Kaaroma 2
2
ONTOPORUA 2.
Uurunde uaajuda
1Otsho ano muntu ngueje#2:1 Omuntu ngu omujuda. sho to pangura, ou nondjo, oshoka mu mbjioka to pangura mukueni, oto ipangura ngueje muene. Oho ningi ngueje muene, shoka to pangura.#2:1 Aajuda kaa ri haa vuru okupangura aapagani aarunde, oshoka jo jene okua haa rongo iironga mbi iihineji.
2Sse otu tshi tshi nokutja Karunga oha pangura motshiri ajeshe mba haa rongo iironga ja tja ngaaka.
3Muntu ngueje, sho ho pangura mba haa rongo ngaano, ngueje muene to ji rongo uo, ou tshi nani, oto vuru okujepa epanguro rja Karunga?
4Nenge oto dini ano uujamba u’uuhanaua, u’ondjeerera no u’onteni he? Ku tshi tshi nani, nokutja ondjeerera ha Karunga oha ar’oku ku fara kehidirururo?
5Ndere moru’uukukututima uohe no moru’omuenjo guohe kagu nihidirururo, ngueje oto imonicire ondjashi mesiku rjondjashi rjo rjehoroko rjepanguro ejuki rja Karunga.
6He ta pe keshe tshi cike piironga je.
7Omuenjo guarushe agu gandjua ku ajeshe, mba ja ronga nuudiginini iironga iihanaua, jo ja kembadara otshingaano kehadimo kesimano mokukara po kuarushe.
8Ondjashi nongejo he ahi gandjua ku ajeshe mba je nembata, inaa gama keehapu dotshiri mba haa rongo uuhineji.
9Uupongo nuumbanda au ja momuenjo guomuntu keshe, ngu ta rongo uuhineji, tango momuenjo guomujuda, no mo guomupagani uo.
10Ndere ehadimo nesimano nombiri tahi ja mu ajeshe mba haa rongo uuhanaua, tango maajuda, no maapagani uo.
11Karunga ka tara omuntu kombanda.
12Oshoka ajeshe mba ja jona kaje nompango#2:12 Okutja aapagani., otaa ka kana uo kaa nompango. Najeshe, mba ja jona je nompango#2:12 Okutja aajuda., otaa ka pangurua uo pampango.#2:12 Ompango ndjika okutja ompango ha Moses. Aapagani kaje nompango ndjika. Ndere otaa ka geerua ku Karunga moru’eendjo dauo je di ninga, sho ja dini otshipango tsha Karunga sho tshi ri muure ueemuenjo dauo.
13Aapuakeni jompango kaje shi aajuki motshipara tsha Karunga, aaue, aaguanici jompango, ojo taa hucirua uujuki.
14Aapagani mba kaje nompango, nge haa guanica eehapu dompango keharo no keendunge dauo jene, nena ojo ompango hauo jene, nanto kaje nompango.#2:14 Iipango ojindji ja Karunga taji turua ku Karunga meemtima daantu ajejeshe. Otsho Paulus ta ti: Aapagani ojo ompango hauo hene, nanto kaje nompango ha Moses.
15Otaa k’orora naua nokutja iironga jompango oja tshangua meemtima dauo. Ehuvo rjomutima tari tshi ja okororere, nomadiradiro gauo, nge taga pacana eembedi, nenge taga popiracama,
16uuna tuu ndu Karunga, nge ta ka pangura mu Jesus Kristus iihorekua jaantu, ngashi nd’uvica.
17Oto iruku omujuda, u’inekera ompango, ngueje oto itangere Karunga.#2:17 Oshoka aajuda ike j’ogororua tango ku Karunga.
18Ou tshi eharo rje. Nde sho ua rongua kompango, oto vuru okujoorora shoka tsh’oparerera.
19Oto inomo ngueje omukuatiketi guaaposi, uujerere ua mboka je ri meemrema.
20Omuputudi guaacece, omurongi guaanona, ngu e na mompango ondjira hotshiri ho houino.
21Ongini nduno, ho rongo jakueni, ngueje ito irongo ngueje muene? Oto uvica, otsh’indikua okujaka, ngueje muene ho jaka.
22To ti: “Otsh’indikua okuondera,” ngueje muene t’ondere. Oho kara mokutonda iikarunga, ngueje ho jeke otempeli.
23To itangere ompango, nde to dini Karunga nokujona kompango.
24Omoru’ondjo heni edina rja Karunga tari tshekua mokati kaapagani, ngashi etshangua tari ti.#2:24 Aapagani kaa diradira naua Karunga kotshiri pokutara iironga iihineji jotshiguana tsh’ogororua ku Karunga.
25Efukareko ori noruporo, nge to guanica ompango. Ndere nge ua ningi omujoni guompango nena efukareko rjohe kari notshironga.
26Nena nduno, ngu ina fukarekua, nge ta guanica eehapu dompango, he ina tarua nga nguka a fukarekua tshiri?
27Na ngu ina fukarekua, he ha guanica ompango, he ota ningi omupanguri guohe#2:27 Omupanguri guomujuda., sho ua dini ompango nanto ou nomambo omajapuki nefukareko.#2:27 Efukareko orjo edidiriko monjama haajuda, ongashi ja rombuerua ku Karunga muujuni ua Abraham, aaisraeli, sho ja kucua maantu jakuauo, sho ja ningi otshiguana tsh’ogororua, jo ja pungure mokati kauo ehiteero rjokuiteera Karunga kotshiri netegerero rjomukuriri. Ndere efukareko itari upica omuenjo guomuisraeli, nge ita guanica uo eharo rja Karunga. Eguanico rjeharo rja Karunga ori vure efukareko.
28Omujuda guotshiri ita dimbururua morupe rue ruopondje, efukareko rjotshiri kari shi ndjoka rja ningua kombanda monjama.
29Aaue, omujuda guotshiri ota dimbururua momuenjo gue no mefukareko rjomutima gue, nokutja omomadiradiro no meemkaro de, ha miinima jokombanda. Esimano rje itari zi kaantu, aaue, oku Karunga.
Omission Heklesia Ekatolika, 1951. Namibian Catholic Bishops Conference.