खबरदुत 18
18
पावलइ अकिलास र प्रिस्किलाकाय कोरिन्थ सहरहाङ क्रुसो
1ओहाङसयको पावल एथेन्स सहर फेआक्तिको कोरिन्थ सहरताङ आला। 2ओहाङ दाहापछि ओउइ पोन्तस छेत्रको अकिलास त मय्ङ्ओ यातचाक यहुदिकाय क्रुसाकान। रोमि माहाराजा क्लउदियसइ जुदा यहुदिलमकाय रोम सहर फेति पाह्य्साको लागि हुकुम जाह्ङोझ्यान्ते ओउखे भखरले लयको माचा प्रिस्किलाकुसि इतालिया देससय ओहाङ दाह्तिवाङो खेतो। पावल ओउनिसकाय क्रुस्लाङ आला। 3पावलइमा ङ्हा ओउनिस लेखाले पाल जाह्ङो काम जाह्ङुतो, ओउतझ्यान्ते पावलमा ओउनिसकुस काम जाह्ङ्ति ओहाङले मुआ। 4हरेक यहुदि धोओ दिनहाङ पावल सभाकिमहाङ आल्तो, अनि यहुदि र अरु जातिको मान्तालमकायमा येसुको बारेहाङ चिःताक्सा कोसिस जाह्ङुतो।
5जब सिलास र तिमोथि माकेदोनिया इलाकासय दाह्तिवाङाकाच, पावलइ लयको जुदा समय येसुले ख्रिस्त खेसास्याउना त दाह्य्ति यहुदिलमकाय प्रचार जाह्ङ्ति हुताकान। 6तर यहुदिलमइ पावलको स्यानरायकाय सुइकार जाह्ङ्निलि र ओउमय पावलको बिरोतहाङ पेमालो कुरा नोःआकाय। ओउतझ्यान्ते ओउइ लयको लावनायको धाह्न् काहाक्तिको ओउमयकाय तोआकान, “निङइ दोःसाखेओ दन्दको जिम्मेवारिखे निङ लयले स्याउतेनय। ङाइपाय लय खाइच्युककाय जुदाले जाह्ङालाङ। द्याहखे ङा अरु जातिको मान्तालमकहाङ आल्नाङ।” 7ओहाङसयको पावल ओउमयकाय फेआक्तिको परमेस्वरको भक्ति जाह्ङो तितस युस्तस त मय्ङ्ओ अरु जातिको मान्ताको किमहाङ याक्लाङ आला। ओउको किमखे यहुदि सभाकिमको छेउसयले खेतो। 8यहुदि सभाकिमको हाकिमि क्रिस्पस र ओउको किमको जुदा माचरलमइले प्रभुहाङ बिस्वास जाह्ङाकानि। अनि कोरिन्थ सहरको अरु नाःतो मान्तालमइमा पावलको स्यानराय साइति बिस्वास जाह्ङाकानि र बप्तिस्मा लेःआकानि।
9याह्दिङको बेलाहाङ पावलइ यातज्यो दर्सन च्यवाकान र प्रभुइ ओउकाय तोसास्यावा, “नाङको बिरोत जाह्ङोलमकुस नाङ रइलाम, प्रचारको काम जाह्ङ्तिले मुअ र ङइमात मुलाम, 10धइतिदाह्य्सा ङा नाङकुसिले मुनाङ। सुइमा नाङकाय आक्रमन जाह्ङ्सा र दुख बइसा खाइतेल, धइतिदाह्य्सा इ सहरहाङ ङाको मान्तालम नाःतोले मुलेनय।” 11ओउतझ्यान्ते पावल ओहाङको मान्तालमकाय परमेस्वरको आखर प्रचार जाह्ङ्धय ओहाङ यात बर्स छ महिनाच्युककाय मुआ।
12जब गलियोन त तोओ मान्ता अखइया इलाकाको सासक स्यावा, अनि केहि पाको अगुवालम मिलति पावलकाय आक्रमन जाह्ङाकानि र चुम्ति अदालतहाङ वानाकानि। 13अनि एतदाह्य्ति दाह्याकाय, “इ मान्ताइ निको नेम-कानुनको बिरोतहाङ आल्ति परमेस्वरको भक्ति जाह्ङ्सा परना त दाह्य्ति मान्तालमकाय स्यान्धय मुना।”
14पावलइ तोसाले बोःङो बेलाहाङ गलियोनइ यहुदिलमकाय तोआकान, “यहुदिलम, निङइ साइनु, यदि निङइ इ मान्ताकाय अपराध अथबा कुनय गल्ति जाह्ङो कारनइ चुम्ति वानो खेयाकाय, ङाइ निङको कुराकाय साइसा परङतो। 15तर इ बहसखेपाय निङको सब्दलम, मय्ङलम र नेम-कानुनको बारेहाङ मात्र खेना, ओउतझ्यान्ते निङ लयमयइले इ कुराको न्याय जाह्ङ्नु। ङा एतताह्ङो कुराको न्याय जाह्ङ्सा चाहङल।” 16ओहाङसयको ओउइ ओउ पाको अगुवालमकाय अदालतसय रुःन्ति ल्होकाकान। 17अनि मान्तालमको हुलइ यहुदि सभाकिमको अगुवा सोस्थेनेसकाय अदालतको ङ्हाहाङले चुम्ति घानाकानि। तर गलियोनइ ओउ घतनाकाय मइतोमा वास्ता जाह्ङुलु।
