ROMANOS 14

Chindee taꞌan ndo xiꞌin na taꞌan ndo, na vita ini xiꞌin tuꞌun Ndioxi

1Na taꞌan yo, ndúku i ya mani nuu ndo ya ndikuiso vií ndo na taꞌan yo, na vita ni ini xiꞌin tuꞌun Ndioxi. Tá tu köo íyo yuꞌu ndo xiꞌin na xaꞌa ya káꞌan na, ta käni taꞌan ndo xiꞌin na. 2Saa chi sava ndo ndíkani ini vaꞌa kuxi ndo ndiꞌi kúu nuu ñaꞌa xíxi, káꞌán ndo. Ta sava tuku ndóꞌo̱ vita ini ndíkani ini ndo küvi kuxi ndo kuñu, káchi ndo. 3Ta ndóꞌo̱ xíxi ndiꞌi kúu nuu ñaꞌa xíxi, kündasi nuu ndo kuni ndo naꞌa, na köo xíxi ndiꞌi ñaꞌa. Ta saa ni ndóꞌo̱ köo xíxi ndiꞌi ni kúu nuu ñaꞌa, kündasi ndo kuni ndo naꞌa, na xíxi ndiꞌi ñaꞌa. Saa chi iin káchi ndi̱kiꞌin vaꞌa Ndioxi uvi saa ndo. 4Yakan ndóꞌo̱, ñani yo tin kuꞌva yo, köo ichí ndo kaꞌan kuachi ndo xaꞌa na xáa chiñu nuu inka taa. Ndisaa mií ra xáa chiñu na nuu ku ra kúu mií ichí kaꞌan ra xaꞌa na, án vaꞌa xáa chiñu na, án väꞌa xáa chiñu na. Ta saa ni kindoo vaꞌa va na nuu xitoꞌo na, saa chi mií Táta yo Jesús ku ra kúu mií ichí ya taxi ra ndee ndaꞌa na xaꞌa chiñu íkan na nuu ra.

5Ta saa ná ndituꞌun tuku i xiꞌin ndo ya kundaa ini ndo: Sava ndóꞌo̱, na taꞌan yo, káꞌan íyo kivi i̱í ni ka ta sava kivi köo i̱í ni ya, káchi ndo. Ta sava tuku ndo káꞌan iin káchi íin ndiꞌi saa kivi, káchi ndo. Xaꞌa ya ikán kua vaꞌa ndikani ini iin iin ndo xaꞌa ya xíniñuꞌu ndo ikan ndo. 6Saa ñani yo, sava ndóꞌo̱ káꞌan i̱í ni sava kivi nuu inka ya, káchi ndo. Ni saa íkan ndo, ta Táta yo ku ra xáa toꞌo ni ndo. Saa tu sava ndóꞌo̱ xíxi ndiꞌi nuu ñaꞌa xíxi, íkan ndo saa ya xáa toꞌo ndo Táta yo, ta táxi ndo tixaꞌvi ndaꞌa ra. Ta saa tu sava ndóꞌo̱ köo xíxi ndiꞌi nuu ñaꞌa, íkan tu ndóꞌo̱ va saa ya xáa kaꞌnu ndo Táta yo, ta táxi ndo tixaꞌvi ndaꞌa ra. 7Tá táku yo ta süvi ka ya ikan yo ya kúni mií yo kua táku yo, saa tu tá ná kuvi va yo. 8Saa chi tá táku yo ta xaꞌa Táta yo ku ya táku yo, án tá ndi̱xiꞌi yo, ta saa ni xaꞌa Tata yo ku ya kuvi yo. Yakan án táku yo án yo ndíi ku yo, ta xa ndaꞌa mií ra íyo yo. 9Jesucristo ku ra ndi̱xiꞌi ta ndi̱taku ra, xaꞌa ya ikán kua ndu̱u ra, Ra Chee, Ra Xáꞌnda chiñu nuu ndiꞌi naꞌa, na táku xiꞌin na ndíi.

10Yakan kua ná käꞌan kuachi ndo xaꞌa ñani ndo án xaꞌa kuꞌva ndo. Ni kündasi nuu ndo kuni ndo na, saa chi vaxi kivi ta kundita iku̱n ndiꞌi yo nuu Ndioxi, saa chi mií ra ku juez. 11Tá káchi tuꞌun ra, ya káchi saa:

Ya káꞌan i xiꞌin ndo ta chínaꞌa i xaꞌa mií i.

Vaxi kivi ta ndiꞌi ni kúu naꞌa sikusiti nuu i.

