Iironga 18
18
ONTOPORUA 18.
Paulus t’uvica mu Korint nde ta tshuna ku Jerusalem. Ita kara ko.
1Konima ha mbjoka Paulus okua zi ku Aten, nde ta hi ku Korint.
2Ho a hada omujuda, edina rje Akuila, ngu a varerue mu Pontus. Opo a zire mu Italia puamue nomukiintu gue Priskilla, oshoka Klaudius okua pa aajuda otshipango ja ze mo mu Roma.#18:2 Klaudius omukuaniirua guaaroma. Okua kara pu jo.#18:2 Paulus okua kara puamue na Akuila na Priskilla.
3Sho a rongo uo otshironga tshauo, okua kara pu jo nde ta rongo. Jo ja ri aatungi jomalapi geesaila.
4Omasabati ageshe okua popi mosinagoga nokutumbura uo edina rja Muene Jesus, he a kembadara okuiteerica aajuda naapagani.
5Ndere Silas na Timoteus sho ja ciki ja zi ku Makedonia, Paulus oku’uvica nerama ndi ri vure rjonare, nde ta tompo aajuda nokutja Jesus ohe ngaa Kristus.
6Nde sho ja patana nokunjana, okua pupura eenguuo de nokue ja rombuera: “Ombinzi heni nahi je kombanda heemtse deni.#18:6 Okutja, itamu vuru okujepa egeero rjeni. Ngaje kandi nondjo. Okonena otandi ka ha kaapagani.”
7Okua zi ko hoka, nde te ja mondjugo homurumentu edina rje Titus Justus, a ri omukareri gua Karunga, ondjugo he ha kuatacana nosinagoga.
8Krispus, muene guosinagoga, oku’iteera Muene nondjugo he ahishe. Otsho tuu ojendji jomaakorinti, mba ja puakena, oj’iteera nde ja tshatshua.
9Ndere uusiku Muene okua popica Paulus memoniko a ti: “Ino tira ino muena.
10Moru’okukara kuandje pungueje kapu na gumue te ku ishirire e ku ningire uuhineji, oshoka ngaje ondi naantu ojendji motshirando shika.”
11Okua kara mo omuvo gumue neemuedi kanekamue, nde t’uvica mokati kauo ohapu ha Karunga.
12Ndere Gallio, sho a ningi omureri mu Akaia,#18:12 Akaia otshirongo otshinene moka mua ri otshirando Korint. aajuda oj’uvacana okukondjica Paulus, no je mu fara kotshipundi tshepanguro.
13Nde taa ti: “Nguno ota pukica aantu ja simaneke Karunga mondjira ndji inahi oparera ompango.”
14Paulus, sho a hara kuekama okana ke, Gallio okua rombuere aajuda: “Jarumentu ne jajuda, ngeno kua ne mue ja moru’ejonaguro nenge otshironga tshududu, ando ngaje nda puakena kune ng’omupanguri.
15Ndere sho tsha tsa ouara omarudi gomarongo, gomadina no giipango jeni, ne jene tsh’uceni, ngaje inandi ara oku tshi tokora.”
16Ongashi e ja tida po potshipundi tshepanguro.
17Nena ajeshe#18:17 Ajeshe mboka okutja aapagani mba ja ri po, ja tonda aajuda. oja kuata Sostenes, muene guosinagoga, je mu denge potshipundi tshepanguro. Gallio okua ri ke na kona tsha na tsho.
18Paulus sho a kara ko nanena omasiku ogendji, okua rareke aarongua aamuahina, nde ta rondo etembameja, ta hi ku Siria puamue na Priskilla na Akuila. Mu Kenkrea okua kururica omutse gue, oshoka a ganene eganeno.#18:18 Shoka Paulus a ninga mu Kenkrea otsho gumue gueemkaro eendjapuki daajuda, da zi ku Moses. Paulus okue di diginine uo moru’aajuda.
19Oje ja ku Efesus, nde te ja cigi po.#18:19 Ina kara ue puamue na Akuila na Priskilla. He muene ta hi mosinagoga, nde ta kundacana naajuda.
20Sho je mu indire a menekere po omasiku gamue, in’iteera.
21Okue ja rareke a ti: “Otandi ka garukira kune, Karunga nge e tshi ara.” Ongashi a zi mu Efesus.
22Sho e ja ku Kesarea, okua hi ku Jerusalem, ta kundire po egongaro. Ndere okuza mpoka okua hi ku Antiokia.
23Sho a ningire mpano omasiku gamue, okua hi. A hendahenda miirando jomotshirongo tsha Galatia na Frigia he ta koreke aarongua.
24Omujuda edina rje Apollo, a varerua mu Aleksandria, h’onkurungu meehapu de, omunandunge guobibeli, okue ja ku Efesus.
25Okua ri a rongua mondjira ha Muene, t’uvica nomuenjo gua sama, ta rongo nerama shoka tsha tsa pu Jesus, nanto a ri e tshi ike etshatsho rja Johannes.
26He okua shimbike okupopja nuufure mosinagoga. Akuila na Priskilla sho je mu uvire, oje mu kuca po no je mu fatururire naanaa ondjira ha Muene.
27Sho a hara kuha ku Akaia, aarongua aamuahina oja kumagida montumuafo aarongua mbejaka, je mu tuumbe. Sho e ja hoka, okua kuaca unene ajeshe mba j’iteera
28A tompo aajuda neenkondo miipaci jaantu, he te j’urukire nokutja Jesus ohe Kristus.
Omission Heklesia Ekatolika, 1951. Namibian Catholic Bishops Conference.