Kaaroma 1
1
ONTOPORUA 1.
Paulus ota kundu aakriste jo ko Roma. Uurunde uaapagani.
1Paulus, omukareri gua Jesus Kristus, a hicanua ng’omuapostoli, a hogororerua evangelium rja Karunga,#1:1 Paulus e ri uvicire aantu.
2ndi rja rombuererue nare kaaprofeti momambo omajapuki,
3ndi rj’Omona gue#1:3 Evangelium rja Jesus Kristus., ngu a zi mezimo rja David kombinga honjama.
4Ndere kombinga h’Ombepo Ondjapuki oku’ororua ng’Omumua Karunga omunankondo, sho a jumuka kuusi, ohe Jesus Kristus, Muene guetu.
5Ohe e tu pa esiroshenda nejakuro rjuuapostoli, sse tu fare iiguana jaapagani mehiteero kesimano rjedina rje.
6Nane#1:6 Aakriste joko Roma. uo omu ri mokati kauo, sho mu’icanua ku Jesus Kristus.
7Ku mboka ajeshe mo Roma, je ri mohore ha Karunga, jo j’icanua kuujapuki. Esiroshenda nombiri ha Karunga Tate, ho ha Muene guetu Jesus Kristus, hi kare mune.#1:7 Paulus ota kundu mboka ta tshangere ombrife ndjika, nokutja aakriste joko Roma.
8Omorueni amushe ngaje andi pandura Karunga mu Jesus Kristus, oshoka ehiteero rjeni ari ka tundua muujuni aushe.
9Karunga, ngaje andi mu karere nomuenjo guandje, te huvica evangelium rj’Omona gue, ohe ontari handje, nokutja ngaje ohii mu dimburukua arushe.
10He hindire kesh’uuna momagarikano gandje, ndi mone uunarume ompito hoku mu tarera po, Karunga nge e tshi ara.
11Oshoka onda jeerukua kune, ngaje nda ara ndi mu tare, ndi mu pe omagano gamue gomuenjo, ne mu korekue.
12Okutja sse tu ekerericacane kehiteero rjetu, rjeni no rjandje.
13Ajee, inandi ara oku tshi mu oreka, jamuameme, nokutja ohe shindi orundji eharo rjokuja kune. Ndere sigo onena onda kara nd’imbiua. Eno, mokati keni ngaje onda ara uo okurikora iihimati, ngashi paapagani jarue.
14Ongaje omunankuma#1:14 Oku nonkuma hokuuvicira iiguana ajishe evangelium rja Jesus Kristus. guaagreka no guaabarbari#1:14 Aabarbari ojo iiguana ajishe mbi kaji neembaro eemhanaua deendjenda dauo. guaanandunge no guaacece.
15Okombinga handje nda ara uo oku mu uvicira evangelium mo Roma.
16Oshoka ngaje inandi sire evangelium oshoni, aaue, orjo eenkondo da Karunga okuupica keshe ngu e ri iteera, tango aajuda, nde aapagani uo.
17Murjo mu’oroka uujuki ua Karunga mehiteero kehiteero.#1:17 Ehiteero ari gandja uujuki kaahiteeri. Ngashi tsha tshangua: “Omuenjo guomujuki ogua zi mehiteero.”#1:17 (Hab 2:4)
18Okuza keguru ondjashi ha Karunga ahi ka cikira kombanda hodinokarunga nuukorokoshi aushe uaantu, mba haa kerere otshiri ha Karunga nuukorokoshi uauo.
19Shoka tshomu Karunga, shi atshi vuru okudimbururua, oje tshi tshi naua; Karunga okue tshi j’ororera.#1:19 Aantu ajeshe otaa vuru okudimburura Karunga miironga je iinene.
20Oshoka sho katshi uetikue mu he, okutja eenkondo de darushe, nuukarunga ue, hera tuu uujuni ua tshitua, eendunge di adi konakona, adi tshi dimburura miironga je. Otsho kaa nehipopiro.
21Nanto ja nongera Karunga, inaje mu tunda, jo inaje mu amberera nga Karunga, aaue, oja diradira uurai meendunge dauo, neemuenjo dauo kadi neendunge, da ningina meemrema.
22Okuinoma ojo aanandunge, jo ja ningi aacece.
23Ehadimo rja Karunga, ngu ka shura po, oje ri pingakanica niiherekera jaantu, mba haa shuru po, no jeedira no jiinamuenjo jomaguru ogane no ja mbi haji ipueda.
24Omoruashi Karunga okue j’ecera muuharu ueemuenjo dauo konjata huurunde, ja ningiracana uuhineji uoshoni komarutu gauo.
25Otshiri ha Karunga oje hi randakanica iirombo. Ehamberero rjauo rjokuamberera nokukarera otshitshitua ori vure ndija rjokuamberera omutshiti, ohe na simanekue sigo osigo Amen.
26Opo Karunga a zi oku ja ecera uuharu uauo uuhineji, oshoka aakiintu jauo ja rundurura omukaro guopantshitue omukaro gu’uuhineji.
27Otsho uo ngaa aarumentu j’eca omukaro guopantshitue nomukiintu, ja vuka neji nokushuracana. Aarumentu ja ningi uuhineji uoshoni naarumentu, nde ja tuumba ondjambi huurunde uauo, ndji j’irongera mujo jene.
28Sho ja tindi okuiteera Karunga, na Karunga okue j’ecera keendunge dauo eembuineji, nde ja ningi shoka inatsh’opara.
29Oj’udirira uukorokoshi nuumbudi, uurunde uoshoni, oruisho onjanja. J’udirira okasheshe, edipago eentamanana, omakoto nuududu. Ja ri aanongoni.
30Aarundiri, eentondi da Karunga, aanantsinu, oonakuitanga, aanandunge jomuuhineji, aadini jaakuruntu.
31Aagoua, aatshendjereki, kaa nohore, kaa nesiroshenda.
32Je tshi naua ohapu ha Karunga, nokutja ajeshe mba haa rongo iironga ja tja ngaaka otaa k’irongera eso, ha mboka ike haa ji rongo, aaue, na mbo uo haa panda pu mbi ja tja ngii.
Omission Heklesia Ekatolika, 1951. Namibian Catholic Bishops Conference.