खबरदुत 12
12
राजा हेरोद अग्रिपासइ मन्दलिकाय सतावत जाह्ङो
1ओउतोक बेलाहाङ राजा हेरोद अग्रिपासइ#१२:१ राजा हेरोद अग्रिपास इ राजा हेरोद अग्रिपासखे मति २:१३-१८ हाङ येसुकाय सात्सा बोःङो राजा हेरोद अथबा राजा हेरोद यातम्को प्लोःम खेना। अनि इकाय “हेरोद अग्रिपास यातम्” त दाह्य्तिमा चिःना। मन्दलिको केहि बिस्वासिलमकाय सतावत जाह्ङ्सा फाःङाकान। 2ओउइ लयको सिपाहिलमकाय आग्या बइति युहन्नाको पुः याकुबकाय नाःसुइइ पाल्ति सात्ताकाकान। 3ओउ कुराइ पाको अगुवालम आसओ च्यउति ओउइ पत्रुसकायमा पक्रताकान। इ घतनाखे छुत्काराको छ्यातको#१२:३ छुत्काराको छ्यात इकाय ग्रिक भासाहाङ, “खमिर कामालो लाङको छ्यात” त दाह्य्ति तोओ मुना। यहुदिलमइ ओउ खमिर कामालो लाङको छ्यातखे यहुदिलमइ “छुत्काराको छ्यात” द्योक्नातासले यात साताको लागि माननानि। तर “छुत्काराको छ्यात” अथबा “खमिर कामालो लाङको छ्यात” मध्येहाङ गाउखे खेयाकायमा यातज्यो मय्ङ पेह्तोकहाङ यहुदिलमइखे ओउ निसज्यो छ्यात त दाह्य्तिले चिःनानि। समयहाङ स्यावो खेतो। 4पत्रुसकाय पक्रआपछि हेरोदइ ओउकाय झेलकनहाङ कुङ्ताकाकान। अनि ओउकाय योसाको लागि सिपाहिलमको प्लय गोता समुहकाय आग्या जाह्ङाकान, ओउ हरेक समुहहाङ प्लय जनाको दक्कालहाङ सिपाहिलम खेइतो। छुत्काराको छ्यात द्योकापछि पत्रुसकाय यहुदिलमको ङ्हा वान्साकाय हेरोदइ बिचार जाह्ङो खेतो। 5ओउतहाइति पत्रुसकाय झेलकनहाङ गमाकानि, तर मन्दलिको बिस्वासिलमइखे पत्रुसको छुत्काराको लागि परमेस्वरकुस भुह्ङ्तिले प्राथना जाह्ङाकानि।
पत्रुसइ झेलकनसय छुत्कारा दोःओ
6हेरोदइ पत्रुसकाय मान्तालमको ङ्हा वान्सा लागओ दिनको ङ्हाको याह्दिङ, पत्रुसखे निसचाक सिपाहिनिसको माझहाङ एःन्तिमुओ खेतो। ओउकाय निसज्यो साङ्लाइ पाःन्तिगमो खेतो र अर्को निसचाक सिपाहिनिसमा झेलकनको दह्य्लोहाङ मुति सुरछ्या जाह्ङ्तिमुओ खेचतो। 7अचानक प्रभुको लाङकादुत पत्रुसको ङ्हा थाआ र कोथाभरि ज्योति थोङा। ओउ लाङकादुतइ पत्रुसकाय कुमहाङ लङ्घरधय “रेह्न्तो च्योक” त दाह्य्ति म्हाङाथय। ओउच्युक खेरले पत्रुसको क्रुतसय साङ्ला फास्ति ग्लेआ। 8लाङकादुतइ पत्रुसकाय, “जुत्ता लावस र तयार स्याव” त दाह्य्ति तोआथय, र लाङकादुतइ तोओलेखाले पत्रुसइ जाह्ङाकान। लाङकादुतइ फेरिले तोआथय, “क्रमनाय क्रम्ति ङाको लोन्हे वाङ।” 9ओहाङसयको पत्रुस झेलकनसय ग्ल्युह्ङ्ति लाङकादुतको लोन्हे-लोन्हे आला। लाङकादुतइ जाह्ङो इ जुदा कुरा दोङ्सिले खेना त दाह्य्ति ओउइ चिःओ नाःआक्ल, धइतिदाह्य्सा ओउइपाय दर्सन च्यउधय मुनाङ त म्हरधय खेतो। 10ओउनिस सिपाहि मुओ निसज्यो चउकि च्योःल्ति सहरको फालामको दह्य्लोहाङ दाहाकाच, र ओउ फालामको दह्य्लो लयले ओउनिसको लागि फोल्माआ। ओहाङसयको ओउनिस गल्लिहाङ वाह्धय मुतोकहाङले अचानक लाङकादुत पत्रुसकाय फेति पाह्या।
11अनि पत्रुसइ दोह स्यावो खेतो त दाह्य्ति चिःआकान, अनि लयकाय तोआकास, “देङे ङाइ दोङ्सिले चिःआलाङ, प्रभु परमेस्वरइ लयको लाङकादुत ल्होकाक्तिको हेरोद राजाको जिःङसय र पाको अगुवालमइ जाह्ङ्सा चाहओ जुदा कुरासय ङाकाय छुत्कारा बइसास्यावा।”
