Efesios 4
4
Espíritu Santonä ji̧nä̧ yotöte huotöjä
1Ja̧'hua̧nö̧ ja̧'a̧ttö̧ Tu̧ru̧hua̧rö̧ esetö cärenä pä̧nö̧, Dios huoinä̧u̧ ttö̧jö̧'a̧nö̧ adiu ka̧cuä̧tu̧cui̧, pä'ösä ttömä ucuturu. Dios huo̧i̧nä̧u̧jä̧ ucutumä. 2Usurä isotö ttö̧ja̧cu̧'a̧nö̧ ka̧cuä̧tu̧cui̧. Adiu jȩpö̧, ppä'ädö ka̧cuä̧tu̧cui̧. Cuami 'qui'ächi'ö ka̧cuä̧tu̧cui̧. Korotörö adiu amöcuädö repe'ätucui. 3Ja̧'hua̧ta̧nö̧ Dios ucuturu eseäcuähuä iyinömä amöcuädö ji̧nä̧ yo̧mȩtȩ eseunu ka̧cuä̧tu̧cui̧, Espíritu Santo ppädomenä. 4Ya̧tȩtä̧ ja̧'a̧do. Ja̧'hua̧ta̧nö̧ ya̧tȩtä̧ Espíritu Santo ja̧'a̧do. Ja̧'hua̧ta̧nö̧ ji̧yȩtȩtä̧ ka̧'a̧do Diosrö eseunu tta̧huä̧rä̧cuä̧huä̧. Ja̧u̧ tta̧cu̧huä̧rä̧tu̧cua̧ pä'ö, Dios huoinä̧u̧jä̧. 5Ya̧tȩtä̧ Tu̧ru̧hua̧mä̧. Ja̧'hua̧ta̧nö̧ ji̧yȩtȩtä̧ adiu esetäcuähuä. Ji̧yȩtȩtä̧ bautismo jȩä̧cuä̧huä̧. 6Ya̧tȩtä̧ o'ca toi'önä Ttä'o Diosmä. Ja̧u̧tä̧ o'ca toi'önä Ttu̧ru̧hua̧ päi'önä kö̧do. Ja̧u̧tä̧ o'ca toi'önä ttami iso'quinä aditödo. Ja̧'hua̧ta̧nö̧ o'ca toi'önärö kö̧do.
7Ja̧'hua̧nö̧ ja̧'a̧nä̧ ya̧cu̧nä̧ adihuä juäinä tadita pä'ö hue'ö iyinödo ujuturu Cristorö pä̧huä̧ rö̧jo̧mȩnä̧. 8Ja̧'hua̧nö̧ ja̧'a̧ttö̧ Huȩyu̧cuä̧ Huȩnȩ päa'a:
Cärenä pȩjä̧tö̧rö̧ ȩpö̧, cä'ecuächinödo mo̧ro̧jä̧ra̧'a̧.
Ja̧'hua̧ta̧nö̧ u̧mä̧tö̧rö̧ adihuä juäi mippoönä iyinödo.
9Cä'ecuächinö jö̧nä̧mä̧ ¿tta̧'a̧nö̧ pä'ö päa'attö? Ja̧'hua̧nö̧ pä'ömä päa'a, pi̧jä̧ dȩa̧'a̧nä̧ mȩyȩhui̧nö̧do äcuomenä. 10Äcuomenä pi̧jä̧nä̧ mȩyȩhui̧nö̧mä̧, ja̧u̧tä̧ mo̧ro̧jä̧ttö̧'i̧nä̧ yabo cä'ecuächinödo, chutä ö̧ja̧'a̧ttö̧ o'ca juiyönä adihua pä'ö. 11Ja̧'hua̧ta̧nö̧ iyinödo o'ca toi'önärö ttaditä̧cuȩ. Korotörö Jesús hue'ähuotörö hue'inödo. Korotörö Dios i̧huȩnȩ, Diosttö ȩmä̧huä̧ huȩnȩ, jittähua pä'ö hue'inödo. Korotörö adihuä i̧huȩnȩ, suronä jȩttö̧ jȩpö̧ icu huȩnȩ, jittähua pä'ö hue'inödo. Korotörö Diosrö esetätörö ppättäda pä'ö hue'inödo. Korotörö Dios i̧huȩnȩ ttu̧huo̧juȩta̧ pä'ö hue'inödo. 12Ja̧'hua̧nö̧ iyinödo, i̧tti̧mö̧ aditö ppättäda pä'ö korotörö, Dios i̧huȩnȩ rö̧ä̧cha̧ pä'ö. 13O'ca toi'önä Dios I̧tti̧rö̧ ji̧nä̧ yo̧mȩtȩnä̧ amöcuädö teseta pä'ö iyinödo. Ja̧'hua̧ta̧nö̧ Dios I̧tti̧rö̧ adiunä tu̧huo̧jua̧rö̧ pä'ö iyinödo. Ja̧'hua̧nö̧ adiunä tö̧ja̧cuä̧cuo̧tö̧jä̧ Cristo ö̧ji̧nö̧ ta'anö yoräteunä kä̧nö̧. 14Jitämä pärohuächocotöjä ppo̧'ä̧tö̧ jä̧'i̧nö̧'a̧nö̧. Ja̧'hua̧ta̧nö̧ korotö adihuä juäi huȩnȩ ji'ähuocotömä, koro yapareu huȩnȩ, jareö huȩnȩ jittähuomenä, esetocotöjä ujutu. 15Pärocua'acu, ujutu iso päi'önä huȩnȩ tahuaruhuärö repe'ö ucuocu, ji̧nä̧ yo̧mȩtȩnä̧ Cristorö esetö, rö̧'ä̧chä̧tö̧jä̧. Iso päi'önä Cristo ujutu tu päi'önä kö̧. 16Tidepä tihue'quiyunä 'chu̧huä̧ra̧'a̧ jä̧'i̧nö̧'a̧nö̧, Cristorö adiu tesetomenä, o'ca toi'önä eseunu tami 'qui'ächi'ö kä̧nö̧, ji̧nä̧ yo̧mȩtȩ ka̧cuä̧tö̧jä̧. O'ca toi'önä adiunä taditomenä, tahuaruhuärö repe'önö rö̧'ä̧chä̧tö̧jä̧.
