खबरदुत 17
17
पावल र सिलास थेसलोनिके सहरहाङ
1पावल र सिलास माकेदोनिया इलाकाको अम्फिपोलिस र अपोल्लोनिया सहर स्याउधय थेसलोनिके सहरहाङ दाहाकाच, र ओहाङ यातज्यो यहुदि सभाकिम खेतो। 2पावल सादाको लेखाले सभाकिमको सेवाहाङ आला। ओहाङ ओउइ सुम सातासम्म धर्मसास्त्रको कितापसय मान्तालमकुस बहस जाह्ङाकान। 3ख्रिस्तइ दुख दोःसा परना र सिओसय फेरि उह्ति च्योक्सा परना त दाह्य्ति अगमबानि जाह्ङो कुरा तोआक्तिको प्रमानित जाह्ङ्ति बयाकान। ओउइ तोआकान, “ङाइ कुरा जाह्ङोखे येसुको बारेहाङ खेना, र ओउले ख्रिस्त खेसास्याउना।” 4ओहाङ साइतिमुओ केहि यहुदिलमइ पावलको कुराहाङ बिस्वास जाह्ङाकानि, र ओउतले परमेस्वरको भक्ति जाह्ङो अरु जातिको नाःतो मान्तालम#१७:४ अरु जातिको नाःतो मान्तालम नया नेमहाङ इ सब्दखे यहुदि खेमालो अरु जातिको मान्तालमकाय तोओ खेना। इहाङ प्राय मान्तालमखे ग्रिकलम खेनय, तर ओहाङ केहि रोमि मान्तालम र अरु जातिको मान्तालममा खेइतो। र केहि महत्वको मोम्चोलममा बिस्वास जाह्ङ्ति पावल र सिलासकहाङ पाःलाङ वाङाकाय।
5तर केहि यहुदिलमइखे चोःर्सा फाःङाकानि र बजारको गल्लिलमसय काम नाःमालो लफङ्गालमकाय वान्ति आतङ्क जाह्ङ्साकाय यातज्यो हुल हुमाकानि। ओउमयइ पावल र सिलासकाय मान्तालमको ङ्हा वान्साको लागि यासोन त मय्ङ्ओ यातचाक बिस्वासिको किमहाङ आक्रमन जाह्ङाकानि। 6तर जब ओउमयइ ओहाङ ओउनिसकाय ङाइनिलि, ओउमयइ यासोन र अरु केहि बिस्वासिलमकाय ह्रयुत्ति ग्ल्युनाकानि। ओउमयइ ओउमयकाय सहरको हाकिमिलमको ङ्हा आःलाक्तिको एतदाह्य्ति हिह्आकाय, “पावल र सिलासइ सङ्सारभरिले#१७:६ सङ्सार इहाङखे सङ्सार त तोओ सब्दइ रोमको जुदा राज्यलमकाय जनाउनउ। पावल र सिलासखे रोमको नाःतो राज्यलम मध्येको यातज्यो राज्यको केहि सहरलमहाङ स्याउचतो। तर मान्तालमइखे पावल र सिलासपाय सङ्सारभरिले स्याउनाच त दाह्यो सालाङ्खाको कुरा जाह्ङ्नितो। समस्यालम वान्धय मुनाच, र देङेखे ओउनिस निको सहरहाङमा दाह्तिखायो मुनाच। 7र ओउनिसकायखे पाहुनाको रुपहाङ यासोनइ लयको किमहाङ गमो मुना। ओउमय जुदाइले येसु त मय्ङ्ओ अर्को राजा मुना त दाह्य्ति रोमि माहाराजाको नेम-कानुनको बिरोत जाह्ङो मुनय।” 8इ कुरा साइति सहरको मान्तालम र सहरको हाकिमिलम छक्कम त ताःआकाय। 9ओउतझ्यान्ते हाकिमिलमइ यासोन र ओउको होयालमकाय धरउति तिरसा कर लागताकाकानि, ओहाङसयको ओउमयइ ओउमयकाय फेति ल्होकाकानि।
