प्रेरित 26
26
पावलले म्हाँराजा अग्रिपासको अगाडि आम्नो कुडा राख्या
1अग्रिपासले पावलकन भुन्या, “तो आम्ना पछ्यामै बोल्न स्हक्छै।”
तब आम्नो हात उठाइ पावलले आपुकन बचाउना बिअ बोल्न लाग्या,
2“हे म्हाँराजा अग्रिपास, यहुदिहरुले मुकन लाया स्हबै दोसका बार्यामै आज तुम्मो अगाडि मोइले आपुकन बचाउना बिअ बोल्न पाया हुनाले मु आपुकन भाग्यामानि ठान्नोछु। 3यहुदिहरुको चालचलन र खलका बार्यामै तुमिकन राम्मरि थाँ भया हुनाले, मु बिन्ति गद्दछु मेरा कुडा धिर गरिकन स्हुनिदेउ।
4“मु आम्नै देसमै र यरुसलेम सहरमै भया यहुदिजातिका बिचमै हुर्क्याँ। तेइबिअ यहुदिहरुले मुकन राम्मरि रौन्छुन्। 5पैला मु फरिसि भुन्न्या कट्ठर धार्मिक दलको मान्ठ छिया, तेइ कठ्ठोर धर्मको जिबन ज्युँन्छिया। यति तिनुहरुले चाया भुन्या यइ कुडा आपैले पुनि भुन्न स्हक्न्याछुन्। 6परमेसोरले हाम्मा पुर्खाहरुकन गर्या बाचामै मोइले आसा राख्या हुनाले आज मु यइ मुद्दामै उबिया छु। 7हे म्हाँराजा अग्रिपास, हाम्मा बारै कुलहरुले यइ आसा पाउन रातदिन एक चित्तले आराधना गद्दछुन्, र मोइले पुनि आसा राख्या हुनाले यहुदिहरुले मुकन दोस लायाहुन्। 8परमेसोरले मर्याहरुकन ज्युँदो गद्दाछुन् भुन्न्या कुडा क्यान तुमिहरु कैकनै बिसास लाग्योन?
9“नासरतका इसुको नाउँको मथ्थै बिरोद गन्नुपड्छ भुन्न्या मु आपैकन पुनि बिसास छियो। 10अनि मोइले यरुसलेममै तेइथै गर्याँ। र मुख्य पुजारिहरुबाट हक पायर मथ्थै प्रभुकन बिसास गन्न्या मान्ठहरुकन मोइले झ्यालखानमै हाल्या मात्तै हैन, तर तिनुहरुकन मान्न पुनि लायाँ। 11अनि मु स्हबै सबाघरमै गैइ तिनुहरुले बिसास गन्न छोडुन भुनि डण्ड दिन लायाँ। तिनुहरुले मेरा जात्ति झोक उठाया छिया। तेइ झोकले अरु देसका सहरहरुमै पुनि गैइ मोइले तिनुहरुकन दुख दिन लाग्याँ।
आपु फेरिया बार्यामै पावलको बयान
(प्रेरित ९:१९; २२:६-१६)
12“यइगरि मु मुख्य पुजारिहरुबाट अदिकार र आग्या पायर दमस्कसतिर जानैछियाँ। 13हे राजा, तेइ दिन मद्दि दिउँस बाटोमै जानै गद्दा सरगबाट बेल भुन्दा पुनि चम्किलो उज्यालो मु र मेरा स्हात्याहरु हँडिरया बेला चारैतिर चम्क्या देख्याँ। 14तेइबेला हामि स्हबै जुना जुमिनमै लोट्या छियौं, तब हिब्रु भासामै मुकन यइथो भुनिरया डाको मोइले स्हुन्या, ‘साउल, साउल, तो मुकन क्यान दुख दिन्छै? स्हुइयामै लात्ता हान्दा तोकनै दुख्छ।’ 15अनि मोइले भुन्या, ‘हे प्रभु, तुमि को हौं?’ प्रभुले मुकन भुन्या, ‘मु तोइले दुख दिइरया इसु हुँ। 16अब उठ र आम्नो खुट्टामै ढुक। क्यानभुन्या मोइले तोकन मेरो सेबक र स्हाँचि दिन्या मान्ठ बुनाउन खोज्याछु। तेइबिअ मु तोइति देखला पड्या छु तोइले मेरा बार्यामै देख्या कुडा र मोइले तोकन पछि देखाउन्या कुडाहरु स्हबै अरु मान्ठहरुकन स्हुनाउनै पड्छ। 