Los Hechos 27

Ti̱ꞌvi ra gobernador Festo ra Pablo kuaꞌan ra ñuu Roma

1Saa ti̱ndaa kivi ya ndi̱kaꞌan ra gobernador Festo ya tiꞌvi ra ra Pablo kuꞌun ra ñuu Roma ya ndíkaa Italia. Ta̱xi ra ra Pablo kuaꞌan ra xiꞌin inka ka nda ñúꞌu veꞌe kàà, kuaꞌan nda xiꞌin ra Julio, ra ndíso chiñu xiꞌin iin ciento nda lapa, ta tiꞌvi nda ikán náni ya batallón Augusto. 2Ta saa nda̱a nde sata iin barco tun ke̱e ñuu Adramitio ta yáꞌa nu kuaꞌan nu kuaꞌa ni ñuu ya ñúꞌu yati yuꞌu nduta ñûꞌu estado Asia. Kuaꞌan tu iin ra taꞌan nde ra náni Aristarco va xiꞌin nde, ta ra ke̱e chí ñuu Tesalónica ya ndíkaa estado Macedonia ku ra ikán. 3Tá ndi̱tuvi inka kivi ndi̱xaa nde ñuu Sidón. Ikán ku nuu i̱kan ra Julio ya vaꞌa xiꞌin ra Pablo, ta̱xi ra ndi̱xaꞌan ra xíto ra na xínitaꞌan xiꞌin ra, ta chi̱ndee ñaꞌa na ikán. 4Ndi̱ꞌi ikán ta ke̱e nde kuaꞌan nde xiꞌin barco ta ni väꞌa kuaꞌan nde chi xíka ni tachi, ta ìyo ka vi ndikava nu xiꞌin nde. Saa vaꞌa ka ndi̱kiꞌin nu kuaꞌan nu xiꞌin nde chí inka ñaꞌñu ñuꞌú íchi ndíkaa Chipre nuu köo xíka ni tachi. 5Saa ke̱e nde kuaꞌan nde, ndi̱xika nde nuu nduta ñûꞌu, ta ndi̱yaꞌa nde yati estado Cilicia xiꞌin estado Panfilia, ñaa ndi̱xaa nde ñuu Mira ya kíndoo estado Licia.

6Ñuu Mira ikán ndi̱taꞌan ra Julio iin barco tun ke̱e ñuu Alejandría ta kuaꞌan nu chí Italia, saa nda̱a nde sata nu ikán kuaꞌan nde. 7Kuekuee kuaꞌan nde, yakan naꞌá ni ndi̱xika nde, ta tuvi ndioxi ndi̱xaa nde yati ñuu Gnido. Saa xíka ka tachi ta köo ndíkuchiñu kiꞌvi nu ñuu ikán. Ñaa ndi̱kiꞌin nu inka ichí ta ndi̱yaꞌa nu nuu xíto ndaa iin ñaꞌñu ñuꞌú íchi Creta nuu köo tachi xíka ni ya xíto ndaa ñuu Salmón. 8Kuekuee kuaꞌan nde yuꞌu nduta ñûꞌu, ndo̱ꞌo ka vi ini nde saa ndi̱xaa nde iin ñaꞌñu ya káꞌan na xiꞌin Buenos Puertos, ta yati ikán ndíkaa ñuu Lasea.

9Xaꞌa ya kuekuee ni kuaꞌan nde ta saa ndi̱xinu kuaꞌa va kivi ka̱na koo nde ñuu Cesarea. Ta ìyo ni kuaꞌan nde ini nduta ñûꞌu saa chi xa ndi̱yaꞌa tu viko nuu xíxi suꞌun na judío va. Saa káꞌan ra Pablo xiꞌin nda ndíso chiñu xiꞌin tun barco ikán, 10káchi ra saa:

―Tata, túvi yeꞌe tá ná kuꞌun yo xiꞌin barco yóꞌó vitin ta ìyo ni va kuꞌun yo, nda mií nu ta ìyo ni ndiꞌi xaꞌa nu xiꞌin ndiꞌi ñaꞌa ndíso nu, ta saa tu mií va yo, ìyo ni ndiꞌi xaꞌa yo ―káchi ra xiꞌin nda.

