ROMANOS 13

Ndioxi ku ra ta̱xi chiñu ndaꞌa na chiñu

1Tá kúu ndiꞌi yo ta xíniñuꞌu yo xaa súvi yo chiñu ya xáꞌnda na chiñu nuu yo. Saa chi na chiñu xiꞌin na naꞌnu ndíso chiñu xiꞌin yo, ta Ndioxi ku ra ta̱xi chiñu ndaꞌa na. 2Yakan ndiꞌi naꞌa, na káni taꞌan xiꞌin na chiñu ta nda xiꞌin Ndioxi káni taꞌan na xaꞌa ya íkan na saa, ta ndiꞌi na íkan saa ta sindoꞌo Ndioxi na. 3Na chiñu, ta süvi xaꞌa ya síꞌvi na naꞌa, na íkan ya vaꞌa kua kúu mií na chiñu. Naꞌa na íkan ya väꞌa kú na xíniñuꞌu ku ívi nuu na. Yakan ikan ndo ya vaꞌa ta ku ïꞌvi ndo nuu na, nda mií na chiñu ta kaꞌan vaꞌa na xaꞌa ndo. 4Saa chi na chiñu, ta nuu Ndioxi kua xáa chiñu na, ta íkan na saa xaꞌa mií yo. Sundi tá íkan yo ya väꞌa, ta ná ku íꞌvi yo nuu na, saa chi kúu mií na ichí ya xaa nduvaꞌa na xiꞌin yo, ta ndixa saa ikan na xiꞌin yo, xaꞌa ya väꞌa íkan yo. Na xáa chiñu nuu Ndioxi ku na, ta íyo ichí na xaa nduvaꞌa na xiꞌin naꞌa, na íkan ya väꞌa. 5Yakan kua xíniñuꞌu yo kuni soꞌo yo ya káꞌan na chiñu xiꞌin yo. Süvi xaꞌa ya íꞌvi yo nuu na xaa nduvaꞌa na xiꞌin yo kua, saa chi ya yóꞌó ku ya kúni Ndioxi, tá íkan yo saa ta íyo vaꞌa ini yo, nda ya xínituni yo ta köo táxi ya kuachi xaꞌa yo.

6Nda ni mií ndo ta kákuꞌun ndo, cháꞌvi ndo nuu na chiñu. Saa chi na xáa chiñu nuu Ndioxi ku na, yakan kúu mií na ichí kiꞌin yaꞌvi na xaꞌa chiñu íkan na, chi táxi ndiꞌi na tiempo kúu mií na xaꞌa ya síxinu na chiñu na. 7Tá tu íyo na níka ndo nuu, ta chaꞌvi ndo nuu na. Tá ndá ñaꞌa níka ndo xaꞌa nuu na chiñu, ta chaꞌvi ndo nuu na. Tá íyo naꞌa na xíniñuꞌu ndo xaa toꞌo ndo, ta vaꞌa xaa toꞌo ndo na, tá íyo na xíniñuꞌu xaa kaꞌnu ndo, ta vaꞌa xaa kaꞌnu ndo na.

8Künika ndo nuu nda iin naꞌa, ya ndee ni ndee xíniñuꞌu ndo ikan ndo ku ya kuꞌvi ni ini ndo kuni taꞌan ndo. Saa chi tá tu kúꞌvi ini yo xíni taꞌan yo, ta saa kua xáa súvi yo ley Ndioxi. 9Saa káchi ley Ndioxi, káchi ya saa: “Küvi kiꞌvi taa xiꞌin inka ñaꞌa, ni käꞌni un nda iin naꞌa, ni väꞌa sikuiꞌna un, ni küvi kutoo un ñaꞌa inka naꞌa, ni küvi kaꞌan siki un xaꞌa naꞌa”, káchi tuꞌun Ndioxi. Ta iin nuu káꞌan ya yóꞌó xiꞌin ya xa íyo inka ñaꞌñu nuu tuꞌun Ndioxi ya káchi saa: “Kuꞌvi ni ini un kuni un na taꞌan un, tá kuꞌva kúꞌvi ini un xíni un mií un”, káchi ya. 10Yakan naꞌa na kúꞌvi ni ini xíni taꞌan, ta köo xáa nduvaꞌa na xiꞌin taꞌan na, tá ndixa kúꞌvi ini yo xíni taꞌan yo, ta saa kua xáa súvi yo ley Ndioxi.

11Xíniñuꞌu ni ndo ikan ndo táꞌan ya káꞌan i xiꞌin ndo, saa chi xa síin tiempo kua ndóo yo vitin. Xa tiempo ndikáxin ini ndo ku ya, saa chi xa kama ni tindaa kivi ya ndiko koo Jesús ya sikaku ra yoo. Kama ni ka kua nuu kivi tá sikan xa̱á yo kándixa yo ra. 12Xa ñǔu ni va ku ya, ta xa kama ni va kúni tuvi. Xaꞌa ya ñaa kua ná ïkan ka yo ya väꞌa taꞌan ya íkan naꞌa, na xíka nuu naá. Ná ikan yo ya vaꞌa, ya íin tá íin naꞌa, na xíka nuu yéꞌe̱. Tá kuꞌva íyo nda lapa ndiꞌi saa kivi íyo tuꞌva nda xiꞌin ndaꞌa chiñu nda. Tá íyo nda ikán, saa xíniñuꞌu yo koo ndúvi ni yo ndiꞌi saa kivi, ya kaka ni yo nuu yéꞌe̱. 13Vívií ná koo yo, tá kuꞌva íin naꞌa, na xíka nduvi teꞌe, saa ná koo yo. Ta ná küꞌun yo nuu viko nuu xíxi náꞌna naꞌa, ta xíꞌi ni na, ni nuu kini ni káa, nuu ñúꞌu taa xiꞌin ná síꞌi. Nda iin ñaꞌñu yóꞌó köo xíniñuꞌu yo kuꞌun yo. Ná käni taꞌan yo xiꞌin nda iin naꞌa, ni ná küu uni ini yo kuni yo inka naꞌa. 14Vaꞌa ni ka kua ná ndikundixi ni yo ndee Tata yo Jesucristo. Ta ná ndïkani kíꞌvi ini yo tá kuꞌva ndíkani ini na ñuu ivi yóꞌó, chi na ikán ta ndisaa xaꞌa chiñu kíꞌvi ya kútoo ni mií ikin kuñu na kua íkan na.

Currently Selected:

ROMANOS 13: xta

Highlight

Copy