17मु तोकन यहुदिहरु र परमेसोरकन बिसास नगन्न्या जातिका बिचौनो पठाउन्याछु। अनि मु तोकन तिनुहरुबाट जोगाउन्याछु। 18तोइले ति मान्ठहरुका आँखा खोल्दिनु, र तिनुहरु उद्यारोबाट उज्यालोतिर र सैतानको सक्तिबाट परमेसोरतिर फर्कुन्। यइगरि तिनुहरुले पापको माप पाउन्याछुन् र मुकन बिसास गर्या हुनाले पबित्त भयाहरुको ठौर तिनुहरुले पुनि पाउन्याछुन्।’
19“यइबिअ, हे राजा अग्रिपास, मोइले सोर्गबाट पाया दर्सनको आग्या नमानि बैन स्हकिन। 20अनि पैला दमस्कस र यरुसलेममै र सारा यहुदिया देसभरि बैन्याहरु, र परमेसोरकन बिसास नगन्न्या जातिहरुकन पुनि पछ्ताप गरि परमेसोरतिर फर्क र परमेसोरति फर्क्य हुँ भुनि प्रमाण आपुले गर्या कामबाट देखाउनु पड्छ भुन्दै सिकायाँ। 21यइबिअ यहुदिहरुले मुकन मुन्दिरमै पक्डेर मार्न खोज्या। 22तर आजको दिनस्हम्म परमेसोरबाट मोइले सायता पायाछु। यइबिअ नाना ठुला दुबैकन स्हाँचि दिनै मु नेइ उबियाछु। परमेसोरका रैबार्याहरुले र मोसाले बोल्या बचन अबस्य पुरा हुन्याछुन् भुन्न्या कुडा बाएक मोइले अरु केइ भुन्यानाइ। 23तिनुहरुले भुन्या छिया कि ख्रिस्टले दुख पाउनुपड्छ, र मर्याबाट ज्युँदो भैइ उठ्न्यामै पैलो हुन्याछुन् र इसुले आम्नो उज्यालो आम्ना जाति र परमेसोरकन नमान्या जातिका म्हाँजौनो देखाउन्या छुन्।”
24पावलले भुन्या यिँ कुडा स्हुनेर फेस्तसले ठुलो डाको गरि भुन्यो, “या पावल, तो बौला होइ, तेरा मथ्थै ग्यानले तोकन बौला बुनायाछ।”
25तर पावलले भुन्या, “मान्न्या गुन्न्या फेस्तस, मु बौलाया हैन, बरु स्हाँचो र बुद्दिका कुडाहरु गद्दैछु। 26राजा अग्रिपासकन यिँ स्हबै कुडाका बार्यामै थाँ छ, जैको अगाडि मु ढुक्कले बोल्लैछु। क्यानकि यिँ केइ कुडा तिनुबाट लुकायानाइ, यइबिअ यइ कुडा गोप्यामै गरिया हैन।” 27अनि पावलले भुन्या, “हे राजा अग्रिपास क्या तुमि परमेसोरका रैबार्याकन बिसास गद्दाछौ? मुकन थाँ छ, तुमि बिसास गद्दाछौ।”
28राजा अग्रिपासले पावलकन भुन्या, “क्या तो स्हाँट्टै मुकन ख्रिस्टियान बुनाउन खोइदोछै?”
29पावलले भुन्या, “अइले होस् या पछि, तुमि र आज मेरा कुडा स्हुन्न्या जति स्हबै मु जैथै हुन् भुनि परमेसोरस्हात प्रार्थना गद्दोछु, तर मु जैथै कैदि हुनु नपडेस्।”
30तब राजा अग्रिपास, ठुला हाकिम फेस्तस, बरनिकि र ताँइ बैन्याहरु जति स्हबै उठ्या। 31अनि तिनुहरु बाइर निस्क्यापछि आपु आपु यइथोगरि कुडा गन्न लाग्या, “यइ मान्ठले मारि पाउन्या या झ्यालखाना जान्या लायकको काम केइ गर्यानाइ।” 32अग्रिपासले फेस्तसकन भुन्या, “यइले रोमि म्हाँराजाति बिन्ति नगर्या भया त यइ मान्ठकन छोडिदिया पुनि हुन्याछियो।”
Currently Selected:
प्रेरित 26: JUML
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
