खबरदुत 13
13
बर्नबास र सावलकाय छ्युह्ङ्ति ल्होको
1एन्तिओखियाको मन्दलिहाङ बर्नबास, कलचन्द्या त तोओ सिमियोन, कुरेनि सहरको लुकियस, राजा हेरोद एन्तिपासको बालाख कालको होया मनेन, र सावल त तोओ अगमबक्तालम र गुरुलम खेइतो। 2ओउमय उपाङ मुति प्रभुको सेवा जाह्ङ्धय मुतोक बेलाहाङ पबित्र ग्वालामइ ओउमयकाय तोसास्यावा, “गाउ कामको लागि ङाइ ओउनिसकाय गोतो खेनाङ, ओउ बिसेस काम जाह्ङ्साको लागि बर्नबास र सावलकाय छ्युह्ङ्नु।”
3ओहाङसयको ओउमयइ झन् नाःतो उपाङ मुति प्राथना जाह्ङाकानि, अनि ओउनिसको तालाङहाङ क्रुत झाम्ति कामको लागि ल्होकाथाच।
बर्नबास र सावल साइप्रस तापुहाङ
4पबित्र ग्वालामइ ल्होक्सास्यावापछि बर्नबास र सावल सिलुकियाहाङ दाहाकाच। ओहाङसयको ओउनिस तिः जहासहाङ लह्न्ति साइप्रस तापुताङ आलाकाच। 5जब ओउनिस साइप्रस तापुको सलामिस सहरहाङ दाहाकाच, ओउनिसइ यहुदि सभाकिमलमहाङ आल्ति प्रभुको आखर प्रचार जाह्ङाकाचु। ओउनिसको कामहाङ सहयोग जाह्ङ्साकाय ओउनिसकुस मर्कुस त तोओ युहन्नामा खेतो।
6जब ओउमय जुदा तापुको यात्रा जाह्ङ्धय पाफोस सहरहाङ दाहाकाय, ओहाङ ओउमयइ बार-येसु त मय्ङ्ओ यातचाक स्याताहा यहुदि चतकवालाकाय क्रुसाकानि। ओउइ लयकाय “ङा अगमबक्ता खेनाङ” त दाह्य्ति तोसतो। 7ओउखे साइप्रस तापुको यातचाक बुद्दिमानि सासक सर्गियस पउलसको होया खेतो। ओउ सासकइ बर्नबास र सावलकाय लयकहाङ गोताकान, धइतिदाह्य्सा ओउइ परमेस्वरको आखर साइसा इच्छ्या जाह्ङो खेतो। 8तर ग्रिक भासाहाङ एलुमास त मय्ङ्ओ यातचाक चतकवाला बार-येसुइ ओउनिसको बिरोत जाह्ङाकान। ओउइ सासक सर्गियस पउलसकाय प्रभुहाङ बिस्वास जाह्ङ्सासय रोकसा कोसिस जाह्ङाकान। 9अनि पावल#१३:९ पावल इकाय ग्रिक भासाहाङ, “पउलस” त दाह्य्ति तोओ मुना। ओउको यहुदि मय्ङ सावल खेना, र रोमि मय्ङखे पावल खेना। ओउ नाःतोक बेलाहाङ ओउको आपा-आमाइ ओउ निसज्यो मय्ङमा बयो स्याउसा खाइनउ, धइतिदाह्य्सा ओउपाय नाःओहाङसयले रोमि मान्ता खेतो। त दाह्य्ति तह्यो सावल पबित्र ग्वालामइ भरपुर स्यावा, र ओउइ ओउ चतकवालाको मिकहाङ ताङ्ति योआकान। 10अनि ओउइ तोआकान, “नाङ दुस्त सय्तानको चोः खेतेना, र नाङ स्याताहा खेतेना। र नाङ जुदा पेओ कुरालमको बइरि खेतेना। दोह नाङइ प्रभुको सत्य ल्यामको बिरोत जाह्ङ्सा फेतेउलु? 11द्याह प्रभुइ नाङकाय केहि समयको लागि तिकताक त ले मिक लोक्ताक्ति दन्द बइसास्याउलेना।”