12ओउइ इ जुदा कुरा चिःआपछि, ओउ मर्कुस त तोओ युहन्नाको आमा मरियमको किमहाङ आला। ओहाङ नाःतो मान्तालम हुम्ति प्राथना जाह्ङ्धय खेइतो। 13पत्रुसइ किमको पर्खालको दह्य्लोहाङ बाहिरसय ध्याक-ध्याक त हायाकान, अनि रोदा त मय्ङ्ओ यातचाक नोकर्नि दह्य्लो फोल्लाङ वाङा। 14जब ओउइ पत्रुसको हाउनयकाय तह्याकान, ओउ माहा जोक्तो आसओझ्यान्ते दह्य्लोमा फोल्मात द्याह्न्ति आलाक्तिको “पत्रुस पर्खालको दह्य्लोहाङ चिङ्तिमुओ मुना” त दाह्य्ति जुदाकाय तोआकान।
15अनि ओउमयइ ओउकाय तोआकानि, “द्याह नाङ ब्रःतेआ रइस।” तर ओउ मोम्चोइ इ कुरा दोङ्सिले खेना त दाह्य्ति दाह्योको दाह्योझ्यान्ते ओउमयइ “ओउतखेया ओउखे पत्रुसको लाङकादुत#१२:१५ पत्रुसको लाङकादुत परमेस्वरइ लयको मान्तालमकाय सुरछ्या जाह्ङ्साको लागि लाङकादुतलमकाय जिम्मा बइसास्याउना, र ओउ जिम्मेवार दोःओ लाङकदुतले मान्ताको रुपहाङ थालाङ वाङ्ना त दाह्यो कुराहाङ ओउ बेलाको केहि यहुदिलमइ बिस्वास जाह्ङ्नितो। पत्रुस सितिखायो मुना त दाह्यो कुराको खबर बइलाङ ओउको लाङकादुत वाङो खेचा त दाह्य्ति ओहाङको बिस्वासिलम म्हरो खेइतो। खेचा” त दाह्याकाय।
16तर पत्रुसइ पर्खालको दह्य्लोहाङ ध्याक-ध्याक त हाइतिले मुआ। जब ओउमय आल्ति दह्य्लो फोलाकानि, ओहाङ पत्रुसकाय च्यउति ओउमय माहा जोक्तो ग्याह्ङाकाय। 17पत्रुसइ क्रुतको इसाराहाङ ङइमात मुन त दाह्य्ति तोआकान, अनि गतहाइति प्रभु परमेस्वरइ झेलकनसय बाहिर ग्ल्युन्ति वानाथय त दाह्यो कुरा ल्हाक्ति छ्यानाकान। “इ कुराखे याकुब र अरु बिस्वासिलमकायमा तोनु” त दाह्य्ति ओउइ तोआकान। ओहाङसयको ओउ अर्को थाउताङ आला।
18अर्को दिन बिहान पत्रुसकाय दोह स्यावा खेचा त दाह्य्ति सिपाहिलम माहा जोक्तो लिह्सा फाःङाकानि। 19हेरोद अग्रिपासइ ओउकाय बोःङ्साको लागि लयको सिपाहिलमकाय आग्या जाह्ङाकान, तर ओउमयइ ङाइसाले खाइनिलि। ओहाङसयको हेरोदइ योसाकाय मुओ सिपाहिलमकाय ह्वताकान, तर दोह स्यावो खेतो त दाह्य्ति जवाफ ङाइमायापछि ओउमयकाय सात्सा अर्को सिपाहिलमकाय आग्या जाह्ङाकान।
ओहाङसयको लोन्हे हेरोदइ यहुदिया फेआक्तिको केहि समयको लागि कयसरियाहाङ आल्ति याका।
हेरोद अग्रिपास सिओ
20हेरोद राजा तुरोस र सिदोन सहरको मान्तालमकुस आन रिस वाङो खेतो। ओउतझ्यान्ते ओउमय फेरिले हेरोदकुस मिलति मुसाको लागि यातहुल स्याउति राजाकहाङ आलाकाय, धइतिदाह्य्सा ओउ निसज्यो सहरको मान्तालम जेःगाको लागि हेरोद राजाको देसको भर परइतो। ओउ यातहुल स्याउति आलो मान्तालमइ राजा हेरोदको दरबारको मुख्य हाकिमि बलस्तसको सहयोग दोःआकाय।
21क्रुस्काइसाको लागि दोको दिनखे राजाइ लावओ बिसेस खालको नाय लावाक्तिको हेरोद अग्रिपास राजगद्दिहाङ च्युःङा, र ओउमयको लागि भासन जाह्ङाकान। 22हेरोदको भासन साइति ओउ मान्तालम हिह्धय एत दाह्याकाय, “इपाय मान्ताको हाउनय खेल, तर देउताको हाउनय खेना।” 23ओउच्युक खेरले परमेस्वरइ दोःसा परओ मान-सम्मान हेरोद लयइले लेःओझ्यान्ते प्रभु परमेस्वरको लाङकादुतइ हेरोदकाय एङ्तोसम्म बिरामि जाह्ङाथय, र केहि दिन लोन्हे ल्याह्उ-ल्याह्उ त पेः पोक्ति सिमाआ।
24तर परमेस्वरको आखरखे वेःताङ-ङोइताङले प्रचार स्यावा र नया बिस्वासिलम झन्-झन् नाःधय आलाकाय। 25बर्नबास र सावलखे लयनिसको सेवाको काम द्योकापछि मर्कुस त तोओ युहन्नाकाय लात्ति एन्तिओखियाताङ द्याह्नाकाच।
Currently Selected:
खबरदुत 12: CHEP
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.