Cristorö esetö jareö kä̧cuä̧huä̧ huȩnȩ
17Pi̧yȩtä̧ hue'ösä ucuturu Tu̧ru̧hua̧ i̧mi̧nä̧. Korotö jitötä ttamönä amöcuädö, Diosrö jerupö jȩpä̧tö̧ ttö̧jö̧'a̧nö̧mä̧, cu̧ja̧cuä̧tu̧cuä̧' ucutu. 18Jahuätömä yo̧ö̧nä̧ amöcuädätö. Ja̧'hua̧ta̧nö̧ jerupätö ttami iso'qui 'quitta'attö. Ja̧'hua̧nö̧ ja̧'a̧ttö̧ yoröiso Dios iyähuä kä̧cuä̧huä̧ jui'ätö. 19Ja̧'hua̧nö̧ huotömä yoröiso dä'äcuocotö. Jahuätörö pä̧huä̧ rö̧jo̧mȩnä̧ o'ca juiyönä suronä jȩpä̧tö̧. 20-21Cristorö adiunä ä̧ju̧cu̧, ja̧'hua̧nö̧mä̧ huo̧jui̧po̧co̧tö̧ pi̧nä̧tö̧jä̧ ucutu. Ja̧'hua̧ta̧nö̧ Jesús iso päi'önä i̧huȩnȩ u̧huo̧juȩti̧nö̧ttö̧mä̧, ja̧'hua̧nö̧mä̧ jȩpo̧co̧tö̧ pajatöjä. 22Pä'äji cu̧ja̧cui̧nä̧tu̧cu̧, ucuturutä yapareu pä̧huä̧ rö̧jö̧ jȩcu̧'i̧nä̧tu̧cu̧, jaropi'ätucui. 23Cuami iso'quitucunä'inä, cuamöcuädätucunä'inä cu'ärohuätucu'a̧nö̧ ja̧'a̧. 24Ttö̧'ca̧tä̧huä̧ta̧ ja̧rȩä̧ta̧ ttö̧'ca̧tä̧hua̧'a̧ jä̧'i̧nö̧'a̧nö̧, Diosrö pä̧huä̧ rö̧jo̧mȩnä̧ aditinömä jareö cu̧'ca̧tä̧huä̧tu̧cu̧'a̧nö̧ ja̧'a̧, adiunä cua̧'cua̧ pö̧nö̧ kä̧nö̧ korotö tottäcua'a̧nö̧.
25Ja̧'hua̧nö̧ ja̧'a̧ttö̧ yapareu huȩnȩmä̧ jicuhuähuätucuä'. O'ca toi'önärö ucuocuätucui iso päi'önä huȩnȩ. Ujutu o'ca toi'önä ji̧nä̧ yotöte huotöjä.
26Korotörö ra̧huä̧rö̧mä̧, suronämä jȩcu̧'ä̧tu̧cuä̧'. Mo̧ro̧ 'cuäopächönämä cu̧ra̧huä̧rä̧tu̧cuä̧'. 27Ähuettärö pä̧huä̧ rö̧jö̧mä̧ jȩcu̧'ä̧tu̧cuä̧'.
28Nä̧u̧cuä̧ri̧nö̧mä̧, jitämä cu̧nä̧u̧cuä̧rä̧'. Ucutä cu̧mö̧nä̧tä̧ adiu aditi, korotö jui'ätörö cuiyäcua'a̧nö̧.
29Suronämä cucuocuätucuä' cuänä. Adiunätä ucuocuätucui, korotö ä̧ju̧cu̧ ttesetäcua'a̧nö̧. Ja̧'hua̧ta̧nö̧ korotörö ppäcuhuädätucua pä'ö adiunätä ucuocuätucui. 30Espíritu Santo a̧'cua̧ tta̧huȩcu̧ juiyönä ka̧cuä̧tu̧cui̧. Ja̧u̧ Espíritu Santo ucuturu ppädomenä, korotö ucuturu topö huo̧juä̧tö̧ iso päi'önä Dios i̧tti̧mö̧jä̧ pä'ö. Ja̧u̧ Espíritu Santo ucuturu tta̧'ä̧rö̧, Tu̧ru̧hua̧ ucuturu ȩmö̧ ichome jubö päi'önä.
31Cuahuaruhuärö cuesehuätucuoca'a cu̧jä̧tu̧cu̧'i̧nä̧, cu̧ra̧huä̧rä̧tu̧cu̧'i̧nä̧, jaropi'ätucui. Ja̧'hua̧ta̧nö̧ suronä cucuocuätucu'inä, o'ca juiyönä suronä jȩcu̧'ä̧tu̧cu̧'i̧nä̧ jaropi'ätucui. 32Pärocua'acu korotörö re rö̧jö̧nä̧ topö ppä'ädätucui. Ja̧'hua̧ta̧nö̧ ucuturu suronä jȩtto̧mȩnä̧, unichi'ö ucuocuätucuitö, Dios ucutu suronä jȩcu̧'i̧nä̧tu̧cu̧ jȩpö̧ icuinö ta'anö, Cristorö cuesetätucuomenä.
Currently Selected:
Efesios 4: PIDNT86
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Piaroa © Sociedades Biblicas Unidas, 1986.