ओउच्युक खेरले दोहमा च्यउमातोसम्म ओउको मिक लोक्तिवाया, अनि कुनय मान्ताइ क्रुतहाङ चुम्ति लात्ति आःल्पाताङ त म्हर्ति वेःताङ-ङोइताङ आल्सा फाःङाकान। 12जब सासकइ ओहाङ स्यावो घतना च्यवाकान, ओउ प्रभुको स्यानरायहाङ माहा जोक्तो ग्याह्ङा। ओउतझ्यान्ते ओउइ प्रभु येसुहाङ बिस्वास जाह्ङाकान।
पावलइ पिसिदियाको एन्तिओखियाहाङ प्रचार जाह्ङो
13पावल र ओउको होयानिस पाफोस सहरसय तिः जहासहाङ लह्न्ति पामफिलिया इलाकाको यातज्यो पर्गा सहरहाङ दाहाकाय। तर मर्कुस त तोओ युहन्नाखे ओउनिसकाय ओहाङले फेआक्तिको यरुसलेमताङ द्याह्ना। 14ओउनिसमा पर्गा सहर फेति पिसिदिया छेत्रको एन्तिओखियाहाङ#१३:१४ पिसिदिया छेत्रको एन्तिओखिया एन्तिओखिया त तोओ सहरखे निसज्यो मुना। पावल र बर्नबासकायखे सिरिया छेत्रको एन्तिओखिया त तोओ सहरको मन्दलिसय प्रचारको लागि ल्होको खेना (१३:१-३)। देङेखे ओउनिस देङेको समयहाङ निइ तर्कि देस त दाह्य्ति चिःओ पिसिदिया छेत्रको अर्को एन्तिओखिया सहरहाङ दाहो खेनाच। आलाकाच, अनि यहुदि धोओ दिनहाङ ओउनिस सेवाको लागि सभाकिमहाङ आलाकाच। 15परमेस्वरइ मोसा दुवारा बइसास्यावो नेम-कानुन र अगमबक्तालमको कितापसय पह्रति भ्याआपछि, सभाकिमको अगुवालमइ ओउनिसकहाङ एतदाह्य्ति खबर ल्होकाकानि— “होयानिस, यदि निङ्जिकुस मान्तालमको लागि केहि हउसलाको आखर मुना त खेया, निङ्जिइ नोःसा खाइतेनाजु।” 16पावल चिङा र लयको ङोइसयको क्रुतइ इसारा जाह्ङाक्तिको नोःसा फाःङाकान—
“अ इस्राएलको मान्तालम र परमेस्वरको भक्ति जाह्ङो अरु जातिको मान्तालम, ङाको कुराकाय घिःति साइनु। 17इस्राएलको परमेस्वरइ निको पुर्खालमकाय छ्युह्ङ्सास्यावा र मिस्र देसहाङ परदेसि स्याउति याक्तोक बेलाहाङ ओउमयकाय महान् जाति जाह्ङ्सास्यावा। अनि परमेस्वरइ लयको ताह्ङो जिःङइ मिस्र देससय ओउमयकाय बाहिर ग्ल्युन्ति वान्सास्यावा। 18र ओउमयइ परमेस्वरको आग्या पालन जाह्ङ्मायामा परमेस्वरइ ओउमयकाय चालिस बर्ससम्म सुमा याक्मालो थाउहाङ स्याहार जाह्ङ्सास्यावा। 19अनि परमेस्वरइ कनान देसहाङ याको सात गोता जातिको मान्तालमकाय म्हेत्ताक्सास्यावा र निको पुर्खालमकाय ओउ देसको मालिक जाह्ङ्सास्यावा। 20इ जुदा घतनालमखे प्लय सय पचास बर्सभित्रहाङ स्यावो खेतो।