पावल र सिलास बेरिया सहरहाङ
10याह्दिङ स्याउनातासले बिस्वासिलमइ पावल र सिलासकाय बेरिया सहरताङ ल्होकाकानि। जब ओउनिस ओहाङ दाहाकाच, ओउनिस यहुदि सभाकिमहाङ आलाकाच। 11थेसलोनिकेको मान्तालमकोसयपाय इहाङको मान्तालमको ल्हुङतुक पेतो खेतो, धइतिदाह्य्सा इमयइ पावलको स्यानरायकाय माहा पेतोकुसि साइनितो। पावल र सिलासइ स्यानो आखर सत्य मुना या मुल या त दाह्य्ति योसाको लागि ओउमयइ दिनमले धर्मसास्त्र पह्रओ काम जाह्ङ्नितो। 12ओउमयमध्ये नाःतो यहुदिलमइ प्रभुहाङ बिस्वास जाह्ङाकानि। ओउतहाइतिले केहि महत्वको मोम्चोलम र अरु जातिको मान्तालमइमा बिस्वास जाह्ङाकानि। 13तर जब पावलइ बेरिया सहरहाङमा परमेस्वरको आखर प्रचार जाह्ङ्धय मुना त दाह्यो कुरा थेसलोनिकेको केहि यहुदिलमइ सायाकानि, ओउमय ओहाङमा आलाक्तिको पावलको बिरोतहाङ मान्तालमको हुलकाय उन्चो लावाकानि। 14अनि बिस्वासिलमइ रेह्न्तोले पावलकाय समुन्द्रको किनार छेउको सहरताङ ल्होकाकानि। तर सिलास र तिमोथिखे बेरियाहाङले मुआकाच। 15पावलकाय लात्ति आःलो मान्तालममा ओउकुस एथेन्स सहरसम्मले आलाकाय। ओहाङसयको खाइच्युकसम्म रेह्न्तोले सिलास र तिमोथिमा ङाकहाङ वाङ्पाच त दाह्यो पावलको खबर लाताक्तिको ओउमय बेरियाताङ द्याह्नाकाय।
एथेन्स सहरहाङ पावलको प्रचार
16पावल एथेन्सहाङ सिलास र तिमोथिकाय ल्युह्ङ्ति मुतोकहाङ, सहरको जुदा थाउहाङ नाःतो मुर्तिलम च्यउति ओउ माहा जोक्तो निरास स्यावा। 17ओउतझ्यान्ते ओउइ यहुदि सभाकिमहाङ आल्ति यहुदिलम र परमेस्वरको भक्ति जाह्ङो अरु जातिको मान्तालमकुस बहस जाह्ङाकान। अनि ओउ दिनमले बजारताङ आल्ति ओहाङ क्रुसो मान्तालमकुस ओउइ नोःसा फाःङाकान। 18केहि इपिक्युरि र स्तोइकि दर्सन#१७:१८ इपिक्युरि र स्तोइकि दर्सन इपिक्युरस त मय्ङ्ओ मान्ताइ इसा पुर्ब ३०० ताङ एथेन्स सहरहाङ स्थापना जाह्ङो दर्सनकाय इपिक्युरि दर्सन त दाह्य्ति तोना। ओउ इपिक्युरि दर्सन मानओ मान्तालमइखे “मान्तालमको देउताकुसि दोह सम्बन्धमा नाःल, र मान्ता सिआपछि लोन्हेको रुवाङमा स्याउल, ओउतझ्यान्ते सु मान्ता खेयाकायमा लय स्याक्ति मुच्युकसम्म आसति-चोङाइतिले याक्सा परना” त दाह्यो कुराहाङ बिस्वास जाह्ङ्नानि। अनि जेनो त मय्ङ्ओ मान्ताइ इसा पुर्ब ३४२-२७० ताङ स्थापना जाह्ङो दर्सनकायखे स्तोइकि दर्सन