प्रेरित 25
25
फेस्तसका अगाडि पावलको मुद्दा
1फेस्तस आम्नो इलाकामै आया तिन दिनपछि नै कैसरिया सहरबाट यरुसलेम गया। 2ताँइ मुख्य पुजारिहरु र यहुदिहरुका मुख्य मान्ठहरुले पावलको बिरुद्दमै दोस लाया। 3पावलकन बाटामै मान्न्या सड्यान्त बुनाइ पावलकन यरुसलेममै घोइराइदेउ भुनि बिन्ति गर्या। 4तर फेस्तसले तिनुहरुकन भुन्या, “पावलकन कैसरियामै थुनि राख्याछ, र आपु पुनि स्हाँट्टै ताँइ जाँदैछु। 5यइबिअ तुमिहरुमद्दिका कोइ अगुवाहरु ताँइ मुस्हात जाउन्, र तेइ मान्ठमै केइ नराम्मा कुडा छुन् भुन्या तेइकन उजुर हालुन्।”
6अनि फेस्तस आठ दस दिनस्हम्म यरुसलेममै बस्यापछि कैसरियामै फर्क्या। भोलिपल्ट तिनुले निसाप गन्न्या ठौरमै बसेर पावलकन ल्याउन्या हुकुम गर्या। 7पावल आयापछि यरुसलेमबाट आया यहुदिहरु पावलका ओरिपोरि उबिया, र पावलका बिरुद्दमै मथ्थै किसिमका आरोप लाया, तर तिनुहरुले पावलकन दोस लाउन्या केइ प्रमाण दिन स्हक्यानुन्। 8अनि पावलले तिनुहरुकन भुन्या, “मोइले न यहुदि धर्मसास्त्रको बिरोदमै, न मुन्दिरको बिरोदमै, न त रोमि म्हाँराजाको बिरुद्दमै केइ नराम्मा काम गर्याछु।”
9तर फेस्तसले यहुदिहरुकन खुसि बुनाउना बिअ पावलकन भुन्या, “क्या तुमि यरुसलेममै गैइ ताँइ मेरो अगाडि यिँ कुडाका बार्यामै निसाप गरिओस् भुन्न्या इच्छ्या गद्दाछौ?”
10तर पावलले भुन्या, “मु रोमि म्हाँराजाले निसाप गन्न्या ठौरको अगाडि उबियाछु, जाँ मेरो निसाप हुनुपड्छ। यहुदिहरुकन मोइले केइ नराम्मो गर्यानाइ। तेइ तुमिकन थाँहै छ। 11यति मु अपरादि हुँ, र मोइले मारि पाउन्या लायकको काम गर्याछु भुन्या मु मन्न तयार छु। तर यति यहुदिहरुले मुकन लाया आरोप स्हाँचो हैन भुन्या मुकन यिनुहरुका हातमै कोइले पुनि स्हुम्पन स्हक्तैन। मु रोमि म्हाँराजाकनै निसाप गद्देउ भुनि बिन्ति गद्छु।”
12तब फेस्तसले स्हल्ला दिन्यास्हात स्हल्ला गरि पावलकन भुन्या, “तोइले रोमि म्हाँराजाति बिन्ति गरिस्, तेइबिअ तो रोमि म्हाँराजाति जान्याछै।”
राजा अग्रिपासस्हात फेस्तसको स्हल्ला
13केइ दिनपछि फेस्तसकन सुम्मान गन्न राजा अग्रिपास र बरनिकि#२५:१३ बरनिकि रोमि म्हाँराजा अग्रिपासकि बुइनि हुन्। कैसरिया सहरमै आया। 14अनि तिनुहरु ताँइ केइ दिन बस्यापछि फेस्तसले पावलको मुद्दा राजाको अगाडि यइथो भुन्दै दिया, “फेलिक्सले थुनेर राख्या एक मान्ठ नेइ छ। 