ओहाङसयको लोन्हे, इस्राएलि मान्तालमकाय सासन जाह्ङ्साको लागि समुएल अगमबक्ताको पालासम्म परमेस्वरइ न्यायधिसलम बइसास्यावा। 21अनि जब ओउमयइ राजा तेआकाय, परमेस्वरइ बेन्यामिन बङ्सको किसको चोः सावलकाय चालिस बर्ससम्म ओउमयको राजा स्याउसाको लागि बइसास्यावा। 22सावलकाय राजासय वायापछि परमेस्वरइ दाउदकाय ओउमयको राजा जाह्ङ्सास्यावा। परमेस्वरइ दाउदको बारेहाङ एतदाह्य्ति तोसास्यावो मुना— ‘ङाइ यिसयको चोः दाउदकाय ङा लयइ झाकोलेखाले ङाःयालाङ, धइतिदाह्य्सा ओउइ ङाको इच्छ्या अनुसारले जुदा कामलम जाह्ङ्लेनउ।’#१समु १३:१४ 23परमेस्वरइ लयइ बाचा जाह्ङ्सास्यावो अनुसारले दाउदको बङ्ससय मुक्तिदाता येसु इस्राएलको लागि बइसास्यावा। 24तर येसुइ लयको सेवा सुरु जाह्ङ्सासय ङ्हा, ल-लयको पापसय पस्ताप जाह्ङ्ति बप्तिस्मा लेःनु त दाह्य्ति इस्राएलको मान्तालमकाय युहन्नाइ प्रचार जाह्ङाकान। 25अनि युहन्नाइ लयको सेवाको काम द्युम्सा लागधार्ना मान्तालमकाय एतदाह्य्ति ह्वताकान, ‘दोह निङ ङाकाय ख्रिस्त त म्हर्तेनय? अह, ङा निङइ ल्युह्ङ्तिमुओ ख्रिस्त खेङल। तर साइनु, ख्रिस्तखे ङासय लोन्हे वाङ्सास्याउधय मुना, र ङापाय ओउको जुत्ताको तुनुला फान्सामा ज्योङल।’
26ङाको होयालम, निङ अब्राहामको सन्तानलम, र इहाङ परमेस्वरको भक्ति जाह्ङो अरु जातिको मान्तालमइ ङाको कुराकाय साइनु, परमेस्वरइ नि जुदाको लागिले इ मुक्तिको खबर ल्होक्सास्यावो मुना। 27धइतिदाह्य्सा यरुसलेमको मान्तालम र ओउमयको अगुवालमइ येसु सुखे खेसास्याउतो त दाह्यो कुरा तह्य्सा खाइनिलि र ओउमयइ धोओ दिनलमहाङ पह्रओ अगमबक्तालमको आखरलममा चिःसा खाइनिलि, ओउतझ्यान्ते अगमबक्तालमइ तोओलेखाले ओउमयइ येसुकाय गाल बयाकानि। 28ओउमयइ येसुकाय सात्सासम्मको दोह कारनमा ङाःयो नाःआकिलि, तर ओउमयइ येसुकाय सात्साले परना त दाह्य्ति पिलातसकाय बिन्ति जाह्ङाकानि। 