11Ta ra Julio, ra xáꞌnda chiñu nuu nda lapa ta köo ndi̱xiin ra kuni soꞌo ra ya ndi̱kaꞌan ra Pablo xiꞌin nda. Vaꞌa ka xi̱ni soꞌo ra ya ndi̱kaꞌan mií ra xíin barco nu ikán xiꞌin ra káva nu. 12Ta köo ndi̱xiin nda ndoo nda Buenos Puertos chi väꞌa ñaꞌñu ikán ndee ni xíka tachi yoo vixin, káchi nda. Xaꞌa ya ikán kua ndi̱kani ini nda kuꞌun nda koo nda ñuu Fenice, nuu xáa barco inka ñaꞌñu Creta. Ta ñuu Fenice kua túvi xíto ndaa ya chi noroeste xiꞌin suroeste, saa íyo nuu vaꞌa kundichi tun barco yoo vixin ñuu ikán, káchi nda.

Ìyo ni kúu xíka ni tachi íꞌná ta kúni ndikava itun barco ini nduta ñûꞌu

13Saa iin ki̱vi xa̱á xíka loꞌo tachi ya ki̱xi chí sur, ñaa xa̱á kúsini nda.

Saa ndi̱xita nda kàà vee #27:13 Kàà vee ikán kua núꞌni ini nu, saa táan na ya ini tikuii tá kúni na kundichi nu. ya xi̱ñuꞌu ini tikuii, ñaa ke̱ta nu kuaꞌan nu xiꞌin nde. Maꞌñu yuꞌu nduta ñûꞌu xíka nu kuaꞌan nu ndiꞌi yuꞌu rá. 14Tá ku̱naꞌa loꞌo kuaꞌan nde nuu rá, ñaa xa̱á ndee ni xíka tachi íꞌná ya káꞌan na xiꞌin Euroclidón ndee ni xíka ya chí nuu kuaꞌan nde. 15Ñaa xa̱á síkuiko ya nu, ta köo ndi̱kuchiñu ka nde kuꞌun nde nuu ndi̱kani ini nda kuꞌun nde. Saa ndi̱ndoo nu i̱kan nda, vaꞌa ka xa̱á chíndaꞌa mií tachi nu. 16Saa ndi̱yaꞌa nde yati nuu ndíkaa inka ñuꞌú íchi loꞌo náni Clauda, ta kuee loꞌo xíka tachi ñaꞌñu ikán. Ta barco kaꞌnu, nu kuaꞌan nde xiꞌin, ñúu nu inka nu loꞌo kuaꞌan nu, saa ndi̱ndoo nu sata nde, ta ndo̱ꞌo ni nde ndi̱xika nde nu. Saa chi̱nuu nde nu sata tun chee. 17Sindiꞌi tá chi̱nuu nde nu sata tun chee, saa ka̱tun kútu nda nu chee xiꞌin yoꞌó ya ná kuchiñu koo ndee nu täꞌnu nu. Ta íꞌvi ni nda xaꞌa ya chíndaꞌa tachi itun kaꞌnu chi ìyo ni kuꞌun nu nuu yoti ya náni Sirte, ta kani ndaa nu nuu yu̱ú taꞌvi nu, káꞌán nda. Saa si̱nuu nda toto ndíchi sata nu ya ná ndïxita ni ya tachi. Ta ñaa kuekuee ndi̱kiꞌin mií nu kuaꞌan nu xiꞌin tachi xiꞌin nde. 18Ta ni köo xíin tachi xikuiin ya, yáꞌa ni ndee xíka ya. Tá ndi̱tuvi inka kivi ta vaꞌa ka xa̱á nda táva nda ñaꞌa ñúꞌu ini nu, ki̱ꞌin nda ya xa̱ta nda ini tikuii ya ná ndukama nu. 19Saa kúu ndi̱xinu uni kivi, ñaa vaꞌa ka ki̱ꞌin nde ndaꞌa chiñu ya xíniñuꞌu mií tun barco xa̱ta nde ini tikuii ya ná ndukama vaꞌa ka nu. 20Nduvi niuun xíka tachi íꞌná ta kúun savi, ni ñu̱ꞌù köo kéta ni kimi köo, iin nánaa káa. Köo ndi̱xika ka ini nde kutaku nde, kuvi ndiꞌi va nde ka̱ꞌán nde.