Saa kua kaꞌan ndiꞌi naꞌa ya kúu i Ndioxi, káchi Tata yo.

káchi ya ta̱a na xinaꞌa. 12Kuenta vaꞌa ná koo yo chi vaxi kivi, ta ndiꞌi ni kúu yo taxi kuenta ndaꞌa Ndioxi xaꞌa ya íkan yo.

13Xaꞌa ya ikán kua ná käꞌan kuachi ka yo xaꞌa na taꞌan yo. Ná kiꞌin yo kuenta xiꞌin mií yo ta ná täxi yo kakiꞌi na taꞌan yo, koyo na nuu kiꞌvi na kuachi, ta küaꞌa ka na kandixa na Ndioxi. 14Tá kúu yeꞌe, ta xíni i köo ñaꞌa xíxi yo yakua nuu Ndioxi, ya vaꞌa ku ndiꞌi ya. Ta yeꞌe ndíkun Tata yo Jesús ku i ta kúndaa vaꞌa ini i vaꞌa kuxi yo ndiꞌi ya. Sundi tá íyo naꞌa káꞌan, küvi kuxi yo sava ñaꞌa chi ya väꞌa ku ya nuu Ndioxi, káchi na, ta vaꞌa ná küxi na ya, tá tu saa ndíkani ini na. 15Saa chi tá xaꞌa ñaꞌa ya xíxi ndo kua síndiko koo ndo ini na xaꞌa ya kándixa na Jesús, ta kúni kachi ya köo kúꞌvi ini ndo xíni ndo na. Täxi ndo ndiꞌi xaꞌa naꞌa xaꞌa ñaꞌa xíxi ndo, saa chi Cristo ku ra ndi̱xiꞌi xaꞌa na. 16Vani xíni ndo ya vaꞌa kuxi ndo ku ndiꞌi nuu ñaꞌa, ta vaꞌa xäa nduxa ndo xiꞌin na kuxi na ya, ya ná känaꞌa inka naꞌa xaꞌa ndo veꞌe ñuꞌu. 17Xíniñuꞌu yo kundaa ini yo chi süvi xaꞌa ya xíxi yo, ta ni süvi xaꞌa nduta xíꞌi yo kua ndáa yaꞌvi ni chindee yoo koo yo nuu xáꞌnda chiñu Ndioxi. Ya ndee ni ndee ku ya ikan yo ya vaꞌa, ya ndaa xiꞌin taꞌan yo, ta vívií ná koo yo xiꞌin taꞌan yo, ná kusini ni yo xaꞌa ya ta̱xi Tachi I̱í Ndioxi ndaꞌa yo ya koo vaꞌa ni ini yo. 18Tá íkan ndo saa xáa chiñu ndo nuu Jesucristo, ta xáa sini ni ndo ini Ndioxi, nda naꞌa ta vaꞌa ni káꞌan na xaꞌa ndo.

19Xaꞌa ya ñaa kua ná xaꞌa ni yo ndee ya koo vií yo xiꞌin taꞌan yo, na kándixa Jesucristo. Kuꞌva saa ná ikan yo ya chindee taꞌan yo xiꞌin na taꞌan yo ya ná kuaꞌnu ka na xaꞌa ya ndíkun na Jesucristo. 20Kuenta ni koo ndo, koto ka sindiꞌi xaꞌa ndo chiñu Ndioxi xaꞌa ñaꞌa ya xíxi ndo. Ya vaꞌa ni kuxi ndo ku ndiꞌi va ya, sundi ïkan ndo ñaꞌa ya táxi koyo na taꞌan ndo nuu kuachi xaꞌa ñaꞌa ya xíxi ndo. 21Yakan kua vaꞌa ka küxi ndo kuñu ni köꞌo ndo ndixi, tá tu xaꞌa ya ñaa ku ya táxi koyo na taꞌan ndo nuu kuachi. Nda iin ñaꞌa ïkan ndo nuu na taꞌan ndo ya sindikava ya ini na ndáa ni ini na xíni na Jesucristo. 22Tá tu ndinuꞌu ni ini ndo kándixa ndo unkua vaꞌa kuxi ndo ta unkua vaꞌa koꞌo ndo nuu Ndioxi. Ta vaꞌa ni kée ndo tá tu köo xíka uvi ini ndo xaꞌa ñaꞌa íkan ndo. 23Saa ni sava na, tá köo kúndaa teꞌe ini na xaꞌa ñaꞌa xíxi na, ndíkani uvi ini na xiꞌin ya, ta saa ni xíxi na ya. Ta ndiꞌi naꞌa íkan ndá ka ñaꞌa, tá tu xíka uvi ini na xaꞌa ya íkan na, ta väꞌa chi ndíkundiso na kuachi nuu Ndioxi xaꞌa ya köo iin ndíkani ini na.

Currently Selected:

ROMANOS 14: xta

Highlight

Copy