29अनि ओउमयइ धर्मसास्त्रहाङ येसुको बारेहाङ तोओ जुदा कुरा जाह्ङ्ति भ्याआपछि, ओउमयइ येसुकाय क्रुससय क्लाःआक्तिको तेसहाङ गमाकानि। 30तर परमेस्वरइ येसुकाय सिओसय उह्ति च्योक्ताक्सास्यावा। 31अनि गालिलिहाङसय लेःति यरुसलेमसम्मको येसुको यात्राहाङ, लयकाय गुह्ल्ति वाहो मान्तालमकहाङ येसु नाःतो दिनसम्म थासास्यावा, र ओउमयले देङे इस्राएलको मान्तालमको लागि इ कुराको साछि खेनय। 32देङे निचिखे निङको लागि इ परमेस्वरको पेओ खबर तोलाङ वाङो खेनाङ्च। इ बाचाखे परमेस्वरइ निको पुर्खालमकुस जाह्ङ्सास्यावो खेना, 33र परमेस्वरइ येसुकाय सिओसय उह्ति च्योक्ताक्ति, ओउमयको सन्तानलम नाङ निको लागि इ बाचा पुत्ताक्सास्यावो खेना। इ कुराखे भजनसङ्ग्रहको निसम् भजनहाङ एतदाह्य्ति लेखओ मुना—
‘नाङपाय ङाको चोः खेतेना,
तेन ङा नाङको आपा स्यावो मुनाङ।’#भजन २:७
34परमेस्वरइ येसु ख्रिस्तकाय फेरि गलमा सिसा परमातो हाइति सिओसय उह्ति च्योक्ताक्सा स्यावोको बारेहाङ एतदाह्य्ति तोसास्यावो मुना—
‘ङाइ दाउदकुस जाह्ङो बाचा अनुसारले,
ङाइ पक्काले निङकाय पबित्र आसिक बइनेनाङ्स।’#यस ५५:३
35भजनसङ्ग्रहको अर्को भजनहाङ एतदाह्य्तिमा तोओ मुना—
‘अ परमेस्वर, नाङइ लयको पबित्र सेवककाय तेसहाङ सय्ङ्ति वाइताक्सा स्याउलेल।’#भजन १६:१०
36इ कुराखे दाउदइ लयको बारेहाङ तोओ खेआक्ल, धइतिदाह्य्सा दाउदइ लयको पालाहाङ परमेस्वरको इच्छ्या अनुसार काम जाह्ङ्ति भ्याआपछि, ओउ सिआ र ओउकाय ओउको पुर्खालमकुस तेसहाङ पाह्म्लेःआ, र ओउको ज्यानखे तेसहाङ सय्ङ्ति वाइलेआ। 37तर परमेस्वरइ येसुकाय सिओसय उह्ति च्योक्ताक्सास्यावा, र येसुको ज्यानखे म्हेत्ति वाइलेल।
38ओउतझ्यान्ते ङाको होयालम, येसुइले निङको पाप छेमा जाह्ङ्सास्याउना त दाह्यो कुरा निङइ चिःओ ङा चाहनाङ। 39परमेस्वरइ मोसा दुवारा बइसास्यावो नेम-कानुनइ पापको छुत्कारा बइसा खाइलेउलु, तर येसुहाङ बिस्वास जाह्ङो मान्तालमखे जुदाले परमेस्वरको ङ्हा पेतो स्याउलेना। 40ओउतझ्यान्ते अगमबक्तालमइ तोओ कुरा निङको रुवाङहाङ स्याउजेलाम त दाह्य्ति होसियार स्याउति मुन। धइतिदाह्य्सा अगमबक्तालमइ एतदाह्य्ति तोओ मुना—
41‘योनु, निङ परमेस्वरकाय ख्याल-ख्याल ताःओलम, ग्याह्ङ्न र सिति आल्न!