15जैखो बार्यामै मु यरुसलेममै हुँदा मुख्य पुजारिहरु र यहुदिहरुका अगुवाहरुले तेइको बिरुद्दमै आरोप लायर तेइकन डण्ड दिनुपड्छ भुनि बिन्ति गर्या छिया। 16तर मोइले तिनुहरुकन भुन्या, ‘मान्ठकन दोसि नठरायास्हम्म रोमि सरकारको डण्ड दिन्या चलन नाइ। दोसि ठराइया मान्ठले दोस लाउन्याका अगाडि आम्नो कुडा स्हुनाउन्या मौका पाउनु पड्छ।’ 17जब तिनुहरु जुम्मा भैइ नेइ आया, र मोइले बार् नगरि भोलिपल्ट पावलकन निसाप गन्न्या ठौरमै ल्याउनु भुनि तिनुहरुकन हुकुम गर्याँ। 18जब पावलका बिरोदिहरु उबियर मोइले ठान्या जैथै तेइका मुद्दामै केइ नराम्मा कुडाहरुको आरोप तिनुहरुले लाउन स्हक्यानुन्। 19तर तिनुहरुको खल आम्नै धर्म र मरिस्हक्या इसुका बार्यामै रैछ। इसुकन पावलले अँजै ज्युँदा छुन् भुनि जिद्दि गद्दा छिया। 20यइबिअ यइ कुडाको बार्यामै स्होदपुछ गन्न मु अलमल्ल पड्या हुनाले यइको बार्यामै कुडाकानि गन्न यरुसलेममै जान्या पावलको इच्छ्या छ कि भुनि मोइले स्होद्या। 21तर पावलले रोमि म्हाँराजाबाट निसाप पाउँछु कि भुनि बिन्ति गर्या, र मोइले राजाति नपठायास्हम्म तेइकन राम्मरि रेखदेक गन्नु भुनि आग्या दियाँ।”
22तब अग्रिपासले फेस्तसकन भुन्या, “यइ मान्ठा कुडा मु आपैले पुनि स्हुन्न पाया हुन्याछियो।”
अनि फेस्तसले भुन्या, “भोलि तुमिले स्हुन्न्याछौं।”
23भोलिपल्ट अग्रिपास र बरनिकि ठुलै फुत्तिगरि आया। तिनुहरु सेनापतिहरु र सहरका मुख्य मान्ठहरुस्हातै कचेरिघरमै पस्या। अनि फेस्तसको हुकुम पायर पावलकन सबामै ल्याया। 24फेस्तसले भुन्या, “राजा अग्रिपास र हाकिमस्हात नेइ भया स्हबै भलादिमिहरु हौं, तुमिहरुले यइ मान्ठकन देख्थाछौ, यिनुका बार्यामै स्हबै यहुदिहरुले ‘यइ मान्ठ अब बाँइन पाउन्यानाइ’ भुनि यरुसलेममै र नेइ मोइस्हात पुनि बिन्ति गर्या छिया। 25तर मोइले यइकन मान्न्या लायकको केइ दोस नदेख्या हुनाले र यइ आपैले पुनि राजाति बिन्ति गर्या हुनाले मोइले यइकन तिनुति पठाउन्या पक्का गर्याछु। 26तर यइको बार्यामै मोइले मेरा राजाकन लेख्न्या मुख्य कुडा केइनाइ। यइबिअ मोइले यइकन तुमिहरुका अगाडि, र खास गरेर, हे राजा अग्रिपास, तुम्मो अगाडि ल्यायाछु। र हामिले यइको जाँच गर्यापछि सायद मोइले केइ लेख्न्या कुडा पाउन्याछु। 27क्यानभुन्या मुकन कैदिको बिरुद्दमै केइ दोस नदेखाइ तेइकन तुमिति पठाउन राम्मो लाग्दैन।”
Currently Selected:
प्रेरित 25: JUML
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