त दाह्य्ति तोना। ओउ स्तोइकि दर्सन मानओ मान्तालमइखे, रुवाङको आनन्दकाय बोःङ्निलि, बरु लयइ जाह्ङो कामको इनामहाङ आसा गम्नानि, र देउता त तोओखे स्रिस्तिको यातज्यो भाक मात्र खेना त दाह्य्नय, बरु लयको भाग्यहाङखे ओउमयइ बिस्वास जाह्ङ्नानि। मानओ गुरुलमइमा पावलकुस बहस जाह्ङाकानि। ओउमयमध्ये कुनयखे एत दाह्याकाय, “इ मान्ताइ दोह कुराको बारेहाङ नोःधय मुनाङ त दाह्यो कुराले चिःउलु। इ मान्ता दोह दाह्य्सा बोःङ्धय मुना?” अनि अरु मान्तालमखे एत दाह्याकाय, “इ मान्ताइ निकाय अरु केहि परदेसि देउतालमको बारेहाङ तोओलेखा मुना।” येसु र सिओसय उह्ति च्योकोको#१७:१८ येसु र सिओसय उह्ति च्योको इकाय ग्रिक भासाहाङ, “एनस्तासि” त दाह्य्ति तोना, र इ सब्दको मानेखे “मान्ता सिओसय उह्ति च्योको” त दाह्य्ति चिःना। अनि इ “एनस्तासि” त तोओ सब्द पेह्तोकहाङ मोम्चोको मय्ङ लेखा साइना, ओउतझ्यान्ते ओउमय “येसु” त दाह्य्ति तोओकायखे परदेसि देउता र “एनस्तासि” त दाह्य्ति तोओकायखे परदेसि देबि त म्हरो खेइतो। बारेहाङ पावलइ प्रचार जाह्ङोझ्यान्ते ओउमयइ इ कुरा तोओ खेइतो।
19ओहाङसयको ओउमयइ पावलकाय अरियोपागस त तोओ सभाहाङ आःलाक्तिको एतदाह्य्ति तोआकानि, “नाङइ प्रचार जाह्ङो इ नया स्यानरायको बारेहाङ निकाय तोताङि। 20नाङइ निकाय तोओ केहि कुरालम नि नउलो ताःआलाङ्सु, र ओउ कुराको माने दोह खेना त दाह्यो कुरा नि चिःसा चाहनाङ्सु।” 21(धइतिदाह्य्सा एथेन्सको जुदा मान्तालम र ओहाङ याको परदेसिलम नया कुरा तोसा र साइसाको लागि लयमयको जुदा समय बइसा चाहओ कुरा ओउ मान्तालमइ पावलकाय तोआकानि।)
22ओहाङसयको पावल अरियोपागस त तोओ सभाको ङ्हा चिङाक्तिको ओउमयकाय एतदाह्य्ति तोआकान, “अ एथेन्सको मान्तालम, निङ माहा जोक्तो धार्मिक मान्तालम खेतेनय त दाह्यो कुरा ङाइ चिःनाङ। 23धइतिदाह्य्सा ङा निङको सहरहाङ आल्तोक बेलाहाङ निङइ पुजा जाह्ङो नाःतो थाउलम च्यवालाङ, र निङइ पुजा जाह्ङो यातज्यो बेदिहाङखे ‘इ बेदिखे निइ तह्य्मालो नउलो देउताको सम्मानको लागि’ त दाह्य्ति लेखओ च्यवालाङ। निङइ तह्य्मातले पुजा जाह्ङ्धयमुओ ओउ परमेस्वरको बारेहाङले ङाइ निङकाय प्रचार जाह्ङो खेनाङ। 24इ परमेस्वरइले जुदा सङ्सार र इहाङ नाःओ जुदा थोकलम जाह्ङ्सास्यावो खेना। ओउ परमेस्वरखे लाङका र ल्हाउदयबाङको मालिक खेसास्याउना, र मान्तालमको क्रुतइ जाह्ङो मन्दिरलमहाङ याक्सास्याउल। 