jacobo 'corupäi'äcua'a ä'canänö, o'ca toi'önä José i̧tti̧mö̧rö̧ adiu ppädäcuähuä huȩnȩ jiähuinä̧u̧do. Ja̧'hua̧ta̧nö̧ itta'canä 'chu̧'ä̧rö̧ kä̧nö̧, Diosrö eseunu ucuocuinödo. 22Diosrö esetö, José 'corupäi'omenä: “Israel ttö̧ja̧ Egipto rȩjȩttö̧ yodoji rättopäcuotö”, pä'inödo. Ja̧'hua̧ta̧nö̧ chutä o'co jähuä ihue'quiyu ttu'turäcua'a hue'ipinödo.
23Diosrö esetö, Moisés uhuäpächomenä, jä'ocu, ja̧ju̧cu̧ huämetucuä kä̧hua̧tö̧ päi'omenä ttödajinäcudo. Chutä öadihuä topinätödo. Ja̧'hua̧ta̧nö̧ ru̧hua̧ hueina'a ja̧u̧ ji̧'qui̧cha̧hua̧rö̧ cuä'ö tticuarö pä'ö, ye'ecuocotö pi̧nä̧tö̧do. 24Diosrö esetö, Moisés böo juomenä, Egipto ru̧hua̧ ittiju ki̧tti̧ pättarö pä'ö kö'cocö pi̧nö̧do. 25Chutä, korotö eseunu jitörötä pä̧huä̧ rö̧jä̧u̧ suronä jȩtta̧'a̧ öjö'coca'attö, Dios umöhuäyotöcu ubara ttuhua pä'inödo. 26Cristorö rö̧ȩnä̧ chesetomenä ubara ttuda'attö, Egipto rȩjȩnä̧ o'ca juiyönä rö̧ȩnä̧ micuäu juäi chu̧ju̧nä̧rä̧cuȩttö̧'i̧nä̧ abonänö rö̧ȩnä̧ chu̧ju̧nä̧rä̧cua̧sä̧ pä'ö amöcuädinödo. Chutä Dios ja̧u̧ru̧ adihuä juäi iyä̧cuȩ amöcuäda'attö, ja̧'hua̧nö̧ pä'inödo. 27Diosrö esetö, Egipto ru̧hua̧rö̧ ö̧ra̧huä̧ra̧'a̧ yecuoca'a, Moisés Egipto rȩjȩttö̧ rä'opinödo. Chutä, Diosrö uhuäpocörö, topö cuettächö jä̧'i̧nö̧'a̧nö̧, adiunätä jȩpö̧ 'chi̧nö̧do.
28Diosrö esetö, Moisés pascua fiesta jȩpi̧nö̧do. Ttojusode äpate ä'ca, isotö ttucuoja tuttepa pä'ö hue'inödo, chutä ángel 'corupäi'äcuähuä ru̧hua̧, Israel ttö̧ja̧ttö̧ tti̧tti̧, ä'canä uhuäpächinörö, cuä'ö icu juiya pä'ö. 29Ja̧'hua̧ta̧nö̧ Diosrö esetö, Israel ttö̧ja̧ Mar Rojo dubora kä'coranä, rȩjȩ jome tti̧'chö̧'a̧nö̧ 'cuä'opinätödo. Egipto ttö̧ja̧ ja̧'hua̧nö̧ 'cuättopa pättomenä, a̧'ä̧u̧ icuinätödo.
30Diosrö esetö, Israel ttö̧ja̧ Jericó ötahuiyä u̧mi̧ i̧so̧ca̧ kada'ca ko̧ro̧mö̧ttö̧nö̧ todäre mo̧ro̧ päi'omenä sobötö cue'ächinätödo. Ja̧'hua̧nö̧ tteseta'attö, ja̧u̧ ötahuiyä i̧so̧ca̧ ma̧ä̧chi̧na̧'a̧do. 31Ja̧'hua̧ta̧nö̧ Diosrö esetö, Rahab, mä̧nä̧ ruhuaju, korotö suronä jȩpä̧tö̧cu̧ 'corupä'i'ocoju pi̧nä̧ju̧do. Jahuäjumä, Israel ttö̧ja̧ttö̧, ötahuiyä topö yä̧huä̧i̧nä̧ 'chi̧nä̧tö̧rö̧, adiu ppä'ädinäjudo.
