प्रेरित 24
24
बारा-हाकिम फेलिक्सक् आगारि पावल
1पाँच दिनपाछु माहा-पुझरि हननिया आउँ कुन्हुँ-कुन्हुँ अगुवालक्, तर्तुल्लस नाउँ भेल एकजेना वकिललाइ लेइबानाइ कैसरिया सहरै आइलुहुन्। उखर्ह्वा जम्माहिं पावलक् बिरोधै बारा-हाकिमक् आगारि उजुर कर्लुहुन्। 2ओक्राक्पाछु पावललाइ बारा-हाकिमक् आगारि आन्नेसौ तर्तुल्लसे ओक्राक् बिरोधै यन्हिं बाजिहिन् दोस लागाबा ठाल्लक्, “मान्जन फेलिक्स, हजुरक्भटे धेरे बर्स आगारिहिंसौ हामि सान्तिसम् बस्बा पाइल रहुँक्ला। आउँ हजुरक्भटे हाम्रा देसक् लागि राम्रो-राम्रो सुधारक् कामलक् आको भेल रहेला।
3“यि कहिनलक् हामि जम्मा ठाँओइ सटौघरि धन्यबाट देहिन् सुइकार करुहुँक्ला। 4उहेरङ् करिहिन् हजुरक् धेरे समइ लेबा नाचाहाम्, तर हाम्रा एक-दुइग्वा कहिन् सुनिदेहे बाजिहिन् बिम्ति करम्ना। 5हामि यि मानुसलाइ जटेतटे दुक्ख देइटे बुल्लाहार आउँ सन्सारभोरिक् जम्मा यहुदिलकक् माझै हुल-दङ्का कर्टे बुल्लाहार नासरि बाज्ल दप्फाक् मुख्य नेता बनिहिन् हिंठ्ल भेंटाल रहुँक्ला। 6यि मानुसे मन्दिरुहुलाइ असुद्ध बानाबाक् खोज्तिहि रैल्हक्, उहेसिहिरे हामि यक्रानि गर्थलुहुँक्। [हामि जम्माहिं आफ्निक् नियमक्भटे यक्रानि कारबाइ कर्बाक् सोंच्लो धर्लुहुँक्। 7तर सेनापति लुसियसे हाम्राठालाइ आइबानाइ यक्रानि जबरजस्ति हाम्रा हाथक्भटे ओंछ्रिबानाइ लेगालक्। 8आउँ हाम्रानि हजुरक्ठालाइ जाहिन् उजुर कर्बा बाजिहिन् हुकुम देलक्।] असौ हजुरे आफ्निहि यि मानुसलाइ सोर्हिबुने हामि यक्रानि लागाल दोस यक्रिहिक्भटे सेप्थोक् थाहा पाहोला।” 9ओछि रैल्ह ओर्को यहुदिलकुहु यि जम्मा कहिन् साँच्चिहिंक् हो बाजिहिन् बाज्लुहुन्।
पावले फेलिक्सक् आगारि बिम्ति कर्लक्
10तसौ बारा-हाकिमे पावललाइ साराबाक् इसारा कर्नेसौ पावले यन्हिं बाज्लक्, “धेरे बर्स आगारिहिसौ हजुरे यि देसक् नियाँधिस भेइबानाइ आइल कहिन् मोरानि थाहा रहैस्। उहेसिहिरे मुँइ हजुरक् आगारि आफ्निक् कहिन् धर्बाक्नि आँट बर्ल्ह रहैस्।
11“मुँइ यरुसलेमक् मन्दिरै परमेस्वरक् भक्ति कर्बा जाइल बार्ह दिनेसौ बर्ता भेल बोइने बाज्बाक् कहिनलाइ तुँइ सजिलोइसम् पात्ता लागाबा पारस्ला। 12मोरानि दोस लागालाहारलके ना ता मोरानि मन्दिरै कुन्हुँ मानुसक्सङ्हिं तर्क-बितर्क कर्तिहि रैल्ह भेंटालुहुन्, ना सभाघरै अथबा सहरै मानुसलकलाइ हुल-दङ्का कर्बाक् लागिय सुर्याल भेंटालुहुन्। 13ना ता अख्नि इखर्ह्वाइ मोरानि लागाल दोसक् पर्मान देखाबा पारट्थ्ला। 14तर मुँइ यि कहिनलाइ हजुरक् आगारि सुइकार करम्ना, जुन् पर्भुक् पैंदालाइ उखर्ह्वाइ झुट्ठा बाज्तिहि रहट्थ्ला, उहे पैंदालाइ पछ्याइबानाइ मुँइ हाम्रा बाज्या-बाराजुलकक्भटे मानिबानाइ आइल परमेस्वरिहिक्लाइ पुज-मान करम्ना। अगमबक्तालके लेख्ल कितापलकै आउँ मोसाइ देल जम्मा नियमलकै मुँइ बिस्वास करम्ना। 15मुँहु उहेखर्ह्वाक् परौ धर्मि आउँ अधर्मि मानुसलक् दोहोगोटाय मोर्लोक्भटे फेरि जिउँटथ्ला बाजिहिन् परमेस्वरक् उप्रै आसा करम्ना। 16उहेसिहिरे मुँइ परमेस्वर आउँ मानुसलकक् आगारि सटौघरि निर्दोस जिबन बिताबाक् कोसिस करम्ना।