21Ta ku̱naꞌa ni täꞌan kuxi nde, nda loꞌo yuꞌu ñaꞌa täꞌan kaxi nde. Saa ndi̱kundichi ra Pablo xa̱á káꞌan ra xiꞌin na, káchi ra saa:

―Na taꞌan yo, xa ndi̱kaꞌan i xiꞌin ndo ya käna koo yo chí Creta. Vaꞌa ka ndi̱ndoo yo ikán nda yaꞌa tiempo vixin saa kixi yo, káchi i xiꞌin ndo. Tá ndi̱xini soꞌo ndo ya ndi̱kaꞌan i xiꞌin ndo, ta köo ya kundoꞌo yo, ni ñaꞌa ndïꞌi xaꞌa, ndikuu. 22Sundi kündiꞌi ini ndo, xaꞌa ndo ndee chi nda iin yo ndïꞌi xaꞌa, ndisaa tun barco ndiꞌi xaꞌa. 23Sundi yoo ta ndïꞌi xaꞌa yo, chi Ndioxi ra káñuꞌu i, ra xáa chiñu i nuu ta ti̱ꞌvi ra tatun ra íyo ya xiꞌin i, ñǔu ndiveꞌe, ndi̱kaꞌan ya xiꞌin i, 24káchi ya saa: “Pablo, ku ïꞌvi un chi xíniñuꞌu un kuꞌun un nuu ra rey kaꞌnu ra César ya xaa nani ra kuachi un. Xaꞌa iin yóꞌo̱ ta kee vaꞌa ndiꞌi nda kuaꞌan xiꞌin un, sikaku Ndioxi nda, küvi nda”, káchi tatun Ndioxi xiꞌin i. 25Yakan xaꞌa ndo ndee, ku ïvi ndo chi yeꞌe ta kándixa i Ndioxi ya xaa súvi ra ya ndi̱kaꞌan ra xiꞌin i. 26Sundi nduxa kani ndaa nu xiꞌin ñuꞌú íchi maꞌñu nduta ñûꞌu saa ndoo yo kundatun yo ikán ―káchi ra Pablo xiꞌin nda.

27Ñaa ndi̱xinu uvi semana ñúꞌu nde ichí ta xíka ka vi tachi íꞌná ndá yokan chíndaꞌa ya tun barco nuu nduta ñûꞌu náni Adriático. Saa ti̱ndaa kàà uxi uvi ñǔu, ta xa̱á ndíkani ini nda xáa chiñu xiꞌin tun barco xa kuaꞌan kúyati nde nuu ñuꞌú íchi, káꞌán nda. 28Xaꞌa ya ikán ta chi̱kaa nda iin yoꞌó xiꞌin iin ñaꞌa vee kaꞌa tikuii ya kundaa ini nda án kunu rá án yáxin rá. Ñaa xíto nda ta oko xaꞌun iin metro kua kunu rá. Naꞌa vaꞌa loꞌo ta tuku xíto ndoso nda rá, saa xi̱ni nda ya kunu rá oko uxa metro. 29Xaꞌa ya íꞌvi nda kuꞌun nu kani ndaa nu xiꞌin yu̱ú, chi xa kúyati nu yuꞌu tikuii, káchi nda. Ta xaꞌa ya ikán kua vaꞌa ka ta̱va nda kumi kàà ta̱an nda ini tikuii chí kaꞌá nu ya ná küꞌun ka nu. Ta ndakua kunáꞌa tuvi kúni nde. 30Saa xa̱á kúni mií nda xáa chiñu xiꞌin nu ikán kunu nda kuꞌun nda ya sikaku nda mií nda, ta xaꞌa ya ikán kua nda̱xin nda itun barco loꞌo chi̱nuu nda nuu tikuii. Ñaa xa̱á táan nda kàà chí nu̱ú itun kaꞌnu ini tikuii, káchi nda, sundi süvi ya ndaa vi kua síin ya íkan va nda. 31Ta saa xi̱ni ra Pablo unkua íkan nda ta ndi̱kaꞌan ra xiꞌin ra ndíso chiñu xiꞌin nda lapa tin mií nda lapa, káchi ra saa:

―Tá tu ná kündoꞌni ndiꞌi nda kaá ini barco yóꞌó ta küchiñu ndo kaku ndo ―káchi ra xiꞌin nda.

