खबरदुत 11
11
पत्रुसइ यरुसलेमको मन्दलिकाय बयान बयो
1अरु जातिको मान्तालमइमा परमेस्वरको आखर सुइकार जाह्ङाकानि त दाह्यो कुरा यहुदियाहाङ मुओ मुख्य चेलालम र अरु बिस्वासिलमइ सायाकानि। 2अनि जब लोन्हे पत्रुस यरुसलेमहाङ द्याह्न्ति दाहा, खतना जाह्ङ्साले परना त दाह्यो कुराहाङ बिस्वास जाह्ङो केहि यहुदि बिस्वासिलमइ ओउको आलोचना जाह्ङ्सा फाःङाकानि। 3ओउमयइ तोआकानि, “नाङ अरु जातिको मान्तालमको किमहाङ पोक्तेआ र ओउमयकुस जेःगामा जेःतेआकान।”
4अनि पत्रुसइ ङ्हाहाङसय दोह-दोह स्यावो खेतो त दाह्यो जुदा कुरा ल्हाक्ति छ्यान्सा फाःङाकान। 5“जब ङा योप्पाको सहरहाङ प्राथना जाह्ङ्धय खेङतो, ङाइ यातज्यो दर्सन च्यवालाङ। यातज्यो ताह्ङो न्हापनाय प्लय गोता चोङहाङ चुम्ति लाङकासय काःम्ताङ क्लाःधयमुओ ङाइ च्यवालाङ, र ओउ ङा द्याङ्तो वाङ्ति न्यासा। 6ङाइ ओउ न्हापनायहाङ ताङ्ति योआलाङ, र ओहाङ ल्हाउदयबाङको प्लय दोम नाःओ बस्तुलम, बन पसुलम, जुदा खालको साःहाङ याको म-मयो प्रानिलम, र स्युङो वाःलम च्यवालाङ। 7अनि ङाकाय यातज्यो हाउनयइ एतदाह्य्ति तोओ ङाइ सायालाङ, ‘पत्रुस च्योक, ओउमयकाय सातु र जेउ।’
8तर ङाइ तोआलाङ, ‘ओउतपाय खेल प्रभु, ङाइपाय यहुदि नेम-कानुनइ अपबित्र अथबा असुद्ध त तोओ दोह थोकमा जेःओ नाःङल।’
9तर लाङकासय ओउ हाउनय फेरिले दाह्या, ‘परमेस्वरइले सुद्ध जाह्ङ्सास्यावो कुराकाय असुद्ध त म्हर्लाम।’ 10सुमपल्तसम्म ओउतले स्यावा, अनि लोन्हे जुदा थोकले लाङकाताङ द्याःन्ति आःल्लेआ।
11ओउतोक बेलाहाङले कयसरियासय ङाकहाङ ल्होको सुम जना मान्तालम ङा#११:११ ङा कुनय-कुनय सङ्सकरनलमहाङखे “नि” त दाह्य्ति तोओ मुना। बास मुओ किमहाङ दाह्तिवाङाकाय। 12पबित्र ग्वालामइ ङाकाय गतमा म्हर्मात ओउमयकुस आल त दाह्य्ति तोआताङ। योप्पा सहरसय वाङो इ छ जना बिस्वासि होयालममा ङाकुस कयसरियाहाङ वाङाकाय र नि जुदा कर्नेलियसको किमभित्र पोकालाङ्सु। 13कर्नेलियसइ लयको किमहाङ लयको ङ्हा यातचाक लाङकादुत थाओ कुरा निकाय तोआताङ्सु, र ओउ लाङकादुतइ ओउकाय तोआथय, ‘केहि खबरदुतलमकाय योप्पा सहरहाङ ल्होकु, र सिमोन पत्रुस त मय्ङ्ओ मान्ताकाय गोत्ति वान्ताकु। 14ओउइ नाङ र नाङको जुदा माचरलम गतहाइति स्याक्सा खाइनानि त दाह्यो कुरा तोति बइतेना।’
15जब ङा नोःसा फाःङालाङ, ङ्हाको समयहाङ निकहाङ वाङ्सास्यावो लेखाले ओउमयकहाङमा पबित्र ग्वालाम वाङ्सास्यावा। 16अनि प्रभुइ तोसास्यावो आखर ङाइ सम्झआलाङ, ‘युहन्नाइपाय तिःइ बप्तिस्मा बयाकान, तर निङखे पबित्र ग्वालामको बप्तिस्मा दोःतेनय।’ 17निइ प्रभु येसु ख्रिस्तहाङ बिस्वास जाह्ङ्धार्ना गाउखे बरदान परमेस्वरइ निकाय बयातहि, ओउ बरदानले अरु जातिको मान्तालमकायमा बइसास्यावा। अनि परमेस्वरकाय रोकसा ङाखे सु खेङतो र?”