17“थुप्रोय बर्सक् पाछु मुँइ आफ्निक् जातक् गरिप मानुसलकलाइ दान देबाक्नि आउँ परमेस्वरलाइ भेंटि चार्हाबाक्नि यरुसलेमै आइल रैल्हम्।#प्रेरित २१:१७-१८ 18इखर्ह्वाइ मोरालाइ मन्दिरै दान देल भेंटालटाकै मुँइ सुद्ध भेबाक् बिधि पुरा करिहिन् सक्ल धर्लम्। ओछि ना ता मानुसलकक् भिर रैल्हुहुन्, ना ता हुल-दङ्काय भेल रैल्हकुन्। 19तर ओछि एसियाक्भटे आइलाहार कुन्हुँ-कुन्हुँ यहुदिलकौ रैल्हुहुन्, उखर्ह्वा यछि हजुरक् आगारि आबापोर्लाहार रैल्हकुन्। यदि उखर्ह्वाइ मोरा बिरोधै बाज्बा पोर्लाहार किच्छु कहिन् रैल्ह सन्तेक् उहेखर्ह्वाय हजुरक्ठालाइ आहिन् उजुर कर्बा पार्टुहुन्। 20नाटेन् यछि रैल्हाहारलके आफ्निहि बाजुस्– यहुदिलकक् मुँइ माहासभाक् आगारि ठड्ध्याल बेलाइ मोरा उप्रै किवा दोस भेंटाल रैल्हुहुन्। 21उखर्ह्वाइ मोरानि यिहे एकेग्वा कहिनै माटेन् दोस लागाबा पारट्थ्ला। जुन् सेहे मुँइ ‘मोर्लो मानुसलक् फेरि जिउँट्थ्ला बाज्ल कहिनै आजु तोहोराखर्ह्वाक् आगारि मोरा मुद्दा चल्तिहि रहैस्,’ बाजिहिन् उखर्ह्वाक् आगारि ठड्ध्याइबानाइ बर्के स्वरे चिच्याइबानाइ यन्हिं बाज्ल रैल्हम्।”#प्रेरित २३:६
22फेलिक्सलाइ पर्भुक् पैंदाक् बिसइमा सेब्भ्रोउ कहिन् थाहा रैल्हकुन्। उहेसैर्हे यि कहिन् सुन्नेसौ ओहिं उखर्ह्वानि यरङ् ढुव पारिहिन् पाठालाहा, “असौ तोहोराखर्ह्वाक् उजुरि सेनापति लुसियस यछि आइनेसौ माटेन् फैसला करिदेमेहेर्ला।” 23तसौ फेलिक्से कप्तानलाइ यन्हिं बोल्लोकुन्, पावललाइ राम्रोइसम् हेरबिचार करहक्, तर ओक्रालाइ चाइल्ह थोकलक् आन्लाहार सङिहिंकलकलाइ बुन् छेक्बेहेरा आउँ ओक्रानि यर्साक्-ओर्साक् कर्बा देहेक्।
फेलिक्स आउँ दुरुसिल्लाक् आगारि पावल
24चुटेक् दिनपाछु फेलिक्से आफ्निक् यहुदि बोहेक दुरुसिल्लालाइ सङ्हिं लेहिन् आइलकुन्, आउँ ओहिं पावललाइ हाँख्राहिन् येसु खिरिस्टलाइ बिस्वास कर्बाक् बिसइमा पावलक्भटे सुन्लुहुन्। 25तर पावले ओक्रानि परमेस्वरक् धार्मिक आग्यालक् मानिहिन् काम कर्बा पोर्लाहार, आफ्निक् मनलाइ अधिनै धर्बापोर्लाहार आउँ परमेस्वरे नियाँ कर्बाक् दिन आइतिहि रहेला बाज्बाक् कहिन् सुनानेसौ फेलिक्से आहाटिबानाइ यन्हिं बाज्लक्, “भेइ, आस्कोक् लागि यट्के भेउस्, असौ तुँइ जा। पाछु मौका पोर्लोटाकै मुँइ फेरि तोरानि हाँख्रामेंर्ला।” 26तर ओहिं पावललाइ घरि-घरि गफ कर्बा हाँख्रायक्। किसाबुने पावलक्भटे घुस पाम्ना ना बाजिहिन् ओहिं आसा कर्ल धर्लक्।
27यरङ् करिहिन् दुइ बर्स कट्नेसौ फेलिक्सक् साँटाइ पर्किअस फेस्तस बारा-हाकिम भेलक्। तसौ फेलिक्से यहुदिलकलाइ खुसि पार्बाक् लागि पावललाइ झेलखारिहिमा धरिहिन् जाइलक्।
Currently Selected:
प्रेरित 24: DEWZ
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