पावल सिरियाको एन्तिओखियाताङ द्याह्नो
18पावल कोरिन्थ सहरहाङ बिस्वासिलमकुस नाःतो दिनसम्म मुआ, ओहाङसयको पावल बिस्वासिलमकाय फेआक्तिको किङ्क्रिया सहरताङ आला। यहुदि चलन अनुसार ङ्हाखाले भाकल जाह्ङोझ्यान्ते ओउइ लयको म्याङ खुर्ति वायाकान। अनि ओउ सिरियाताङ आल्साको लागि तिः जहासहाङ लह्ना, र ओउ तिः जहासहाङ ओउकुस प्रिस्किला र अकिलासमा खेचतो। 19जब ओउमय एफिससहाङ दाहाकाय, पावलइ प्रिस्किला र अकिलासकाय ओहाङले फेति गमाकान। तर लयमा ओहाङ मुतोकहाङखे पावल यहुदि सभाकिमहाङ आल्ति यहुदिलमकुस बहस जाह्ङाकान। 20मान्तालमइ ओउकाय अझले केहि दिनच्युककाय मुसाको लागि बिन्ति जाह्ङाथय, तर ओउ जुगाङमा ग्याल। 21बरु ओउइ “यदि परमेस्वरको इच्छ्या स्याउना त खेयाकाय, ङा फेरि निङकहाङ द्याह्न्ति वाङ्लेनाङ” त दाह्य्ति तोआक्तिको ओहाङसय तिः जहासहाङ लह्न्ति पाह्या।
22जब पावल कयसरिया सहरहाङ दाहा, ओउइ यरुसलेमहाङ आल्ति मन्दलिको मान्तालमकाय क्रुसाकान, ओहाङसयको ओउ एन्तिओखिया सहरताङ आला। 23ओहाङ मुओ केहि समय लोन्हे, ओउ सहर फेआक्तिको गलातिया र फ्रिगिया छेत्र स्याउधय बिस्वासिलमकाय हउसला बइधय थाउ-थाउताङ आला।
अपोल्लोस एफिसस र कोरिन्थ सहरहाङ
24ओउतोक बेलाहाङ अलेक्जेन्द्रिया सहरहाङ नाःओ अपोल्लोस त मय्ङ्ओ यातचाक यहुदि एफिससहाङ वाङा। ओउखे माहा पेतो नोःसा चिःओ र धर्मसास्त्रको पेतो ग्यान नाःओ मान्ता खेतो। 25ओउइ गतहाइति प्रभुको इच्छ्या अनुसार याक्सा परना त दाह्योको बारेहाङ पेओ स्यानराय दोःओ खेतो, र मान्तालमकाय आन चोङाइति येसुको बारेहाङ सत्य कुरा स्यानुतो। तर ओउइखे युहन्नाको बप्तिस्माको बारेहाङ मात्र चिःउतो। 26अपोल्लोसइ यहुदि सभाकिमहाङ साहसकुसि नोःसा फाःङाकान। जब प्रिस्किला र अकिलासइ ओउको कुरा सायाकाचु, ओउनिसइ अपोल्लोसकाय लयनिसको किमताङ लात्ति आःलाकाचु अनि गतहाइति प्रभुको इच्छ्या अनुसार याक्सा परना त दाह्योको बारेहाङ झन् नाःतोकुसि तोति बयाकाचु।
27ओहाङसयको अपोल्लोसइ अखइया इलाकाताङ आल्सा इच्छ्या जाह्ङाकान, र एफिससको बिस्वासिलमइ ओहाङ आल्साको लागि ओउकाय हउसला बयाथय। अनि ओउमयइ ओउकाय स्वागत जाह्ङ्ताक्साको लागि अखइयाको बिस्वासिलमकाय चिथि लेखआकानि। जब ओउ अखइयाहाङ दाहा, परमेस्वरको अनुग्रह दुवारा प्रभु येसुहाङ बिस्वास जाह्ङोलमकाय ओउइ नाःतो सहयोग जाह्ङाकान। 28ओउइ येसुले ख्रिस्त खेसास्याउना त दाह्य्ति धर्मसास्त्रसय पेतोकुसि प्रमान बइति जुदा मान्तालमको ङ्हाहाङले यहुदिलमकुस जोक्तोले बहस जाह्ङाकान।
Currently Selected:
खबरदुत 18: CHEP
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.