प्रेरित 25
25
फेस्तसक् आगारि पावलक् मुद्दा
1फेस्तस बारा-हाकिम भेहिन् आफ्निक् इलाकाइ आइल तिन दिनपाछुहि कैसरियाक्भटे उक्लिहिन् यरुसलेम जाइलक्। 2ओछि रैल्हटाकै बर्के-पुझरिलक् आउँ यहुदि अगुवालके ओक्राक्ठालाइ आइबानाइ पावलक् बिरोधै दोस लागालुहुन्। 3आउँ पावललाइ यरुसलेम पाठाहोंक् बाजिहिन् बिम्ति कर्लुहुन्, किसाबुने उखर्ह्वाइ ओक्रानि पैंदाहिमा मार्बाक्नि साउटि मिलाल धर्लुहुन्। 4ओक्राक्पाछु फेस्तसे उखर्ह्वानि यन्हिं बाजिहिन् जुबाप देलाहा, “पावललाइ कैसरियाहिक् झेलखारै धरिजाइल रहैस्, आउँ मुँइ आफ्निऔ ओछि छिट्टोय जाइतिहि रहम्ना। 5उहेसिहिरे तोहोराखर्ह्वामध्ये कुन्हुँ अगुवालक् मोरासङ्हिं जाबा चाहिबुने पाठाहो। आउँ पावले किच्छु काम बिराल भेनेमा ओच्छिहि उखर्ह्वाइ ओक्राक् बिरोधै उजुर करुस्।”
6फेस्तस आठ-दस दिनसम्म उखर्ह्वाक्सङ्हिं यरुसलेमै बसिबानाइ कैसरिया फर्कलक्। तसौ ओहिं ओर्को दिनै ओछि नियाँ कर्बाक् ठाँओइ बसिबानाइ पावललाइ आनहँक् बाजिहिन् हुकुम देलक्। 7पावल ओछि आइनेसौ यरुसलेमक्भटे आइल यहुदिलके ओक्रानि चारौभटे घेरिबानाइ नाना-थरिक् डरौलाक्टो दोस लागाबा ठाल्लुहुन्। तर उखर्ह्वाइ लागाल दोसलकक् किच्छुय पर्मान पुर्याबा नहिंपार्लुहुन्। 8ओक्राक्पाछु पावले आफ्निक्लाइ जोगाइबानाइ यन्हिं बोल्लाहा, “मुँइ यहुदिलकक् नियमक् बिरोधै, मन्दिरक् बिरोधै, आउँ रोमि राजाक् बिरोधै किच्छुय अपरारक् काम नाहाँकरम्।”
9तर फेस्तसे यहुदिलकलाइ खुसि पार्बाक् बिचार करिहिन् पावललाइ यन्हिं बोल्लोकुन्, “किस् तुँइ यरुसलेमै जाइबानाइ ओच्छिहि मोरा आगारि यि कहिनलकक् बिसइमा तोरा नियाँ भेउस् बाजिहिन् चाहास्ला?”
10तर पावले बाज्लक्, “मुँइ रोमि राजाक् नियाँ कर्बाक् ठाउँहिमा ठड्ध्याल रहम्ना, मोरा नियाँ यच्छिहि भेबा पोर्लाहार। मुँइ यहुदिलकक् बिरोधै किच्छुय नराम्रो काम नाहाँकर्ल बाज्बाक् कहिन् हजुरलाइ आको थाहाय भेल कहिन् हो। 11यदि मुँइ अपरार कर्ल भेनेमा, आउँ मुँइ मोर्बाक् साजाइ पाबा पोर्लाहार किच्छु काम कर्ल भेने ता मुँइ मोर्बाहुँक्लाइ तियार रहम्ना। तर यहुदिलके लागाल कुन्हुँ दोस सहि नहिंभेइबुनेमा मोरानि उखर्ह्वाक् हाथै कुन्हुँहि सोंप्पाक् अधिकार बोइने। मुँइ रोमि राजाहिक्सङ्हिं मोरा मुद्दाक् फैसला करिदेउस् बाजिहिन् बिम्ति कर्बाक् माङ् करम्ना।”
12तसौ फेस्तसे आफ्निक् सर-साल्हा देलाहारलकक् सङ्हिं साल्हा करिबानाइ यन्हिं बोल्लोकुन्, “तुँइ रोमि राजाक्ठालाइ बिम्ति कर्बाक् माङ् कर्लधरस्ला, उहेसिहिरे मुँइ तोरानि रोमि राजाहिक्ठालाइ पाठामेर्ला।”
फेस्तसे राजा अग्रिपासक्ठालाइ साल्हा लेल
