2 Kaatessaloniki 3
3
ONTOPORUA 3.
Omakumagido
1Nanena, jamuameme, tu garikaneneni, ohapu ha Muene hi kare nokuenda, ho hi simanekue ngashi uo pu ne,
2sse tu upicue kaantu aadudu, oshoka kaje shi ajeshe mba ja ara ehiteero.
3Ndere Karunga ohe omudiginini. Ote mu koreke nde te mu kerere kuuhineji.
4Otue mu itura uo mu Muene, ne hamu rongo nena no komesho shoka tue mu rombuera.
5Muene n’ukice eemtima deni kohore ha Karunga no kehididimiko rja Kristus.
6Otatu mu pe otshipango medina rja Muene guetu Jesus Kristus, jamuameme aahorike, ne kamu karacane namukueni keshe ngu e neemkaro eemhineji, ta dini omarongo nga mua peua ku sse.
7Omu tshi tshi ne jene, sho tshi nokuorerua musse. Inatu monica jarue uudigu, sho tua ri mokati keni.
8Inatu rja ombroto tua peua otshari, aaue, otua ronga nuudigu nuupjakadi omutenja nuusiku, katu vurice nand’omuntu.
9Inatu tshi ninga oshoka katua ri nepitiko,#3:9 Paulus okua ri nepitiko rjokufutica aakriste aatessaloniki iiparuca je moru’iironga je mokati kauo koruporo ruauo. aaue, sse otu mu pe otshoorerua ne mu tu orere.
10Ngija tua ri mokati keni, sse tue mu rombuera eehapu dika: Keshe ngu ina ara okuronga, ina rja uo.
11Oshoka otu’uva nokutja mokati keni omu na jamue haa monica jakuauo uudigu.#3:11 Aantu mbo ja hehera moru’uuheci nonjaro hauo. Kaje na sho haa rongo, haa ningi iinima mbi kaji namutse nandungu.
12Aantu mboka atu ja rombuere noku ja kumagida mu Muene Jesus Kristus, jo j’irongere ombroto hauo jene nokuronga nengungumano.
13Ndere one jamuameme, inamu vurua okuronga uuhanaua.
14Nge ku na gumue ina ara kuvurika kohapu hetu homombrife ndjika, mu didirikeni naua, inamu karacana na he, opo a se oshoni.
15Ndere inamu mu tara a f’omutondi gueni. Mu pukurureni ng’omumuanjoko.
16He Muene guombiri, he e mu pe ombiri arusherushe napeshepeshe. Muene na kare na ne.
17Ngaje Paulus andi tshanga ekundo ndika neke rjandje. Rjo orjo edidiriko rjandje rjo mombrife keshe. Ote tshanga ngi.
18Oshenda ha Muene guetu Jesus Kristus nahi kare na ne amushe Amen.
Omission Heklesia Ekatolika, 1951. Namibian Catholic Bishops Conference.