32Koromä, ¿tta̧'a̧nö̧ jidähuäcua'ajä̧ttö̧? Korotörö, Gedeónrö'inä, Baracrö'inä, Sansónrö'inä, Jeftérö'inä, Davidrö'inä, Samuelrö'inä, Dios i̧huȩnȩ jiäcuähuä isotörö'inä jidähua pä'ö recua'ado. 33Diosrö esetö, korotö tti̧rȩjä̧ra̧'a̧ rohuäu tti̧'cho̧mȩnä̧, juruhuinätödo. Ja̧'hua̧ta̧nö̧ adiunä hue'inätödo. Dios jahuätörö ppäda päinö ȩmi̧nä̧tö̧do. Yä̧hui̧tö̧ ttä'inä mö̧'ȩpi̧nä̧tö̧do. 34Ocurä rö̧arä'inä na̧'ȩpö̧ icuinätödo. Jahuätörö curodänä cuä'ö tticua pä'ö ttu̧sä̧ro̧mȩnä̧, to'ipächinätödo. Juiyupätömä, juruhuinätödo. Rohuäcuähuänä ttaboiyotö'inä töttipächönä juruhuinätödo. 35Korotö nä̧tö̧ ttahuaruhuärö, 'corupätti'äja'attö Dios ttoädinä̧u̧ru̧ ku̧nä̧ri̧nä̧tö̧do.
Yotöte Dios jarotti'oca'attö, korotö suronä jȩttä̧u̧ 'corupä'i'inätödo, ttottächö o'ca'a korotöttö'inä abonänö adiunä ttö̧ja̧cua̧ pä'ö. 36Ja̧'hua̧ta̧nö̧ korotö'inä suronä ttucuocuomenä, korotö ttami 'qui'ächi'inätödo. Korotörö'inä ä̧nu̧chu̧nä̧'i̧nä̧ cuäcuäpö, cuoräusanä'inä nö'cö cärenä rötinätödo. 37Ja̧'hua̧ta̧nö̧ korotörö ido'qui icuäu cuä'ö icuinätödo. Korotörö kä'cotönä nä'epö tticuinä̧u̧do. Korotörö ka̧cuä̧mö̧ suronä jȩtti̧nä̧u̧do. Korotörö curodänä cuä'ö icuinätödo. Korotömä ttö̧'ca̧tä̧huä̧ta̧ o̧vȩja̧stö̧'i̧nä̧, ca̧bra̧stö̧'i̧nä̧ tti̧jȩti̧yu̧ttu̧ adicua'a 'ca̧tä̧u̧, kara'acu cue'ächinätödo. Jahuätö usurä isotö ttö̧ja̧'a̧nä̧, suronä jȩttä̧u̧ barahuä̧u̧ cue'ächinätödo. 38Pi̧jä̧ rȩjȩmä̧ jahuätö ttö̧ja̧cua̧ pä'ö yoröiso adihuoca'a ji̧na̧'a̧do. Ja̧'hua̧nö̧ ja̧'a̧nä̧ jahuätömä de'anä'inä, de'a juiyome'inä, idoränä'inä, reju jacuäcu huäosenä'inä ja̧'a̧tä̧ cue'ächinätödo. 39Jahuätö o'ca toi'önä Diosrö tteseta'a ttu̧huo̧jui̧nä̧u̧, Dios iya päinömä yoröiso ȩmo̧co̧tö̧ pi̧nä̧tö̧do. 40Dios korotä adihuä juäi amöcuädinödo. Ujuturu'inä amöcuädinödo. Ujutu'inä, jahuätö'inä ji̧nä̧ yo̧mȩtȩnä̧ adiunätä aditö icua pä'inödo.
Currently Selected:
Hebreos 11: PIDNT86
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Piaroa © Sociedades Biblicas Unidas, 1986.