13चुटेक् दिनपाछु राजा अग्रिपास आउँ ओक्राक् बैन्हेक् बरनिकिय फेस्तसलाइ भेंटाहिन् स्वागत कर्बाक्नि कैसरियाइ आइलुहुन्। 14उखर्ह्वा ओछि थुप्रोय दिन बस्नेसौ फेस्तसे उखर्ह्वानि पावललाइ लाग्ल मुद्दाक् कहिन् यन्हिं बाजिहिन् सुनालाहा, “यछि फेलिक्सक् पालाहिसौ थुनिहिन् धर्ल एकजेना मानुस रहैस्। 15जक्राक् बिसइमा, मुँइ यरुसलेम जाइल बेलाइ यहुदिलकक् बर्के-पुझरिलके आउँ ओर्को अगुवालके ओक्राक् बिरोधै दोस लागाइबानाइ ओक्रानि साजाइ देबाय पोर्लाहार बाजिहिन् बिम्ति कर्ल धर्लुहुन्। 16भेटौ मुँइ उखर्ह्वानि यन्हिं बोल्लोमिखान्, ‘कुन्हुँ मानुसलाइ दोसि नहिं ठहराबासम्म रोमि सरखारे साजाइ देबाक् चलन बोइने। दोस लाग्ल मानुसे दोस लागालाहारक् आगारि आफ्निक् कहिनलक् बाज्बाक् मौका पाबा पोर्लाहार।’ 17जब उखर्ह्वा मोराठालाइ आइलुहुन्, मुँइ बियाँलो नहिंकरिहिने ओर्को दिनिहिंमा पावललाइ नियाँ कर्बाक् ठाँओइ आन्बाक्नि हुकुम कर्लम्। 18पावलक् बिरोधै दोस लागालाहारलके ओक्राक् अपरार कर्ल किच्छु दोस लागाइदेथिला भेका बाजिहिन् बिचार कर्ल रैल्हम्, भेटौ उखर्ह्वाइ ओरोङ् किच्छुय दोस लागाबा नहिंपार्लुहुन्। 19तर उखर्ह्वाक् मनमुटाबसेहे उहेखर्ह्वाक् धर्मक् बिसइमा आउँ मोरिहिन् सिधाल येसु बाज्ल मानुसक् बिसइमा रैल्हाहा। पावले सेहे येसु मोरिबानाइ जिउँटल रहैस् बाजिहिन् जोर कर्तिहि रैल्हक्। 20यि कहिनक् बिसइमा कहने छानबिन कर्बा बाजिहिन् मुँइ अलमल्ल पोर्लोम्। उहेसैर्हे यक्राक् बिसइमा छलफल कर्बाक्नि यरुसलेमै जाहिन् तोरा नियाँ ओच्छिहि कर्ने भेला ना बाजिहिन् सोर्ल्होमिक्। 21तर पावले रोमि राजाक्भटेहि नियाँ नहिंभेबायसम्म झेलखारिहिमा धरुस् बाजिहिन् बिम्ति कर्ल सिहिरे ओक्रानि राजाक्ठालाइ नहिंपाठाबा सम्मक्लाइ राम्रोइसौ पहरा देहिन् यच्छिहि धरहक् बाजिहिन् हुकुम देल धर्लम्।”
22ओक्राक्पाछु अग्रिपासे फेस्तसलाइ यन्हिं बोल्लोकुन्, “उ मानुसक् कहिन् मुँइ आफ्निहि आको सुन्बा पाइलसन् भेइटकुन्।”
तसौ फेस्तसे बाज्लक्, “हजुरे काल्हु सुन्बा पाइहालहला।”
23ओर्को दिन पोर्नेसौ अग्रिपास आउँ बरनिकि एकदमे धुमधामेसम् सेनापति आउँ सहरक् गन्याँ-मान्याँ मानुसलकक्सङ्हिं सभा घरै पोस्लुहुन्। तसौ फेस्तसे हुकुम देनेसौ पावललाइ सभाइ आन्लिहिक्। 24तसौ फेस्तसे बाज्लक्, “राजा अग्रिपास, यछि जउर भेलाहार जम्मा गन्याँ-मान्याँ मानुसलक् आउँ यहुदिलके मोराठालाइ उजुर कर्ल मानुस यिहे हो। यि मानुसलाइ मार्बा पोर्लाहार बाजिहिन् बर्के स्वरे चिच्याइबानाइ जम्मा यरुसलेमै आउँ यछि कैसरियाइ आको माङ् कर्तिहि रहट्थ्ला। 25तर मुँइ यि मानुसे मोर्बाक् साजाइ देबा पोर्लाहार खालक किच्छु कर्लय नाहाँ देखम्। आउँ यहिं आफ्निहि रोमि राजाक्ठालाइ बिम्ति चार्हाल सैर्हे मुँइ यक्रानि रोमि राजाहिक्ठालाइ पाठाबाक्नि निर्नय कर्लम्। 26तर मुँइ यक्राक् बिसइमा राजालाइ लेख्बाक् किच्छु खास कहिन् बोइने। उहेसिहिरे मुँइ ओक्रालाइ तोहोराखर्ह्वाक् आगारि आउँ खास करिहिन्, हे राजा अग्रिपास, हजुरक् आगारि यक्रानि आन्ल धर्मिना। हजुरे यक्राक् जाँचबुझ करिबुनेमा मुँइ लेख्फाक् कहिन् पाम्ना ना बाजिहिन् आसा कर्ल धरम्ना। 27किसाबुने कैदिक् बिरोधै किच्छु दोस नहिंभेंटाहिने ओक्रालाइ राजाक्ठालाइ पाठाबाक् मोरालाइ राम्रो नालागै।”
Currently Selected:
प्रेरित 25: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