धइतिदाह्य्सा ङाइ निङको पालाहाङले केहि काम जाह्ङ्धय मुनाङ,
र कुनय मान्ताइ ओउ कामको बारेहाङ निङकाय तोतेनय त खेयाकायमा,
निङइखे ओउ कामको बारेहाङ गलमा बिस्वास जाह्ङ्लेतिनिलि।’#हब १:५”
42पावल र बर्नबास सभाकिमसय ग्ल्युह्ङ्ति पाह्य्धय मुतोकहाङ, अर्को धोओ दिनमा वाङ्ति इ कुरालमखे नाःतोले तोति बइताङि त दाह्य्ति मान्तालमइ ओउनिसकाय बिन्ति जाह्ङाथाच। 43सभाकिमसय बाहिर ग्ल्युह्ङापछि, यहुदिलम र लोन्हे यहुदि धर्म मानओ अरु जातिको मान्तालमइ पावल र बर्नबासकाय गुह्ल्ति वाह्सा फाःङाकानि, र ओउनिसइखे ओउ मान्तालमकाय परमेस्वरको अनुग्रहहाङ याक्ति मुन त दाह्य्ति हउसला बयाकाचु।
44अर्को साताको धोओ दिनहाङखे प्रभु येसुको बारेहाङ साइलाङ सहरको जुदा मान्तालमको हुलले वाङाकाय। 45र ओउ मान्तालमको हुलकाय च्यउति यहुदिलमखे चोःर्सा फाःङाकानि, र ओउमयइ पावलइ तोओ कुराहाङ बाद-बिबाद जाह्ङ्ति ओउको अपमान जाह्ङाकानि। 46तर पावल र बर्नबासखे झन् साहसि स्याउति नोःसा फाःङाकाचु, “परमेस्वरको आखरखे ङ्हा निङ यहुदिलमकायले तोसा आबस्यक खेतो। तर निङइ इ आखरकाय इन्कार जाह्ङोझ्यान्ते र लयमयकाय अजम्बरि रुवाङको लागि ज्योतो ताःमालोझ्यान्ते, द्याह निङकाय फेति नि अरु जातिको मान्तालमकहाङ आल्नाङ्सु। 47धइतिदाह्य्सा प्रभुइ निकाय बइसास्यावो आग्या इले खेना—
‘ल्हाउदयबाङको जुदा मान्तालमइ मुक्ति दोःपनय त दाह्य्ति,
ङाइ नाङकाय अरु जातिको मान्तालमको लागि ज्योति जाह्ङो खेनाङ।’#यस ४९:६”
48जब अरु जातिको मान्तालमइ इ कुरा सायाकानि, ओउमय माहा जोक्तो आसति ओउ आखरको लागि प्रभुको प्रसङ्सा जाह्ङाकानि। र परमेस्वरइ सु-सुकाय अजम्बरि रुवाङको लागि छ्युह्ङ्सास्यावा, ओउमयइखे प्रभुहाङ बिस्वास जाह्ङाकानि।
49ओउ छेत्रभरिको जुदा मान्तालमइले प्रभु येसुको आखर साइसा दोःआकाय। 50तर यहुदिलमइ सहरको अगुवालम र ताह्ङो ओहोदाको धार्मिक मोम्चोलमकायमा पावल र बर्नबासको बिरोतहाङ कुल काआकानि, र ओउमयइ ओउनिसकाय सतावत जाह्ङ्ति ओउमयको छेत्रसय लगार्ति ल्होकाथाच। 51ओउतझ्यान्ते ओउनिसइ ओउमयको बिरोतहाङ लयनिसको दोमपाकको धाह्न् काहाकाचु#१३:५१ लयनिसको दोमपाकको धाह्न् काहाकाचु यदि कुनय गाउ-थाउको मान्तालमइ प्रभुको आखरकाय सुइकार जाह्ङ्निलि त खेया, ओउत हाइसाको लागि येसुइ लयको चेलालमकाय आग्या जाह्ङ्सास्यावो खेतो। ओउतझ्यान्ते दोमपाकको धाह्न् काह्सा त तोओखे परमेस्वरइ न्याय जाह्ङ्तोकहाङ मुख्य चेलालम जिम्मेवारि नाःइलि त दाह्य्ति चिःताक्साको लागि चिनो खेना (मति १०:१४-१५; मर्कुस ६:११)। अनि आइकोनियन त तोओ सहरताङ आलाकाच। 52तर एन्तिओखियाको बिस्वासिलमखे पबित्र ग्वालामइ भरपुर स्याउति आन चोङायाकाय।
Currently Selected:
खबरदुत 13: CHEP
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.