18जब ओउमयइ इ कुरा सायाकानि, ओउमयइ आलोचना जाह्ङ्सा फेआकानि र एतदाह्य्ति परमेस्वरको प्रसङ्सा जाह्ङ्सा फाःङाकानि, “अरु जातिको मान्तालमकायमा लयको पापको पस्ताप जाह्ङ्सा र अजम्बरि रुवाङ दोःसाको लागि परमेस्वरइ मउका बइसास्यावो मुना त दाह्यो कुरा देङे निइ चिःनातह्य्नि।”
सिरिया इलाकाको एन्तिओखिया सहरहाङ मुओ मन्दलि
19स्तिफनसकाय सात्तोक बेलाहाङ ताह्ङो सतावत वाङोझ्यान्ते केहि बिस्वासिलम छरपस्त स्यावाकाय। ओउमय यहुदिलमकाय मात्र प्रचार जाह्ङ्धय फोनिके छेत्र, साइप्रस तापु र सिरियाको एन्तिओखिया सहरसम्मको यात्रा जाह्ङाकानि। 20तर साइप्रस तापु र कुरेनि सहरसय वाङो केहि बिस्वासिलमखे एन्तिओखियाहाङ आल्ति अरु जातिको मान्तालमकायमा प्रभु येसुको बारेहाङ पेओ खबर प्रचार जाह्ङाकानि। 21प्रभु परमेस्वरको जिःङ ओउ बिस्वासिलमकुसि मुसास्याउतो, अनि अरु जातिको नाःतो मान्तालमइ प्रभुहाङ बिस्वास जाह्ङाकानि र प्रभुको चेला स्यावाकाय।
22इ कुराको खबरखे यरुसलेमको मन्दलिहाङ दाहा, ओउतझ्यान्ते ओउमयइ बर्नबासकाय एन्तिओखियाताङ ल्होकाकानि। 23जब ओउ ओहाङ दाहा, परमेस्वरइ मान्तालमकाय आसिसित जाह्ङ्सास्यावो च्यउति ओउ आन आसआ, र ल-लयको ल्हुङतुकसयले प्रभुहाङ दोङ बिस्वासि स्याउति मुन त दाह्य्ति ओउमयकाय हउसला बयाकान। 24बर्नबासखे पबित्र ग्वालाम र बिस्वासइ भरपुर स्यावो पेओ मान्ता खेतो, र ओउको कारनइ नाःतो मान्तालमइ प्रभुहाङ बिस्वास जाह्ङो खेइतो।
25ओहाङसयको बर्नबास सावलकाय बोःङ्लाङ तार्ससताङ आला। 26जब ओउइ सावलकाय क्रुसाकान, ओउइ ओउकाय एन्तिओखियाहाङ वानाकान। ओउनिस निसचाकमा नाःतो मान्तालमकाय स्यान्धय मन्दलिको मान्तालमकुस यात बर्सच्युककायले मुआकाच। जुदासय ङ्हा एन्तिओखियाको बिस्वासिलमकायले ख्रिस्तियान त दाह्य्ति तोआकानि।
27ओउतोक बेलाहाङले केहि अगमबक्तालम यरुसलेमसय एन्तिओखियाहाङ वाङाकाय। 28ओउमय मध्येको यातचाक अगाबस त मय्ङ्ओ मान्ता चिङाक्तिको “ल्हाउदयबाङभरिले ताह्ङो अनिकाल स्याउसा लागओ मुना” त दाह्य्ति अगमबानि जाह्ङाकान। (ओउ कुराखे लोन्हे रोम देसको माहाराजा क्लउदियसको पालाहाङ पुत्लाङ वाङा।) 29अगाबसको ओउ कुरा साइति भ्याआपछि, एन्तिओखियाहाङ मुओ बिस्वासिलमइ यहुदियाहाङ मुओ बिस्वासि होयालमकाय ल-लयइ खायोसम्मको सहयोग ल्होकाकानि। 30ओउतहाइति हुमो थेपो यरुसलेमको अगुवालमकाय आःल्ति बइसाको लागि बर्नबास र सावलकाय ल्हाआकानि।
Currently Selected:
खबरदुत 11: CHEP
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.