25इ परमेस्वरइले मान्तालमकाय रुवाङ, सास, र जुदा थोकलम बइसास्याउना। परमेस्वरकाय सु मान्तालमको सहयोगको खान्चोमा परल, धइतिदाह्य्सा लयकाय चाहओ जुदा कुरा परमेस्वरकुसिले मुना। 26परमेस्वरइले यातयज्यो मान्ताकसय ल्हाउदयबाङभरिको जुदा जातिलम जाह्ङ्सास्यावा। ओउमय स्याक्साखेओ समय र याक्साखेओ थाउ परमेस्वरइ ङ्हाखाले दोक्ति बइसास्यावो मुना। 27निइ परमेस्वरकाय पेतोकुसि बोःङ्सा खाइपातह्य्नि त दाह्य्तिले परमेस्वरइ इ जुदा कुरालम जाह्ङ्सास्यावा। तर खेयाकायमा दोङ्सिले परमेस्वरखे निसय लोक्तो मुसा स्याउलेल। 28धइतिदाह्य्सा कुनय यातचाकइ एतदाह्य्ति तोओ मुना,
‘नि ओउकहाङ स्याक्नातहि, साह्ङ्नातहि र थानातहि।’
निङको कबिलम मध्येको यातचाकइ एतदाह्य्तिमा तोओ मुना,
‘नि दोङ्सिले ओउको सन्तानले खेनातहि।’
29धइतिदाह्य्सा नि परमेस्वरको सन्तान स्यावो कारनइ, निइ परमेस्वरकाय मान्तालमको कल्पना र सिपसय जाह्ङो सुन, चान्दि अथबा बाङको मुर्तिको रुपहाङ सम्झसास्याउल। 30उहिलेको समयहाङ मान्तालमइ परमेस्वरको बारेहाङ चिःमालोझ्यान्ते परमेस्वरइ ओउमयको पेमालो कामकाय छेमा जाह्ङ्सास्यावा। तर देङेखे ल-लयको पेमालो कामकाय फेति ङाकताङ द्याह्न्ति वाङ्पनय त दाह्य्ति ल्हाउदयबाङको जुदा मान्तालमकाय परमेस्वरइ आग्या जाह्ङ्सास्यावो मुना। 31धइतिदाह्य्सा परमेस्वरइ इ सङ्सारको जुदा मान्तालमकाय धार्मिक्ताहाङ न्याय जाह्ङ्साको लागि दिन दोक्तिखायो मुना। र परमेस्वरइ लयको लागि ओउ काम जाह्ङ्साकाय यातचाक मान्ता येसुकाय छ्युह्ङ्सास्यावो मुना। परमेस्वरइ येसुकाय सिओसय उह्ति च्योक्ताक्ति जुदा मान्तालमकाय इ कुराको प्रमान बइसास्यावो मुना।”
32जब पावलइ सिओसय उह्ति च्योकोको बारेहाङ तोओ कुरा ओउमयइ सायाकानि, केहि मान्तालमइखे ओउकाय थ्याउति निसा फाःङाकानि, तर अरुखे एत दाह्याकाय, “नाङइ इ कुराको बारेहाङ अझ नाःतो तोओ नि चाहनाङ्सु।” 33ओहाङसयको पावल सभासय ग्ल्युह्ङ्ति पाह्या। 34तर केहि मान्तालमइखे प्रभुहाङ बिस्वास जाह्ङाकानि र पावलकुस ब्रक आलाकाय, र ओउमयमध्ये दियनुसियस त मय्ङ्ओखे सभाको सदस्य खेतो। अनि दामारिस त मय्ङ्ओ मोम्चो र अरुलमइमा प्रभुहाङ बिस्वास जाह्ङाकानि।
Currently Selected:
खबरदुत 17: CHEP
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.