32Saa xa̱ꞌnda nda lapa ikán yoꞌó ya núꞌni tun barco loꞌo xiꞌin nu chee, ñaa ndi̱saña nu ndi̱kava nu ini tikuii. 33Tá xa kuaꞌan kúni tuvi, ta saa ndi̱kaꞌan ra Pablo xiꞌin nda, ya xíniñuꞌu nda kuxi nda, káchi ra xiꞌin nda:

―Chi xa ndi̱xinu uvi semana ta nda loꞌo täꞌan kusun ndo ni täꞌan kuxi ndo. 34Ta vitin xíkan i ya mani nuu ndo kuxi ndo án nda loꞌo, ta saa ndikiꞌin ndo ndee ndo, saa kuchiñu kaku ndo. Ta kündiꞌi ini ndo chi nda iin ixi xiní nda iin ndo ndäñuꞌu ―káchi ra Pablo xiꞌin nda.

35Saa ki̱ꞌin ra xita vaꞌa kuxi ra ta nuu ndiꞌi nda ta̱xi ra tixaꞌvi ndaꞌa Ndioxi, saa ta̱ꞌvi ra ya xa̱á ra xíxi ra. 36Ñaa ndu̱vaꞌa ini ndiꞌi nda, saa xa̱á tu nda ikán va xíxi nda. 37Ta ndiꞌi nde kuaꞌan ini barco ikán kúu nde uvi ciento uni xiko xaꞌun iin. 38Tá ndiꞌi xi̱xi vaꞌa ndiꞌi nde nda̱ꞌa ini nde, ñaa ki̱ꞌin nda trigo xa̱ta nda ini tikuii ya ná ndukama ka tun barco.

Ndíkava tun barco kuaꞌan nu ini tikuii

39Saa ndi̱tuvi inka kivi ta köo ndi̱kundaa ini nda xáa chiñu xiꞌin tun barco mií kua ndi̱xaa nde. Ñaa xi̱ni nda yuꞌu tikuii nuu íyo yoti, saa ndíkani ini nda sikutaꞌa nda tun barco xaa nu yuꞌu tikuii. 40Xaꞌa ya ikán kua xa̱ꞌnda nda yoꞌo ya núꞌni kàà vee ya kée ini tikuii. Saa nda̱xin nda ya núꞌni itun káva na barco, ñaa ka̱ndichi na tikoto loꞌo xiní nu ya ná kani tachi ya ta ndixita ya nu kuꞌun nu yuꞌu tikuii. 41Tá kuaꞌan barco ta saa ka̱ni ndaa nu nuu yoti ini tikuii. Xaꞌa ya ikán kua köo kúvi ka keta nu ndi̱tiin nu nuu yoti. Ta nuu ndi̱tiin nu ikán vaxi tikuii káni ndaa rá nu, ta ndee ka vi káni ndaa rá sata nu, ñaa xa̱á táꞌvi nu. 42Saa chi̱taꞌan tuꞌun nda lapa kaꞌni ndiꞌi nda nda preso kuaꞌan xiꞌin nda, chi koto ka suta nda ta kunu ndiꞌi nda kuꞌun nda káꞌán nda ikán. 43Ta köo ndi̱taxi ra xáꞌnda chiñu nuu nda ya kaꞌni ñaꞌa nda, chi ku̱ni ra sikaku ra ra Pablo. Xaꞌa ya ikán kua xa̱ꞌnda ra chiñu, káchi ra saa:

―Unku nda xíni suta ta vaꞌa ná suta nda kana koo nda yuꞌu tikuii nuu íchi. 44Ta nda köo xíni suta ta ná kiꞌin nda ñaꞌñu vitun án ñaꞌñu itun barco kundoso nda nuu nu kana koo nda ―káchi ra ndíso chiñu xiꞌin nda lapa ikán.

Saa ku̱u ta ka̱na koo ndiꞌi nde yuꞌu rá, nda iin ya köo ndi̱ndoꞌo nde.

Currently Selected:

Los Hechos 27: xta

Highlight

Copy